Pakauna iti Daan a Tulag

Maysa a wagas tapno makasarak iti nabaknang a naespirituan a taraon iti Daan a Tulag ket ti panagsapul iti Tinapay ti Biag, ni Jesucristo (kitaen iti Juan 6:48). Kas pagarigan, kasano ti pannakakitam iti Mangisalakan kadagiti sumaganad?

• Mana (Exodo 16:4, 11–15; Juan 6:35)

• Ti naisakripisio a kordero (Exodo 12:3–5; Juan 1:29)

• Gambang nga uleg (Numeros 21:4–10; Juan 3:14)

• Jonas (Jonas 1:4–17; Mateo 12:38–41)

Ania ti isuro kaniak dagitoy a pagarigan maipapan Kenkuana? Ania dagiti dadduma pay a pagibasaran ken ni Jesucristo iti Daan a Tulag a siguden a pamiliarkayo?

Iti mensahena a “Jesus Christ Is the Treasure,” inallukoynatayo ni Elder Dale G. Renlund a “manglaglagip ken kanayon nga agpokus ken ni Jesucristo” (Liahona, Nob. 2023, 98). Ibilangmo ti panangbasa iti mensahena, a mangsapsapul kadagiti banag a mabalinmo nga aramiden a mangsapul ken ni Jesucristo saan laeng nga iti Daan a Tulag no di pay ket iti biagmo.

Kitaen met iti “Types or Symbols of Christ” iti Pangiwanwan iti Nasantuan a Kasuratan, “Jesus Christ,” Gospel Library; “Seek the Lord Early,” Children’s Songbook, 108.

Insuro ni Presidente Dallin H. Oaks: “Inyam-ammo ti Ama ti Bugbugtong nga Anakna, ni Jesucristo, kas Mangisalakan ken Mannubbottayo ken inikkannatayo iti bilin a ‘dumngeg Kenkuana.’ Manipud iti daytoy a pammilin igibustayo a dagiti nasantuan a kasuratan dagiti balikas nga insao ti ‘Dios’ wenno ti ‘Apo’ ket dumani kanayon a dagiti balikas ni Jehova, ti nagungar nga Apotayo, ni Jesucristo” (“The Teachings of Jesus Christ,” Liahona, Mayo 2023, 102).

14:7

Idi kinarit dagiti lider dagiti Judio ni Jesus maipapan iti kinasiasinona, impakdaarna, “Sakbay ni Abraham, siak.” Dagitoy a balikas ti nangpakigtot kadagiti tao a nakangngeg ken ni Jesus, ket nakasaganadan a mangbato Kenkuana (kitaen iti Juan 8:58–59). Ibilang ti panangbasa iti Exodo 3:13–15; 6:3–5 tapno makita no apay a nasakit ti nakem ti sumagmamano a Judio iti kinuna ni Jesus.

Apay a napateg a maammuanyo a ni Jesucristo ti Jehova?

Iti maysa a parmata, impakita ti Apo ken ni Nephi ti yaay ti Biblia, a nangilawlawag nga “adu a nalawag ken napateg a banag” ti maala manipud iti daytoy. Ibilang ti panangbasa iti 1 Nephi 13:21–29, 38–42, a mangsapsapul no kasano a plinano ti Apo a “mangipakaammo kadagiti nalawag ken napateg a banag.” Segun iti 2 Nephi 3:12, kasano nga agtitinnulong ti Biblia ken Libro ni Mormon?

Bayat ti panangadalmo iti Daan a Tulag iti daytoy a tawen, adalemto pay ti sumagmamano kadagiti “dadduma pay a libro” a nasaksakbay a nakita ni Nephi. Iraman dagitoy:

• Ti libro ni Moises, paset ti patarus ni Joseph Smith iti Biblia. Isublina dagiti kinapudno ken salaysay a saan a masarakan iti agdama a teksto ti Genesis 1–6.

• Ti libro ni Abraham, a naipalgak ken ni Joseph Smith bayat ti panangamirisna kadagiti nagkauna nga Egipcio a papiro (kitaen iti Topics and Questions, “Book of Abraham,” Gospel Library).

• Dagiti agduduma a binatog manipud iti Patarus ni Joseph Smith, sumagmamano kadagitoy ti makita kadagiti footnote, apendiks ti Biblia, ken iti Pangiwanwan iti Nasantuan a Kasuratan.

Adtoy ti sumagmamano a pagarigan dagiti salaysay iti Daan a Tulag a naisubli babaen ken Joseph Smith: siudad ti Sion ni Enoc (Moises 7:18–19), parmata ni Abraham iti konseho ti langit (Abraham 3:22–28), ken ti panagministro ni Melchizedek (Patarus ni Joseph Smith, Genesis 14:25–40). Apay a “nalawag ken napateg” kenka dagitoy a salaysay?

Ti Daan a Tulag ket estoria ti Dios a mangsapsapul a mangaramid kadatayo a “karkarna a gamengna” babaen ti katulagan (Exodo 19:5). Gapu iti dayta a rason, ti nasayaat a wagas ti panagsagana a mangbasa iti Daan a Tulag ket ti panangadal maipapan kadagiti katulagan—nangnangruna iti agnanayon a katulagan nga indaton ti Dios kadagiti nagkauna a propeta a kas kada Abraham, Isaac, Jacob, ken ti kaputotanda. Ket ti maysa a naindaklan a wagas tapno makasursuro maipapan kadagiti katulagan ket ti panagadal iti mensahe ni President Russell M. Nelson a “The Everlasting Covenant” (Liahona, Oktubre 2022, 4–11).

Bayat ti panagbasam, saludsodem iti bagim: Apay a napateg kaniak dagiti katulagan? Ania a “naisangsangayan a kita ti ayat ken asi” ti maawatko manipud iti Dios bayat ti panagtungpalko kadagiti katulagak Kenkuana? Bayat ti panangbasam iti Daan a Tulag ita a tawen, agsipsiputka kadagiti banag a kayat nga isuro kenka ti Dios maipapan iti pannakitulagmo Kenkuana.

Kitaen met iti Jeremias 31:31–34.

• Mabalin a narigat a maawatan dagiti ubbing dagiti balikas ken kultura ti Daan a Tulag, ngem matulongam ida a makakita ken ni Jesucristo kadagiti simbolo ken estoria. Nalabit a mabalinmo ken dagiti annakmo a kitaen ti ladawan iti baba, Impadto ni Propeta Isaias ti Pannakaipasngay ni Cristo. Paitudom kadagiti annakmo dagiti detalye a makitada. Allukoyem ti atensionda, nangnangruna, iti maladaga a ni Jesus. Kalpasanna, mabalinmo a basaen kadakuada no ania ti insurat ni Isaias maipapan iti pannakayanak ti Mangisalakan iti Isaias 7:14; 9:6. Ibinglaymo kadagiti annakmo no kasano ti riknam maipapan iti panangsapul iti Mangisalakan iti Daan a Tulag ita a tawen.

  

• Mabalinmo pay ti agbasa ken dagiti annakmo iti Salmo 23 wenno Isaias 53:3–9 ket agsapul kadagiti balikas a mangipalagip kenka ken ni Jesucristo. Ania ti isuro kadatayo dagitoy a balikas maipapan iti biag ken ti Pannubbotna?

• Dagiti katulagan ti maysa a kangrunaan a tema iti Daan a Tulag. Tapno mayam-ammo daytoy a tema kadagiti annakmo, mabalinmo ti makisarita kadakuada maipapan kadagiti kari nga aramiden ken tungpalenda iti pamilia wenno gagayyem ken no apay a napateg ti panangtungpal kadagitoy a kari. Kalpasanna mabalinmo a kitaen ti ladawan ti panagbuniag ket pagsaritaan ti kari, wenno katulagan, nga aramidentayo iti Dios no mabuniagantayo (kitaen iti Mosiah 18:10, 13). Mabalinmo pay nga ipakita ti maysa a ladawan ti templo ket ibinglaymo dagiti riknam maipapan kadagiti katulagan nga aramidentayo idiay.

• Ti panid ti aktibidad iti daytoy a lawas ket makatulong kadagiti annakyo a magagaran nga agaramid ken mangtungpal kadagiti katulagan iti Nailangitan nga Ama. Mabalinyo pay ti agkansion iti kanta maipapan iti panagaramid kadagiti katulagan, kas iti “When I Am Baptized” (Children’s Songbook, 103).

• Adda kadi asino man nga am-ammo dagiti annakyo a nagduduma ti naganna iti nadumaduma a kasasaad? Nalabit a naiduma ti pannakaawag ti maysa a nagannak wenno mannursuro iti trabaho, pagtaengan, ken iti simbaan. Pagsaritaan dagita a nagan; kalpasanna basaen ti Exodo 6:3 nga aggigiddan ket awisem dagiti annakmo a mangsapul kadagiti nagan a naam-ammo ni Jesucristo sakbay a naipasngay (kitaen met iti Patarus ni Joseph Smith iti footnotec).