Exodo 19–20; 24; 31–34

Insuro ni Presidente Russell M. Nelson: “Iti Daan a Tulag, ti termino a Hebreo a ti peculiar ket naipatarus iti segullah, a kayatna a sawen ti ‘naikkan pateg a kukua,’ wenno ‘gameng.’ Ti panangbigbig kadatayo dagiti katulongan ti Apo kas peculiar a tattaona ket maysa a pammadayaw ti kangatuan nga urnos” (“Children of the Covenant,” Ensign, Mayo 1995, 34). Kasano nga apektuan dagiti balikas ni Presidente Nelson ti wagas a pannakaawatmo iti Exodo 19:3–6? Kasano nga impakita ti Apo kenka nga ipatpategnaka?

Imbaga ti Apo ken ni Moises a kinasapulan nga agsagana dagiti annak ti Israel sakbay a mabalinda ti “sumabat iti Dios” (Exodo 19:10–11, 17) ken agtungpal iti katulagan Kenkuana (kitaen iti Exodo 19:5). Kasano ti panagsaganam para kadagiti naespirituan a padas, agraman dagiti ordinansa ti sakramento ken templo? Kasano a matulongam dagiti dadduma nga agsagana? Ania ti masursurom maipapan iti panagsagana manipud iti Lucas 6:12–13; Enos 1:2–6; Alma 17:2–3?

Bayat ti panaguummong dagiti Israelita iti baba ti Bantay Sinai, nangngegda ti timek ti Dios a nangted kadagiti Sangapulo a Bilin (kitaen iti Deuteronomio 4:12–13). Dagitoy, siempre, saan laeng a bilin ti Dios—adu ti dadduma pay kadagiti nasantuan a kasuratan. Isu a bayat ti panangbasam iti Exodo 20:1–17, saludsodem iti bagim no apay nga inyunay-unay ti Dios dagitoy sangapulo a nangnangruna. Adtoy ti pagarigan a tsart a mabalinmo nga usaren bayat ti panangutobmo iti kinapateg ti Sangapulo a Bilin iti biagmo:

• Kasano a makatulong kenka ti panangtungpal kadagitoy sangapulo a bilin a mangtungpal iti dua a naindaklan a bilin nga inted ni Jesus iti Mateo 22:34–40?

• Ania dagiti banag a mabalin a pakasulisogam nga ipangruna sakbay ti Dios? Ania dagiti bendision a nakitamon manipud iti panangipangruna nga umuna ti Dios?

• Kasano a sungbatam ti maysa a tao a mangibaga a naited ti Sangapulo a Bilin iti nabayagen a panawen ken saanen a mayaplikar ita? Ania dagiti pagarigan manipud iti biagmo nga ibinglaymo kas paset ti sungbatmo? Kasano a mabalin nga apektuan ti himno a “How Gentle God’s Commands” (Hymns, no. 125) ti wagas ti panangilawlawagmo kadagiti bilin ti Dios kadagiti dadduma?

• Kasano nga impatungpal ti Apo ti kari iti Exodo 20:6 iti biagmo?

Kitaen met iti “The Great Commandment—Love the Lord,” iti Teachings of Presidents of the Church: Ezra Taft Benson (2014), 37–45; Dallin H. Oaks, “No Other Gods,” Liahona, Nob. 2013, 72–75; Topics and Questions, “Commandments,” Gospel Library.

Bayat ti panangbasam iti bersikulo 24:3–8, ibilangmo dagiti katulagan nga inaramidmo iti Nailangitan nga Ama ken ni Jesucristo. Nupay mairaman iti katulagan ti Israel dagiti ritual a maigidiat iti no ania ti dawdawaten a kasapulan ti Dios iti agdama, mabalin a madlawmo dagiti sumagmamano a pagpapadaan. Kas pagarigan, dakamaten dagiti bersikulo 4, 5, ken 8 ti maysa nga altar, dagiti sakripisio iti animal, ken dara. Ania ti mabalin nga ibagi dagitoy a banag, ken kasano a mainaigda kadagiti katulagam?

Padasem nga ikabil ti bagim iti lugar dagiti Israelita—addaka iti let-ang, pimmanaw ni Moises iti 40 nga aldaw, ket iti masakbayam, makidangadangka kadagiti Canaanita maipapan iti naikari a daga (kitaen iti Exodo 32:1–8). Apay iti panagkunam a kayat dagiti Israelita ti balitok a didiosen? Ania ti mangparegta kenka maipapan iti pakaasi ni Moises iti Apo iti Exodo 33:11–17?

Idinto a nadagsen ti basol dagiti Israelita, iraman pay daytoy nga estoria ti mensahe ti asi ken pammakawan ti Dios. Ania ti isuro kenka ti Exodo 34:1–10 maipapan iti Mangisalakan? (Kitaen iti Exodo 32:30–32; Mosiah 14:4–8; 15:9; Doktrina ken Katulagan 45:3–5).

Inlawlawag ni Presidente Russell M. Nelson: “Idi ubingak, inadalko ti aramid dagiti dadduma a namagtitipon kadagiti listaan ti bambanag nga aramiden ken saan nga aramiden iti Sabbath. Agingga iti saan a nabayag a nasursurok manipud kadagiti nasantuan a kasuratan a ti galadko ken ugalik iti Sabbath ti mangbukel iti maysa a pagilasinan ti nagbaetak ken ti Nailangitan nga Amak [kitaen iti Exodo 31:13; Ezequiel 20:12, 20]. Iti dayta a pannakaawat, saankon a kasapulan dagiti listaan ti aramiden ken saan nga aramiden. No nasken nga agaramidak iti maysa a pangngeddeng no ti maysa nga aktibidad maitutop man wenno saan para iti aldaw ti Sabbath, simple laeng a saludsodek no kua iti bagik, ‘Ania a pagilasinan ti kayatko nga ited iti Dios?’ Dayta a saludsod ti nangaramid kadagiti pilik maipapan iti aldaw ti Sabbath a nakalawlawag” (“The Sabbath Is a Delight,” Liahona, Mayo 2015, 130). Utobem no ania a pagilasinan ti kayatmo nga ited iti Dios babaen ti panangngilinmo iti Sabbath.

Idi bimmaba ni Moises manipud iti bantay, inyegna ti linteg a naisurat kadagiti taptapi a bato. Kalpasan ti pannakatakuatna a linabsing dagiti Israelita ti katulaganda, imbuong ni Moises dagiti taptapi (kitaen iti Exodo 31:18; 32:19). Idi agangay, binilin ti Dios ni Moises a mangaramid iti sabali pay nga asmang ti taptapi a bato ken isublina dagitoy iti bantay (kitaen iti Exodo 34:1–4). Ilawlawag ti Patarus ti Joseph Smith iti Exodo 34:1–2 (iti Bible appendix) a nairaman ti immuna nga asmang dagiti taptapi a bato dagiti ordinansa ti Dios a “nasantuan nga urnos,” wenno ti Kinasaserdote a Melchizedek. Nairaman iti maikadua nga asmang “ti linteg ti nailubongan a bilin.” Daytoy ti nababbaba a paglintegan nga inannong ti “nababbaba a kinasaserdote” (kitaen iti Doktrina ken Katulagan 84:17–27) a naisangrat a mangisagana kadagiti Israelita iti nangatngato a paglintegan ken nangatngato a kinasaserdote tapno makastrekda iti imatang ti Dios.

• Kasano a maaramidmo a makaay-ayo kadagiti annakmo ti panagsursuro maipapan iti Sangapulo a Bilin? Bayat ti panangbasayo iti Exodo 20:3–17 nga aggigiddan, bay-am a tulongannaka dagiti annakmo a mangsapul wenno mangidrowing iti maysa a ladawan a mangibagi iti tunggal maysa kadagiti Sangapulo a Bilin. Kalpasanna mabalin nga agsisinnublat dagiti annakmo iti panangpili iti maysa a ladawan ken pagsasaritaan no kasano a maibiagda dayta a bilin. Ibinglayyo iti tunggal maysa no kasano a nangisangbay iti ragsakyo ti panangibiag iti dayta a bilin.

• Mabalinyo pay ti agkansion iti maysa a kanta kas iti “Keep the Commandments” (Children’s Songbook, 146–47). Tulongam dagiti ubbing a mangsapul kadagiti balikas iti kanta a mangisuro kadakuada no apay a tarigagayan ti Dios nga agtungpaltayo kadagiti bilinna.

• Tulongam dagiti annakmo a makasursuro iti ragup ti balikas a “Dayawem ni amam ken ni inam” (Exodo 20:12). Mabalin a kayatmo nga ilawlawag a ti “agdayaw” iti maysa a tao kaipapananna ti mangipakita iti panagraem kadakuada wenno mangyeg kadakuada iti ragsak. Ania ti inaramid ni Jesus a mangdayaw iti mortal nga inana ken ti Nailangitan nga Amana? (kitaen iti Lucas 2:48–51; Juan 19:26–27). Nalabit a mabalin dagiti annakmo ti agsisinnublat iti panangyakem kadagiti banag a mabalinda nga aramiden a mangdayaw kadagiti nagannak kadakuada, idinto a pugtuan dagiti dadduma nga ubbing no ania ti ar-aramidenda.

• Mabalin a maragsakan dagiti annakmo a mangsapul kadagiti pagarigan dagiti pagilasinan—kas kadagiti pagilasinan iti kalsada wenno pagilasinan iti maysa a pasdek. Ania dagiti panggep dagiti pagilasinan? Tulongam dagiti annakmo a mangbilang no mano a daras a makita ti balikas a “pagilasinan” iti Exodo 31:13, 16–17. Ania ti kinuna ti Apo a maysa a pagilasinan iti nagbaetantayo Kenkuana? Isaritam kadagiti ubbing maipapan iti sumagmamano a wagas a panangpadasmo ken ti pamiliam a mangipakita iti ayatyo para iti Apo iti Sabbath.

• Ibilang ti panangusar iti “Ni Moises iti Bantay Sinai” (iti Dagiti Estoria iti Daan a Tulag, 77–82) tapno matulongan dagiti annakmo a mangsursuro iti estoria iti Genesis 32:1–8, 19–24. Apay a biddut nga agdaydayaw dagiti Israelita iti maysa nga estatua imbes nga iti Dios?

  

  2:55

• Mabalin a makaparagsak ti mangparnuay iti dana iti suelo (wenno agsapul iti maysa iti asideg ti pagtaenganyo) a mangiladawan kadagitoy a balikas manipud iti Exodo 32:8: “Nagbaw-ingda iti apagdarikamat iti dalan nga imbilinko kadakuada.” Bayat ti pannagna iti dana, mabalin a pagsasaritaan dagiti annakmo maipapan kadagiti pannulisog a pakaipasanguantayo tapno tumallikud iti Dios. Ania ti makatulong kadatayo nga agtalinaed iti dana ti Dios—ken agsubli iti dayta no simminatayo? (kitaen Exodo 34:6–7).