“Enero 5–11. ‘Daytoy ti Aramidko ken Gloriak’: Moises 1; Abraham 3,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Enero 5–11. ‘Daytoy ti Aramidko ken Gloriak’,” Umaykayo, Sumurot Kaniak: 2026
Enero 5–11: “Daytoy ti Aramidko ken Gloriak”
Moises 1; Abraham 3
Irugi ti Biblia kadagiti balikas nga “idi punganay pinarsua ti Dios ti langit ken ti daga” (Genesis 1:1). Ngem ania ti adda idi sakbay daytoy a “punganay”? Ken apay a pinarsua ti Dios amin daytoy? Babaen ken ni Propeta Joseph Smith, nangted ti Apo iti panangilawlawag maipapan kadagitoy a saludsod.
Kas pagarigan, inikkannatayo iti rekord ti maysa a parmata a nakakitaan ni Abraham iti kaaddatayo kas espiritu “sakbay ti lubong” (kitaen iti Abraham 3:22–28). Inikkannatayo pay ti Apo iti naparegta a patarus wenno rebision ti umuna nga innem a kapitulo ti Genesis, a maawagan iti libro ni Moises—a saan a mangrugi iti “idi punganay.” Ketdi, mangrugi daytoy iti padas ni Moises a mangted iti sumagmamano a konteksto para iti nalatak unay nga estoria iti Panagparsua. Sangkamaysa, a dagitoy a nasantuan a kasuratan iti ud-udina nga aldaw ket nasayaat a lugar a pangrugian iti panagadal iti Daan a Tulag gapu ta ipaayda ti sumagmamano a napapateg a saludsod a makaited iti naipalawlaw a konteksto iti panagbasatayo: Asino ti Dios? Asinotayo? Ania ti aramid ti Dios, ken ania ti lugartayo iti daytoy? Makita dagiti pangrugian a kapitulo ti Genesis kas sungbat ti Apo iti kiddaw ni Moises: “Kaasiam koma ti katulongam, O Dios, ket ibagam kaniak ti maipanggep iti daytoy a lubong, ken dagiti agindeg ditoy, ken kasta met dagiti langit” (Moises 1:36).
Dagiti Kapanunotan iti Panagsursuro iti Pagtaengan ken iti Simbaan
Kas maysa nga anak ti Dios, addaanak iti nadiosan a pagtungpalan.
“No direkta a makisarsarita kenka ti Apo,” insuro ni Presidente Russell M. Nelson, “ti umuna a banag a siguraduenna a maawatanyo ket ti pudno a kinasiasinoyo” (“Choices for Eternity” [worldwide devotional for young adults, Mayo 2022], Gospel Library). Sumaruno a padasen ni Satanas ti mangtikaw kadakayo iti dayta met laeng a punto. Sapulen daytoy a pagtuladan iti mensahe ti Dios ken ni Moises iti Moises 1:4, 6 ken kadagiti mensahe ni Satanas iti Moises 1:12. Ania ti masursuroyo manipud kadagitoy a bersikulo maipapan kadagiti pagdumaan ti Dios ken ni Satanas?
Insuro pay ni Presidente Nelson, “Ti wagas ti panangpanunotmo no siasinoka a talaga ket mangapekto iti dandani tunggal desision nga aramidem” (“Choices for Eternity”). Ibilang ti pananglista kadagiti pili nga aramidem gapu ta napatpateg ti kinasiasinom kas anak ti Dios ngem iti dadduma a pakabigbigan.
Ania dagiti bersikulo wenno ragup ti balikas iti Moises 1 a mangtulong kenka a makaawat iti nadiosan a pategmo? Mabalinmo pay a basaen ti ad-adu pay iti mensahe ni Presidente Nelson iti benneg ti “Choices for Eternity” a napauluan iti “First: Know the truth about who you are.” Ania ti mariknam a makaparegta nga aramidem tapno agbalin ti kinasiasinom kas maysa nga anak ti Dios a kapatgan a pakabigbigam?
Kitaen met iti “I Am a Child of God,” Hymns (1985), no. 301; “Our True Identity” (video), Gospel Library; Topics and Questions, “Children of God,” Gospel Library.
Our True Identity
Babaen iti tulong ti Apo, mapagkedkedak ni Satanas.
Kas ipakita ti Moises 1 a silalawag, saan a kayat a sawen a dagiti nabileg a naespirituan a padas a ditayonto pulos masulisog manen. Kinapudnona, maysa kadagiti taktika ni Satanas ket mangsulisog kadatayo a pagduaduaan dagitoy a padas. Bayat ti panangbasam iti sungbat ni Moises ken ni Satanas kadagiti bersikulo 12–26, ania ti masursurom a makatulong kenka nga agtalinaed a napudno iti pammaneknek nga inawatmo? Ania ti nakatulong kamaudiananna ken ni Moises a nangparmek ken ni Satanas?
Maysa pay nga adalen manipud iti padas ni Moises ket ti panangsulisog ni Satanas kadatayo kadagiti panangballikug iti kinapudno ken bileg ti Dios. Panunotem ti sumagmamano a peke a bersion dagiti banag, kas iti artipisial a mula wenno baby doll. Kasano a maibagam a peke dagitoy? Kalpasanna ibilang dagiti panangballikug nga us-usaren ni Satanas ita a mangsulisog kadakayo. Ania ti masursuroyo manipud iti Moises 1:13–18 maipapan iti no kasano nga ilasin ken supringen dagiti panangballikugna? Kasano a makatulong ti Apo kadakayo? (kitaen iti Moises 1:24–26).
Kitaen met iti Matthew 4:1–11; Gary E. Stevenson, “Deceive Me Not,” Liahona, Nob. 2019, 93–96; “I Am a Son of God” (video), Gospel Library.
I Am a Son of God
Mabalin a maplano ti panagsursuro iti pagtaengan ngem kasta met a madagdagus. “Masansan a mapasamak dagiti gundaway iti panangisuro iti pamilia kadagiti impormal, inaldaw a kanito—bayat ti pannangan, panagaramid kadagiti trabaho iti balay, panagay-ayam, [wenno] panagbiahe” (Panangisuro iti Wagas ti Mangisalakan (Teaching in the Savior’s Way), 31). Kas pagarigan, malaksid iti panagbasa maipapan iti no kasano a sinaranget ni Moises ni Satanas iti Moises 1, mabalin a mangbuboskayo iti sumagmamano a kanito iti oras ti pangrabii nga agsasarita a sangapamiliaan maipapan no kasano a sinarangetyo ti impluensia ti kabusor.
Ti aramid ken gloria ti Dios ti mangtulong kaniak a manggun-od iti agnanayon a biag.
Kalpasan ti pannakakitana iti parmata maipapan kadagiti pinarsua ti Dios, nagkiddaw ni Moises iti Apo: “Ibagam kaniak … apay a kastoy dagitoy a banag” (Moises 1:30). Ania ti makaawis riknam maipapan iti sungbat ti Apo iti Moises 1:31–39? Ania ti pagdumaan ti saan nga ipapataytayo wenno imortalidad ken agnanayon a biag? (kitaen iti Topics and Questions, “Eternal Life,” Gospel Library). Kasano a tumulong ni Jesucristo a mangipatungpal iti agpada? Naaddaan met ni Abraham iti parmata, a nairekord iti Abraham 3. Ania ti masarakam kadagiti bersikulo 22–26 a makatulong a mangsungbat iti kiddaw ni Moises?
Nagbiagak kas espiritu sakbay a nayanakak iti daga.
Bassit unay ti ammotayo maipapan iti biag sakbay daytoy a biag. Ngem ti kaaduan kadagiti ammotayo ti naggapu iti parmata ni Abraham iti Abraham 3:22–28. Bayat ti panangbasam kadagitoy a bersikulo, ilistam dagiti kinapudno a masarakam—agraman dagiti kinapudno maipapan iti bagim ken maipapan ken Jesucristo. Apay a napateg kenka dagitoy a kinapudno? Ania ti pagdumaan a maaramid dagitoy iti biagmo?
Kitaen met iti Topics and Questions, “Premortal Life,” Gospel Library.
Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Siak ti anak ti Dios.
-
Kalpasan ti aggigiddan a panangbasayo iti mensahe ti Dios ken ni Moises iti Moises 1:4, ibilang ti panangipalubos kadagiti annakyo a mangkita iti langada iti sarming ken mangted iti bagbagida iti umasping a mensahe: “Anaknak ti Dios.” Kalpasanna, mabalinda ti mangted iti isu met laeng a mensahe iti tunggal maysa: “Anaknaka ti Dios.” Mabalin a makasarakka pay kadagiti ladawan ti nadumaduma a tattao ket awisem dagiti annakmo a mangitudo iti tunggal maysa ket kunaenda, “Anak ti Dios daytoy.” Ibinglayyo iti tunggal maysa no apay a maragsakankayo a makaammo nga annaknakayo ti Dios. Kasano a balbaliwan daytoy a pannakaammo ti wagas ti panangtratoyo iti bagiyo ken iti dadduma?
-
Mabalinmo ken dagiti annakmo ti mangidilig iti mensahe ti Dios ken ni Moises iti Moises 1:4 ken iti mensahe ni Satanas iti Moises 1:12. Kasano a matulongam dagiti annakmo a mangilasin kadagiti mensahe ti Dios kadakuada ken ni Satanas?
Nakita ni Moises ni Jehova, ni Joseph Brickey (detalye)
Adda trabaho nga ipaaramid ti Nailangitan nga Ama kaniak.
-
Bayat ti panagbasayo iti Moises 1:6 kadagiti annakmo, mabalinmo a kasarita ida maipapan iti “trabaho” ti Dios para ken Moises. Ibilang ti panangusar iti Libro ti Arte ti Ebanghelio, dagiti bilang 13–16, wenno Dagiti Estoria iti Daan a Tulag, dagiti panid 64–84, tapno matulongan dagiti annakyo a makakita no ania ti naipatungpal ni Moises babaen ti tulong ti Nailangitan nga Ama. Ania ti trabaho a kayat ti Dios nga aramidentayo? (kitaen, kas pagarigan, iti Doktrina ken Katulagan 11:20).
Mapagkedkedak dagiti pannulisog ni Satanas.
-
Bayat ti panagadalyo iti Moises 1:12–26 kadagiti annakmo, tulongam ida a mangtakuat no ania ti inaramid ni Moises a mangsaranget ken ni Satanas (kitaen kadagiti bersikulo 13, 15, 18, 20–22, 26). Mabalin a makaparagsak kadakuada ti panagyakem kadagiti banag a mabalinda nga aramiden a mangsaranget iti sulisog (kas iti panagkararag, panangliklik, wenno panagkiddaw iti tulong).
Nagbiagak kas espiritu sakbay a nayanakak iti daga.
-
Ti pannakaammo maipapan iti biagtayo sakbay daytoy a biag ket mabalin a mangparegta kadatayo nga agaramid kadagiti pili a maibatay kadagiti agnanayon a kinapudno. Tapno matulongam ida a mangammo iti dayta, mabalinmo nga ikkan ida iti sumagmamano a kangrunaan a balikas ken ragup ti balikas a masarakanda iti Abraham 3:22–28, kas iti “sakbay ti lubong,” “dagiti espiritu,” “mangaramid iti daga,” ken “ipaneknek.” Ania ti isuro dagitoy a bersikulo kadatayo maipapan no apay nga imbaonnatayo ti Nailangitan nga Ama iti daga?
-
Maysa a kanta kas iti “I Will Follow God’s Plan” (Children’s Songbook, 164–65) ket makatulong no ania ti isuro ti Abraham 3 . Mabalinmo nga awisen dagiti annakmo nga agdrowing kadagiti ladawan a maikadua kadagiti balikas.
-
Tulongam dagiti annakmo a mangpanunot kadagiti situasion a nasken a pilienda no aramidenda wenno saan ti kiniddaw ti Dios kadakuada (kitaen iti Abraham 3:25; kitaen met iti Para iti Pigsa Dagiti Agtutubo: Maysa a Pangiwanwan iti Panagpili). Bay-am ida a mangsanay kadagiti mabalin a sungbat kadagita a situasion. Kasano a tulongannatayo ti Mangisalakan no agaramidtayo iti biddut a pili?
Para iti ad-adu pay, kitaen iti isyu ti magasin a Friend iti daytoy a bulan.