Genesis 24–33

Bayat ti panangbasam iti Genesis 24, saludsodem iti bagim no apay nga imbilang ni Abraham a napateg unay ti panagkallaysa ni Isaac nga anakna. Apay a napateg iti Dios ti kallaysa?

Ania dagiti kababalin a masarakam ken Rebecca a makatulong iti natibker a panagdenna kas agassawa ken pamilia? (kitaen nangnangruna kadagiti bersikulo 15–28, 57–61).

Kitaen met iti Topics and Questions, “Marriage,”Gospel Library.

Iti kultura da Isaac ken Rebecca, ti inauna nga anak ti nangawat iti kalintegan kas inauna, a kaipapananna ti dakdakkel a tawid, nga agraman ti dakdakkel a responsibilidad iti panangaywan iti pamilia. Bayat ti panangbasam iti Genesis 25:29–34, utobem no apay a mabalin a nagtallugod ni Esau a mangisuko iti kalinteganna kas inauna a kasukat ti maysa a makan. Ania dagiti adalen a masarakam para iti bagim iti daytoy a salaysay? Mabalin a makatulong ti panangaramid iti dua a listaan: (1) dagiti agnanayon a bendision a kayat nga ited kenka ti Dios ken (2) dagiti nailubongan a banag a mabalin a mangsinga kenka. Kalpasanna mabalinmo a basaen ti binatog, a mangsuksukat iti “kalintegan kas inauna [birthright]” iti maysa a banag manipud iti umuna a listaan ken mangsuksukat iti “sopas [pottage]” iti maysa a banag manipud iti maikadua a listaan. Kasano a maipamaysam ti Mangisalakan ken dagiti agnanayon a bendision ti ebangheliona?

Kitaen met iti Mateo 6:19–33; M. Russell Ballard, “Remember What Matters Most,” Liahona, Mayo 2023, 105–7.

Bayat ti panagturogna iti rabaw dagiti bato, adda tagtaginep ni Jacob a namagbalbaliw iti biagna. Maysa daytoy a sagrado a padas ta pinanaganan ni Jacob ti lugar iti Betel, wenno “balay ti Dios,” a nangipakpakdaar, “Adda gayam ditoy a lugar ti Apo” (Genesis 28:16).

Bayat ti panangbasam iti Genesis 28, mabalinmo a saludsoden iti bagim no ania ti namagbalin iti daytoy a padas a sagrado unay ken ni Jacob. Ania ti mapaspasaranna iti dayta a kanito? Kasano koma ti mabalin a rikna ni Jacob? Mabalinmo pay a sapulen dagiti balikas ken ragup ti balikas kadagiti berikulo 10–22 a mangipalagip kenka iti balay ti Apo. Ania dagiti impresion a maawatmo maipapan iti Dios, ti balayna, ken dagiti katulaganna?

Iti ungto daytoy a balabala adda naipinta a ladawan a mangiladawan iti tagtagainep ni Jacob; mabalinmo a pagibasaran daytoy bayat ti panagbasam. No nasken a mangparnuayka iti bukodmo nga artistiko a panangiladawan iti tagtagainepna, ania koma ti aramidem? Ania dagiti kinapudno manipud iti estoria a padasem nga iladawan?

Ti himno a “Nearer, My God, to Thee” (Hymns,, no. 100) ket maibatay iti padas ni Jacob. Ania dgiti koneksion a makitam iti nagbaetan daytoy a kanta ken ti Genesis 28:10–22? Kasano a matulongannaka ti templo a makarikna nga as-asidegka iti Dios? Ibilang ti panagsapul kadagiti sungbat iti daytoy a saludsod iti mensahe ni Presidente Russell M. Nelson “The Temple and Your Spiritual Foundation” (Liahona, Nob. 2021, 93–96). Mabalin pay a kayatmo nga irebyu dagiti katulagan ken bendision ti balay ti Apo iti General Handbook, 27.2 (Gospel Library). Kasano a ti panangtungpal kadagitoy a katulagan ket mangyeg iti bileg ti Dios iti biagmo?

Bayat ti panangbasam iti Genesis 29:31–35 ken 30:1–24, sapulem dagiti balikas ken ragup ti balikas a mangiladladawan iti asi ti Dios kada Raquel ken Lea. Utoben no kasano a ti Dios “nakitana ti liday[mo]” ken “linagipna[ka]” (Genesis 29:32; 30:22).

Idi nagsubli ni Jacob iti Canaan, “nagbuteng ken nariribukan” maipapan no kasano nga awaten isuna ti kabsatna, ni Esau (Genesis 32:7). Bayat ti panangbasam iti Genesis 32–33, utobem dagiti bukodmo a relasion ti pamilia—nalabit nangnangruna ti maysa a kasapulan ti pannakaagas. Nalabit a makaparegta kenka daytoy nga estoria a mangtulong iti maysa a tao. Mabalin a mangtarabay dagiti kastoy a saludsod iti panagbasam:

• Kasano a nagsagana ti Jacob a makipagkita ken ni Esau?

• Ania ti napateg kenka maipapan iti kararag ni Jacob a masarakan iti Genesis 32:9–12?

• Ania ti masursurom maipapan iti pammakawan manipud iti pagwadan ni Esau?

• Kasano a matulongannatayo ti Mangisalakan a mangpaimbag kadagiti relasion iti pamilia?

• Tapno maitampok ti makaawis rikna a pagwadan ni Rebecca iti kinaimbag, mabalinmo nga ipakita kadagiti annakmo ti ladawan iti baba wenno ti panid ti aktibidad ita a lawas bayat ti pananggupgopmo iti estoria iti Genesis 24:10–21. Mabalin a magustuan dagiti annakmo ti mangyakem iti estoria. Makaiturong daytoy iti saritaan maipapan kadagiti aramid ti kinaimbag a nakitamon ken dagiti annakmo.

• Agkansion iti maysa a kanta maipapan iti kinaimbag, kas iti “Kindness Begins with Me” (Children’s Songbook, 145). Mabalin a dumngeg dagiti annakmo iti balikas a “kinaimbag” (wenno maysa a kapada a balikas) ket tumakderda no mangngegda daytoy. Kasano a makapagbalintayo a naimbag a kas ken ni Rebecca?

• Ibilang ti panangusar iti “Da Jacob ken Esau” (iti Dagiti Estoria iti Daan, 38–41) tapno matulongan dagiti annakmo a makaawat iti estoria iti Genesis 25:21–34. Mabalin a mailadawan dagiti annakyo a kiniddaw ni Esau ti balakadda no nasken nga isukatna iti lugaw ti kalinteganna kas inauna. Ania koma ti isaoda kenkuana?

  

  2:5

• Ania dagiti banag nga agnanayon a napateg kenka ken kadagiti annakmo? Nalabit a mabalin a sapulen dagiti annakmo dagiti ladawan wenno banag a mangibagi kadagitoy a banag. Kasano a maipakitatayo iti Apo a napateg dagitoy a banag kadatayo?

• Bayat ti panagbasayo iti Genesis 28:10–22 nga aggigiddan, mabalinmo ti agusar iti maysa nga agdan wenno staircase (wenno ladawan a kas iti adda iti ungto daytoy a balabala) tapno pagsaritaan no kasano a kasla maysa nga agdan dagiti katulagantayo. Nalabit a mabalin nga agpammarang dagiti annakmo nga umul-ulida iti agdan bayat ti panagsaritam maipapan kadagiti panawen no agkaritayo nga agtungpal iti Dios, kas no agbuniagtayo, umawat iti sakramento, wenno mapan iti templo. Kasano a yas-asidegnatayo iti Dios dagiti katulagantayo?

• Tapno mayam-ammo dagitoy a bersikulo, mabalinmo nga ilawlawag a kalpasan ti adu a tawen a sakit ti nakem, makipagkita manen ni Jacob ken ni Esau. Aggigiddan a basaen ti Genesis 32:6–11. Kasano ti narikna ni Jacob? Ania ti inaramidna tapno makaala iti tulong? Aggigiddan a basaen ti Genesis 33:1–4 tapno takuaten no kasano a sinungbatan ti Apo ti kararag ni Jacob. No makasaodatayo da Jacob ken Esau ita, ania koma ti ibagada a mangtulong kadatayo no adda sinnupanget iti pamiliatayo?