Genesis 42–50

Nadlawmo kadi dagiti ania man a pagpapadaan iti nagbaetan ti biag ni Jose ken ti pangsubbot a mision ni Jesucristo? Tapno makitam ti sumagmamano a pagarigan kadagitoy a panagpapada, padasem ti panangidilig:

• Genesis 37:3 iti Mateo 3:17.

• Genesis 37:26–28 iti Mateo 26:14–16.

• Genesis 45:5–7 iti Lucas 4:18.

• Genesis 47:12 iti Juan 6:35.

Ania dagiti impresionmo maipapan iti Mangisalakan ken ti misionna bayat ti panangbasam kadagitoy a binatog?

Ti panangbasa maipapan iti panangpakawan ni Jose kadagiti kakabsatna gapu kadagiti naulpit a banag nga inaramidda kenkuana ket mabalin a mangguyugoy kenka a mangpanunot iti maysa a tao nga agdama nga ikarkarigatam a pakawanen. Mabalin a makatulong kenka dagiti sumaganad a saludsod bayat ti panagkagumaam a mangyaplikar iti daytoy a pagbatayan:

• Apay a mabalin koma a narigat a pakawanen ni Jose dagiti kakabsatna? (Tapno irebyu no ania ti inaramidda kenkuana, kitaen iti Genesis 37). Ania a padas wenno galad ti mabalin a nangted iti pigsa ken ni Jose tapno mamakawan? (kitaen, kas pagarigan, iti, Genesis 45:1–15 wenno 50:15–21).

• Ania dagiti bendision a simmangbay manipud iti panangpakawan ni Jose kadagiti kakabsatna? Kas pagarigan, idasig dagiti relasion iti pamilia ni Jacob iti rugi ti estoria (kitaen, kas pagarigan, iti Genesis 37:3–11) kadagiti relasion iti udina (kitaen iti Genesis 45:9–15; 50:15–21). Kasano a mabalin a naiduma ti nagbalbaliwan dagiti banag no saan koma a nagtallugod ni Jose a mamakawan?

• Ibilang ti panangisurat iti nagan ti maysa a tao a mabalin a makasapul iti pammakawanmo—nagkiddawda man iti pammakawan wenno saan. Ania ti maaramidam a mangawis iti makaagas a bileg ti Mangisalakan iti dayta a kasasaad? No kasla narigat unay ti panangpakawan, ibilangmo ti panangrebyu iti balakad ni Elder Gerrit W. Gong kadagiti maudi nga innem a parapo ti mensahena “Happy and Forever” (Liahona, Nob. 2022, 85). Ania ti masarakam a makaited kenka iti namnama a kabaelam ti mamakawan?

Kitaen met iti Doktrina Ken Katulagan 64:9–11; “Forgiveness: My Burden Was Made Light” (video), Gospel Library.

8:24

Naglaon dagiti bendision ni Jacob iti kaputotanna iti nalawag a pannakailadawan, ngem saan a nalaka a maawatan dagitoy. Napnuan iti panagyaman, nangted kadatayo ti naisubli nga ebanghelio iti sumagmamano a tulong. No basaem ti bendision ken ni Jose iti Genesis 49:22–26, basaem met dagiti sumaganad a bersikulo, ket kitaem no ania dagiti nalawag a pannakaammo ken pannakaawat nga ipaayda: 1 Nephi 15:12; 2 Nephi 3:4–5; Jacob 2:25; Doktrina ken Katulagan 50:44.

Bayat ti panangbasam maipapan iti bendision ni Juda iti Genesis 49:8–12, laglagipem nga an-annabo ni Juda ni Jesucristo. Ania ti masarakam kadagitoy a bersikulo a mangipalagip kenka iti Mangisalakan? (kitaen met iti Apocalipsis 5:5–6, 9; 1 Nephi 15:14–15; Doktrina ken Katulagan 45:59; 133:46–50).

Ti panangbasa kadagitoy a bendision ket mabalin a mangparegta kenka a mangrebyu iti bendisionmo iti patriarka—wenno, no awananka pay, mangawatka iti maysa. Ania dagiti balikas ken ragup ti balikas iti bendisonmo ti mangipalagip kenka maipapan ken ni Jesucristo?

Kitaen met iti Randall K. Bennett, “Your Patriarchal Blessing—Inspired Direction from Heavenly Father,” Liahona, Mayo 2023, 42–44.

Nupay mabalin a saan a nalawag dagiti napasaranna a pannubok, idi agangay kinabaelan ni Jose ti nangtaliaw iti rigatna iti Egipto ken nakitana a “pinagbalin ti Dios a naimbag daytoy” (Genesis 50:20). No nasarungkaram ni Jose bayat ti kaaddana iti abut wenno iti pagbaludan, kasano koma ti panangliwliwam kenkuana? Kasano a matulongannaka ti Genesis 50:19–21 kadagiti panawen ti pannubok?

Kitaen met iti Doktrina ken Katulagan 122; “How Firm a Foundation,” Hymns, no. 85.

Bayat ti panangbasam iti Genesis 50:24–25 ken ti Patarus ni Joseph Smith, Genesis 50:24–38 (iti Pangiwanwan iti Nasantuan a Kasuratan), utobem no apay a napateg koma a maammuan ni Jose ti maipapan kada Moises ken Joseph Smith iti adu a siglo a nasaksakbay. Kasano a naipatungpal ni Joseph Smith dagiti padto ni Joseph maipapan kenkuana? (kitaen iti Doktrina ken Katulagan 1:17–23; 20:7–12; 39:11; 135:3).

• Mabalin a makaparagsak kadagiti annakmo a mangyakem manen ti estoria ni Jose a makitipon manen iti pamiliana (kitaen iti Genesis 42–44). Wenno mabalinda nga usaren ti “Ni Jose ken ti Panagbisin” (iti Dagiti Estoria iti Daan a Tulag, 57–60) wenno dagiti ladawan iti daytoy a balabala a mangisuro ti estoria iti tunggal maysa. Adtoy ti sumagmamano a saludsod a makatulong kadagiti annakmo nga agsursuro manipud iti estoria:

  • Ania ti inaramid ni Jose a nangipakita iti ayat para iti pamiliana? (kitaen iti Genesis 45:4–15).

  • Apay a mariknayo a pinakawan ni Jose dagiti kakabsatna?

  • Kasano iti panagkunayo ti narikna dagiti kakabsat ni Jose idi naammuanda a pinakawan ida ni Jose? Asino iti biagyo ti agkasapulan a mapakawan? Kasano a maipakitayo ti ayat ken pammakawanyo?

  

  2:26

• Mabalin a kayatmo wenno dagiti annakmo ti mangibinglay iti maysa a padas idi pinakawanda ti maysa a tao wenno idi pinakawan ida ti maysa a tao. Mabalinyo ti agkasion iti maysa a kanta kas iti “Love One Another” (Children’s Songbook, 136) wenno “Help Me, Dear Father” (Children’s Songbook, 99).

• Mabalinmo ken dagiti annakmo ti kumita iti ladawan ni Jacob a mangbembendision kadagiti annakna a lallaki iti ungto daytoy a balabala ken pagsasaritaan no ania ti mapaspasamak (kitaen iti Genesis 48:8–9). No kasapulan, ilawlawag a tarigagayan ni Jacob, ti ama ni Jose, a mangted kadagiti bendision ti priesthood iti pamiliana. Nalabit mabalinyo nga ibinglay iti tunggal maysa ti aniaman a kapadasanyo iti yaawat iti tulong manipud iti Dios babaen ti bendision ti priesthood. Ania ti sumagmamano a gapu a mabalin a pagdawatantayo iti maysa a bendision ti priesthood?

• Kasano a matulongam dagiti annakmo a makakita iti Mangisalakan iti estoria ni Jose a mangisalsalakan iti pamiliana manipud iti panagbisin? Ibilang ti panagaramid iti tsart nga addaan iti dua a kolum a naikkan iti label a Jose ken Jesucristo. Tulongam dagiti annakmo a mangsukisok kadagiti sumaganad a paris dagiti nasantuan a kasuratan ket punnuan ti tsart kadagiti banag a pagpadaan da Jose ken Jesus: Genesis 37:3 ken Mateo 3:17; Genesis 37:26–28 ken Mateo 26:14–16; Genesis 45:5–7 ken Lucas 4:18; ken Genesis 47:12 ken Juan 6:35.

• Saludsodem kadagiti annakmo no ania ti kaipapanan ti isalakan wenno ispalen ti maysa a tao. No adda man kadakuada ti addaan iti maysa a padas a naisalakan wenno naispal manipud iti peggad, awisem ida a mangibinglay. Kasano nga insalakan ni Jose dagiti kakabsatna? (kitaen iti Genesis 42:1–3; 45:5–7). Kalpasanna mabalinyo nga aggigiddaan a mangkita iti ladawan ti Mangisalakan ket kiddawen kadagiti annakmo a mangisarita maipapan no kasano nga isalakannatayo ni Jesus.