Numero 11–14; 20–24; 27

Iti Numero 11:11–17, 24–29, kitaen ti problema a nakaipasanguan ni Moises ken ti pangrisut nga insingasing ti Dios. Ania iti panagkunam a kayat a sawen ni Moises idi kinunana a tinarigagayanna nga “agbalin a propeta ti amin a tattao ti Apo”? (bersikulo 29). Bayat ti panangutobmo iti daytoy a saludsod, sapulem dagiti posible a sungbat iti mensahe ni Presidente Russell M. Nelson a “Revelation for the Church, Revelation for Our Lives” (Liahona, Mayo 2018, 93–96).

Ti panagkunana a makaawattayo amin iti paltiing, nupay kasta, saan a kayat a sawen a mabalintayo amin nga iturong dagiti tao ti Dios iti wagas nga inaramid ni Moises. Ti pasamak a naisurat iti Numero 12 ti mangilawlawag iti daytoy. Ania dagiti pammallaag a masarakanyo iti daytoy a kapitulo? Ania ti mariknam a tarigagayan ti Apo a maawatam maipapan iti bukod a paltiing ken panangsurot iti propetana?

Kitaen met iti 1 Nephi 10:17; Doktrina ken Katulagan 28: 1–7; Dallin H. Oaks, “Two Lines of Communication,” Liahona,, Nob. 2010, 83–86.

Mabalin a masdaaw ti sumagmamano a tao a mangammo a ni Moises, maysa a maingel a dadaulo a nagtakder iti sango ni Faraon ken nagaramid kadagiti nakaskasdaaw a milagro nga addaan iti bileg ti Apo, ket maysa pay a “napakumbaba unay.” (Numero 12:3). Ania ti kayat a sawen ti agbalin a napakumbaba? Ibilang ti panangadal iti pangilawlawag ni Elder David A. Bednar iti “Meek and Lowly of Heart” (Liahona, Mayo 2018, 30–33) wenno iti “Napakumbaba, Kinapakumbaba” iti Pangiwanwan iti Nasantuan a Kasuratan (Gospel Library).

Ania ti masursurom kadagiti pagarigan ni Moises maipapan iti kinapakumbaba iti Exodo 18:13–25; Numero 11:26–29; Numero 12; Hebreo 11:24–27; ken Moises 1:10–11? Mabalinmo pay a basaen ken ilawlawag no kasano nga impakita ti Mangisalakan ti kinapakumbaba (kitaen iti Mateo 11:29; 27:11–14; Lucas 22:41– 42; Juan 13:4–5). Ania ti isuro dagitoy a pagarigan kenka?

Bayat ti panangbasam iti Numero 13–14, padasem nga ikabil ti bagim iti lugar dagiti Israelita. Apay iti panagkunam a kayatda nga “agsubli idiay Egipto”? (Numero 14:3). Kasano ti panangiladawanmo ti sabali nga “espiritu” nga adda ken ni Caleb? (Numero 14:24). Ania ti makaawis iti riknam maipapan iti pammati da Caleb ken Josue, ken kasano a mayaplikarmo dagiti pagwadanda kadagiti kasasaad a pakaipasanguam?

Ammo dagiti propeta iti libro ni Mormon ti estoria a nairekord iti Numero 21:4–9 ken naawatanda ti naespirituan a kinapateg daytoy. Mabasam dagiti pannursuroda maipapan iti daytoy nga estoria iti 1 Nephi 17:40–41; Alma 33:18–22; ken Helaman 8:13–15. Adtoy dagiti sumagmamano a saludsod nga utoben bayat ti panagbasam:

• Ania ti mabalin nga ibagi ti gambang nga uleg?

• Ania ti mabalin nga ibagi dagiti kagat ti uleg?

• Nasken kadagiti Israelita a “[kitaenda] ti sinan-uleg a bronse” (Numero 21:9) tapno maimbaganda. Apay nga iti panagkunam a nagkedked a kumita ti sumagmamano a tattao? Adda kadi maysa a maipada a napasamak kenka?

• Ania ti mariknam a makaparegta nga aramidem tapno ad-adda a naan-anay a “kumita ti Anak ti Dios nga addaan pammati” ket maimbaganka? (Helaman 8:15).

Ti panangbasa kadagitoy a binatog ket mabalin a mangipalagip kenka iti dadduma a gundaway kadagiti nasantuan a kasuratan no nasken a pagtalinaeden dagiti tao ti pokusda ken Cristo. Kas pagarigan, idilig ti mensahe ti Numero 21:4–9 iti Mateo 14:25–31 ken 1 Nephi 8:24–28 (kitaen met dagiti ladawan iti ungto ti balabala daytoy a lawas). Ania ti ayo a mangyadayo kadatayo ken Cristo? Kasano a bendisionanna dagiti tao nga agtalinaed a nakapokus Kenkuana?

Kitaen met iti “Jesus, the Very Thought of Thee” (Hymns, no. 141).

Idi naammuan ni Balak, ti ari ti Moab, ti yaasideg dagiti Israelita, inawaganna ni Balaam, ti lalaki a maam-ammo iti panangisawang kadagiti bendision ken lunod. Tinarigagayan ni Balak ti mangilunod kadagiti Israelita. Kitaen no kasano a pinadas nga inallukoy ni Balak ni Balaam (kitaen iti Numero 22:5–7, 15–17), ket panunotem maipapan kadagiti pannulisog a mabalin a pakaipasanguam a mangsupiat iti pagayatan ti Dios. Ania ti makaawis iti riknam maipapan kadagiti sungbat ni Balaam iti Numero 22:18, 38; 23:8, 12, 26; 24:13? Nakalidliday, ta simmuko ni Balaam ti kamaudiananna ken liniputanna ti Israel (kitaen iti Numero 31:16; Judas 1:11). Utobem no kasano a makapagtalinaedka a napudno iti Apo iti baet ti pammilit manipud kadagiti dadduma.

• Saludsodem kadagiti annakmo no malagipda ti sumagmamano a milagro nga inaramid ti Apo a nangtulong kadagiti Israelita (kitaen iti “Dagiti Angol iti Egipto” ken “Ti Fiesta ti Paskua” iti Dagiti Estoria iti Daan a Tulag, 67–74). . Kalpasanna mabalinmo a gupgopen para kadakuada ti Numero 11:4–10, a mangyunay-unay a nalipatan dagiti Israelita dagiti bendisionda ken nagdaydayamudomda. Ania dagiti bendision a malipatantayo no dadduma?

• Bayat ti panagkansionyo iti maysa a kanta maipapan iti kinamanagyaman, kas iti “Count Your Blessings” (Hymns, no. 241), mabalin nga agdrowing dagiti annakmo kadagiti ladawan dagiti bendision nga inted ti Apo kadakuada.

• Tapno mayam-ammo ti Numero 12, mabalinmo nga isarita kadagiti annakmo a saan a naragsakan ti Apo kada Aaron ken Miriam, a kakabsat ni Moises. Awisem ida a mangbasa iti Numero 12:1–8 tapno ammuen no apay. Ibilang ti panangusar iti Libro ti Arte ti Ebanghelio a mangtulong kadagiti annakmo a mangsapul kadagiti pagarigan dagiti tao kadagiti nasantuan a kasuratan a nangraem iti propeta ti Apo ken nabendisionan. Kasano a mabendisionantayo no surotentayo ti propeta ti Apo?

• Ibilang ti panangusar iti “Ni Moises ken ti Gambang nga Uleg” (iti Dagiti Estoria iti Daan a Tulag, 83–84), a mangtulong kadagiti annakmo a mangammo no ania ti napasamak iti estoria iti Numero 21:6–9. Kasano a maipada ti gambang nga uleg ken ni Jesucristo? (kitaen iti Juan 3:14–15). Mabalin a magustuan dagiti annakmo ti agaramid iti uleg manipud iti papel ken mangisurat iti daytoy ti sumagmamano a simple a banag a mabalinda nga aramiden a “mangkita iti Anak ti Dios nga addaan iti pammati” (Helaman 8:15).

  

  1:2

• Mabalin a pumili dagiti in-inauna nga ubbing iti maysa kadagiti sumaganad a nasantuan a kasuratan ken ibinglay no ania ti mangnayon iti pannakaawatda iti estoria: 1 Nephi 17:41; Alma 33:18–20; Helaman 8:13–15; Doktrina ken Katulagan 6:36.

• Gupgopem ti Numero 22:1–18 para kadagiti annakmo, a mangyunay-unay no kasano a nagkedked ni Balaam a mangilunod kadagiti tao ti Dios, nupay ni Balak, ti ari ti Moab, indiayana kenkuana ti dayaw ken kinabaknang. Kalpasanna mabalinmo a tulongan dagiti annakmo a mangsukisok kadagiti sumaganad a bersikulo para kadagiti ragup ti balikas a mariknada a mangipakita a tinarigagayan ni Balaam ti mangsurot iti Dios: Numero 22:18; 23:26; 24:13. Nalabit a mabalin a pumidut dagiti annakmo iti maysa a ragup ti balikas a magustuanda ket isurat daytoy iti maysa a kard a mangtulong kadakuada a manglagip nga agtungpal iti Apo.