Genesis 6–11; Moises 8

Adda kadi makitam iti pannakailadawan ti aldaw ni Noe a kasla umasping kadagiti kasasaad iti aldawtayo? Nangnangruna a sapulem iti Moises 8:15–24, 28. Ania dagiti tema a makitam a naulit-ulit?

Maysa a napateg a pagpadaan a makitam ket inawagan ti Dios ni Noe nga agbalin a maysa a propeta, ken inawaganna pay ti maysa a propeta ita. Ibilang ti panangaramid iti listaan dagiti kinapudno a masursuron maipapan kadagiti propeta manipud iti Moises 8:13–30. Kasano a maipada ken ni Noe ti sibibiag a propetatayo? Siempre, ti propeta ti Apo ita ket saan a mangibalballaag iti Layus wenno mangaw-awis kadatayo a tumulong a mangbangon iti daong. Ngem ania ti maipapan iti ibalballaagna kadatayo? Ket ania ti yaw-awisna nga aramidentayo? Tapno makatulong a mangsungbat kadagitoy a saludsod, mabalinmo nga irebyu ti maysa a kapitulo manipud iti Teachings of Presidents of the Church iti Gospel Library, nangnangruna iti paulo nga “Invitations and Promises”. Nalabit a mabalinmo ti agpili iti maysa a ballaag ken maysa nga awis a kasla naisangsangayan a napateg kenka.

Insuro ni Elder Allen D. Haynie, “Pinili ti naan-anay ken naayat nga Ama idiay Langit ti pagtuladan ti panangipalgakna iti kinapudno kadagiti annakna babaen ti maysa a propeta” (“A Living Prophet for the Latter Days,” Liahona, Mayo 2023, 25). Ibilang ti panagadal iti mensahe ni Elder Haynie, ti panagsapul kadagiti gapu ti kaadda ti maysa a propeta ket maysa a pagilasinan ti ayat ti Nailangitan nga Ama. Kasano a nakatulong kenka ti panangsurot iti propeta ti Apo a makarikna iti natalged nga agbiag kadagiti ud-udina nga aldaw?

Kitaen met iti Topics and Questions, “Prophets,” Gospel Library; “Why Do We Have Prophets?” (video), Gospel Library.

1:37

Masdaaw ti sumagmamano a tao maipapan iti hustisia ti Dios iti panangipatulodna iti Layus tapno “pukawen ti tao” (Genesis 6:7). Inlawlawag ni Elder Neal A. Maxwell nga iti panawen ti Layus, “pimmalalo ti kurapsion a nangpabassit iti karbengan a panagpili dagiti tao nga agbalin a nalinteg tapno saan a maibaon dagiti espiritu nga agindeg ditoy” (We Will Prove Them Herewith [1982], 58). Mabalin pay nga ibilangmo no kasano a maysa a tignay ti asi ti Layus. Ania ti masarakam iti Genesis 6: 5–13 a mangipakita iti nadungngo nga asi ken ayat ti Apo kadagiti tao?

Segun iti Genesis 9:8–17, ania ti mabalin nga ipalagip ti maysa a bullalayaw kenka? Ania ti inayon iti pannakaawatmo iti Patarus ni Joseph Smith, Genesis 9:21–25 (iti Bible appendix)? Mabalinmo pay nga ibilang ti panangilista iti dadduma pay a banag (kas kadagiti simbolo, banag (objects), wenno aniaman) nga inted kenka ti Dios a mangipalagip kenka kadagiti katulagam. Ania ti isuro dagitoy a banag kenka? Kasano a tulongandaka a manglagip?

Kitaen met iti Gerrit W. Gong, “Always Remember Him,” Liahona, Mayo 2016, 108–11; “Reverently and Meekly Now,” Hymns, no. 185.

Ti salaysay dagiti tao ti Babel a mangbangbangon iti maysa a torre ket mangipaay iti makaay-ayo a pagdumaan iti salaysay ni Enoc ken dagiti taona a mangbangbangon iti Zion, nga inadalyo itay napalabas a lawas. Padpadasen ti agpada a grupo a dumanon iti langit ngem iti aggidiat a wagas. Apay a nagun-od dagiti tao ti Zion ti langit? (kitaen iti Moises 7:18–19, 53, 62–63, 69). Ania ti masursurom manipud iti Genesis 11:1–9 ken Helaman 6:26–28 mipapan kadagiti tao ti Babel? Ania ti maisuro daytoy kadatayo maipapan kadagiti bukodtayo a panagkagumaan tapno makasubli iti imatang ti Dios? Ania ti impaay ti Dios a mangtulong kadatayo a “dumanon iti langit”? (Genesis 11:4; kitaen met iti Juan 3:16).

• Pagaayat ti kaaduan nga ubbing ti estoria maipapan ken ni Noe ken ti daong. Ibilangmo ti panangted kadagiti annakmo kadagiti gundaway a mangibinglay iti ammoda maipapan iti daytoy. Tapno matulongam ida, mabalinmo nga usaren dagiti ladawan iti daytoy a balabala, “Ni Enoc ken ti Pamiliana” iti Dagiti Estoria iti Daan a Tulag (22–25), ken ti maikatlo a berso ti“Follow the Prophet” (Children’s Songbook, 110–11). Mabalin a magustuan dagiti annakmo ti mangyakem kadagiti paset ti estoria—kas pagarigan, babaen iti panagpammarang nga usaren ti maysa a ramit a mangbangon iti daong wenno pannagna a kas kadagiti ayup a sumsumrek iti daong.

• Bayat ti panangisaritayo ti maipapan ken ni Noe a sangkamaysa, tulonganyo dagiti annakyo a makakita no kasano a naparaburantayo nga addaan iti propeta ti Dios ita. Tulongam dagiti annakmo a mangsukisok iti Moises 8:16–24 tapno mangsapul kadagiti banag nga insuro ni Noe nga isursuro pay laeng dagiti propeta ti Apo ita. Kasano a mabendisionantayo no tungpalentayo dagitoy a pannursuro?

• Mabalin a kaay-ayo dagiti annakmo ti agdrowing wenno agkolor iti maysa a bullalayaw bayat ti panagsaritam maipapan iti no ania ti ibagi daytoy (kitaen iti Patarus ni Joseph Smith, Genesis 9:21–25 [iti Bible appendix]). Ania ti kayat ti Dios a panunoten ni Noe ken ti pamiliana tunggal makakitada iti bullalayaw?

• Mabalinmo pay nga ipakita kadagiti annakmo ti maysa a banag nga adda kenka a mangipalagip kenka iti maysa a banag a napateg iti biagmo, kas iti maysa singsing ti kallaysa, maysa a ladawan, wenno maysa a journal. Paibinglaymo kadagi annakmo dagiti bukodda a pagwadan. Mabalin a daytoy ti makaiturong iti maysa a pagsasaritaan maipapan kadagiti banag a mangtulong kadatayo a manglagip kadagiti katulagantayo, kas iti sakramento, a tumulong kadatayo a manglagip iti katulagantayo iti panagbuniag a sumurot ken ni Jesucristo (kitaen iti Doktrina ken Katulagan 20:75–79).

• Mabalin a makaparagsak ti mangbangon iti maysa a torre manipud kadagiti bloke wenno sabali a banag a kaduam dagiti annakmo. Bayat ti panangaramidmo iti kasta, ilawlawag nga impagarup dagiti tao ti Babel a makadanonda idiay langit babaen ti panangbangon iti maysa a natayag a torre. Kalpasanna mabalinyo nga aggigiddan a kumita iti ladawan ti Mangisalakan ket damagem kadagiti annakmo no kasano a matulongannatayo Isuna a makadanon iti langit. Kalpasanna mabalinyo a pagsasaritaan maipapan kadagiti banag a mabalinyo nga aramiden tapno sumurot iti Mangisalakan.

• Kas pangnayon iti panangbasa iti estoria maipapan iti torre ti Babel iti Genesis 11:1–9, mabalinmo ken dagiti annakmo a mangbasa iti Helaman 6:28. Segun iti daytoy a bersikulo, apay a nangbangon iti torre dagiti tao ti Babel? Apay a ti panangbangon iti daytoy a torre ket biddut a dalan a dumanon iti langit? Kalpasanna mabalinmo ti mangsukisok iti 2 Nephi 31:20–21 ken Helaman 3:28 a mangsapul iti umno a dalan a dumanon iti langit. Ania a balakad ti itedtayo koma kadagiti tao ti Babel?