Genesis 12–17; Abraham 1–2

“Inimpluensiaandatayo amin dagiti pamiliatayo [ken] ti kulturatayo,” insuro ni Elder Neil L. Andersen, “ngem mamatiak nga adda maysa a lugar iti kaunggantayo a naidumduma ken agmaymaysatayo a mapengdan ken maparnuay. … Iti kamaudianan, dagiti akin-uneg a tarigagaytayo ket maikkantayo iti biag ken makitada kadagiti pilitayo ken kadagiti tignaytayo” (“Educate Your Desires, Elder Andersen Counsels,” ChurchofJesusChrist.org). Ibilang no kasano a maipakita ti Abraham 1:1–19 no ania ti insuro ni Elder Andersen. Mabalin a makatulong dagiti kastoy a saludsod:

• Ania ti tinarigagayan ni Abraham? Kasano a pakakitaan dagiti tarigagayna kadagiti tignayna? Kasano a sinuportaran ti Dios dagiti tarigagayna?

• Ania dagiti tagigagaymo? Kasano a pakakitaan dagitoy kadagiti tignaymo? Kasano a mangsuporta ti Dios kenka?

• Ania ti mensahe dagitoy a bersikulo para kadagiti tao a dagiti miembro ti pamiliada ket saan nga agtarigagay iti kinalinteg?

Maysa kadagiti kaindaklanan a taigagay da Abraham ken Sara—a maaddaan iti maysa nga anak—ket saan a naipatungpal iti uneg ti adu a tawen (kitaen iti Genesis 15:1–6). Ania ti masursuroyo manipud iti Hebreo 11:8–13 maipapan iti no kasano a sinango da Abraham ken Sara daytoy a pannubok? Kasano a tulongannaka ti Mangisalakan a “mangarakup” kadagiti karina, uray no “adayo” dagitoy?

Kitaen met iti “Deliverance of Abraham” (video), Gospel Library.

1:38

Apay a napateg a maammuam maipapan iti katulagan nga inaramid ti Dios ken ni Nephi? Gapu ta tarigagayan ti Dios nga agaramid iti isu met la a katulagan kenka. Inkarina nga agtultuloy daytoy a katulagan iti kaputotan ni Abraham, wenno “bukel,” ken “kas iti kaadu ti umawat iti daytoy nga Ebanghelio ket … maibilangto kadagiti bukelmo” (kitaen iti Abraham 2:10–11). Iti sabali a pannao, agtultuloy ti katulagan kenka—no mabuniaganka ken ad-adda a kumpleto no aramidem dagiti katulangan iti templo (kitaen iti Taga Galacia 3:26–29; Doktrina ken Katulagan 132:30–32).

Para iti dayta a gapu, mabalin a kayatmo nga adalen ti Abraham 2:6–11 ket ilistam no ania, ti ekasakto, nga inkari ti Dios kada Abraham ken Sara (kitaen met iti Genesis 12:1–3; 13:15–16; 15:1–6; 17:1–8, 15–22). Kasano a mayaplikar kenka dagitoy a bendision?

Sumagmamano kadagitoy a kari ti addaan kadagiti agnanayon a pagpapadaan. Kasano a maipada dagiti kari iti maysa a daga ti tawid wenno dakkel a kaputotan a maipatungpal iti agnanayon? (kitaen iti Doktrina ken Katulagan 131:1–4; 132:20–24, 28–32).

Malaksid iti panangikari iti bendision, imbaga ti Dios ken ni Abraham nga “agbalin a maysa a bendision” (Genesis 12:2; nainayon ti panangyunay-unay). Ania iti panagkunam ti kaipapanan dayta? Kasano nga agbalinka a maysa a bendision? (kitaen iti Abraham 2:11).

Tapno maisuro maipapan kadagiti katulagan, nagsarita ni Elder Dale G. Renlund maipapan iti dalluyon ti panagayus ti danum iti Karayan Amazon, ken nagsarita ni Presidente Emily Belle Freeman maipapan iti pannagna iti nabato a dalan nga addaan iti nadunor a palay-palay (kitaen iti “Accessing God’s Power through Covenants,” Liahona, Mayo 2023, 35–37; “Walking in Covenant Relationship with Christ,” Liahona, Nob. 2023, 76–79). Sapulen ti maysa wenno agpada kadagitoy a mensahe para kadagiti binatog a makatulong a mangsungbat iti saludsod nga “Apay a tarigagayan ti Dios a makitulagak Kenkuana?”

Kitaen met iti Topics and Questions, “Abrahamic Covenant,” Gospel Library; “Dagiti Kapanunotan a Laglagipen: Ti Katulagan,” iti daytoy a resource.

Ipapan a yam-ammom ni Melchizedek iti maysa a tao a saan a makaam-ammo kenkuana. Ania koma ti isaom? Sapulem dagiti kapanunotan iti Patarus ni Joseph Smith, Genesis 14:26–27, 33–38 (iti Bible appendix); Alma 13:13–19; Doktrina ken Katulagan 107:1–4. Ania dagiti dadduma pay nga adalen a masarakam kadagitoy a panangiladawan ni Melchizedek? Kasano nga apektuan ti panagadalmo iti biag ni Melchizedek ti wagas a panangkitam iti Melchizedek Priesthood?

Ania pay ti masursurom maipapan iti ugali ni Abraham iti kinabaknang manipud iti Genesis 14:18–24 ken Patarus ni Joseph Smith, Genesis 14:36–40 (iti Pangiwanwan iti Nasantuan a Kasuratan)? Kas pagarigan, kitaem ti sungbatna iti ari ti Sodoma iti Genesis 14:23. Kasano nga inapektuan ti pannirigam iti kuarta ti panagtulnog iti linteg ti apagkapullo?

Bayat ti panangbasam iti Genesis 16, mabalin a panunotem ti maysa a panawen idi nariknam a saan a nainkalintegan ti pannakatratom, kas iti inaramid ni Agar. Kitaen a ti “Ismael” kaipapanna ti “dumngeg ti Dios.” Kasano nga impakita ti Apo kenka a dimgngeg kenka?

Kitaen met iti “Secret Prayer,” Hymns, no. 144.

• Bayat ti panangbasam ken dagiti annakmo iti Abraham 1:18 ken 2:8, mabalinmo nga awisen ida a dumngeg iti maysa a paset ti bagi a nadakamat iti agpada a bersikulo. Nalabit a mabalinyo ti agay-ayam iti maysa a game a pangikideman ti maysa nga ubing iti matana ket kibinem ti ubing nga iturong iti maysa a lugar. Kalpasanna pagsasaritaanyo no kasano ti rikna ti kaadda ni Jesucristo a mangkibin a mangiturong ken mangsalaknib kadatayo.

• Mabalin a magustuan dagiti annakmo a mangyakem iti estoria manipud iti Genesis 13:5–12, nga agpammarang nga isuda da Abraham, Lot, ken dagiti agpaspastor. Kasano a masurottayo ti pagwadan ni Abraham a panagbalin a mamagkappia iti pamilia wenno gagayyemtayo? Padasen a yakem (role-play) dagiti sungbatda.

• Ibilang ti panangipakita kadagiti annakmo iti pagkargaan ti darat, dagiti bituen iti langit iti rabii, wenno ti ladawan iti ungto daytoy a balabala. Makatulong daytoy kadakuada a makaawat kadagiti kari ti Dios iti Genesis 13:16; 15:1–6. Isaritam no kasano a nasursurom ti agtalek kadagiti kari ti Dios, uray no kasla imposible dagitoy.

• Tapno maisuro kadagiti annakmo maipapan kadagiti katulagan, kiddawem kadakuada nga ibagada kenka ti maipapan iti maysa a panawen a nagkarida wenno adda maysa a tao a nagkari kadakuada. No makatulong, ibinglaymo ti sumagmamano a pagarigan a bukodmo—a pakairamanan dagiti katulagan nga inaramidmo iti Dios iti panagbuniag wenno iti templo. Kasano nga inapektuan dagiti katulagam ti relasionmo iti Dios? Pumilika iti sumagmamano a ragup ti balikas manipud iti Genesis 15:1–6; 17:1–8; Abraham 2:9–11 tapno mangibinglay iti sumagmamano kadagiti bendision nga inkari ti Dios kada Abraham ken Sara.

• Tapno matulongam dagiti annakmo nga agsagana a makitulag iti Dios inton mabuniaganda, mabalinmo nga usaren ti sumagmamano kadagiti kapanunotan ti aktibidad a naisingasing iti apendiks A wenno apendiks B.

• Idi nagpeggad ti biag ni Abraham, inawaganna iti Dios. Idi agmaymaysa ni Agar iti let-ang, naammuanna a dimngeg ti Dios kenkuana. Ibilang ti panangibinglay kadagitoy dua nga estoria kadagiti annakmo:“Da Abraham ken Sara” ken “Agar” iti Dagiti Estoria iti Daan a Tulag, 28–31, 32–33. Ania ti masursurotayo maipapan iti Dios manipud kadagitoy nga estoria? Kalpasanna mabalinyo pay nga ibinglay iti tunggal maysa dagiti padas idi nariknayo .a dimngeg kadakayo ti Dios. Ti maysa a kanta nga “A Child’s Prayer” (Children’s Songbook, 12–13) ket mabalin a mangpabileg iti daytoy a pagbatayan.

2:20

1:23