Paskua ti Panagungar

Adu a binatog iti Daan a Tulag ti mangitudo iti panagministro ken pangsubbot a sakripisio ti Mangisalakan. Nailista iti tsart iti baba ti sumagmamano kadagitoy a binatog. Bayat ti panangbasam kadagitoy a bersikulo, ania dagiti impresion nga umay kenka maipapan iti Mangisalakan?

Ad-adu ken nalawlawag pay dagiti pammadto a mangisuro maipapan iti Mangisalakan iti Libro ni Mormon. Ibilangmo no kasano a pinapigsa ti pammatim dagiti binatog kas kadagitoy: 1 Nephi 11:31–33; 2 Nephi 25:13; Mosiah 3:2–11; Alma 7:10–13.

Agtultuloy ti naisangsangayan a panagsaksi dagiti propeta iti ud-udina nga aldaw maipapan ken ni Jesucristo ken ti panangsubbot a misionna. Bayat ti panagdengngegmo iti sapasap a komperensia iti daytoy a Paskua ti Panangungar iti udi ti lawas, isuratmo dagiti pammaneknek ni Cristo a mangngegam. Ania ti isuro kenka dagitoy maipapan Kenkuana?

Naragsak a panawen ti Paskua ti Panagungar, gapu ta panawen ti panangrambak iti Pannubbot ken Panagungar ti Mangisalakan. Ngem, uray kabayatan ti Paskua ti Panagungar, adu dagiti tao a saan a makarikna iti rag-o gapu iti nadumaduma a rason. Ania ti maaramidam tapno maisaknap ti talna ken rag-o ti Mangisalakan iti daytoy a Paskua ti Panagungar?

Maysa a kapanunotan ket mangsapul kadagiti mensahe kadagiti nasantuan a kasuratan maipapan iti talna ken rag-o nga idiaya ni Jesucristo, kas kadagitoy: Salmo 16:8–11; 30:2–5; Isaias 12; 25:8–9; 40:28–31; Juan 14:27; 16:33; Alma 26:11–22. Ibilang no kasano a maibinglaymo dagitoy a mensahe kadagiti dadduma. Kas pagarigan, mabalin a makaaramidka kadagiti kard ti Paskua ti Panagungar nga ibinglay, maibatay kadagitoy a mensahe. Ikararagam maipapan no siasino ti agkasapulan nga umawat iti kablaawmo iti Paskua ti Panagungar. Mabalin pay nga ikeddengmo nga ibinglay dagiti mensahem iti social media, a mabalin a pakakitaan kadagitoy ti adu a tattao.

Dagiti himno maipapan ken ni Cristo ken ti Panagungar, kas iti “He Is Risen!” (Hymns, no. 199), ket makatulong pay kadatayo a makarikna iti talna ken rag-o iti Paskua ti Panagungar. Agsapul kadagiti ragup ti balikas iti himno nga, iti opinionmo, ket mangibagi iti rag-o ti Paskua ti Panagungar.

Kitaen met iti Jeffrey R. Holland, “Not as the World Giveth,” Liahona, Mayo 2021, 35–38; Mark S. Palmer, “Our Sorrow Shall Be Turned into Joy,” Liahona, Mayo 2021, 88–90.

Adtoy ti maysa nga aktibidad a makatulong kenka a mangkita iti adu a bendision a sumangbay babaen ken ni Jesucristo ken ti Pannubbotna. Basaen dagiti nasantuan a kasuratan iti baba maipapan ken ni Jesucristo a mangtulong kadatayo a mangparmek. Padasem ti panangurnos kadagiti binatog kadagitoy a kategoria: basol, ipapatay, pannubok, ken pagkapsutan (mabalin a maibagay ti sumagmamano a binatog iti nasurok a maysa a kategoria). Bayat ti panagbasam, ania dagiti impresion nga adda kenka maipapan iti bileg ti Mangisalakan?

• Isaias 61:1–3

• Ezequiel 36:26–28

• Mateo 11:28–30

• Lucas 1:46–55

• Taga Roma 8:35–39

• Alma 7:10–13

• Alma 11:42–45

• Alma 58:11

• Moroni 10:32–33

• Doktrina ken Katulagan 19:15–19

• Moises 5:9–12

Kasano nga ilawlawagmo iti maysa a gayyem a saan a Kristiano no apay a napateg kenka ni Jesucristo? Makatulong ti mensahe ni Elder Ahmad S. Corbitt “Do You Know Why I as a Christian Believe in Christ?” (Liahona, Mayo 2023, 119–21).

Kitaen met iti Reyna I. Aburto, “The Grave Has No Victory,” Liahona, Mayo 2021, 85–87; Topics and Questions, “Atonement of Jesus Christ,” “Resurrection,” Gospel Library.

Ania ti masursurom manipud kadagiti sumaganad a bersikulo maipapan iti gatad a binayadan ni Jesucristo para iti pannakaisalakanmo: Isaias 53:3–5; Mosiah 3:7; Doktrina ken Katulagan 19:16–19? Ania ti gatad a binayadan ti Nailangitan nga Amatayo? (kitaen iti Juan 3:16).

• Ti lawas ti Paskua ti Panagungar ket nasayaat a panawen a mangisuro kadagiti annakyo maipapan iti inaramid ti Mangisalakan para kadatayo iti Getsemani ken iti krus. Mabalinmo a rugian babaen ti panangipakita kadakuada kadagiti ladawan iti baba ken bay-am ida a pagsasaritaan maipapan iti mapaspasamak kadagiti ladawan. Bayat ti panangbuya dagiti annakmo kadagiti ladawan, mabalinmo a basaen dagiti bersikulo a mangiladawan kadagitoy a pasamak (kitaen iti Mateo 26:36–46; 27:35–50; Lucas 22:39–46; Juan 19:16–30). Mabalin dagiti annakmo ti mangilawlawag kadagiti detalye kadagiti ladawan a nangngeganda kadagiti bersikulo.

• Kasano a nabendisionantayo gapu iti sakripisio ni Jesucristo? Tulongam dagiti annakmo a mangsapul kadagiti balikas ken ragup ti balikas a mangsungbat iti daytoy a saludsod iti Isaias 53:4–12; Alma 7:11–13; ken Doktrina ken Katulagan 19:16–19. Ibinglayyo iti tunggal maysa no kasano ti riknayo maipapan iti Mangisalakan kalpasan ti panangbasayo kadagitoy a nasantuan a kasuratan.

• Mabalinmo nga usaren ti panid ti aktibidad iti daytoy a lawas wenno dadduma pay a ladawan iti daytoy a balabala a mangisarita kadagiti annakmo iti estoria maipapan iti Panagungar (kitaen met iti “Nagungaren ni Jesus,” iti Dagiti Estoria iti Baro a Tulag, 139–44). Kalpasanna paisaritam kadagiti annakmo ti estoria kenka.

• Panunotem no kasano a tulongamto dagiti annakmo a mangsapul iti rag-o ken ni Cristo iti daytoy a Paskua ti Panagungar. Kas pagarigan, mabalinyo ti aggigiddan nga agkanta iti himno wenno kanta maipapan iti Paskua ti Panagungar kas iti “Christ the Lord Is Risen Today” (Hymns, no. 200) wenno “Gethsemane” (Gospel Library). Tapno mangsapul iti dadduma pay a kanta maipapan iti Panangungar, mabalinmo a kitaen iti topical index ti Hymns ken Children’s Songbook. Mabalinyo ken dagiti annakmo nga ibinglay iti tunggal maysa no apay a magustuanyo dagitoy a kanta ken no kasano ti riknayo no kantaenyo dagitoy. Ania ti isuro kadatayo dagitoy a kanta maipapan iti Nailangitan nga Ama ken ni Jesucristo?

• Addaan ti Gospel Library iti koleksion dagiti video ti Paskua ti Panagungar a mabalin a magustuan dagiti annakmo. Nalabit a mabalinmo a pagpilien ida iti maysa a buyaenda. Saludsodem kadakuada no ania ti masursuroda maipapan ken ni Jesucristo manipud iti video. Mabalinmo pay a kiddawen kadakuada a manggupgop iti mensahe ti video iti maysa a binatog.

• Bayat ti panagbuyam ken dagiti annakmo iti sapasap a komperensia iti daytoy a Paskua ti Panagungar iti udi ti lawas, tulongam ida a mangkita no mangiburay iti pammaneknek dagiti naisangsangayan a saksi ti Mangisalakan maipapan iti Panagungar. Nalabit mabalinmo ti mangaramid iti maysa nga ay-ayam manipud iti daytoy—awisen ida nga agtakder tunggal mangngegda dagiti balikas a kas iti Paskua ti Panagungar wenno Pannubbot wenno Panagungar. Ibinglay iti tunggal maysa no apay nga agyamyamankayo kadagiti pammaneknek dagiti propeta maipapan iti Mangisalakan.