Exodo 1–6

Ania ti pakaawisan ti riknam maipanggep kadagiti babbai a nailadawan iti Exodo 1–2? Kasano a nakatulongda a mangipatungpal ti plano ti Dios para kadagiti taona? Ania ti isuro kadakayo dagiti panagkagumaanda maipapan iti serbisio iti aramid ti Dios?

Sakbay a rugiam a basaen ti Exodo, mabalin a panunotem ti maysa a rigat a mapaspasaram—maysa a banag a namnamaem nga ispalennakanto ti Apo manipud iti daytoy. Ania dagiti balikas ken ragup ti balikas iti Exodo 1–3 a kasla umasping iti naespirituan a pannakabalud wenno dadduma pay a banag a sangsanguentayo ita? Kitaem pay no kasano a nagsapul dagiti annak ti Israel iti pannakaispal ken no kasano a simmungbat ti Apo (kitaen kas pagarigan, iti Exodo 2:23–25; 3:7–8). Kasano a “bimmaba tapno ispalennaka” ti Apo?

Iti intero a libro ti Exodo, mabalin a makitam pay ti sumagmamano a pagpapadaan da Moises ken Jesucristo (kitaen iti Deuteronomio 18:18–19; 1 Nephi 22:20–21). Kas pagarigan, ania dagiti pagpapadaan a makitam iti nagbabaetan ti Exodo 1:22; 2:1–10 ken Mateo 2:13–16? Wenno iti nagbabaetan ti Exodo 24:18 ken Mateo 4:1–2? Ania ti mariknam a kayat ti Apo a maawatam maipapan iti Bagina ken ti bilegna?

Mapanunotmo kadi ti panawen idi adda maysa a banag a namagsiddaaw kenka? Kasano ti reaksionmo? Kasano nga iladawam dagiti emosion a nariknam?

Laglagipem dayta bayat ti panangbasam iti Salmo 3:1–6. Ania ti makaawis iti riknam maipapan iti makaparegta a padas ni Moises? Ania ti inaramid ni Moises a nangipakita iti panagraem iti Dios? Ania dagiti koneksion a makitam iti nagbaetan dagiti tignay ken panagraemna kadagiti sagrado a banag?

Ti panangbasam kadagitoy a bersikulo ti mabalin a mangguyugoy kenka a mangpanunot maipapan kadagiti sagrado a banag ken nasantuan a lugar iti biagmo. Apay a sagrado dagitoy kenka? Kasano a tratuem ida a naiduma kadagiti banag a gagangay? Tapno maiwanwanmo ti panagutobmo, mabalinmo ti agibasar iti benneg a napauluan “Remembering the Promises” iti mensahe ni Elder David A. Bednar nga “Exceeding Great and Precious Promises” (Liahona, Nob. 2017, 91–93). Mabalinmo met ti agkanta wenno dumngeg iti himno a mangparegta iti siddaaw, kas iti “I Stand All Amazed” (Hymns, no. 193) ket utobem no ania ti maipapan iti ebanghelio a mamagsiddaaw kenka.

Siempre, uray no addaantayon kadagiti nakaskasdaaw a naespirituan a padas, adda peggad nga agbalintayo a gagangay unay maipapan kadagiti sagrado a banag. Kasano a maliklikam daytoy? Adtoy ti dua a mensahe a mangtaming iti daytoy nga isyu; piliem ti maysa, ket agsapulka kadagiti sasao a makatulong kenka: Ulisses Soares, “In Awe of Christ and His Gospel” (Liahona, Mayo 2022, 115–17); Gérald Caussé, “Is It Still Wonderful to You?” (Liahona, Mayo 2015, 98–100).

Kitaen met iti Doktrina ken Katulagan 6:10–12; 63:64.

Ita am-ammotayo ni Moises kas maysa a naindaklan a propeta ken lider. Ngem saan a nakita ni Moises ti bagina iti kasta a wagas idi damo nga inawagan Isuna ti Apo. Bayat ti panangbasam iti Exodo 3–4, ilistam dagiti pakaseknan ni Moises no kasano a sinungbatan ti Apo ti tunggal maysa. Ania ti masarakam kadagitoy a kapitulo a mabalin a mangparegta kenka no mariknam ti kinakurang? Kasano a nakitamon ti Dios a nangpabileg kenka wenno ti dadduma nga agaramid iti trabahona?

Kitaen met iti “The Church Gives Us Opportunities to Assist in God’s Work” iti “Church Organization” iti Topics and Questions, Gospel Library.

Mabalin a makaupay no dagiti napudno a panagkagumaantayo nga agaramid iti nasayaat ket kasla saan a maipatpatungpal—no ikarkarigatantayo nga agaramid iti pagayatan ti Apo ngem saantayo a makitkita dagiti bunga a ninamnamatayo. Tapno maammuan maipapan ti isu met la a padas nga adda ken ni Moises, basaen ti Exodo 5:4–9, 20–23. Kasano a tinulongan ti Apo ni Moises a mangparmek kadagiti riknana iti pannakaupay? (kitaen iti Exodo 6:1–13). Kasano a matulongannaka ti Apo nga agtultuloy iti panangaramid iti pagayatanna?

Kitaen met iti Jeffrey R. Holland, “Waiting on the Lord,” Liahona, Nob. 2020, 115–17.

• Adda maysa a kangrunaan nga akem ni Moises iti pannakawayawaya ti Israel manipud iti pannakaadipen. Ngem saanna koma a kinabaelan nga impatungpal daytoy no saan a sinalakniban ken inaywanan ti inana, ti kabsatna a babai, anak a babai ni Faraon, ken dagiti dadduma pay a napudno a babbai. Tulongam dagiti annakmo a mangsursuro maipapan kadagitoy a babbai iti Exodo 1:15–20; Exodo 2:2–10 (kitaen met iti Dagiti Numero 26:59); ken Exodo 2:16–21. Mabalinmo pay nga usaren ti panid ti aktibidad ita a lawas ken ti “Ni Maladaga a Moises” (iti Dagiti Estoria iti Daan a Tulag, 61–63) a mangisarita kadagiti estoriada. Kasano a timmulong a nangipatungpal dagitoy a babbai iti plano ti Dios? Pagsaritaan ti tunggal maysa maipapan kadagiti dadduma a tao a daydayawenyo a tumultulong iti trabaho ti Dios, agraman iti babassit ken simple a wagas. Kasano a masurottayo ti pagwadanda?

  

  1:36

• Kalpasan ti panangbasa iti Exodo 3:1–5 nga aggigiddan, kiddawem kadagiti annakmo a manggupgop kadagitoy a bersikulo iti bukodda a balikas (kitaen met iti “Ni Moises a Proteta” iti Dagiti Estoria iti Daan a Tulag, 64–66). Kasano nga impakita ni Moises ti panagraem iti imatang ti Apo? Kasano ti kayat ti Apo a panangipakitatayo iti panagraem? Mabalinmo pay a kiddawen kadagiti annakmo a tulongandaka a mangbirok (wenno agdrowing) kadagiti ladawan dagiti sagrado a lugar wenno aktibidad a nasken a pagraemantayo. Ania ti maaramidtayo a mangaramid iti pagtaengantayo a maysa a sagrado a lugar?

  

  1:26

• Aggigiddan nga agkansion iti maysa a kanta maipapan iti panagraem, kas iti “Reverence Is Love” (Children’s Songbook, 31). Bayat ti panangaramidyo, mabalinmo ken dagiti annakmo ti mangsapul kadagiti balikas wenno ragup ti balikas a mangilawlawag no ania ti kayat a sawen ti agbalin a naraem. No mangitugottayo ti maysa a gayyem iti simbaan iti umuna a gundaway, kasano a mailawlawagtayo no ania ti kaipapanan ti panagbalin a naraem?

• Iti panangusar iti salaysay iti Exodo 3; 4:1–17, pagsisinnublatem dagiti annakmo nga agpammarang nga isuda ni Moises. Mabalin a makaparagsak ti mangiraman kadagiti banag wenno simple a props, kas iti flashlight ken mula a mangibagi iti sumsumged a kayo. Tulongam ida a mangtakuat no kasano a pinaregta ti Apo ni Moises maipapan iti naituding nga aramiden nga inted ti Apo kenkuana (kitaen iti Exodo 3:11; 4:1, 10). Kalpasanna mabalinyo nga ibinglay iti tunggal maysa no naadddankayo iti kasta met laeng a rikna. Ania a balakad ti maibinglaytayo ken ni Moises a makatulong kenkuana? Basaem ti maipapan no kasano a pinaregta ti Apo ni Moises iti Exodo 3:12; 4:2–9, 11–12. Ibagam kadagiti ubbing no kasano a tinulongannaka ti Mangisalakan a mangipatungpal iti maysa a pagrebbengan (calling), mangsurot iti maysa a pannignay (prompting), wenno mangaramid iti maysa a banag a narigat para kenka.