“Imicabango Okumele Uyigcine Emqondweni: ITabernakele noMnikelo,” Wozani, Ngilandeleni—Incwadi Yezifundo zaseKhaya naseBandleni: ITestamente eliDala 2026 (2026)
“ITabernakele kanye noMnikelo,” Wozani, Ngilandeleni: ITestamente eliDala 2026
Imicabango Okumele Uyigcine Emqondweni
ITabernakele kanye noMnikelo
Ngesikhathi sifunda iTestamente eliDala, sibuye sihlangane nezindima ezinde ezimayelana nezinto okucacile ukuthi zazibalulekile eNkosini kodwa esingaboni ukuthi zingasisiza ngani namuhla. I-Eksodusi 25–30; 35–40 kanye ILevithikhusi 1–9; 16–17 yizibonelo. Lezi zahluko zichaza kabanzi ngetabernakele labakwa-Israyeli ehlane kanye neminikelo yezilwane okwakumele yenzelwe khona. ITabernakele kwakuyithempeli eliphathekayo, indawo yokuhlala uNkulunkulu phakathi kwabantu Bakhe.
Amathempeli ethu esimanjemanje acishe afane netabernakele labakwa-Israyeli, kepha awafani ncamashi nencazelo yetabernakele eku-Eksodusi. Futhi asizibulali izilwane emathempelini ethu—iNhlawulo kaJesu Kristu yaqeda ukunikela ngezilwane cishe eminyakeni eyizi-2000 edlule. Kepha noma kukhona lomehluko, kuyasiza namuhla ukuba sifunde ngendlela yokukhonza yabakwa-Israyeli yasemandulo, ikakhulukazi uma sibabona ngendlela abantu baNkulunkulu bababona ngayo eNcwadini kaMormoni—njengendlela “yokuqinisa ukholo lwabo kuKristu” (Alima 25:16). Lapho siqonda umfanekiso wetabernakele kanye nomnikelo wezilwane, singathola ukuqonda okungokomoya okuzoqinisa ukholo lwethu kuKristu.
Sacrifice of a Lamb [Umnikelo weMvana], nguRobert T. Barrett
ITabernakele Liqinisa Ukholo kuJesu Kristu
Ngesikhathi uNkulunkulu eyala uMose ukuba akhe itabernakele kwinkambu yabakwa-Israyeli, Wayisho inhloso yalokho: “ukuba ngihlale phakathi kwabo” (I-Eksodusi 25:8). Ngaphakathi kwetabernakele, umphongolo wesivumelwano wawumele uNkulunkulu—ibhokisi lokhuni, limbozwe ngegolide, liqukethe isivumelwano esilotshiwe sikaNkulunkulu nabantu Bakhe. Umphongolo wawugcinwe egunjini elingcwele, futhi elimaphakathi kunawo wonke, lihlukaniswe yisisitho kwamanye amagumbi akwithabanakeli. Isisitho singamela ukusuka kwethu ekuphileni noNkulunkulu ngenxa yoKuwa, futhi nendlela yethu yokubuyela Kuyena—ngoMsindisi.
Ngaphandle kwaMose, sazi ngomuntu oyedwa owayekwazi ukungena kuleyo “ndawo engcwelengcwele” (I-Eksodusi 26:34)—umphristi omkhulu. Njengabanye abaphristi, kwakumele aqale agezwe futhi agcotshwe futhi agqokiswe izembatho ezingcwele ezingokomfanekiso wesikhundla sakhe. Kanye ngonyaka, ngosuku olwalubizwa ngokuthi wuSuku lweNhlawulo, umphristi omkhulu wayenza iminikelo esikhundleni sabantu ngaphambi kokuba angene yedwa kwithabanakeli. Esisithweni, wayeshisa impepho. Intuthu enephunga yayinyukela ezulwini yayimele imikhuleko yabantu inyukela kuNkulunkulu. Bese umphristi omkhulu, ephethe igazi elivela kumnikelo wesilwane, wayedlula isisitho aye esihlalweni sobukhosi sikaNkulunkulu, esasimelwe umphongolo wesivumelwano.
Ngokwazi lokho okwaziyo ngoJesu Krsitu nendima Yakhe ohlelweni lukaBaba oseZulwini, uyabona ukuthi itabernekele lisikhomba kanjani kuMsindisi na? Njengoba itabernekele, nomphongolo ngaphakathi kwalo, kwakumele ukuba khona kwaNkulunkulu ebantwini Bakhe, uJesu Kristu wayemele ukuba khona kwaNkulunkulu ebantwini Bakhe. Njengomphristi omkhulu, uJesu Kristu ungumLamuleli phakathi kwethu noBaba uNkulunkulu. Wadlula esisithweni ukusilamulela ngegazi Lakhe lomnikelo Wakhe.
Okunye okumayelana netabernakele labakwa-Israyeli kungezwakala kukhumbuleka kuwena, ikakhulukazi uma usuyile ethempelini ukuyothola izimiso zakho. Ithempeli liyindlu yeNkosi—indawo Yakhe yokuhlala phakathi kwabantu Bakhe. Njengendawo engcwelengcwele yetabernakele, igumbi lesilestiyali ethempelini limele ukuba khona kwaNkulunkulu. Ukuze singene, kumele siqale sigezwe bese siyagcotshwa. Sigqoka izembatho ezingcwele. Senza izivumelwano. Siyakhuleka kwi-althare lapho imikhuleko yethu ikhuphukela kuNkulunkulu. Bese ekugcineni sidlula isisitho ukuyongena lapho kukhona uNkulunkulu.
Mhlawumbe okubalulekile kakhulu okufanayo phakathi kwamathempeli amanje netabernakele lasemandulo ukuthi kokubili, uma kuqondisiswa ngendlela efanele, kuqinisa ukholo lwethu kuJesu Kristu futhi kusigcwalisa ngokubonga ngomnikelo Wakhe wenhlawulo. UNkulunkulu ufuna bonke abantwana Bakhe bangene babe phambi kwakhe ; Ufuna “umbuso wabaphristi” nabaphristikazi (I-Eksodusi 19:6). Kepha izono zethu ziyasivimba ekutholeni leso sibusiso, ngoba “akukho nto engcolile engahlala noNkulunkulu” (1 Nefi 10:21). Ngakho-ke uNkulunkulu wathumela uJesu Kristu, “umphristi [wethu] omkhulu wezinto ezinhle ezizayo” (KumaHebheru 9:11). Usigudluzela isisitho futhi anikeze amandla kubo bonke abantu baNkulunkulu ukuba “[ba]sondele ngesibindi esihlalweni somusa ukuba samukeliswe isihawu” (KumaHebheru 4:16).
Namuhla, inhloso yethempeli inkulu kunokuba sizitholele ukuphakanyiswa. Emuva kokuba sithole izimiso zethu nokwenza izivumelwano noNkulunkulu, singama esikhundleni sabangasekho bethu samukele izimiso ezikhundleni zabo. Ngandlela thizeni, singaba okucishe kufane nomphristi omkhulu wasemandulo—nomPhristi oMkhulu Kakhulu—sivulele abanye indlela eya kuNkulunkulu.
Umnikelo Uqinisa Ukholo kuJesu Kristu
Imigomo yenhlawulo nokubuyisana ifundiswa ngendlela enamandla osikweni lasendulo lokunikela ngesilwane, okwakwenziwa isikhathi eside ngaphambi komthetho kaMose. U-Adamu no-Eva banikela ngeminikelo. Bayiqonda inkomba okungokomfanekiso womnikelo woMsindisi. Futhi bafundisa izingane zabo ngalokhu.
Lokhu okumelwe umnikelo wesilwane kwakungabukeka kudumaza ngoSuku lweNhlawulo labakwa-Israyeli (“Yom Kippur” ngesiHeberu). Isidingo salomcimbi owawuba njalo ngonyaka sichaziwe kuLevithikhusi 16:30: “Ngokuba ngalolo suku umphristi uyonenzela inhlawulo, anihlambulule ukuze nibemsulwa ezonweni zenu zonke phambi kweNkosi.” Lokhu kuvumela ukuba khona kukaNkulunkulu ukuba ahlale phakathi kwabo. Lenhlawulo yafezwa ngemicimbi ehlukahlukene. Kowodwa umcimbi, imbuzi yayibulawa njengomnikelo wezono zabantu, futhi umphristi omkhulu athathe igazi lempongo aliyise endaweni engcwele kunazo zonke. Ngokudlula kwesikhathi, umphristi omkhulu wayebeka izandla zakhe phezu kwembuzi ephilayo bese evuma izono zabantu bakwa-Israyeli—enze lokhu ukukhombisa ukuthi lezo zono zidluliselwa empongweni. Bese imbuzi yayikhishwa kwiNkambu yabakwa-Israyeli.
Kulolusiko, izimbuzi zazimele uJesu Kristu, ethatha isikhundla sabantu abonile. Isono akumele sivunyelwe lapho kukhona uNkulunkulu. Kepha, kunokuthi abhubhise noma axoshe abonile, uNkulunkulu wanikeza enye indlela—kunalokho impongo yayizobulawa noma ixoshwe. “Impongo iyothwala ububi babo bonke” (ILevithikhusi 16:22).
Lamasiko ayekhombisa indlela uNkulunkulu ayinikezile ukusibuyisa kuYena—uJesu Kristu neNhlawulo Yakhe. UMsindisi “uthwale izifo zethu, wabetshatha ubuhlungu bethu,” ngisho “ububi bethu sonke” (U-Izaya 53:4, 6). Wama endaweni yethu, wanikela ngempilo Yakhe ukukhokhela inhlawulo yesono, bese wanqoba ukufa ngoVuko Lwakhe. Umnikelo waJesu Kristu “[wawung]umnikelo omkhulu nowokugcina; yebo, hhayi umnikelo womuntu, noma wesilwane” kepha “umnikelo ongenakuphela futhi waphakade” (Alima 34:10). Wayengukufezeka kwakho konke lokho iminikelo yasemandulo yayikukhomba.
Ngalesi sizathu, emuva kokuba umnikelo Wakhe usugcwalisekile, Wathi, “Ningabe nisaletha kimi nanini ukuchithwa kwegazi; yebo, imihlatshelo yenu … iyoyekwa. … Futhi niyonikela umnikelo kimi wenhliziyo edabukileyo kanye nomphefumulo ophukileyo” (3 Nefi 9:19–20).
Ngakho-ke, uma uthola imibhalo kwiTestamente Elidala emayelana neminikelo netabernakele (noma ngokuhamba kwesikhathi, emayelana nethempeli)—futhi uzothola eminingi—khumbula ukuthi inhloso eyisisekelo yakho konke ukuqinisa ukholo lwakho kuMesiya, uJesu Kristu. Xhumanisa lokho okufundayo kanye nokukhonza kwakho endlini Yakhe. Yekelela inhliziyo kanye nengqondo yakho ibheke Kuye. Cabanga ngalokho akwenzile ukukubuyisela kuNkulunkulu—nalokho ozokwenza ukuze umlandele.