Genesis 37–41

Iti panawen ken manen, kasla binaybay-an ti naimbag a gasat ni Jose, ngem di kaano man binaybay-an ti Apo. Bayat ti panangbasam iti estoria ni Jose, utobem dagiti saludsod kas kadagitoy: Ania ti inaramid ni Jose tapno agtalinaed nga asideg iti Apo? Kasano nga adda ti Apo “kenkuana”? (kitaen iti Genesis 39; 40:1–19; 41:9–45). Ania ti masursurom manipud iti estoria ni Jose a makatulong kenka a mangbigbig iti kaadda ti Dios iti biagmo?

Mabalinmo pay ti agdamag kadagiti isu met la a saludsod maipapan iti biagmo. Ania ti pakakitaan a nakitamon a dinaka binabay-an ti Apo kadagiti panawen ti pannubok? Ibilangmo no kasano a maibinglaymo dagiti padasmo kadagiti miembro ti pamiliam ken dagiti masakbayan a kaputotan (kitaen iti 1 Nephi 5:14).

Siempre, maaddaankanto pay iti dadduma a pannubok iti masakbayan. Ania ti mabalinmo nga aramiden ita a makatulong a mangsigurado a dagitoy a pannubok ket saan a mangyadayo kenka iti Apo? Ibilangmo ti panangaramid iti surat a mangparegta iti masakbayan a bagim nga agtalinaed a nasinged Kenkuana aniaman ti mapasamak. Mabalinmo nga iraman dagiti nalawag a pannakaammo ken pannakaawat manipud iti mensahe ni Elder D. Todd Christofferson “Our Relationship with God” (Liahona, Mayo 2022, 78–81).

Kitaen met iti Juan 14:18; Taga Roma 8:28; Alma 36:3; Doktrina ken Katulagan 121:7–8; “Abide with Me!,” Hymns, no. 166.

Adda sagut ni Jose a mangilasin (discern) kadagiti mensahe manipud iti Apo babaen kadagiti tagtagainep. Ania ti masursurom manipud iti Genesis 37:5–11; 40:5–8; 41:14–25, 37–38 maipapan iti panangawat ken pannakaawat iti paltiing manipud iti Apo? Kas pagarigan, ania ti masursurom manipud iti pagwadan ni Jose no kasla narigat a maawatan ti paltiing? (kitaen iti Genesis 40:8; 41:16).

Utobem no kasano ti panangipalgak ti Apo iti pagayatanna kenka. Ania ti ar-aramidem tapno agtignay iti paltiing nga inted ti Apo kadakayo? Kasano nga agkalkalikagumka a manggun-od iti nayon a pannarabay manipud Kenkuana?

No mangted ni Jose iti balakad no kasano a pagkedkedan ti sulisog nga agaramid iti seksual a basol, ania ti panagkunam nga isaona? Panunotem ti maipapan iti daytoy bayat ti panangbasam iti maipapan iti padasna iti Genesis 39. Kas pagarigan, ibilang no kasano a makaresponde ni Jose kadagiti pakaseknan kas kadagitoy:

• No awanen ti sabali a makaammo iti ar-aramidek, ania ti dakkel a banag? (kitaen kadagiti bersikulop 8–9).

• Pinadasko a pagkedkedan, ngem kasla saan nga agsardeng ti pannulisog (kitaen iti bersikulo 10).

• Ania ti nasken nga aramidek no addaak iti maysa a situasion a napigsa ti sulisog? (kitaen iti bersikulo 12).

Kasano nga ilawlawagmo no apay a napateg ti panagtulnog iti linteg ti kinadalus? (kitaen iti Para iti Pigsa dagiti Agtutubo: Maysa a Pangiwanwan iti Panagpili, 23–28).

Siempre, ti pagwadan ni Jose ket mabalin a mayaplikar iti dadduma a kita ti sulisog. Sipapanunot iti padas ni Jose, ibilang ti panangplano iti panangliklik ken panangkedked iti pannulisog. Kas pagarigan, mabalinmo ti agpanunot iti maysa a pannulisog, mangisurat kadagiti situasion a liklikam ken mangplano no kasano nga “umadayoka” no adda rumsua a pannulisog.

Adtoy ti sumagmamano a nasantuan a kasuratan a mabalin a mangipakaammo iti planom. Ania ti masursurom iti tunggal maysa maipapan iti no kasano a matulongannaka ti Mangisalakan a mangkedked iti pannulisog? Mateo 4:1–11; 1 Taga Corinto 10:13; 1 Nephi 15:23–24; 3 Nephi 18:17–18.

Bayat ti panangaramidmo iti planom, mabalin pay a makatulong no panunotem maipapan dagiti panawen iti napalabas a sibaballigi a liniklikam wenno pinagkedkedam ti sulisog. Kasano a tinulongannaka ti Mangisalakan? (kitaen iti 2 Nephi 4:18–33).

Ti panangyulog ni Jose iti tagtagainep ni Faraon ti nangiturong iti sumagmamano a nainsiriban ken maaramat unay a balakad para iti pannakalasat iti panagbisin (kintaen iti Genesis 41:15–57). Ibilang no ania dagiti naespirituan a mensahe ti Apo para kenka iti daytoy a salaysay. Kasano ti mariknam a tarigagayanna nga isaganam para kadagiti pagrigatan iti masakbayam?

Kitaen met iti David A. Bednar, “We Will Prove Them Herewith,” Liahona, Nob. 2020, 8–11.

• Ti panagbasa maipapan kadagiti sakit ti nakem iti pamilia ni Jose ket mabalin a mangtignay iti panaglilinnawag maipapan iti no kasano ti nasken a panangtratotayo kadagiti miembro ti pamilia. Tapno isarita ti estoria ni Jose ken dagiti kakabsatna a lallaki manipud iti Genesis 37, mabalinmo nga usaren dagiti ladawan iti daytoy a balabala wenno iti “Dagiti Naparegta a Tagtagainep ni Jose” (iti Dagiti Estoria iti Daan a Tulag, 47–51). Paibinglay kadagiti annakmo dagiti detalye nga ammoda maipapan iti estoria. Mabalinmo a kiddawen kadagiti annakmo a mangipapan nga addada iti pamilia ni Jose. Ania ngata ti imbaga wenno inaramidda tapno agbalinda a mamagkappia iti pamilia? Kas pagarigan, ania ti kayat a sawen ti “agsao a sitatalna” iti pamiliatayo? (bersikulo 4). Kasano a mamagkappia ni Jesucristo iti pamilia ti Dios?

  

  2:17

• No maipasango dagiti annakmo kadagiti narigat a panawen, nasken nga ammoda nga addanto ti Apo kadakuada, a kas idi kaaddana ken ni Jose. Nalabit a matulonganyo dagiti annakyo a mangilista kadagiti naririgat a banag a napasamak ken ni Jose (kitaen iti Genesis 37:23–28; 39:20; wenno “Dagiti Naparegta a Tagtagainep ni Jose” ken “Ni Jose iti Egipto,” iti Dagiti Estoria iti Daan a Tulag, 47–51, 52–56). Kalpasan ti tunggal rigat a masarakanda, awisem dagiti annakmo a mangulit, “Adda idi ti Apo ken ni Jose” (Genesis 39:2).

  

  2:17

  

  2:50

• Nalabit mabalin a sukisoken dagiti annakyo ti Genesis 39:1–3, 20–23 para iti tunggal pagarigan ti ragup ti balikas nga “Adda idi ti Apo ken ni Jose” ken dagiti umasping a ragup ti balikas. Paibinglaymo kadakuada no ania ti panagkunada a kayat a sawen ti ragup ti balikas. Kasano nga ammotayo nga adda ti Apo kadatayo? Ibagayo iti tunggal maysa no kasano ti nariknayo idi adda ti Dios kadakayo kabayatan ti narikut a panawen.

• Adtoy ti maysa a banag nga adalen a makatulong kadagiti annakyo a mangsurot iti pagwadan ni Jose nga immadayo manipud iti asawa ni Potifar: Agusar iti dua a magnet a mangibagi kada Jesucristo ken Satanas. Usaren ti maysa a bassit a banag a metal, kas iti paper clip, a mangibagi kadatayo. Kalpasanna, bay-am a makita dagiti annakmo no kasano a napigpigsa ti impluensia ti magnet iti metal a banag no yas-asidegda ti banag iti daytoy. Kasano a mangiladawan ti padas ni Jose iti Genesis 39:7–12 iti daytoy a kinapudno? Ania ti maaramidtayo tapno umadayotayo iti basol ket umas-asidegtayo ken ni Jesus? Ti video “Temptation Fades as We Seek Christ in Every Thought” (Gospel Library) ken ti kanta kas iti “I Need Thee Every Hour” (Hymns, no. 98) ti makatulong iti daytoy a panaglilinnawag.

  

  2:58

  Agusar iti musika. “Makatulong kadagiti ubbing dagiti himno ken dadduma pay a sagrado a kanta a mangrikna iti ayat ti Dios, mangrikna iti Espiritu, ken mangsursuro kadagiti kinapudno ti ebanghelio. Makatulong kadagiti ubbing dagiti melodia, ritmo, ken simple a rhyme tapno manglagip kadagiti kinapudno ti ebanghelio kadagiti sumangbay a tawen. No makipagkantaka kadagiti ubbing, tulongam ida a mangtakuat ken mangawat kadagiti pagbatayan a naisuro kadagiti kanta” (Panangisuro iti Wagas ti Mangisalakan, 32). .

• Tulongam dagiti annakmo a mangpanunot kadagiti pannulisog a mabalin a pakaipasanguanda. Payakem kadakuada no kasano a mabalinda nga “umadayo” manipud kadagitoy a pannulisog.