Impwal Sarawio oh Tohnmetei

Ni ansou me Koht ketin kehkehlikiong Moses en kauwada ehu impwal sarawi nan kamp en mehn Israel kan, E ketin kasaledahr kahrepehu: “pwe I en kin koukousoan nanpwungarail” (Eksodus 25:8). Nan impwal Sarawio, kopwahn inouo wia kasalepen kepitien Koht— koakon tuhke ieu, pweipweikihdi kohl, me rekohd en sapwellimen Koht inou ong Sapwellime aramas mih loale. Kohpwahn inouo kin mihmi wasa keiou sarawi, pere keiou mas loale, me tohrohrsang soahng koaros nan impwalo sang kahdeng ehu. Kahdengo kak wia kilelepen atail tohrohrsang Koht pwehki Pwupwilaho, oh pil atail ahl pwuralahng Reh—sang atail Sounkomouro.

Palahsang Moses, kitail ese emente aramas me kak pidelong wasa “me keiou sarawio” (Eksodus 26:34)—samworo lapalapo. Duwehte samworo teikan, keiou e anahne wideud oh keidi oh likawihada likou sarawi me wia kilelepen ah pwukoah. Pak ehu nan ehu pahr, ni Rahn ehu me kahdaniki Rahn en Tomwpen Dihpo, samworo lapalapo pahn kihda meiroangkan me wiawi ong aramas akan mwohn pidelongehng nan impwal Sarawio kelehpw. Ni kahdengo, e pahn isik warpwohmwahu. Ediniei pwohmwahu me kohkohda nanleng wia kasalepen kapakap kan en aramas me kohkohdalahng rehn Koht. Eri samworo lapalapo, me wouwa nta sang ehu meiroangen mahn, pahn alu daulihala kahdengo oh kolahng ni mwoalen Koht, me kopwahn inouo wia weliepe.

Ni ahmw ese dahme ke ese duwen Sises Krais oh Sapwellime pwukoah nan en Sahm Nanleng pilahn, ke kak kilang ia mwomwen impwal Sarawio ah idihong kitail ong Sounkomouro? Duwehte impwal Sarawio, oh kohpwa me mih loalehu, me weliandi kepitien Koht nanpwungen Sapwellime aramas akan, Sises Krais iei kepitien Koht nanpwungen Sapwellime aramas akan. Duwehte samworo lapalapo, Sises Krais me kin kadokepene nanpwungen kitail oh Koht Sahm. E dauliher nan kahdengo pwe en wia weliapatail sang kamwahupen Sapwellime nta me tohnmeteiki pwehki kitail.

Ekei pali kan en impwal sarawi en Israelo kak mwomwen dehde ong uhk, mehlel ma ke kolahr ni tehnpas sarawi pwe ken alehdi pein ahmw tiahk sarawi kan. Tehnpas Sarawi iei tehnpesen Kauno—wasa E kin ketiket Ie nanpwungen Sapwellime aramas akan. Me duwehte en impwal Sarawio wasa keiou kesempwal, perehn selesdiel nan tehnpas sarawi wia weliepen kepitien Koht. Pwe kitail en pidelong, keiou kitail anahne en wideudehr oh keidier. Kitail kin likawih likou sarawi. Kitail kin wiahda inou sarawi kan. Kitail kin kapakap ni pehi ieu wasa me kapakap kan kin kohdalahng Koht. Oh kitail eri alu nan kahdeng ehu kolahng nan kepitien Koht

Mwein me duwepene me keiou kesempwal nanpwungen tehnpas sarawi en met oh impwal sarawi en kawaho iei me ira koaros, ma kitail wehwehki ni pwung, kin kakehlaka atail pwoson Sises Krais oh audehkin kitail kaping pwehki Sapwellime tomw en tohnmeteio. Koht ketin kupwuriki Sapwellime seri kan koaros en pidelongehng Reh, E ketin kupwuriki “wehi ehu me pahn papah Ie duwen samworo, pwinen aramas ehu me kasarawihong iehte (Eksodus 19:6). Ahpw dipatail kan perehsang kitail en alehdi kapai wo, pwe “sohte mehkot samin kak mihmi rehn Koht” (1 Nihpai 10:21). Eri Koht Sahm kadaralahr Sises Krais, atail “samworo lapalap en kapai koaros me pahn kohdo” (Ipru 9:11). E kin kihpeseng kahdengo ong kitail oh kakehlaka koaros sapwellimen Koht aramas en “kitail eimah oh keiong mpen mwoalen Koht, wasahn ale kalahngan” (Ipru 4:16).

Rahnwet, kahrepen tehnpas sarawi kan laudsang alehdi kesepwildahn mour ong pein kitail. Mwurin alehdi pein atail tiahk sarawi kan oh wiahda inou sarawi kna ong Koht, kitail kak weliandi atail keinek kan oh alehdi tiahk sarawi kan ong irail. Ni mwohmw ehu, kitail kak duwehla samworo lapalap en kawaho—oh Samworo Lapalapo— ritiritingadahng ahlo kolahng rehn Koht ong mehteikan.

Padahk kan en tomwpen dihp oh kapwurpwurpenehu padahngkiher ni kehlail ni kawaho ni meiroang en mahn, me miehier mwohn kosonned en Moses. Adam oh Ihp wiadahr meiroang. Irail wehwehki kilelepeho me kosoia sapwellimen Sounkomouro tohnmeteio. Oh ira padahkihong met ong neira seri kan.

Kilel en meiroang en mahn kakete mwomwen kansensuwed ong en Israel en kawaho Rahn en Tomwpen Dihpo (“Yom Kippur”ni Ipru) Anahn ong kasarawi en pahr koaroso sansaladahr nan Lipai 16:30:“Ni rahno samworohu pahn wia tomwpen dihp ong uhk, pwe en kamwakelei iukadahr, pwe ken kak mwakaelekeldahsang dipomw koaros mwohn Kauno.” Met mweidada kepitien Koht en mihmihte nanpwungen aramas akan. Tomwpen dihpo pweidahr sang soangesoangen kasarawi kei. Nan ehu Mepwukat, emen kuht kamakamala en wia meiroangen dipen aramas akan, oh samworo lapalapo wahlahng ntahn kuhto ong nan wasa keiou sarawi. Mwuhr, samworo lapalapo kihdiong pehkoa pohn kouto momour men oh wehkadahr dipen seri en Israel kan—kasakasau dihp koa ong kouto. Kouto eri pwekpweksang Nan kamp en Israelo.

Nan kasarawi pwukat, kout kan wia kilelepen Sises Krais, me ale dowen aramas dipan akan. Dihp sohte kak mweimweida nan kepitien Koht. Ahpw kaidehn en Kamwomwala de pwakih iei me dipan akan, Koht ketin kaunopadahr ehu ahl—emen kout me pahn kamakamala de pwekpweksang wasahu. “Eri dipen aramas koaros pahn iang kuhto kolahng Nan sahpw ehu me sohte towe ”Lipai 16:22).

Kasarawi pwukat idihadahr ahlo me Koht ketkidahr pwe en waikitail pwuralahng Reh—Sises Krais oh Sapwellime Tomwpen Dihp. Sounkomouro “Aiseia 53:4, 6). E ketin wekiankitaildi, ketkihda Ah mour pwe en pwainla pweinen dihp, oh eri powehdier mehla sang Sapwellime Iasadaho. Tohnmetei en SIses Krais wia “ehu me pahn keimwisekla meirong koaros; ei, kaidehn meirong en aramas ehu, de pil mahn,” Alma 34:10). Ih me kapwaiadahr soahng koaros me meiroang en kawaho idilahngehr.

Ong kahrepe wet, mwurin Sapwellime tohnmeteio ah imwiseklahr, E mahsaniher, “Kumwail pahn uhdisang wia meirong en kakerehdi nta; ei, amwail meirong kan …pahn uhdier. … “Kumwail pahn tounmetei kihong ie meiroang en mohngiong karakarahk oh ngehn peik ehu” (3 Nihpai 9:19–20).

Eri ansou ke diar iren pwuhk sarawi kan Nan Kadehde Mering duwen meiroangkan oh impwal Sarawio (de, mwuhr, tehnpas sarawio)—oh ke pahn diar me tohto—tamataman me kahrepe keiou ong koaros iei en kakehlaka amwail pwoson rehn Masaiaho, Sises Krais. Kihpene dahme ke wadek oh esehla ong ahmw kaudek Nan Sapwellime tehnpas. Mweidohng ahmw mohngiong oh lamalam en sohpeilahng Ih. Medewe mwahu E wiahier pwe en waiukodo rehn Koht—oh dahme ke pahn wia pwe ken Idawehn Ih.