“Enero 12–18. ‘Idi Punganay Pinarsua ti Dios ti Langit ken ti Daga’: Genesis 1–2; Moises 2–3; Abraham 4–5,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Enero 12–18. ‘Idi Punganay Pinarsua ti Dios ti Langit ken ti Daga’,” Umaykayo, Sumurot Kaniak: 2026
Enero 12–18: “Idi Punganay Pinarsua ti Dios ti Langit ken ti Daga”
Genesis 1–2; Moises 2–3; Abraham 4–5
Gapu ta nangayed ken napintas ti lubong iti aglawlawtayo, narigat a panunoten ti daga idi ket “adda idi a gosogoso,”ken “awan nagyan ken naliday” (Genesis 1:2; Abraham 4:2). Maysa a banag nga isuro kadatayo ti estoria ti Panagparsua ket ti Dios makaaramid iti maysa a banag a nakaskasdaaw manipud iti maysa a banag a saan pay a nabukel. Makatulong dayta iti pananglagip no kasla natikaw ti biag. Namarsua ti Nailangitan nga Ama ken ni Jesucristo, ket saan pay a nalpas ti aramidda iti panagparsua. Makaaramidda iti silaw nga agraniag kadagiti nalidem a kanito iti biagtayo. Mabalinda a punnuen ti kinaubbawtayo iti biag. Mapagbalindatayo iti nadiosan a parsua a nakairantaantayo. Dayta ti kaipapanan ti pannakaparsua iti ladawan ti Dios, a kaaspingna (kitaen iti Genesis 1:26). Addaantayo iti potensial nga agbalin a kas Kenkuana: naitan-ok, nagloriaan, nailangitan.
Para iti pakagupgopan ti libro ti Genesis, kitaen iti “Genesis” iti Pangiwanwan iti Nasantuan a Kasuratan.
Dagiti Kapanunotan iti Panagsursuro iti Pagtaengan ken iti Simbaan
Genesis 1:1–25; Moises 2:1–25; Abraham 4:1–25
“Babaen ti Bugbugtongko pinarsuak dagitoy a banag.”
Nupay ditayo ammo ti amin a banag maipapan iti no kasano a naparsua ti lubong, makaay-ayo a paliiwen no ania ti pinili ti Dios nga ipalgak maipapan iti Panagparsua. Ania ti isuro ti Dios kadakayo maipapan iti daytoy iti Genesis 1:1–25; Moises 2:1–25; ken Abraham 4:1–25? Apay a kayatna a maammuanyo dagitoy a banag? Bayat ti panangutobmo kadagitoy a salaysay, mabalinmo pay nga ibilang no ania ti isuroda kenka maipapan iti Nailangitan nga Ama, ni Jesucristo, iti lubong, ken iti bagim.
Tapno mapabaknang ti panagadalmo, ibilangmo ti panangbasa kadagitoy a bersikulo bayat ti kaaddam kadagiti pinarsua ti Dios wenno bayat ti panagdengngegmo iti kanta a kas iti “All Creatures of Our God and King” (Hymns, no. 62). Masarakam dagiti ladawan dagiti pinarsuana a makatulong kenka a makarikna iti panagraem iti Namarsua. Ibilangmo ti panangibinglay kadagitoy a ladawan, agraman ti pammaneknekmo, kadagiti dadduma.
Kitaen met iti Doktrina ken Katulagan 101:32–34.
Ti Minuyongan ti Eden, ni Grant Romney Clawson
Genesis 1:26–27; Moises 2:26–27; Abraham 4:26–27
Naparsuaak iti ladawan ti Dios.
Bayat ti panangbasam iti Genesis 1:26–27; Moises 2:26–27; ken Abraham 4:26–27, utobem no ania ti kaipapanan ti pannakaparsua iti “ladawan” wenno “kaasping” ti Dios, lalaki ken babai. Apay a napateg kenka a mangammo kadagiti kinapudno kadagitoy a bersikulo? Kas pagarigan, kasano nga apektuan dagitoy a kinapudno ti wagas a pakakitaam iti bagim, iti dadduma, ken iti Dios? Kasano a matulongandaka no addaanka iti negatibo a rikna maipapan iti bagim?
Tapno matulonganka a mangpanunot kadagitoy a saludsod, padasem a kompletuen ti maysa a binatog a kas iti daytoy: “Gapu ta ammok a naparsuaak iti ladawan ti Dios, piliek ti …” Ti panangrebyu iti “Sagrado ti bagiyo” iti Para iti Pigsa dagiti Agtutubo: Maysa a Pangiwanwan iti Panagpili (For the Strength of Youth: A Guide for Making Choices) (dagiti panid 22–29) ket makatulong. Ibilangmo ti panangpili iti maysa a banag nga aramidem tapno maipakitamto iti Dios nga ammom a sagrado ti bagim.
Iti video “God’s Greatest Creation” (Gospel Library), iburay ni Presidente Russell M. Nelson ti pammaneknekna maipapan iti namilagruan a bagi ti tao. Bayat ti panangbuyam iti daytoy a video, saludsodem iti bagim, “Kasano ti kayat ti Nailangitan nga Ama a mariknak maipapan iti bagik?” Kasano a naiduma daytoy kadagiti mensahe a mabalin a mangngegmo manipud kadagiti dadduma?
God's Greatest Creation
Mabalin a kunaen ti dadduma a tattao a ti pannakaparsua iti ladawan ti Dios kaipapananna nga anamonganna ti amin a pampanunot, rikna, ken tarigagaytayo ken saantayo a kasapulan (wenno saan a kabaelan ti) dumur-as. Ania koma ti makunam iti dayta? Ania dagiti nalawag a pannakaammo ken pannakaawat a magun-odmo manipud iti Mosiah 3:19 ken Ether 12:27?
Kitaen met iti Russell M. Nelson, “Your Body: A Magnificent Gift to Cherish,” Liahona, Ago. 2019, 50–55.
Genesis 1:27–28; 2:18–25; Moses 3:18, 21–24; Abraham 5:14–18
Inordenan ti Dios ti kallaysa ti maysa a lalaki ken maysa a babai.
“Nagtipon da Adan ken Eva iti kallaysa para iti daytoy a panawen ken para iti kinaagnanayon babaen ti bileg ti agnanayon a priesthood” (Russell M. Nelson, “Lessons from Eve,” Ensign, Nob. 1987, 87). Utobem daytoy bayat ti panangbasam iti Genesis 1:27–28; 2:18–25; Moises 3:18, 21–25; ken Abraham 5:14–19. Kasano a matratom ti kallaysa iti kinasagrado nga inted ti Dios?
Kitaen met iti 1 Taga Corinto 11:11; “Ti Kaamaan: Maysa a Waragawag iti Lubong,” Gospel Library.
Genesis 1:28; Moises 2:28; Abraham 4:28
Siak ti akinrebbeng iti panangaywan kadagiti pinarsua ti Dios.
Ania ti isingasing ti Genesis 1:28; Moises 2:28; ken Abraham 4:28 maipapan iti pagrebbengantayo kadagiti pinarsua ti Dios? Ania iti inayon ti Doktrina ken Katulagan 59:16–21 ken 104:13–18 iti pannakaawatmo?
Kitaen met iti Gérald Caussé, “Our Earthly Stewardship,” Liahona, Nob. 2022, 57–59; Topics and Questions, “Environmental Stewardship and Conservation,” Gospel Library.
Genesis 2:2–3; Moises 3:2–3; Abraham 5:2–3
Binendisionan ken pinasanto ti Dios ti aldaw ti Sabbath.
Ti Dios inaramidna a nasantuan ti aldaw ti Sabbath, ken indawatna kadatayo a mangpatalinaed iti daytoy a nasantuan. Bayat ti panangbasam iti Genesis 2:2–3; Moises 3:2–3; ken Abraham 5:2–3, panunotem no ania ti mamagbalin a “parabur” kenka ti Sabbath.
Kitaen met iti Doktrina ken Katulagan 59:9–13; “The Sabbath Is a Delight” (video), Gospel Library.
Highlight: The Sabbath Is a Delight
Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Genesis 1:1–25; Moises 2:1–25; Abraham 4:1–25
Pinarsua ni Jesus ti daga.
-
Kasano a maaramidmo a naragsak para kadagiti annakmo ti panagsursuro maipapan iti Panagparsua? Mabalinmo a kuyogen ida iti panagsukisok iti ruar para kadagiti kita dagiti banag a naaramid kabayatan ti tunggal panawen ti Panagparsua. Mabalin pay a sapulen dagiti annakyo dagiti ladawan dagiti banag a pinarsua ni Jesus (kitaen iti “Ti Pannakaparsua ti Daga” iti Dagiti Estoria iti Daan a Tulag, 8–12). Kalpasanna mabalin a pagsasaritaanyo kadagiti annakyo maipapan no kasano ti nariknayo maipapan ken ni Jesucristo kalpasan ti panagbasa maipapan iti Panagparsua.
-
Ibilang ti panangkanta iti maysa a kansion maipapan iti ayat ti Nailangitan nga Ama, kas iti “My Heavenly Father Loves Me” (Children’s Songbook, 228–29). Mabalin a mangnayon dagiti annakmo iti kanta iti dadduma pay a banag a pinarsua ti Dios a nakatulong kadakuada a makarikna iti ayatna.
Tulongam dagiti ubbing a mangipakita iti kinamanagpartuatda. “No awisem dagiti ubbing nga agdrowing, agbangon, agkolor, wenno agsurat iti maysa a banag nga adda pakainaiganna iti maysa a pagbatayan ti ebanghelio, tulongam ida a makaawat a nasaysayaat iti pagbatayan ket ikkam ida iti maigganan a palagip ti no ania ti nasursurodan” (Panangisuro iti Wagas ti Mangisalakan, 32).
Genesis 1:26–27; Moises 2:26–27; Abraham 4:26–27
Naparsuaak iti ladawan ti Dios.
-
Mapatanor dagiti annakyo ti rikna ti panagraem ken panangrespeto para iti bagida ken iti bagi dagiti dadduma bayat ti panangsursuroda a naparsuatayo amin iti ladawan ti Dios. Tapno matulongam ida a makaawat no ania ti kaipapanan daytoy, mabalin a paipakitam kadagiti annakmo ti ladawanda iti sarming wenno ladawan bayat ti panangibasam iti Moises 2:26–27 kadakuada. Mabalinmo pay nga ipakita kadakuada no kasano a masansan a “kaasping” dagiti maladaga nga ayup dagiti dadakkelda (kitaen ti ladawan iti daytoy a balabala, kas pagarigan). Daytoy ti mabalin a mangiturong iti maysa a pagsasaritaan maipapan iti no apay a napateg a maammuanyo a naparsuakayo iti ladawan ti Nailangitan nga Amayo.
-
Mabalin a magustuanyo kadagiti annakmo ti agdrowing iti maysa a bagi ti tao ken manggetteng kadagiti drowing nga agbalin a puzzle. Bayat ti panangbukel dagiti annakmo kadagiti puzzle-da, mabalinda ti agsarita maipapan kadagiti wagas a pangipakitaanda iti Nailangitan nga Ama nga agyamyamanda kadagiti bagida.
Genesis 2:2–3; Moises 3:2–3; Abraham 5:2–3
Nasantuan ti aldaw ti Sabbath.
-
Bayat ti panangbasam iti Moises 3:2–3, kiddawem kadagiti annakmo a dumngeg iti no ania ti inaramid ti Dios iti maikapito nga aldaw. Tulongam dagiti annakmo a mangsapul wenno mangidrowing kadagiti banag a mabalinda nga aramiden iti Domingo a mamagbalin daytoy a maysa a nasantuan nga aldaw ken maiduma kadagiti sabali nga aldaw. Ibinglay iti tunggal maysa no apay a napateg kenka a ngilinen a nasantuan ti aldaw ti Sabbath.
-
Tulongam dagiti annakmo a mangilawlawag iti maysa a gayyem no apay a pilienda nga aramiden dagiti banag iti Domingo a mangdayaw ti Nailangitan nga Ama ken ni Jesus. Isingasing nga usarenda ti Genesis 2:2–3 kadagiti panangilawlawagda. Kasano a ti panangngilintayo a nasantuan ti aldaw ti Sabbath ket mangipakita iti ayattayo iti Nailangitan nga Ama ken ni Jesucristo?
Para iti ad-adu pay, kitaen iti isyu ti magasin a Friend iti daytoy a bulan.