Ti Tabernakulo ken Sakripisio

Idi binilin ti Dios ni Moises a mangbangon iti tabernakulo iti kampo dagiti Israelita, dinakamatna ti panggepna: “tapno agnaedak iti nagbabaetanda” (Exodo 25:8). Iti uneg ti tabernakulo, ti imatang ti Dios ti imbagi ti lakasa ti katulagan—maysa a kayo a kahon, nakaluban iti balitok, a naglaon kadagiti naisurat a kasuratan ti katulagan ti Dios kadagiti taona. Naidulin ti lakasa iti kasantuan, kaunegan ti siled, a naisina manipud iti dadduma pay a tabernakulo babaen iti maysa a belo. Mabalin nga isimbolo daytoy a belo ti pannakaisinatayo iti imatang ti Dios gapu iti Pannakatnag, kasta met ti dalantayo nga agsubli Kenkuana—babaen iti Mangisalakan.

Malaksid ken ni Moises, ammotayo ti maysa laeng a tao a mabalin a sumrek iti dayta a “disso a kasasantuan” (Exodo 26:34)—ti nangato a saserdote. Kas kadagiti sabali a saserdote, nasken nga umuna a mabugguan ken masapsapuan isuna ken makawesan iti sagrado a kawes a mangisimbolo iti takemna. Maminsan ti makatawen, iti maysa nga aldaw a maawagan iti Aldaw ti Pannubbot, idaton ti nangato a saserdote dagiti sakripisio a maipaay kadagiti tao sakbay ti iseserrekna nga agmaymaysa iti tabernakulo. Iti belo, puoranna ti insienso. Ti nasayamusom nga asuk nga agpangato iti langit ti mangibagi iti karkararag dagiti tao nga agpangato iti Dios. Kalpasanna, magna iti belo ti nangato a saserdote, a mangig-iggem iti dara manipud iti isakripisio nga ayup, ken umasideg iti trono ti Dios, nga isimbolo ti lakasa ti katulagan.

Iti panangammo no ania ti ammom maipapan ken ni Jesucristo ken ti akemna iti plano ti Nailangitan nga Ama, makitam kadi no kasano nga itudonatayo ti tabernakulo iti Mangisalakan? Kas met laeng iti tabernakulo, ken ti lakasa iti uneg daytoy, a mangibagi iti imatang ti Dios kadagiti taona, ni Jesucristo ti imatang ti Dios kadagiti taona. Kas iti nangato a saserdote, ni Jesucristo ti Mangibabaet iti nagbabaetantayo ken iti Dios nga Ama. Nagna isuna iti belo tapno mangibabaet para kadatayo babaen ti dara ti bukodna a sakripisio.

Mabalin a kasla pamiliarka iti sumagmamano nga aspeto ti tabernakulo ti Israel, nangnangruna no napankan iti templo tapno umawat kadagiti bukodmo nga ordinansa. Ti templo ti balay ti Apo—ti lugar a pagindeganna kadagiti taona. Kas iti kasasantuan a lugar iti tabernakulo, ti celestial a siled ti templo ti mangibagi iti presensia ti Dios. Tapno makastrek, nasken nga umuna a mabugguan ken masapsapuantayo. Agaruattayo iti sagrado a kawes. Agaramidtayo kadagiti katulagan. Agkararagtayo iti maysa nga altar a manipud ditoy agpangato dagiti kararag iti Dios. Ket iti kamaudiananna magnatayo iti belo nga agturong iti imatang ti Dios.

Nalabit a ti kapatgan a pagpapadaan dagiti kabaruanan a templo ken ti nagkauna a tabernakulo ket agpadpada a, no umno a maawatan, mangpapigsa iti pammatitayo ken ni Jesucristo ken mangpunno kadatayo iti panagyaman para iti pangsubbot a sakripisiona. Kayat ti Dios ti amin nga annakna a sumrek iti imatangna; kayatna ti “maysa a pagarian dagiti saserdote” ken saserdote a babbai (Exodo 19:6). Ngem dagiti basoltayo ti manglapped kadatayo manipud iti pananggun-od iti dayta a bendision, gapu ta “awan ti narugit a banag a mabalin a makipagnaed iti Dios” (1 Nephi 10:21). Isu nga imbaon ti Dios nga Ama ni Jesucristo, ti “nangato a saserdote dagiti naimbag a banag nga umay” (Hebreo 9:11). Iwaknitna ti belo para kadatayo ken mangted iti bileg iti amin a tao ti Dios nga “umadanitayo ngarud a sitatalged iti trono ti parabur, tapno awatentayo ti asi” (Hebreo 4:16).

Ita, ti panggep dagiti templo ket ad-adda pay ngem iti pananggun-od iti pannakaitan-ok para iti bagbagitayo. Kalpasan ti panangawattayo kadagiti bukodtayo nga ordinansa ken panagaramidtayo kadagiti katulagan iti Dios, makapagtakdertayo iti lugar dagiti kapuonantayo ken umawat kadagiti ordinansa nga agpaay kadakuada. Iti kaipapananna, makapagbalintayo a maysa a banag a kas kadagiti nagkauna a nangato a saserdote—ken ti Naindaklan a Nangato a Saserdote—a mangluklukat iti dalan nga agturong iti imatang ti Dios para kadagiti dadduma.

Naisuro a sibibileg dagiti pagbatayan ti pannubbot ken pannakitunos iti nagkauna a kannawidan ti panangisakripisio iti ayup, a nabayagen nga addan sakbay pay ti linteg ni Moises. Nangidaton da Adan ken Eva iti sakripisio. Naawatanda ti simboliko a pagibasaranna iti sakripisio ti Mangisalakan. Ket insuroda daytoy kadagiti annakda.

Ti simbolismo ti panangisakripisio iti ayup ket mabalin a kasla nangnangruna a nasaem iti Aldaw ti Pannubbot ti nagkauna nga Israel (“Yom Kippur” iti Hebreo). Ti panagkasapulan iti daytoy a tinawen a seremonia ket mayebkas iti Levitico 16:30: “Iti daytoy nga aldaw maaramidto ti pannakaabbongyo, tapno pakadalusanyo, maugasankayonto kadagiti amin a basbasolyo iti saklang ni Jehova.” Iti kasta, agtalinaed ti imatang ti Dios kadagiti tao. Naipatungpal daytoy a pannubbot babaen ti nadumaduma a seremonia. Iti maysa kadagitoy, napatay ti maysa a kalding kas maysa a daton para iti basbasol dagiti tao, ket impan ti nangato a saserdote ti dara ti kalding iti kasasantuan a lugar. Idi agangay, impatay ti nangato a saserdote dagiti imana iti maysa a sibibiag a kalding ket impudnoda ti basbasol dagiti annak ti Israel—simboliko a panangyakar kadagita a basbasol iti kalding. Kalpasanna mapapanaw ti kalding iti kampo ti Israel.

Kadagitoy a ritual, isimbolo dagiti kalding ni Jesucristo, a mangsuksukat iti lugar dagiti managbasol a tao. Nasken a saan a mapalugodan ti basol iti imatang ti Dios. Ngem imbes a mangdadael wenno mangpapanaw kadagiti managbasol, nangipaay ti Dios iti sabali a wagas—maysa a kalding ti mapapatay wenno mapapanaw ketdi. “Ket ti kalding ti mangawit a mangipan iti amin a kinadakes” (Levitico 16:22).

Ti simbolismo dagitoy a ritual ti mangitudo iti wagas nga impaay ti Dios a mangisubli kadatayo iti imatangna—ni Jesucristo ken ti Pannubbotna. Ti Mangisalakan “inturedna dagiti lidaytayo,” ken inawitna dagiti ladingittayo,” uray pay “ti kinadakestayo amin” (Isaias 53:4, 6). Nagtakder isuna iti lugartayo, intedna ti biagna a pangbayad iti dusa ti basol, ket kalpasanna pinarmekna ti patay babaen ti Panagungarna. Ti sakripisio ni Jesucristo ti “naindaklan ken maudi a daton; wen, saan a daton ti tao, wenno ayup” ngem ketdi “awan patinggana ken agnanayon a daton” (Alma 34:10). Isu ti pannakatungpal ti amin a banag nga intudo dagiti nagkauna a sakripisio.

Gapu iti daytoy, kalpasan a nakumpleto dagiti sakripisiona, kinunana, “Saanyon nga idaton pay kaniak ti agayus a dara; wen; maisardengen ti panagidatonyo. … Ket idatonyo kaniak a daton ti nasneban a puso ken napnuan babawi nga espiritu” (3 Nephi 9:19–20).

Isu a no masarakam dagiti binatog iti Daan a Tulag maipapan kadagiti sakripisio ken tabernakulo (wenno iti agangay, ti templo)—ken masarakamto ti adu kadagitoy—laglagipem a ti kangrunaan a panggep ti amin daytoy ket mangpapigsa iti pammatim iti Mesias, a ni Jesucristo. Ikonektam ti mabasa ken masursurom iti panagdayawmo iti balayna. Bay-am ti pusom ken panunotmo nga umasideg Kenkuana. Utobem no ania ti naaramidnan a mangisubli kenka iti imatang ti Dios—ken no anianto ti aramidem a mangsurot Kenkuana.