Moises 7

Idi damo a naammuan ni Propeta Joseph Smith ti maipapan ken ni Enoc ken ti Siudadna iti Kinasanto, naparegta isuna. Isu “ammona a dimtengen ti aldaw inton ipasdek manen ti Apo ti Zion ditoy daga” (Saints, 1:108–9), ket rinugianna ti tungpal biag a panagsapul tapno mangbangon iti Zion. Ti panangbasa iti Moises 7 makaparegta kenka a mangitultuloy iti dayta a panagkagumaan ita.

Mabalinmo a rugian babaen ti panangsukisok kadagiti saludsod nga “Ania ti Zion?” ken “Kasano a maiduma daytoy iti dadduma iti lubong?” Ibilang ti pananglista kadagiti sungbat a sumangbay kenka bayat ti panagadalmo iti Moises 7, nangnangruna kadagiti bersikulo 16–21, 27, 53, 62–69.

Mabalin a nalawag dagiti sungbatmo kadagitoy a saludsod nga adu pay ti trabahotayo a mangbangon iti Zion. Ngarud kasano nga aramidentayo daytoy? Mabalin a makatulong no panunotem dagiti panawen a nariknam a “sangsangkamaysa ti puso ken panunotmo” iti maysa a tao (Moises 7:18). Mabalin nga iti maysa a ward, pamilia, wenno grupo iti trabaho wenno pagadalan. Ania ti inaramid dagiti tao a nangparnuay iti nalinteg a panagkaykaysa?

Adtoy ti sumagmamano a dadduma pay a resources a mabalinmo a sukisoken tapno makasarakka kadagiti kapanunotan ken inspirasion. Mangpilika iti maysa wenno ad-adu pay nga adalen, ket kalpasanna isuratmo no ania ti mariknam a naparegtaka nga aramidem a mangbangon iti Zion:

• Taga Filipos 2:1–4; 4 Nephi 1:15–18; Doktrina ken Katulagan 97:21; 105:5.

• Ulisses Soares, “Brothers and Sisters in Christ,” Liahona, Nob. 2023, 70–73.

• D. Todd Christofferson, “One in Christ,” Liahona, Mayo 2023, 77–80.

Ania ti kaipapanan kenka ti kaadda ni Jesucristo kas Ariyo? Ammuen dagiti dadduma pay a pangawag ken ni Jesucristo iti daytoy a bersikulo. Ania ti isuro kenka dagitoy maipapan Kenkuana? Ania iti panagkunam ti kaipapanan ti “umasideg iti ruangan ken [umuli] [Kenkuana]”?

Kitaen met iti “Come, O Thou King of Kings,” Hymns, no. 59.

Makita ti sumagmamano a tao ti Dios kas adayo a parsua a saan a maapektaran ti riknana iti mapaspasamak kadatayo. Nagun-od ni Enoc ti naiduma a panangkita iti Dios iti parmata a naisurat iti Moises 7. Ania ti nasursurona maipapan iti Dios—ken ania ti nasursurom—kadagiti bersikulo 28-40? Apay iti panagkunam a nasdaaw ni Enoc a makita nga agsangit ti Dios? Apay a napateg kenka a mangammo nga agsangit Isuna?

Ket nagtultuloy ti parmata, nagsangit met ni Enoc. Ngem imbinglay pay ti Dios kenkuana dagiti gapu ti panagrag-o. Sapulem dagitoy iti Moises 7:41–69. Ania ti masursurom iti parmata ni Enoc a makatulong kenka a “liwliwaem ti pusom, ken agragsakka,” iti laksid ti “saem” iti biagmo (bersikulo 44)?

Kitaen met iti Jeffrey R. Holland, “The Grandeur of God,” Liahona, Nov. 2003, 70–73.

Ti parmata ni Enoc, nangnangruna iti naisurat iti Moises 7:59–67, ket maysa kadagiti immuna a padto ti pakasaritaan maipapan iti Maikadua a Yaay ti Mangisalakan. Ania ti makaawis iti riknam maipapan iti wagas a panangiladawan dagitoy a bersikulo kadagiti maudi nga aldaw? Kas pagarigan, panunotem no kasano ti riknam a dagiti padto manipud iti bersikulo 62 ket maipatpatungpalen. Ania ti isuro kenka dagitoy a ragup ti balikas maipapan iti trabaho ti Dios kadagiti ud-udina nga aldaw?

Kitaen met iti Henry B. Eyring, “Sisters in Zion,” Liahona, Nob. 2020, 67–69.

• Tapno matulongam dagiti annakmo a makasursuro maipapan ken ni Enoc ken ti Zion, mabalinmo nga usaren ti “Ni Enoc a Propeta” iti Dagiti Estoria iti Daan a Tulag (19–21) wenno ti maikadua a berso ti“Follow the Prophet” (Children’s Songbook, 110–11). Kalpasanna mabalinmo a kiddawen kadagiti annakmo a mangtulong kenka a mangisarita manen iti estoria iti bukodda a balikas. Mabalin a makatulong dagiti ladawan ni Enoc iti daytoy a balabala.

• Adtoy ti maysa a wagas a mangtulong kadagiti annakmo a makaawat no ania ti kayat a sawen ti “sangsangkamaysa ti puso ken panunot” (Moses 7:18): Agaramid iti papel a sinanpuso ket gettengen daytoy iti sumagmamano a pedaso, nga umanay para iti tunggal ubing a maaddaan iti maysa. Paisuratmo ti naganda iti pedasoda ket agtitinnulongda a mangbukel iti sinanpuso. Bayat ti panangaramidda, mabalinmo nga isarita maipapan kadagiti banag a patpatgem maipapan iti tunggal ubing.

• Tulongam dagiti annakmo a mangbilang no mano a daras a makita ti balikas a “Zion” iti Moises 7:18–21, 62–63, 68–69. Tunggal makitada ti balikas, tulongam ida a mangtakuat no ania ti ibaga ti bersikulo maipapan iti Zion (kitaen met iti Pangiwanwan iti Nasantuan a Kasuratan, “Zion,” Gospel Library). Kasano nga agbalintayo nga ad-adda a kas dagiti tao a nailadawan kadagitoy a bersikulo?

• Tapno mayam-ammo ti Moises 7:32–33 kadagiti annakmo, mabalinmo a kasarita ida maipapan iti pili a nasken nga inaramidda itay nabiit. Kalpasanna mabalinyo nga aggigiddan a basaen dagiti bersikulo tapno ammuen no ania ti tarigagayan ti Apo a pilientayo. Ania dagiti pili a mabalintayo nga aramiden tapno maipakita nga Isu ti pilientayo? Nalabit a makapagsisinnublat dagiti annakmo iti panangyakem iti maysa kadagitoy a pili idinto a padasen a pugtuan dagiti dadduma no ania ti ibagi ti tignay.

• Iti Moises 7:59, nagdamag ni Enoc iti maysa a saludsod iti Apo. Awisem dagiti annakmo a mangsapul iti dayta, ket kalpasanna kiddawem kadakuada a mangbirok iti sungbat iti bersikulo 60. Mabalinmo pay a kasarita ida maipanggep iti maysa a panawen idi namnamaenda iti maysa a tao a sumarungkar wenno agawid. Saludsodem ida no kasano ti nariknada ken no ania ti inaramidda a makapagsagana. Kasano a makapagsaganatayo para iti panagsubli ni Jesus?

• Ibilang ti panangipakita kadagiti ladawan dagiti panawen idi nagparang ti Mangisalakan kadagiti tao (kitaen iti Libro ti Arte ti Ebanghelio, dagiti num. 60, 82, 83, ken 84). Ania ti ar-aramiden dagiti tao nga adda kadagiti ladawan? Kasano ti mabalin a narikna dagiti tao idi naam-ammoda ni Jesus? Agkansion iti maysa a kanta maipapan iti Maikadua a Yaay ti Mangisalakan, kas iti “When He Comes Again” (Children’s Songbook, 82–83), ken saludsodem kadagiti ubbing no ania ti panunotenda a kayariganna no umayto manen ni Jesus. Paibinglaymo kadagiti ubbing no kasano ti mariknada no makitada ni Jesucristo iti yaayna manen.