Genesis 5; Moises 6

Bayat ti panagadalmo iti Moises 6:26–36, ania ti masursurom maipapan kadagiti epekto ti basol? Kasano a nakitamon dagitoy nga epekto? Ania dagiti kababalin ni Enoc a nakatulong kenkuana a mangparmek kadagitoy nga epekto? Kasano a binendisionan ti Dios isuna kas bungana?

No makariknaka iti talipupos iti no ania ti nangawagan kenka ti Dios nga aramidem, saanka nga agmaymaysa. Uray idi narikna ni Enoc iti kasdiay idi inawagan ti Apo isuna nga agbalin a maysa a propeta. Bayat ti panangbasam iti Moises 6:26–36, sapulem no apay a narikna ni Enoc ti talipupos ken no ania ti kinuna ti Apo a mangted kenkuana iti tured.

Kadagiti bersikulo 37–47, mabalinmo a sapulen dagiti wagas a nangsuportaran ti Apo ken ni Enoc ken nangpabileg kenkuana a nangaramid iti trabahona (kitaen met iti Moises 7:13). Mabalinmo nga idasig ti padas ni Enoc iti padas dagiti dadduma pay a propeta a nakarikna iti pagkurangan, kas kada Moises (kitaen iti Exodo 4:10–16), Jeremias (kitaen iti Jeremias 1:4–10), Nephi (kitaen iti 2 Nephi 33:1–4), ken Moroni (kitaen iti Ether 12:23–29). Ania ti mariknam a kayat ti Dios a masursurom manipud kadagitoy a nasantuan a kasuratan maipapan iti trabaho nga intedna kenka nga aramidem?

Adu kadagiti apostol ken propeta iti agdama nga aldaw ti nangipeksa kadagiti riknada a maipada iti rikna ni Enoc idi inladawanda no kasano ti riknada idi umawatda kadagiti awagda. Kas pagarigan, kitaen ti pammaneknek ni Elder Ulisses Soares iti “Prophets Speak by the Power of the Holy Spirit” (Liahona, Mayo 2018, 98–99).

Ania ti masursurom manipud kadagitoy a propeta ken apostol maipapan kadagiti riknam iti kinakurang? Kaano a nariknam ti tulong ti Mangisalakan idi kiniddawna kenka nga agaramid kadagiti narigat a banag? Ibilangmo ti panangisurat iti sumagmamano a padas iti masakbayam inton kasapulam ti agpannuray iti tulong ti Mangisalakan. Kasanom a sanguen dagitoy a pasamak nga addaan ti pammati ken ni Jesucristo?

Kitaen iti David A. Bednar, “Abide in Me, and I in You; Therefore Walk with Me,” Liahona, Mayo 2023, 123–25; “I’ll Go Where You Want Me to Go,” Hymns, no. 270.

Gapu ta addaantayo iti libro ni Moises, ammotayo nga isursuron ti Dios dagiti annakna no kasano ti mangsapul iti pannakasubbot manipud pay idi adda da Adan ken Eva. Bayat ti panagadalmo iti Moises 6:48–68, sukisokem no ania ti nasken nga ammuen ken aramidentayo tapno masubbot. Kitaen ti saludsod ni Adan iti bersikulo 53. Nasdaawka kadin iti dayta? Ania ti masursurom manipud iti sungbat ti Apo kadagiti bersikulo 53–65? Mabalin a panunotem dagitoy a bersikulo a kas mensahe ti Apo iti serbisio ti panagbuniag ni Adan. Ania ti masursurom maipapan iti panagbuniag manipud iti mensahena? Apay iti panagkunam nga indiligna ti panagbuniag iti “pannakaipasngay manen”? (bersikulo 59). Ania ti maaramidmo tapno agtultuloyka a “maipasngay manen” iti unos ti panagbiagmo?

Kalpasan ti panangisurona ken ni Adan kadagiti kinapudno ti ebanghelio ni Jesucristo, iti Moises 6:51–63, imbaga ti Apo ken ni Adan nga isurona dagitoy kadagiti masakbayan a kaputotan. Ibilang ti panangilista kadagitoy a kinapudno. (Mabalin a makatulong no bingayen ti binatog iti babbabassit a grupo dagiti bersikulo, kas kadagiti bersikulo 51–52, 53–57, 58–60, 61–63). Apay a napateg dagitoy a kinapudno iti tumantanor a kaputotan iti agdama? Ania pay ti masursurotayo manipud kadagiti pangiturong ti Apo kadagiti nagannak iti Mosiah 4:14–15 ken Doktrina ken Katulagan 68:25–28; 93:40–50?

Iti panangbasa maipapan iti “libro a pakalaglagipan” nga intalimeng da Adan ken Eva ket mabalin a mangparegta kenka ken iti pamiliam a mangaramid iti bukodmo a libro a pakalaglagipan. Ania ti mariknam a kayat ti Apo nga iramanmo? Ibilang ti panangi-save iti impormasion manipud iti librom a pakalaglagipan iti FamilySearch.org.

Kitaen met iti Dieter F. Uchtdorf, “Jesus Christ Is the Strength of Parents,” Liahona, Mayo 2023, 55–59; “Parenting: Touching the Hearts of Our Youth,” “But Why?” (videos), Gospel Library.

• Idi naawagan ni Enoc a mangikasaba iti ebanghelio, nagdanag amangan no mapaay. Ngem tinulongan ti Dios isuna. Aggigiddan a basaen daytoy nga estoria iti Moises 6:26–34 (kitaen met iti “Ni Enoc a Proteta” iti Dagiti Estoria iti Daan a Tulag, 19–21). Apay a narikna ni Enoc a saanna a maikasaba ti ebanghelio? (kitaen iti Moises 6:31). Kasano a tinulongan ti Dios ni Enoc? (kitaen iti Moises 6:32–34; 7:13).

• Mabalin a tagiragsaken dagiti annakmo ti mangibinglay wenno mangakto kadagiti dadduma a pagarigan no kaano a tinulongan ti Dios dagiti tao nga agaramid kadagiti narigat a banag—kas pagarigan, ni Noe, David, Ammon, wenno ni Samuel a Lamanite (kitaen iti Libro ti Arte ti Ebanghelio, dagiti numero 7, 19, 78, 81). Mabalinmo pay nga ibinglay ti bukodmo a padas ken bay-am nga agsarita dagiti annakmo no kasano a tulongan ida ti Dios nga agaramid kadagiti narigat a banag.

• Insuro ti Dios ni Adan no ania ti kasapulan nga aramidentayo nga agsubli Kenkuana—maaddaan iti pammati ken ni Jesucristo, agbabawi, mabuniagan, ken umawat iti sagut ti Espiritu Santo. Mabalinmo a tulongan dagiti annakmo a mangsapul kadagitoy a pagbatayan iti Moises 6:52, 57. Kalpasanna, mabalinmo a tulongan ida a mangisurat iti ababa a bitla maipapan iti maysa kadagiti pagbatayan. Iraman ti tunggal bitla ti maysa a nasantuan a kasuratan manipud iti Moises 6, maysa a padas, ken maysa a pammaneknek. Paibinglay kadakuada dagiti bitlada iti tunggal maysa.

• Mabalinmo pay nga ipakita dagiti ladawan a mangibagi kadagiti umuna a pagbatayan ti ebanghelio (kitaen iti maikapat a pagannurotan ti pammati). Ipuesto ida iti maysa a linia nga agturong iti maysa a ladawan ni Jesucristo. Bayat ti panangbasam iti Moses 6:52, mabalin nga agtakder dagiti annakmo iti abay ti umisu a ladawan no mangngegda dagiti balikas nga ibagi ti ladawan.

• Mabalin a magustuan dagiti annakmo ti agkansion kadagiti kanta a mangisuro kadagiti pagbatayan iti Moises 6:52, kas iti “Faith,” “When I Am Baptized,” ken “The Holy Ghost” (Children’s Songbook, 96–97, 103, 105). Tulongam dagiti annakmo a mangsapul kadagitoy a pagbatayan iti Moises 6:52.

• Tapno maparegta dagiti annakmo a mangsuporta kadagiti nagannakda iti akemda kas mannursuro iti ebanghelio, ibilangmo ti panangkiddaw iti maysa nga ubing a mangbasa iti Moises 6:58 ken mangilasin iti bilin nga inted ti Dios kadagiti nagannak. Kalpasanna mabalinmo ti mangipakita iti maysa a ladawan da Adan ken Eva a mangisursuro kadagiti annakda (kas iti maysa iti ungto daytoy a balabala) ket paisaritam kadagiti annakmo no ania ti makitada iti ladawan. Mabalin dagiti annakmo ti agdrowing kadagiti ladawan ti pamiliada nga aggigiddan iti panagbasa kadagiti nasantuan a kasuratan, aggigiddan iti panagkararag, wenno aggigiddan iti panagay-ayam.