Genesis 3–4; Moises 4–5

Pudno a ti pinili da Adan ken Eva ti nangiturong iti adu a rigat a mapasarantayo iti mortalidad. Ngem saan a kaipapanan dayta nga agbabawitayo iti pilida. Bayat ti panangbasam iti Genesis 3 ken Moises 4, mabalinmo a saludsoden iti bagim, apay a napateg ti Pannakatnag iti plano ti Dios?

Segun iti Moises 5:9–12, kasano ti rikna da Adan ken Eva maipapan iti Pannakatnag? Kasano a mayaplikarmo dagiti balikasda kadagiti padasmo iti daytoy natnag a lubong? Ania pay ti masursurom manipud iti 2 Nephi 2:19–25?

Kitaen met iti Mosiah 3:19; Alma 12:21–37; ken Doktrina ken Katulagan 29:39–43.

Ti estoria da Adan ken Eva ket maysa a maipapan iti namnama ken pannakasubbot babaen ken ni Jesucristo. Tapno makita no apay, mabalinmo a rugian ti panangsukisok kadagiti bunga ti Pannakatnag iti Genesis 3:1–7; Moises 4:22–31 ken panangmarka wenno panangilista no ania ti masarakam. Kasano a makaapekto kenka dagitoy a bunga? Kalpasanna mabalinmo a sukisoken ti Moises 5:4–15, nga agsapsapul iti plano ti Dios a mangsubbot kadatayo manipud kadagitoy nga epekto. Apay a “naragsakan” da Adan ken Eva kalpasan a sinarungkaran ida ti anghel? Ania ti masursurom manipud kadakuana maipapan iti plano ti Nailangitan nga Ama?

Kitaen met iti “Because of Him” (video), Gospel Library.

2:44

Daytoy a binatog ti nasantuan a kasuratan ket biddut ti pannakaawat no dadduma a nainkalintegan ti saan a nasayaat a panangtrato ti maysa nga asawa a lalaki iti asawana. Iti aldawtayo, insuro dagiti propeta ti Apo a nasken nga ibilang ti agassawa ti tunggal maysa kas agpada nga agkadua (kitaen iti “Ti Kaamaan: Maysa a Waragawag iti Lubong” [Gospel Library]). Inlawlawag da Elder Dale G. Renlund ken Sister Ruth Lybbert Renlund a ti nalinteg nga asawa a lalaki “agkalikagumto nga agserbi; akuennanto ti biddutna ket agdawat iti pammakawan; alistonto a mangidiaya iti pammadayaw; agbalinto a mannakaawat kadagiti paggugusto dagiti miembro ti pamilia; mariknananto ti dagsen ti pagrebbengan a mangipaay kadagiti ‘kasapulan ti biag ken panangsaluad’ para iti pamiliana; tratuennanto ti asawana iti kangatuan a panangrespeto ken pammadayaw. … Bendisionannanto ti pamiliana” (The Melchizedek Priesthood: Understanding the Doctrine, Living the Principles [2018], 23).

Kas insuro ni Elder Dale G. Renlund, “Ti panggep a tun-oyen ti Amatayo iti Langit iti panagbalin a nagannak ket ti saan a panangpaaramid kadagiti annakna no ania ti umno; daytoy ket panangpapili kadagiti annakna nga agaramid iti umno ken iti kamaudiananna agbalin a kas Kenkuana” (“Choose You This Day,” Liahona, Nob. 2018, 104). Apay a napateg unay iti plano ti Nailangitan nga Ama a datayo ti agpili nga agaramid no ania ti umno?

Bayat ti panangbasam iti Moises 4:1–4, sapulem no ania ti inaramid ti Nailangitan nga Ama ken ni Jesucristo a mangsalaknib iti karbengam nga agpili—ti kinawayam nga agpili. Kasano a magun-odyo ti mangsalsalaknib a bilegna? Para kadagiti kapanunotan, ibilang ti panangadal iti benneg iti “Agaramid kadagiti naparegta a pili” iti Para iti Pigsa dagiti Agtutubo: Maysa a Pangiwanwan iti Panagpili ( 4–5).

Ibilangyo pay ti panangbasa iti no ania ti insuro ni Lehi maipapan iti kinawaya nga agpili iti 2 Nephi 2:11–20, 25–30. Apay a kasapulan ti oposision iti kinawaya nga agpili? Kasano a maipakitayo ti panagyamanyo ken ni Jesucristo iti panangaramidna a “nawayakayo nga agpili”? (2 Nephi 2:27).

Kitaen met iti Dallin H. Oaks, “Opposition in All Things,” Liahona, Mayo 2016, 114–17; Topics and Questions, “Agency,” Gospel Library; “Choose the Right,” Hymns, no. 239.

Bayat ti panagbasam iti Moises 4:4–12; 5:13–33, ibilang ti panangilista kadagiti wagas a nangpadasan ni Satanas nga inallilaw da Adan ken Eva ken dagiti annakda. Kasano ti panaggandatna kadagitoy isu met la a banag iti agdama? Kasano a matulongannaka ti Nailangitan nga Ama a mangsupring kadagiti panangallilaw ni Satanas?

Kalpasan ti pannanganda iti maiparit a bunga, pinadas da Adan ken Eva a mangabbong iti kinalamulamoda. Idin agangay indiaya ti Apo a mangkawes kadakuada. Bayat ti panangbasam iti Moises 4:13–16, 27, ibilang dagiti sumaganad:

• Utobem no ania ti mabalin nga ibagi ti kinalamolamo ken kawes kadagiti nasantuan a kasuratan (kitaen, kas pagarigan, iti Apoclipsis 7:9, 13–15; 2 Nephi 9:14; Doktrina ken Katulagan 109:22–26, 76). Ania ti masursurom manipud iti padas ni Adan ken Eva iti kinalamulamo ken kawes?

• No na-endowkan iti templo, ibilang no ania ti mabalin nga ibaga kenka da Adan ken Eva maipapan iti kaipapanan ti temple garment-mo iti templo ken no ania ti ibagi daytoy.

Kitaen met iti “Sacred Temple Clothing” (video), Gospel Library.

4:12

Bayat ti panagadalmo iti Moises 5:4–9, 16–26, ibilang dagiti ugali da Adan ken Eva ken dagiti annakda a da Cain ken Abel iti panagsakripisio. Apay nga inawat ti Apo ti sakripisio ni Abel ngem saanna nga inawat ti sakripisio ni Cain?

Ania ti idawat ti Apo kenka nga isakripisiom? Adda kadi ania man a banag kadagitoy a bersikulo a mangsukog iti wagas a panangpanunotmo maipapan kadagita a sakripisio?

• Tapno matulongam dagiti annakmo a nasaysayaat a maawatanda ti Pannakatnag da Adan ken Eva, mabalinmo a kopiaen dagiti ladawan manipud iti “Da Adan ken Eva” (iti Dagiti Estoria iti Daan a Tulag, 13–16) ket gettengem dagitoy. Kalpasanna mabalinyo ti agtitinnulong a mangurnos kadagiti ladawan bayat ti panaglilinnawagyo kadagiti padas da Adan ken Eva. Bayat ti panangaramidmo, isaritam no apay a napateg, iti plano ti Nailangitan nga Ama, a pumanaw da Adan ken Eva iti Minuyonga ti Eden.

• Marikna dagiti annakyo ti panagyaman iti Pannubbot ni Jesucristo bayat ti pannakaawatda no kasano a parmekenna dagiti epekto ti Pannakatnag. Bayat ti aggigiddan a panangbasayo iti Moises 4:25; 6:48; Taga Roma 5:12; 2 Nephi 2:22–23, tulongam dagiti annakmo a mangbirok kadagiti wagas a mangileppas iti daytoy a binatog: “Gapu iti Pannakatnag, siak …” Kalpasanna, bayat ti aggigiddan a panangbasayo iti Moises 5:8–11, 14–15; 6:59; Alma 11:42, mabalinda nga ileppas daytoy a binatog: “Gapu ken ni Jesucristo, siak …” Ibinglayyo iti tunggal maysa ti panagyamanyo ken ni Jesucristo.

• Ibilang ti maysa a simple nga adalen a banag (object lesson) a mangyam-ammo iti pagbatayan ti kinawaya nga agpili: awisem dagiti annakmo a mangkolor iti panid ti aktibidad iti daytoy a lawas, ngem ikkam ida iti maysa laeng a kolor nga usarenda. Apay a nasaysayaat ti maaddaan kadagiti pili? Kalpasanna mabalinyo nga aggigiddan a mangbasa iti Moises 4:1–4 ken pagsaritaan no apay a kayat ti Dios a kabaelantayo ti agpili iti nagbaetan ti naimbag ken dakes. Kasano a matulongannatayo ti Nailangitan nga Ama ken ni Jesucristo nga agaramid kadagiti nasayaat a pili?

• Tulongam dagiti annakmo nga agpanunot ken agdrowing kadagiti ladawan dagiti nasayaat a pili a mabalinda nga aramiden a mangsurot ken ni Jesucristo. Aggigiddan nga agkansion iti maysa a kanta maipapan iti panagaramid kadagiti nasayaat a pili kas iti “Choose the Right Way” (Children’s Songbook, 160–61). Mabalinmo nga isarita kadagiti ubbing maipapan iti maysa a gundaway idi pinilim ti nagaramid iti nasayaat a pili, ken isaritam no kasano ti nariknam kalpasanna.

• Idi nasken a pumanaw da Adan ken Eva iti Minuyongan ti Eden, saandan a mabalin a makadenna ti Nailangitan nga Ama. Basaenyo ti Moises 5:4, 8 kadagiti annakmo, ken tulongam ida a mangsapul iti no ania ti inaramid da Adan ken Eva tapno mariknada nga asidegda Kenkuana ken dumngeg Kenkuana. Ania dagiti sumagmamano a banag a mabalintayo nga isao iti Nailangitan nga Ama kadagiti kararagtayo?