Genesis 18–23

Nagaramid ti Apo kadagiti nagloriaan a kari kadagiti napudno, ngem no dadduma dagiti pasamak iti biagtayo ti mangigapu kadatayo tapno masdaaw no kasano a posible a maipatungpal dagita a kari. Mabalin a narikna da Abraham ken Sara ti kasdiay. Ania ti masursurom manipud kadagiti padasda? Mabalin a makatulong a rugiam ti panagadalmo babaen ti panangrebyu iti no ania ti inkari ti Apo iti Genesis 17:4, 15–22. Kasano ti reaksion da Abraham ken Sara? (kitaen met iti Patarus ni Joseph Smith, Genesis 17:23 [iti Genesis 17:17, footnote b]; Genesis 18:9–12). Kasano a simmungbat ti Apo a nangtulong kadakuada a maaddaan iti dakdakkel a pammati kadagiti karina? (kitaen iti Genesis 18:14).

Ania ti masarakam kadagitoy a bersikulo a mangbangon iti pammatim? Ania dagiti dadduma pay a padas—iti biagmo wenno iti biag ti maysa a tao—a nangpapigsa iti pammatim nga ipatungpalto ti Apo dagiti karina iti bukodna a panawen ken wagas? Mabalinmo pay nga utoben no kasano a masustenaram ti pammatim no saan a maawat dagiti naikari a bendision iti daytoy a biag. Ania a balakad ti masarakam iti Hebreo 11:8–13 ken iti mensahe ni Presidente Russell M. Nelson “Christ Is Risen; Faith in Him Will Move Mountains”? (Liahona, Mayo 2021, 101–4).

Kitaen met iti Doktrina ken Katulagan 88:68.

Ania dagiti adalen a masursurom maipapan iti yaadayo iti kinadangkes bayat ti panagbasam maipapan ken ni Lot ken ti pamiliana? Kas pagarigan, ania ti makaawis iti riknam maipapan iti kinuna ken inaramid dagiti anghel a nangtulong ken ni Lot ken ti pamiliana a nakalibas iti pannakadadael? (kitaen iti Genesis 19:12–17). Kasano ti panangtulong ti Apo kenka ken ti pamiliam nga umadayo wenno mangsapul iti pannakasaluad manipud kadagiti dakes nga impluensia iti lubong? Panunotem ti maipapan kadagiti situasion a mabalin a masulisogka a “[tumaliaw]” (bersikulo 26) no nasken a mangpadpadaanka nga addaan pammati iti Mangisalakan. Ania ti inayon ti Lucas 9:62 iti pannakaawatyo iti daytoy a konsepto?

Kitaen met iti Patarus ni Joseph Smith, Genesis 19:9–15 (iti Pangiwanwan iti Nasantuan a Kasuratan).

Insuro ni Elder Jeffrey R. Holland:

“Nalawag, a ti biddut iti asawa ni Lot ket saan laeng a tumaltaliaw isuna; iti pusona tinarigagayanna ti agsubli . Makita nga uray sakbay a nalabsannan dagiti beddeng ti siudad, kailiwnan no ania ti indiaya ti Sodoma ken Gomorra kenkuana. …

“Posible a timmaliaw ti asawa ni Lot nga addaan iti sakit ti nakem iti Apo iti panagidawatna kenkuana a tallikudanna. … Ngarud saan a basta laeng timmaliaw isuna; timmaliaw a sitatarigagay. Iti ababa a pannao, ti pammategna iti napalabas ti nangrimbaw iti panagtalekna iti masakbayan. Nalawag, a dayta ti paset ti basolna.

“… Ipakaasik kadakayo a saanyon a lagipen dagidi nga aldaw a napalabas wenno pagtarigagayan dagiti awan kaes-eskanna a naglabas nga aldaw, nupay nagbalin a nasayaat dagidi nga aldaw. Nasken nga agbalin nga adal ti napalabas ngem saan a pagbiagan. Taliawentayo ti napalabas tapno mangala kadagiti beggang manipud kadagiti agrimrimat a padas ngem saan a kadagiti dapo. Ken no nasursurotayon no ania ti nasken a masursurotayo ken nangyeg kadatayo ti kasayaatan a napadasantayon, ngarud agtultuloytayo ken laglagipen a ti pammati ket kanayon a nakatudo iti masakbayan. …

“… Ti pananglagip iti biag iti napalabas, agraman kadagiti napalabas a biddut, ket saan a nasayaat! Saan a daytoy ti ebanghelio ni Jesucristo. …

“Iti amin a [tattao] ti tunggal kaputotan, yawagko, ‘Laglagipenyo ti asawa ni Lot’ [Lucas 17:32]. Ti pammati ket para iti masakbayan. Nabangon ti pammati iti napalabas ngem saan iti kaano man nga agtarigagay nga agtalinaed sadiay. Agtalek ti pammati nga addaan ti Dios kadagiti naindaklan a banag a nailatang para iti tunggal maysa kadatayo ken pudno a ni Cristo ti “kangatuan a saserdote dagiti naimbag a bambanag nga umayto’ (Hebreo 9:11)” (“The Best Is Yet to Be,” Ensign, Ene. 2010, 24, 26–27).

Nupay ditayo ammo ti amin a gapu a binilin ti Dios ni Abraham a mangidaton ken ni Isaac kas maysa a sakripisio, ammotayo a maysa a pannubok daytoy ti pammatina iti Dios. Ammotayo pay a daytoy ti “kaasping ti Dios ken ti Bugbugtong nga Anakna” (Jacob 4:5). Bayat ti panangbasam iti Genesis 22:1–19, mabalinmo a sapulen dagiti simbolo wenno pagpadaan ti panangidaton ni Abraham ken ni Isaac ken ti panangidaton ti Ama iti Anakna, ni Jesucristo. Ibilang ti panangisurat no ania ti masarakanyo iti tsart a kas iti daytoy:

Ania dagiti simbolo wenno pagpapadaan iti pangsubbot a sakripisio ti Mangisalakan a masarakam a kapatgan iti kaipapanan? Ibilang ti panagkanta wenno panagbasa kadagiti liriko ti maysa a himno a mangipakita iti ayat ti Nailangitan nga Ama para kadatayo, kas iti “God Loved Us, So He Sent His Son,” Hymns, no. 187. Mabalinmo pay nga isurat ti riknam maipapan iti Nailangitan nga Ama ken ni Jesucristo ken ti sakripisioda para kenka.

No kayatmo nga adalen ti ad-adu pay maipapan iti sakripisio ti Mangisalakantayo, ibilang ti panangbasa iti mensahe ni Presidente Jeffrey R. Holland “Behold the Lamb of God” (Liahona, Mayo 2019, 44–46). Apay a ti maysa a kordero ket kasta a nabileg a simbolo ti Anak ti Dios? Ania ti insuro ni Presidente Holland a mangpadakkel iti panagraemmo iti sagut ti Nailangitan nga Ama?

Kitaen met iti “Akedah (The Binding)” (video), Gospel Library.

12:57

• Tapno masursuro ti panagtalek da Abraham ken Sara kadagiti kari ti Dios, mabalinmo ken dagiti annakmo a pagsasaritaan maipapan iti panawen a masapul nga urayenda ti maysa a banag a talaga a tarigagayanda. Kalpasanna, mabalinmo a kitaen ti ladawan da Sara ken Isaac iti rugi daytoy a balabala ken pagsaritaan ti kari nga inaramid ti Dios kenkuana ken ni Abraham (kitaen met iti “Da Abraham ken Sara,” iti Dagiti Estoria iti Daan a Tulag, 28–31). Tulongam dagiti annakmo a mangpanunot kadagiti banag nga inkari ti Dios kadatayo no napudnotayo. Allukoyem ida nga agan-anus ken agtalek a tungpalento ti Dios dagiti karina.

  

  2:20

• Tapno matulongan dagiti annakmo a makasursuro iti napateg a kinapudno iti Genesis 18:14, mabalinmo nga isurat ti tunggal balikas manipud iti umuna a binatog dayta a bersikulo iti nagsisina a papel. Kalpasanna, paglalaokem dagiti papel, ket awisem dagiti annakmo a mangurnos kadagitoy a balikas iti umisu nga urnos. Kalpasanna mablinmo ken dagiti annakmo a mangbasa iti Genesis 17:15–21; 21:1–7 tapno mangsapul iti maysa a pagarigan ti maysa a banang nga inaramid ti Apo a kasla imposible. Ibinglaymo kadagiti annakmo ti pammatim nga ipatungpalto ti Apo dagiti karina, uray no kasla imposible wenno mabayag.

• Saludsodem kadagiti annakmo maipapan kadagiti kasasaad a mabalin nga awisen ida ti maysa a tao nga agaramid iti maysa a banag nga ammoda a saan nga umisu. Kasano a “pumanaw[tayo]” kadagitoy a situasion? Gupgopem ti Genesis 19:15–26 babaen ti panangilawlawag a nagindeg ti pamilia ni Lot iti maysa a nakadangdangkes a siudad, ket binallaagan ida dagiti anghel a pumanaw. Bayat ti panagbasayo ken dagiti annakyo nga aggigiddan kadagiti bersikulo 15–17, 26, saludsoden kadakuada no ania ti mabalin a kaipapanan kadatayo ita ti “agtaray” iti kinadakes ken “ditayo tumaltaliaw” (bersikulo 17).

• Ti panangusar kadagiti ladawan da Abraham ken Isaac ken ti Pannakailansa iti krus (kitaen iti Gospel Art Book, nos. 9, 57) ket makatulong kadagiti annakyo a mangidilig iti estoria iti Genesis 22 iti sakripisio ti Mangisalakan (kitaen iti Mateo 27:26–37). Ania ti masursurotayo maipapan iti Nailangitan nga Ama ken ni Jesucristo manipud kadagiti salaysay da Abraham ken Isaac ken ti Pannakailansa iti krus? (Kitaen met iti “Da Abraham ken Isaac,” iti Dagiti Estoria iti Daan a Tulag, 34–37.)

  

  2:0

• Makapanunotka kadi iti maysa a simple a game nga ay-ayamen dagiti annakmo a kasapulan a surotenda dagiti direksion? Nalabit a mabalin nga agturong dagiti direksion iti nailemmeng a ladawan ti Mangisalakan. Mabalin a mangguyugoy ti ay-ayam iti saritaan maipapan kadagiti banag nga imbilin nga aramidentayo ti Nailangitan nga Ama tapno makapagindegtayo manen Kenkuana ken ni Jesucristo. Ibilang ti panangkansion iti maysa a kanta kas iti “Keep the Commandments” (Children’s Songbook, 146–47). Makatulong met ti panid ti aktibidad itoy a lawas.