Joshua 1–8; 23–24

Pijaikļo̧k ta eo emaron̄ āinwōt n̄an Joshua ke kar kūr e bwe en bōk jikin Moses. Kile ta eo Irooj ekar ba ilo Joshua 1:1–9 n̄an kōketak e. Ļōmņak kōn apan̄ ko reppen kwoj jelm̧aeiki; ta eo ilo eoon kein me rej lewaj n̄an eok peran?

Āt eo Joshua (Yehoshua ak Yeshua ilo Hibru) meļeļein “Jeova ej lo̧mo̧o̧ren.” Im āt eo Jisōs ej itok jān Yeshua.. Kiiō ilo am̧ riit kōn Joshua, ļōmņak kōn eddo eo an ilo tōl ro nejin Israel n̄an kijone Reba Jordan im n̄an āneen kallim̧ur. Ekōjkan an mijen eo an āinwōt ta eo Kraist eaar kōm̧m̧ane n̄an kōj?

Ke E ear kōketak Joshua, Irooj ear leļo̧k kabilōk eo ilo Joshua 1:8 kōn jeje ko rekwojarjar, ak “bok in kien.” Ļōmņake ļap in wōt eddo eo an Joshua, etke kaiilōk in emaron̄ kar ļap an jipan̄?

N̄e Irooj ej karuwaineneik kōj n̄an riiti jeje ko rekwojarjar, E ekkā an kōjerbal naan ko me reļļapļo̧k jān ad riit wōt. E kar bar kallim̧ur kōjeraam̧m̧an ko reļļap. Jaat in ilaļ emaron̄ jipan̄ eok loi karuwanene kein im kōjeraam̧m̧an ko kallim̧ur kaki.

Ekōjkan an Irooj kakūrm̧ool kallim̧ur kein ilo mour eo am̧? Kiiō emaron̄ juon iien em̧m̧an n̄an etale iminene in am̧ ekkatak jeje ko rekwojarjar. Ta eo em̧m̧an? Ta eo kwoj en̄jaake n̄an kōm̧m̧an bwe en aorōkļok am̧ iien ilo naan in Anij?

As I Search the Holy Scriptures,” Hymns, nō. 277

Rikūrjin ro ilo Kallim̧ur Ekāāl raar lo Rahab āinwōt juon waanjon̄ak in kajoor jim̧or ilo tōmak im ilo jerbal (lale Hibru 11:31; Jemes 2:25). Ilo am̧ riiti Joshua 2, ļōmņak kōn jerbal eo an Rahab kōn tōmak im jerbal ko ilo an lo̧mo̧o̧ren e make, baam̧le eo an, im riaron̄ron̄ ro an Israel. Ta eo men in ej katakin eok kōn wāween an tōmak eo ilo Kraist im jerbal ko am̧ maron̄ un̄ūr eok make im ro jet?

Irooj eaar jerbali kabwilōn̄lōn̄ ko ibwiljin armej ro An ilo An kar tōl er n̄an āneen kallim̧ur, im E maron̄ kōm̧m̧an ejja men in n̄an kwe. Erkein jet kajjitōk n̄an tōl eok ilo ekkatak eo am̧ Joshua 3–4:

• Etke kwoj ļōmņak riIsrael ro raar aikuj kakkwojarjar er make m̧okta jān aer kijone Reba Jordan? (lale Joshua 3:5).

• Jeļā bwe reba eo ear jepelļo̧k ālkin “lo̧piden neen pris ro … rej juur dān ko” (Joshua 3:13, 15). Etke ej aorōk?

• Men ko jet raorōk raar waļo̧k ilo Reba Jordan—lale 2 Kiin̄ Ro 2:6–15; 5:1–14; im Mark 1:9–11. Ta ekkeijel ko kwoj loi ikōtaan iien kein?

• Ekōjkan an kar Irooj kōm̧m̧ani “men in bwilōn̄ ko” ilo mour eo am̧? (Joshua 3:5). Ewi wāween an emakijkij am̧ en̄jake—ak kile—mennin bwilōn̄ kein? (n̄an waanjon̄ak, lale Joshua 3:17

Joshua 6–8 ej m̧adm̧ōde pata ko ikijeen jikin ko ilo Jericho im Ai. Ilo am̧ riiti jepta kein, ļōmņak ekōjkan am̧ tariņae kapo (n̄an waanjon̄ak, lale Joshua 7:10–13). Ta eo kwoj ekkatak kōn wāween an Anij jipan̄ eok im ta eo kwoj aikuj kōm̧m̧ane n̄an tōpar kajoor eo An? N̄an waanjon̄ak, ta eo ej im̧we eok kōn kōmeļeļe ko an Irooj n̄an bōk Jericho? (lale Joshua 6:1–5). Bolen bwebwenato eo ilo Joshua 7 enaaj im̧we eok n̄an kāālet n̄e “ewōr men in aje ippemi” ilo mour eo am̧ me kwoj aikuj joļo̧ke (Joshua 7:13).

Katak ko āliktata an Joshua n̄an riIsrael ro ilo Joshua 23–24 ekoba kakōlkōl ko raorōk, kapilōk ko, im kōjeraam̧m̧an ko kallim̧ur kaki. Bōlen kwomaron̄ kōm̧m̧ane juon laajrak in ta eo kwoj loe. Ļōmņak kōn aolep men ko riIsrael ro rekar jelm̧ae, etke kwoj ļōmņak Joshua ekar kāālet n̄an ba n̄an er men ko ilo jem̧ļo̧kin mour eo an? Ta eo kwoj lo ej un̄ūr eok n̄an “eddāp wōt n̄an Irooj” (Joshua 23:8).

Bar lale Dale G. Renlund, “Kom̧win Kāālōt Rainin,” Liaona, Nob. 2018, 104–6.

• Juon in wāween n̄an jipan̄ ajri ro nejum̧ “kajoor im kanooj peran” (Joshua 1:6) ilo Jisōs Kraist. Karuwanene er n̄an pukot juon naan me Joshua 1:6, 9, im 18, rej āliji, im je ak keememej e. Jipan̄ ajri ro nejum̧ ļōmņaki jekjek ko me remaron̄ raikuji enaan in, āinwōt Joshia ear aikuji. Kom̧ maron̄ bar etale ippān doon jet iaan bwebwenato ko ilo Joshua 1–4; 6 (bar lale “Rikanaan Joshua” im “Rehab im Riiaron̄ron̄ Ro” ilo Bwebwenato ko jān Kallim̧ur M̧okta, 85–91). Elmen an armej ro ilo bwebwenato kein kwaļo̧k peran im kajoor ilo Irooj?

  

  2:59

  

  1:39

• Riiti Joshua 1:8 emaron̄ im̧we ajri ro nejum̧ n̄an riit jeje ko rekwojarjar ippāer make. Jipan̄ er kappukot naan ko ilo eoon in me ej katak er wāween im etke jej aikuj riiti jeje ko rekwojarjar. Remaron̄ pukot ejja men in wōt ilo 1 Nipai 15:23–24; 2 Nipai 31:20; 32:3; Jekab 4:6; Hilamōn 3:29–30. Kwomaron̄ bar jipan̄ er kōm̧m̧an karōk in riiti jeje ko rekwojarjar im wōnm̧aanļo̧k ilo karōk in.

• Komaron̄ kōjerbal bwebwenato in an ri Israel ro kijone Reba Jordan āinwōt juon kakōļļe in peptaij—joļo̧k mour eo ad m̧okta ilo āne jemdan im ijjino juon kāāl ilo bujen jemjerā ippān Anij. Kiiō ilo ami riit ippān doon Joshua 3–4 (ak “Rikanaan Joshua” ilo Bwebwenato ko jān Kallim̧ur M̧okta, 85–89), kwomaron̄ bar lale pija in an Jisōs kar peptaij im kōmeļeļe bwe Jisōs ekar peptaij ilo reba eo ri Israel ro raar kijone. Kom̧ maron̄ al juon al āinwōt “Baptism” (Children’s Songbook, 100–101). Kwaļo̧k n̄an doon ekōjkan an peptaij eo ami āinwōt ijjino juon mour ekāāl ilo aelōn̄ in kiin̄ an Kraist.

  

  2:59

• Ta eo komaron̄ kōm̧mane n̄an jipan̄ ajri ro nejum̧ ekkatak kāālet n̄an ļoor Jisōs Kraist, āinwōt an Joshua kar karuwaineneik ri Israel ro bwe ren ļoor E. Komaron̄ karuwanene er n̄an:

  • Kakeememej juon naan ekadu jān Joshua 24:15. Kajjieon̄ kōm̧m̧an bwe en limo n̄an ajri ro nejum̧. Bōnbōn in naan ko rej kakeememej emaron̄ ekkar n̄an drettaer.

  • Kappukot bwebwenato ko kōn armej ro raar kāālet in jerbal n̄an Jisōs Kraist. Remaron̄ lale Jera māākjiin, Bok In Gospel Pija, ak Bwebwenato ko jān Kallim̧ur M̧okta im bok in bwebwenato ko jet an jeje ko rekwojarjar.

  • Arin jekjek ko me remaron̄ kāālet in ļoor im jerbal n̄an Rilo̧mo̧o̧r eo.