“Dagiti Kapanunotan a Laglagipen: Ti Katulagan,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Ti Katulagan,” Umaykayo, Sumurot Kaniak: 2026
Dagiti Kapanunotan a Laglagipen
Ti Katulagan
Iti Intero a Daan a Tulag, masansan a mabasamto ti balikas a katulagan. Ita gagangay a mapanunottayo dagiti katulagan a kas sagrado a kari iti Dios, ngem idi nagkauna a lubong, dagiti katulagan ket napateg pay a paset ti pannakipulapol dagiti tao iti tunggal maysa. Para iti panagtalged ken panagbiagda, kinasapulan dagiti tao tapno makapagtitinnalek, ken dagiti katulagan ket wagas a mangpatalged iti dayta a panagtalek.
Ngarud idi kinasarita ti Dios da Noe, Abraham, Moises ket ti dadduma pay maipapan kadagiti katulagan, aw-awisenna ida a sumrek iti maysa a relasion nga addaan iti panagtalek Kenkuana. Awagantayo daytoy a katulagan iti baro ken agnanayon a katulagan wenno ti katulagan ni Abraham—maysa a panangibasar iti katulagan nga inaramid ti Dios kada Abraham ken Sara ket kalpasanna pinabarona kadagiti an-annaboda a da Isaac ken Jacob (maawagan pay iti Israel). Iti Daan a Tulag naam-ammo laeng daytoy a “ti katulagan.” Makitayonto a ti Daan a Tulag ket kangrunaanna a ti estoria dagiti tao a nangibilang iti bagbagida kas agtawid iti daytoy a katulagan—dagiti natulagan a tao.
Agtultuloy ti katulagan ni Abraham nga agbalin a napateg iti agdama, nangnangruna kadagiti Santo iti Ud-udina nga Aldaw. Apay? Gapu ta datayo pay dagiti natulagan a tao, direktatayo man wenno saan nga an-annabo da Abraham, Isaac, ken Jacob. Gapu iti daytoy, napateg a maawatan no ania ti katulagan ni Abraham ken no kasano a mayaplikar daytoy kadatayo iti agdama.
Ania ti Katulagan ni Abraham?
Tinarigagayan ni Abraham “nga agbalin a nain-indaklan a pasurot ti kinalinteg” (Abraham 1:2), isu nga inawis ti Dios isuna iti maysa a pannakinaig iti katulagan. Saan a ni Abraham ti immuna a naaddaan iti daytoy a tarigagay, ken saan nga isu ti immuna nga immawat iti katulagan. Daytoy, ngamin, ti agnanayon a katulagan. Kinalikaguman ni Abraham ti “ti bendision dagiti amma” (Abraham 1:2)—dagiti bendision a naidiaya babaen ti katulagan kada Adan ken Eva ken kalpasan dayta kadagiti tao a nagkalikagum kadagitoy a bendision a sipapasnek.
Ti katulagan ti Dios ken ni Abraham nangikari kadagiti nakaskasdaaw a bendision: tawid ti daga, dakkel a kaputotan, panaggun-od kadagiti ordinansa iti priesthood, ken nagan a madayawto para kadagiti umay a kaputotan. Ngem ti pokus daytoy a katulagan saan laeng a kadagiti bendision ni Abraham ken ti pamiliana nga umawatto ngem iti pay panagbalindanto a bendision iti dadduma pay nga annak ti Dios. “Sikanto ti maysa a bendision,” impakdaar ti Dios, ken benditodanto kenka amin a kaputotan iti daga” (Genesis 12:2–3).
Nangted kadi daytoy a katulagan kada Abraham, Sara, ken dagiti an-annaboda iti addaan pribilehio a kasasaad kadagiti annak ti Dios? Iti laeng kaipapanan daytoy ket pribilehio a mangbendision iti dadduma. Ti pamilia ni Abraham isudanto ti “mangpaneknek kadaytoy a panagserbi ken Kinasaserdote iti amin a pagilian” a mangibingbinglay “kadagiti bendision ti Ebanghelio, nga isuda ti bendision ti pannakaisalakan, uray pay iti agnanayon a biag” (Abraham 2:9, 11). Ti panagbalin a natulagan a tattao ti Dios dina kayat a sawen a nasaysayaatda ngem kadagiti dadduma; kayatna a sawen nga adda pagrebbenganda a tumulong kadagiti dadduma nga agbalin a nasaysayaat.
Daytoy a katulagan ti bendision a tinartarigagayan ni Abraham. Kalpasan ti panangawatna iti daytoy, kinuna ni Abraham iti pusona, “Siaanus a sinapulnaka ti katulongam; ita nasarakankan” (Abraham 2:12).
Rinibribu a tawen ti naglabasen dayta, ngem naisubli ti katulagan iti aldawtayo. Ken madama a maipatpatungpalen daytoy iti biag dagiti tao ti Dios. Ti pannakaipatungpal ti katulagan ket nabangonen a momentum kadagiti ud-udina nga aldaw bayat ti panagdur-as iti aramid ti Dios, a mangbembendision kadagiti pamilia iti intero a lubong. Ken asino man a, kas ken ni Abraham, nga agtarigagay nga agbalin a nain-indaklan a pasurot ti kinalinteg, asino man a sipapasnek nga agsapul iti Apo—makapagbalin a paset daytoy.
Ania ti Kaipapanan Kaniak ti Katulagan ni Abraham?
Maysaka nga anak ti katulagan. Makitulagka ken ni Jesucristo no agbuniagka ken makiranudka iti sakramento. Ket awatem ti pakabuklan ti katulagan kadagiti sagrado nga ordinansa ti templo.
Babaen kadagitoy a katulagan ken ordinansa, agbalintayo a tattao ti Dios. Naisinggaluttayo Kenkuana nga “addaan kadagiti agnanayon a begkes.” “Apaman a makitulagtayo iti Dios,” insuro ni Presidente Russell M. Nelson, “panawantayo ti neutral a daga iti agnanayon. Saanto a baybay-an ti Dios ti relasionna kadagidiay nangbukel iti kasta a begkes Kenkuana. Kinapudnona, amin dagidiay nakitulag iti Dios ket makagun-od iti naisangsangayan a kita ti ayat ken asi. … Gapu iti katulagantayo iti Dios, saanto a pulos a mabannog kadagiti panagreggetna a tumulong kadatayo, ken pulos a dinanto maibus ti naasi nga anusna kadatayo.” Makitamto daytoy iti pakasaritaan dagiti natulagan a tattao ti Dios iti Daan a Tulag, ket makitamto daytoy iti bukodmo a biag kas maysa kadagiti natulagan nga annakna.
Saan nga Agbuteng, ni Dan Wilson
Daytoy ti napateg a pannakaawat a naited kadatayo gapu iti Pannakaisubli ti katulagan ni Abraham babaen ken ni Propeta Joseph Smith. Isu a no mabasam maipapan kadagiti katulagan iti Daan a Tulag, saanmo a panunoten laeng maipapan iti pakainaigan ti Dios kada Abraham, Isaac, ken Jacob. Panunotem pay maipapan iti pakainaiganna kenka. No mabasam maipapan iti kari dagiti adu a kaputotan. saanmo laeng panunoten maipapan kadagiti minilion nga awaganda ita ni Abraham nga amada. Panunotem pay maipapan iti kari ti Dios kenka maipapan kadagiti agnanayon a pamilia ken agnanayon a panagadu. No mabasam maipapan iti kari ti maysa a tawid a daga, saanmo laeng a panunoten maipapan iti daga a naikari ken ni Abraham. Panunotem pay ti celestial a pagbanagan ti daga a mismo—maysa a tawid a naikari kadagiti “naemma” nga “agur-uray iti Apo” (Mateo 5:5; Salmo 37:9, 11). Ken inton mabasayo ti maipapan iti kari a pangbendisionan dagiti natulagan a tattao ti Dios ti “amin a pamilia ditoy daga” . (Abraham 2:11), saanmo a panunoten laeng ti panangminister ni Abraham wenno dagiti propeta a nagtaud kenkuana. Panunotem met no ania ti maaramidmo—kas natulagan a pasurot ni Jesucristo—tapno agbalinka a bendision iti amin a pamilia iti aglawlawmo.