“Ļōmņak ko n̄an Keememeji: M̧ōn Kōppād im Katok,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“M̧weo mōn Kōppād im Katok,” Itok, Ļoor Eō: Kalim̧m̧ur M̧okta 2026
Ļōmņak ko n̄an Keememeji
M̧ōn Kōppād im Katok
Ilo ad riiti Kalim̧m̧ur M̧okta, jej jet iien lo naan ko raitok kōn men ko me rekar lukkuun alikkar aer aorōk n̄an Irooj ak emaron̄ jab mennin aorōk n̄an kōj rainin. Exodus 25–30; 35–40 im Livitikos 1–9; 16–17 rej waanjon̄ak ko. Jepta kein rej kōmeļeļeik ilo lukkun dipdikier ilo mōn kōppād in ilo āne jam̧den im katok kōn menin mour n̄an kōm̧m̧ane ijeņ. M̧ōn Kōppād eo ekar juon tampeļ eo me remaron̄ tūm̧wi im bar kōļaake, jikin kōppād eo an Irooj ilubwiljin armej ro An.
Tampeļ ko raan kein rej kwaļo̧k kōn m̧ōn kōppād ko an Israel, ak rejjab lukkuun jejjet n̄an kōmeļeļe ko an ilo Exodus. Im jejjab m̧anm̧an menin mour ilo tampeļ ko ad—Pinmuur eo an Rilo̧mo̧o̧r ekar jem̧ļo̧kin katok kōn menin mour elōn̄ļo̧k jān 2,000 iiō ko rem̧ootļo̧k. Ijoke jekdoon eoktak kein, ewōr juon aorōkin rainin kōn ad riiti wāween kabun̄jar ko an ri Israel etto, eļaptata n̄e jej kalimjōk er āinwōt armej ro an Anij ilo Bok in Mormon— wāween in “n̄an kōkajoorļo̧k aer tōmak ilo Kraist” (Alma 25:16). n̄e jej meļeļe kakōļļe ko an m̧ōn kōppad im kotak kōn mennin mour, jemaron̄ bōk ļōmņak in jetōb ko me rej bar kōkajoor tōmak eo ad ilo Kraist.
Katok ko̧n Lamb, jān Robert T. Barrett
M̧ōn Kōppād eo ej Kōkajoorļo̧k Tōmak ilo Jisōs Kraist
Ke Anij ekar kakien Moses n̄an kalōk m̧ōn kōppād eo ilo kāām eo an ri Israel ro, E ekar ba unin: “bwe In jokwe ippāer” (Exodus 25:8). Ilowaan m̧ōn kōppād eo, an Anij pād kar bōk jikin kōn tōptōp in bujen eo—juon bo̧o̧k kōm̧m̧an jān aļaļ, kabarin kōm̧m̧an jān gold, ime ej pād ie rekoot ko em̧ōj jei ippān armej ro An. Tōptōp eo kar kakoņe ilo juon ruum elukkuun ekwojarjar im epād ilowa, ejeņoļo̧k jān aolepān m̧ōn kōppād eo kōn juon nuknuk ran̄ōl. Rōn̄ōl in ej kakōļļeik ad jepelļo̧k jān im̧aan Anij kon Wōtlo̧k eo, barāinwōt iaļ eo ad n̄an Ippan—kōn Rilo̧mo̧o̧r eo.
Ijjeļo̧kin Moses, jejeļā kōn juon wōt armej eo emaron̄ deļon̄e “jikin kwōjarjar otem kwōjarjar” (Exodus 26:34pris eo eutiej. Āinwōt pris ro jet, e ear aikuj in mokta ekapit im nuknuk kōn nuknuk kwojarjar ko me rej kakōļļeik jerbal eo an. Juon kōttan ilo juon iiō, ilo juon raan eo em̧ōj ņa etan Raan in Pinmuur, pris eo eutiej emaron̄ kōm̧m̧an katok ilo etan armej ro m̧okta jān an deļon̄ ilo m̧ōn kōppād eo. Ilo rōn̄ōl eo, e naaj ittil kein kanemnem. Baat eo en̄aaj walōn̄ļo̧k n̄an lan̄ ej bōk jikin jar ko an armej ro me rej walōn̄ļo̧k n̄an ippān Anij. Innem pris eo eutiej, ej bōk bōtōktōk jān katok eo an menin mour, enaaj dōbļo̧ke nuknuk ran̄ōl eo im kwaļo̧k tūro̧o̧n an Anij, kar kōkaļļe kōn tōptōp in bujen eo.
Ilo ad jeļā ta eo kwoj jeļā kōn Jisōs Kraist im eddo eo An ilo karōk eo an Jemedwōj Ilan̄, kwomaron̄ lo wāween an M̧ōn Kōppād eo jitōn̄ļo̧k kōj n̄an Rilo̧mo̧o̧r? Āinwōt m̧ōn kōppād eo, im ilowaan tōptōp eo, ej bōk jikin an Anij pād ilubwiljin armej ro An, Jisōs Kraist ekar bōk jikin an Anij pād ilubwiljin armej ro An. Āinwōt pris eo eutiej, Jisōs Kraist ej kōtaad im Anij Jemād. E ekar dōbļo̧ke nuknuk ran̄ōl eo n̄an kōm̧m̧an kōtaad kōn erreo in bōtōktōk in katok eo An make.
Jet m̧ōttan m̧ōn kōppād eo an Israel remaron̄ kar m̧ōj am̧ ron̄, eļaptata eļan̄n̄e em̧ōj am̧ kar etal n̄an tampeļ n̄an bōk kain̄i ko am̧ make. Tampeļ eo ej m̧weeo im̧ōn Irooj—jikin kōppād eo An ibwiljen armej ro An. Āinwōt jikin eo eļap an ekwojarjar ilo m̧ōn kōppād eo, celestial ruum eo ilo tampeļ ej bōk jikin Ijo jikin Anij. N̄an deļo̧n̄e, rej aikuj m̧okta kwaļ im kapit kōj. Jej ekkanōk nuknuk ko rekwojarjar. Jej kōm̧m̧an bujen. Jej jar ilo turin juon lokatok ijo jar ko rej walōn̄ļo̧k n̄an Anij. Im jej dōbļo̧ke juon nuknuk rōn̄ōl ilo ijo jikin Anij.
Bolen aorōk eo ikōtaan tampeļ eo an etto im raan kein ej,, eļan̄n̄e ejim̧we ad meļeļe, kōkajoorļo̧k tōmak ko ad ilo Jisōs Kraist im kobrak kōj kōn kam̧m̧oolol kōn Pinmuur eo An. Anij ekōņaan bwe aolep ajri ro Nejin ren deļon̄e ijo Jikin; E ekōņaan “juon aelōn̄ in pris ro” im kōrā ro me rej pris (Exodus 19:6). Ak jerawiwi ko ad rej bōbraeik kōj jān kōjeraam̧m̧an eo, bwe “ejjeļo̧k juon men ettoon emaron̄ pād ippān Anij” (1 Nipai 10:21). Kōn men in Anij ekar jilkinļo̧k Jisōs Kraist, ad “Pris eļap n̄an men ko rem̧m̧an renaaj itok” (Hibru 9:11). Ekar kekōl nuknuk ran̄ōl eo im kōkajoorļo̧k aolep armej ro an Anij n̄an “kepaak n̄an tūroon in jouj, bwe jen bōk tūriam̧okake” (Hibru 4:16).
Rainin, un ko na tampeļ eļapļo̧k jān bōk mour ijo eutiejtata n̄an kōj make. Ālkin ad bōk kain̄i ko ad make, jej jutak ilo etan ro jibūd im jim̧aad, bōk kain̄i ko ilo etaer. Ilo juon wāween, jemaron̄ erom̧ āinwōt pris eo eutiej etto—im Pris eo Eļap im Eutiej—kōpelļo̧k iaļ eo n̄an ippān Anij n̄an ro jet.
Katok ej Kōkajoorļo̧k Tōmak ilo Jisōs Kraist
Pedped in pinmuur eo im kajim̧we rej katakin ilo kajoor iminene eo etto ikkijeen katok kōn menin mour ko, eo me ekar waļo̧k etto m̧okta jān kien eo an Moses. Adam im Eve leļo̧k katok ko aer Remeļeļe kakōļļein kalikkar ko kōn en̄taan eo an Rilo̧mo̧o̧r. Im raar katakin ajri ro nejier men in.
Kōkaļļein katok an menin mour emaron̄ kaburom̧ōjm̧ōj ilo Raan in Pinmuur an Israel eo etto (“Yom Kippur” in Hebrew). Aikuj eo ilo iien jar an iiō in ilo Livitikōs 16:30: “Ilo raan eo renaaj kōm̧m̧an kōllaajrak n̄an kom̧, im karreoik kom̧ jān jerawiwi otemjej ami, kom̧ naaj erreo im̧aan Irooj.” Men in ekōtļo̧k an Anij pād emaron̄ pād wōt ilubwiljin armej ro. Pinmuur in ekar dedeļo̧k kōn juon iien jar ilo elōn̄ wāween ko. Ilo juon iaan men kein, rekar m̧an juon goat āinwōt juon menin joortak kōn jerawiwi ko an armej ro, im pris eo eutiej ekar bōk bōtōktōk in goal eo ilo jikin eo ekwojarjar otem ekwojarjar. Tokālik, pris eo eutiej ekar likūt pein ioon goat eo emour im kwaļo̧k jerawiwi ko an ajri ro nejin Israel—kōkaļļein bōk jerawiwi ko n̄an goat eo. Innem ekar kadiwōjļo̧k ko̧o̧t eo (goat) jān kāām eo an Israel.
Ilo iien jar in ekwojarjar, goat ko rekar kōkaļļein Jisōs Kraist, bōk jikin armej ro rejerawiwi. Jerawiwi ko rejjab maron̄ deļo̧n̄e ijo Anij ej pād ie. Ak ijjeļo̧kin kakkure ak jutokļo̧k rijerawiwi ro, Anij ekar bar leļo̧k juon wāween—naaj m̧an juon ko̧o̧t (goat) ak joļo̧ke. “Im ko̧o̧t (goat) eo enaaj inekļo̧k jero̧wiwi ko aer otemjej” (Livitikōs 16:22).
Kōkaļļein iien jar kein rekwojarjar ej kalikkar wāween an Anij ekar letok bwe jen maron̄ bar roolļo̧k n̄an Ippān—Jisōs Kraist im Pinmuur eo An. Rilo̧mo̧o̧r ekar “ineek en̄taan ko ad, im bōkļo̧k būrom̧ōj ko ad,” em̧ool “jerawiwi ko ad otemjej” (Aiseia 53:4, 6 E ekar jutak ilo jikin ko ad, ekar leļo̧k mour eo An n̄an kōļļā wōņāān jerawiwi, innem ekar anjo̧ ioon mej kōn An Jerkakpeje. Katok eo an Jisōs Kraist ekar “katok eļap im āliktata; aaet, jab juon katok an armej, im jab kōn mennin mour ko” ak ijjeļo̧kin “juon katok indeeo im ejjeļo̧k jem̧ļo̧kin” (Alma 34:10). E eo kar kūrm̧ool in men otemjej me katak ko etto rekar jitļo̧k n̄an e.
Kōn un in, ālkin katok eo An ekar dedeļo̧k, E ekar ba, “Im kom̧ naaj jab ajetok n̄an Eō kōto̧o̧rļo̧k bōtōktōk; aaet, katok ko ami … naaj kōjjem̧ļo̧k i. … Im kom̧ naaj ajetok āinwōt juon katok n̄an Eō bōro e rup im jetōb ettā” (3 Nipai 9:19–20).
Kōn menin kwomaron̄ lo eoon ko ilo Kallim̧ur M̧okta kōn katok ko im m̧ōn kōppād eo (ak tokālik, tampeļ eo)—im kwonaaj lo aolepeer—keememej bwe un ko m̧oktata an aolep ej n̄an kōkajoorļo̧k tōmak eo am̧ ilo Messaia, Jisōs Kraist. Ekkeijel ta eo kwoj riit im ekkatat ippān kabun̄jar eo am̧ im̧weo Im̧ōn. Kōtļo̧k bwe buruōm̧ im kōļmenļo̧kjeņ eo am̧ en n̄an E. Kejo̧kļo̧kjeņ kōn ta eo E ekar kōm̧m̧ane n̄an kōjepļaakļo̧k eo n̄an im̧aan mejān Anij—im ta eo kwonaaj kōm̧m̧ane n̄an ļoor E.