Josue 1–8; 23–24

Panunotem no ania koma ti mabalin a kayarigan para ken ni Josue a maawagan a mangsukat ken ni Moises. Kitaem no ania ti kinuna ti Apo iti Josue 1:1–9 a mangparegta kenkuana. Panunotem maipapan kadagiti narigat a karit a pakaipasanguam; ania kadagitoy a bersikulo ti mangted kenka iti tured?

Ti nagan a Josue (Yehoshua wenno Yeshua iti Hebreo) kaipapananna ti “mangisalakan ni Jehova.” Ket ti nagan a Jesus naggapu iti Yeshua. Isu a bayat ti panangbasam maipapan ken ni Josue, ibilangmo no kasano a mangiturong ti akemna kadagiti annak ti Israel iti ballasiw ti Karayan Jordan ken agturong iti naikari a daga. Kasano a maipada ti misionna iti no ania ti inaramid ni Cristo para kadatayo?

Bayat ti panangparegtana ken ni Josue, nangted ti Apo iti balakad iti Josue 1:8 maipapan kadagiti nasantuan a kasuratan, wenno “ti sao ti linteg.” Iti panangibilang iti nadagsen a pagrebbengan ni Josue, apay a mabalin a nangnangruna a nakatulong daytoy a balakad?

No awisennatayo ti Apo a mangbasa kadagiti nasantuan a kasuratan, masansan nga usarenna dagiti balikas nga ad-adda pay ngem iti panagbasa laeng. Ikarina pay dagiti naindaklan a bendision. Makatulong kenka ti tsart iti baba a mangtakuat kadagitoy nga awis ken naikari a bendision:

Kasano nga impatungpal ti Apo dagitoy a kari iti biagyo? Mabalin nga ita ti nasayaat a gundaway a mangamiris kadagiti ugaliyo iti panagadal iti nasantuan a kasuratan. Ania ti nasayaat a mapaspasamak? Ania ti mariknam a makaparegta nga aramiden tapno maaddaanka kadagiti napnapnuan kaipapanan a padas iti balikas ti Dios?

Kitaen met iti “As I Search the Holy Scriptures,” Hymns, no. 277.

Nakita dagiti nagkauna a Kristiano ni Rahab kas maysa a pagwadan ti bileg ti agpada a pammati ken dagiti aramid (kitaen iti Hebreo 11:31; Santiago 2:25). Bayat ti panangbasam iti Josue 2, ibilangmo ti akem ti pammati ni Rahab ken dagiti aramid iti panangisalakan iti bagina, ti pamiliana, ken dagiti espia nga Israelita. Ania ti isuro daytoy kenka maipapan iti no kasano a makaimpluensia iti bagim ken iti dadduma ti pammatim ken ni Cristo ken dagiti aramidmo?

Nagaramid ti Apo kadagiti datdatlag kadagiti taona bayat ti panangiturongna kadakuada iti naikari a daga, ket maaramidna met dayta para kenka. Adtoy ti sumagmamano a saludsod a mangtarabay iti panagadalyo iti Josue 3–4:

• Apay iti panagkunam a kasapulan dagiti Israelita a mangpasanto iti bagbagida sakbay ti panagballasiwda iti Karayan Jordan? (kitaen iti Josue 3:5).

• Makita a nagsina laeng ti karayan kalpasan a “timmapog dagiti saserdote iti karayan” (Josue 3:13, 15). Apay a napateg dayta?

• Para iti dadduma pay a napapateg a pasamak a napagteng iti Karayan Jordan—kitaen iti 2 Ar-ari 2:6–15; 5:1–14; ken Marcos 1:9–11. Ania dagiti koneksion a makitam iti nagbabaetan dagitoy a pasamak?

• Kasano nga inaramid ti Apo dagiti “datdatlag” iti biagmo? (Josue 3:5). Kasano a mapadasam—wenno mabigbigmo—dagiti datdatlag nga ad-adda a masansan? (kas pagarigan, kitaen iti Josue 3:17).

TiJosue 6–8 ket mainaig kadagiti panagraranget kadagiti daga ti Jerico ken Ai. Bayat ti panangbasam kadagitoy a kapitulo, ibilangmo no kasano a makirangetka iti sulisog (kas pagarigan, kitaen iti Josue 7:10–13). Ania ti masursurom maipapan no kasano a makatulong ti Dios kenka ken no ania ti kasapulam nga aramiden tapno magun-odmo ti bilegna? Kas pagarigan, ania ti makaawis iti riknam maipapan kadagiti pangiturong ti Apo iti pananggun-od iti Jerico? (kitaen iti Josue 6:1–5). Nalabit a paregtaennakanto ti salaysay iti Josue 7 tapno mangikeddeng no adda “banag a naranta a madadael” iti biagmo a nasken nga ibellengmo (Josue 7:13).

Dagiti maudi a panangisuro ni Josue kadagiti Israelita iti Josue 23–24 iramanna dagiti napateg a pammallaag, balakad, ken dagiti naikari a bendision. Nalabit a mabalinmo nga ilista ti no ania ti masarakam. Iti panangibilang iti amin a banag a napasaran dagiti Israelita, apay iti panagkunam a pinili ni Josue nga ibaga kadakuada dagitoy a banag iti gibus ti biagna? Ania ti masarakam a mangparegta kenka a “kumpet iti Apo“? (Josue 23:8).

Kitaen met iti Dale G. Renlund, “Choose You This Day,” Liahona, Nob. 2018, 104–6.

• Adtoy ti maysa a wagas tapno matulongam dagiti annakmo a “pakirden ti pakinakemda ken dida agbuteng” (Joshua 1:6) babaen ken ni Jesucristo. Awisem ida a mangsapul iti ragup ti balikas a maulit iti Josue 1:6, 9, ken 18, ket isurat daytoy wenno ikabesada daytoy. Tulongam dagiti annakmo a mangpanunot kadagiti gapu no apay a mabalin a kasapulantayo daytoy a mensahe, kas met laeng iti inaramid ni Josue. Mabalinyo pay nga irebyu nga aggigiddan ti sumagmamano kadagiti estoria iti Josue 1–4; 6 (kitaen met iti “Ni Josue a Propeta” ken “Ni Rahab ken dagiti Espia” iti Dagiti Estoria iti Daan a Tulag, 85–91). Kasano nga impakita dagiti tao kadagitoy nga estoria ti tured ken pigsa iti Apo?

  

  2:59

  

  1:39

• Ti panangbasa iti Josue 1:8 mabalin a mangparegta kadagiti annakmo a mangbasa a bukbukodda kadagiti nasantuan a kasuratan. Tulongam ida a mangbirok kadagiti balikas iti daytoy a bersikulo a mangisuro kadakuada no kasano ken no apay a nasken nga agbasatayo kadagiti nasantuan a kasuratan. Mabalinda a sapulen ti isu met la a banag iti 1 Nephi 15:23–24; 2 Nephi 31:20; 32:3; Jacob 4:6; Helaman 3:29–30. Mabalinmo pay a tulongan ida a mangaramid ken mangipatungpal iti plano a mangbasa kadagiti nasantuan a kasuratan.

• Mabalinmo nga usaren ti estoria ti panagballasiw dagiti Israelita iti Karayan Jordan kas simbolo ti panagbuniag—ti panangisuko iti daan a biagtayo iti let-ang ken panangrugi iti baro a biag iti natulagan a relasion iti Dios. Isu a bayat ti aggigiddan a panangbasayo iti Josue 3–4 (wenno “Ni Josue a Propeta” iti Dagiti Estoria iti Daan a Tulag, 85–89), mabalinmo met a kitaen ti ladawan ni Jesus a mabumbuniagan ken ilawlawag a nabuniagan ni Jesus iti isu met laeng a karayan a binallasiw dagiti Israelita. Kalpasanna mabalinyo pay ti agkansion iti maysa a kanta kas iti “Baptism” (Children’s Songbook, 100–101). Ibinglayyo iti tunggal maysa no kasano a ti panagbuniag ket kasla panangrugi iti baro a biag iti pagarian ni Jesucristo.

  

  2:59

• Ania ti mabalinmo nga aramiden tapno matulongam dagiti annakmo a makasursuro a mangpili a sumurot ken Jesucristo, kas iti panangyawis ni Josue nga aramiden dagiti Israelita? Mabalinmo nga awisen ida nga:

  • Ikabesa ti ababa a ragup ti balikas manipud iti Josue 24:15. Padasem nga aramiden a makaparagsak daytoy para kadagiti annakmo. Mabalin nga agdepende iti edadda ti bilang dagiti balikas nga ikabesada.

  • Sapulen dagiti estoria maipapan kadagiti tao a nangpili nga agserbi ken ni Jesucristo. Mabalinda ti agsapul iti Friend a magasin, ti Libro ti Arte ti Ebanghelio, wenno Dagiti Estoria iti Daan a Tulag ken dagiti dadduma pay a libro ti nasantuan a kasuratan.

  • Dagiti situasion a mayakem a mabalinda a pilien ti sumurot ken agserbi iti Mangisalakan.