Bōnbōn 11–14; 20–24; 27

Ilo Bōnbōn 11:11–17, 24–29, kile bwe būrabļōm eo Moses ekar jelm̧ae im uwaak eo Anij ekar kwaļo̧k. Ta eo am ļōmņak kōn meļeļe eo an Moses ke ekar ba ekōņaan bwe “aolep armej rein otemjej rej an Irooj ri kanaan”? (eoon 29). Ilo am̧ kejōkļo̧kjen kōn kajjitōk in, lale uwaak ko ilo enaan eo an Būreejtōn Russell M. Nelson “Revelesōn n̄an Kabun̄ eo, Revelesōn n̄an Mour ko Ad” (Liaona, May 2018, 93–96).

Ejba emaron̄ lōn̄ ad aolep revelesōn, ijoke, ejjab meļeļein bwe kōj aolep maron̄ tōl armej ro an Anij āinwōt kar Moses. Iien ko rekooti ilo Bōnbōn 12 kalikkar menin. Ta kakōlkōl ko kwoj loi ilo jepta in? Ta eo kwoj en̄jake Irooj ej kōņaan bwe kwōn meļeļe kōn revelesōn an juon make im ļoor rikanaan eo?

Bar lale 1 Nipai 10:17; Katak im Bujen Ko 28:1–7; Dallin H. Oaks, “Two Lines of Communication,” Liahona, Nov. 2010, 83–86.

Jet armej rej ilbōk n̄an jeļā ke Moses, juon ritōl ekajoor ear jutak im̧aan Pera im jerbali kabwilōn̄lōn̄ ko kōn kajoor eo an Irooj, juon eo ear “kanooj ineem̧m̧an” (Bōnbōn 12:3). Ta meļeļe in ineem̧m̧an? Ļōmņak in ekkatak kōmeļeļe eo an Elder David A. Bednar ilo “Ineem̧m̧an im Ettā Bōro” (Liaona, May 2018, 30–33) or “Ineem̧m̧an, Rittā Bōro” ilo Unin Tōl eo n̄an Jeje Ko Rekwōjarjar (Gospel Ļaibrāry).

Ta ko kwoj ekkatak jān waanjon̄ak in ineem̧m̧an eo an Moses ilo Exodus 18:13–25; Bōnbōn 11:26–29; Bōnbōn 12; Hibru 11:24–27; im Moses 1:10–11? Komaron̄ bar lin̄ūri wāween nan Rilo̧mo̧o̧r kwaļo̧k ineem̧m̧an (lale Matu 11:29; 27:11–14; Luk 22:41–42; Jon 13:4–5). Ta eo waanjon̄ak kein rej katakin eok?

Ilo am̧ riiti Bōnbōn 13–14, kajjieon̄ n̄an likūt eok make āinwōt en̄jake ko an Riisrael ro. Etke kwoj ļōmņak rekar kōņaan “jepļaak n̄an Ijipt” (Bōnbōn 14:3). Ewi wāween am̧ kōmeļeļeik “jetōb” eo juon me ekar pād ippān Caleb (Bōnbōn 14:24). Ta eo ej im̧we eok kōn tōmak eo an Caleb im Joshua, im ewi wāween am̧ maron̄ mour kōn waanjon̄ak kein n̄an jekjek ko kwoj jelm̧aeiki?

Rikanaan ro ilo Bok in Mormon ekar jeļā bwe bwebwenato ko kar rekooti ilo Numbers 21:4–9 im kar meļeļe kōn aorōk ko an jetōb. Riit katak ko aer kōn bwebwenato in ilo 1 Nipai 17:40–41; Alma 33:18–22; im Hilam̧ōn 8:13–15. Erkein rej jet kajjitōk ko kwomaron̄ jino kaki:

• Ta eo jedpānit brass eo ej pinej jenkwan?

• Ta eo ikkūn in jineik eo ej pinej jenkwan?

• Riisrael ro rekar aikuj “[lo] juon jedpānit jān bronze” (Bōnbōn 21:9n̄an bōk kōmour. Etke kwoj ļōmņak armej raar makoko in kalimjōk? Elōn̄ ke men āinwōt men in ear waļo̧k n̄an kwe?

• Ta eo kwoj en̄jake ej im̧we n̄an kōm̧m̧ane bwe en ļapļo̧k am̧ “reilo̧k n̄an eo Nejin Anij kōn tōmak” im bōk kōmour? (Hilamōn 8:15).

Riit eoon kein remaron̄ kakeemej eok kōn jet iien ilo jeje ko rekwojarjar me armej raar aikuj in mije wōt Kraist. N̄an waanjon̄ak, keidi enaan eo an Bōnbōn 21:4–9 ippān Matu 14:25–31 im 1 Nephi 8:24–28 (bar lale pija ko ilo jem̧ļo̧k in unin tōl eo an wiik in). Ta eo ej kōttoļo̧k kōj jān Kraist? Ewi wāween An kōjeraam̧m̧an armej ro rej pād wōt im mije E?

Bar lale “Jesus, the Very Thought of Thee” (Hymns, no. 141).

Ke Balak, kiin̄ eo an Moab, kar ekkatak bwe Riisrael ro rekar kajjieon̄ tōpare, ekar kūr Balaam, juon em̧m̧aan eo etijem̧ļo̧k ilo leļo̧k kōjeraam̧m̧an im kaje ko. Balak eaar kōņaan bwe E en kaje ri Israel ro. Lale wāween an Balak kar kajjieon̄ kadeell Balaam (lale Bōnbōn 22:5–7, 15–17), im ļōmņak kōn kapo ko me kwoj jelm̧aeiki me ej jum̧ae ankilaan Anij. Ta im̧we ko kwoj en̄jake kōn uwaak ko an Balaam ilo Bōnbōn 22:18, 38; 23:8, 12, 26; 24:13? Būrom̧ōj eo, ilo kalimjōke āliktata Balaam ekar illu im liakeļo̧k (lale Bōnbōn 31:16; Jud 1:11). Kejōkļo̧kjeņ kōn wāween am̧ maron̄ pād wōt ilo tōmak n̄an Irooj jekdo̧o̧n illu kōn ro jet.

• Kajjitōk n̄e ajri ro nejum̧ rej keememej jet iaan kabwilōn̄lōn̄ ko Irooj ear kōm̧m̧ani n̄an jipan̄ ri Israel ro (lale “Nan̄inmej ko ilo Ijipt” im “Kwojkwoj in Kijone eo” ilo Bwebwenato ko jān Kallim̧ur M̧okta, 67–74). Innām kwomaron̄ kōkaduuk n̄an er Bōnbōn 11:4–10, kalikkar bwe ri Israel ro raar melo̧kļo̧k kōjeraam̧m̧an ko aer im raar elotaan. Ta kōjeraam̧m̧an ko jej meļo̧kļo̧k jet iien?

• Ilo am̧ al ak ron̄jake juon al kōn kam̧m̧oolol, āinwōt “N̄e Kwoj Ion Buktak Ko An Mour In” (Al Ko Al In Ajri, no. 6), ajri ro nejum̧ remaron̄ jin̄aik kōjeraam̧m̧an ko Irooj ear leļo̧k n̄an er.

• N̄an kwaļo̧k kadkad in Bōnbōn 12, komaron̄ jiron̄ ajri ro nejum̧ ke Irooj ear jab m̧ōņōņō ippān Arōn im Miriam, būratōr im sister an Moses. Kajjitōk ippāer n̄an riiti Bōnbōn 12:1–8 n̄an lale ta unin. Ļōmņak in kōjerbal Bok In Gospel Pija n̄an jipan̄ ajri ro nejum̧ pukot waanjon̄ak in armej ro ilo jeje ko rekwojarjar me rej kautiej rikanaan ro an Irooj im rekar jeraam̧m̧an. Elmen ad jeraam̧m̧an n̄e jej ļoor rikanaan an Irooj?

• Ļōmņak in kōjerbal “Moses im Jedpānit Brass eo” ilo Bwebwenato ko jān Kallim̧ur M̧okta, 83–84, n̄an jipan̄ ajri ro lale ta eo eaar waļo̧k ilo Bōnbōn 21:6–9. Elmen an jedpānit brass eo āinwōt Jisōs Kraist (lale Jon 3:14–15). Ajri ro remaron̄ m̧ōņōņō in kōm̧m̧ane juon jedpānit jān pepa im je ioon jet men ko repidodo me remaron̄ kōm̧m̧ani n̄an “reilo̧k n̄an eo Nejin Anij kōn tōmak” (Hilamōn 8:15).

  

  1:2

• Ajri ro reritto remaron̄ kāālet juon iaan eoon kein laajraki im kwaļo̧k ta eo ej kōļapļo̧k melele eo aer kōn bwebwenato eo: 1 Nipai 17:41; Alma 33:18–20; Hilamōn 8:13–15; Katak im Bujen Ko 6:36.

• Kōmeļeļeiki Bōnbōn 22:1–18 n̄an ajri ro nejum̧, kalikkar wāween an Balaam kar m̧akoko in kaliaik armej ro an Anij, men̄e Balak, kiin̄ eo an Moab, ekar leļo̧k utiej im m̧weeie. Innem komaron̄ jipan̄ ajri ro nejum̧ etale eoon ko laajraki n̄an naan ko me rej en̄jake ke rej kwaļo̧k an Balaam kōņaan ļoor Anij: Bōnbōn 22:18; 23:26; 24:13. Bōlen kwomaron̄ kajjitōk ippāer n̄an kāālet juon naan me em̧m̧an ippāer im je ioon juon peba n̄an jipan̄ er keememej n̄an pokake Irooj.