Deuteronomio 6–8; 15; 18; 29–30; 34

Inraman ti linteg ni Moises ti adu a makinruar a seremonia ken ritual. Kas makitayo iti balakad ni Moises iti Deuteronomio, maseknan met ti Apo iti makin-uneg a kasasaad dagiti taona—ti naespirituan a kasasaad ti puspusoda.

Kadagiti binatog (passages) iti baba, sapulem ti balikas a puso, ket utobem no ania ti mabalin nga isimbolo daytoy. Mabalin a panunotem dagitoy a binatog kas maysa a kita ti naespirituan a panangeksamen iti pusom. Ania a diagnosis ti maitedmo koma iti bagim? Ania dagiti panagagas nga iresetam tapno mapasayaat ti naespirituan a salun-at ti pusom? Isuratmo dagiti impresionmo:

• Deuteronomio 6:4–7:

• Deuteronomio 8:2–5:

• Deuteronomio 8:11–17:

• Deuteronomio 29:18–20:

• Deuteronomio 30:6–10:

• Deuteronomio 30:14–20:

Ti maysa a wagas tapno maurnos dagiti pampanunotmo ket mabalin a mangidrowing iti maysa a puso ken mangisurat iti uneg daytoy kadagiti banag nga ibaga ti Apo a nasken nga adda kenka iti pusom. Kalpasanna mabalinmo nga isurat iti ruar daytoy dagiti banag a nasken a panangsalaknib iti pusom.

Kasano a maipakitam nga ay-ayatem ti Dios iti amin a pusom? Para kadagiti kapanunotan, kitaen iti “Ayatem ti Dios, ayatem ti kaarrubam” iti Para iti Pigsa dagiti Agtutubo: Maysa a Pangiwanwan iti Panagpili10–12.

Kitaen met iti M. Russell Ballard, “Lovest Thou Me More Than These?,” Liahona, Nob. 2021, 51–53.

Kaaduan kadagiti Israelita a sumrek iti naikari a daga ti saan pay a nakakita kadagiti angol iti Egipto wenno nangballasiw iti Nalabaga a Baybay. Ammo ni Moises nga isuda—ken dagiti masakbayan a kaputotan—a nasken a laglagipenda dagiti milagro ti Dios ken dagiti linteg ti Dios no nasken nga agtalinaedda a tattao ti Dios.

Ania a balakad ti ited ni Moises iti Deuteronomio 6:4–12, 20–25 a makatulong kenka a manglaglagip kadagiti naindaklan a banag nga inaramid ti Dios para kenka? Ania dagiti makaparegta nga aramidem tapno ti balikas ti Apo “agyanto iti pusom” iti inaldaw? (bersikulo 6).

Mabalinmo met nga adalen ti mensahe ni Brother Jan E. Newman a “Preserving the Voice of the Covenant People in the Rising Generation” (Liahona, Nob. 2023, 36–38) ket ibliangmo no kasano nga ipasamto ti pammatim ken ni Cristo kadagiti masakbayan a kaputotan.

Kitaen met iti Deuteronomio 11:18–21; Dale G. Renlund, “Consider the Goodness and Greatness of God,” Liahona, Mayo 2020, 41–44; Bible Dictionary, “Frontlets or phylacteries.”

Saantayo pay nakasangpet iti aldaw “nga awanto ti napanglaw iti biangmo” (Deuteronomio15:4), iti kasta dagiti pagbatayan maipapan iti panangtulong kadagiti nakurapay iti Deuteronomio 15 ket napateg pay laeng dagitoy, uray no nagbalbaliwen dagiti naipangruna a kannawidan. Kitaen no ania ti isuro dagiti bersikulo 1–15 maipapan no apay a tulongantayo dagiti tao nga agkasapulan ken no ania ti rumbeng a kababalintayo maipapan iti daytoy.

Ania ti kayat a sawen ti “ukrademto a di bumurong ta imam” kadagiti tao nga agkasapulan? (dagiti bersikulo 8, 11). Ania ti masursurom manipud iti pagwadan ti Apo maipapan iti panangtulong kadagiti tao nga agkasapulan? (kitaen iti bersikulo 15).

Kitaen met iti “Have I Done Any Good?,” Hymns, no. 223.

Amin da Pedro, Nephi, Moroni, ken ti Mangisalakan Mismo ti nangted iti masao iti padto iti Deuteronomio 18:15–19 (kitaen iti Dagiti Aramid 3:20–23; 1 Nephi 22:20–21; Joseph Smith—Pakasaritaan 1:40; 3 Nephi 20:23). Ania ti masursurom maipapan iti Mangisalakan manipud kadagitoy a bersikulo? Panunotem maipapan iti no ania ti nabasam maipapan ken ni Moises iti napalabas a sumagmamano a lawas. Kasano a “maipada” ni Moises ken ni Jesucristo?

Mabalin a makaay-ayo nga idilig dagiti balikas ni Moises iti Deuteronomy 29:9; 30:15–20 iti sumagmamano a kaudian a pannursuro ni Lehi iti kaamaanna iti 2 Nephi 2:26–29; 4:4. Kasano a pinadakkel ni Lehi no ania ti insuro ni Moises? Ania ti masarakanyo kadagitoy a binatog a mangparegta kadakayo nga “agpili iti biag”? (Deuteronomio 30:19).

• Tapno matulongan dagiti annakmo a makaawat iti Deuteronomio 6:5, mabalinmo nga idrowing iti pisarra ti maysa a puso, maysa a balabala ti bagi, ken maysa a napigsa a takiag. Mabalin nga itudo dagiti annakmo dagiti ladawan bayat ti panangbasam kadagiti balikas a “puso,” “kararua,” ken “pigsa” iti bersikulo. Kasano a maipakitatayo iti Apo a patpatgentayo Isuna iti amin a puso, kararua, ken pigsatayo?

• Basaem a kadua dagiti annakmo ti balakad ti Apo kadagiti Israelita a mangipan kadagiti binatog ti nasantuan a kasuratan iti lugar a pakakitaanda kadagitoy iti inaldaw (kitaen iti Deuteronomio 6:6–9). Mabalin a daytoy ti mangparegta kenka ken kadagiti annakmo a mangpanunot kadagiti wagas a mangsigurado a diyo “lipaten ti Apo” .(bersikulo 12) ken laglagipen no ania ti inaramidna para kenka.

• Mabalinmo nga ilawlawag ti Deuteronomio 6:13, 16 ken 8:3 ket nakatulong iti Mangisalakan bayat ti napateg a kanito iti biagna. Tapno makita no apay, aggigiddan a basaenyo ti Mateo 4:1–10. Kalpasanna mabalinyo nga ibinglay iti tunggal maysa ti sumagmamano a binatog ti nasantuan a kasuratan a nakatulong kadakayo iti panawen ti panagkasapulan.

• Bayat ti panangbasayo iti Deuteronomio 18:18 nga aggigiddan, tulongam dagiti annakmo a makaawat a ti Propeta a kas ken ni Moises iti daytoy a bersikulo ket ni Jesucristo. Nalabit a mabalinmo a kitaen dagiti ladawan dagiti banag nga inaramid ni Moises ken dagiti banag nga inaramid ni Jesucristo, ket bay-am a pagparisen dagiti annakmo dagitoy (kitaen iti Libro ti Arte ti Ebanghelio, dagiti bilang 15, 16, 38, 39). Ania ti insuro kadatayo ti propetatayo maipapan iti Mangisalakan?

• Ti panangisarita maipapan iti Deuteronomio 29:12–13 ket mangipaay iti maysa a gundaway a pagsasaritaanyo kadagiti annakmo maipapan kadagiti katulagan nga aramidendanto wenno inaramiddan iti Nailangitan nga Ama. Ania ti kayat a sawen ti agbalin a tattao ti Dios? Kasano a pagbalinendatayo a tattao ti Dios dagiti karitayo? (kitaen iti bersikulo 13; kitaen met iti Mosiah 18:8–10).

• No kasapulan dagiti annakmo ti tulong a makaawat no ania ti katulagan, isingasing a sapulenda iti depinision iti “Katulagan” iti Pangiwanwan iti Nasantuan a Kasuratan (Gospel Library). Ania dagiti kari nga inaramid ti Dios ken dagiti Israelita iti tunggal maysa iti Deuteronomio 30:8–10? Ania dagiti kari nga inaramidtayo iti Dios? (kitaen iti Doktrina ken Katulagan 20:37, 77). Kasano a mangisilpo kadatayo dagitoy a kari Kenkuana? Ibilang ti aggigiddan a panagkansion iti kanta maipapan kadagiti katulagan, kas iti “Standing on the Promises” (Gospel Library).