“Dagiti Kapanunotan a Laglagipen: Panangbasa iti Daan a Tulag,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Panangbasa iti Daan a Tulag,” Umaykayo, Sumurot Kaniak: 2026
Dagiti Kapanunotan a Laglagipen
Panangbasa iti Daan a Tulag
Idi kayat ni Nephi nga allukoyen dagiti kakabsatna nga agtalek iti Apo, inbinglayna dagiti estoria maipapan ken ni Moises ken pannursuro manipud ken ni Isaias. Idi kayat ni Apostol Pablo a paregtaen dagiti immuna a Kristiano a maaddaan iti pammati kadagiti kari ti Dios, impalagipna kadakuada ti maipapan iti pammati da Noe, Abraham, Sara, Rahab, ken dadduma pay. Idi kinuna ni Jesus kadagiti lider dagiti Judio, “sukisokenyo dagiti nasantuan a kasuratan,” a mangipalpalawag a “paneknekandak” (Juan 5:39), dagiti nasantuan a kasuratan nga ibagbagana ket maipapan kadagiti sinurat nga awagantayo iti Daan a Tulag.
Iti sabali a pannao, no basaem ti Daan a Tulag, basbasaem dagiti balikas a nangparegta, nangliwliwa, ken nangallukoy kadagiti tao ti Dios iti literal a rinibu a tawtawen.
Ngem mabalin kadi a talaga a makatulong kenka ti maysa a banag a naisurat iti nabayag unayen a panawen a mangsapul kadagiti pangrisut kadagiti parikut iti agdama? Wen, mabalin! Nangnangruna no malagipmo no maipapan iti asino ti Daan a Tulag.
Maysa a Pammanek ken ni Jesucristo
Aniaman dagiti karit a mabalin a sangsanguem ken ti pamiliam, kanayon a ni Jesucristo ti sungbat. Isu a tapno masarakam dagiti sungbat iti Daan a Tulag, sapulem Isuna. Saan a kanayon a nalaka daytoy. Mabalin a kasapulam ti agutob a siaanus ken agkalikagum iti naespirituan a panangiwanwan. No dadduma kasla direkta unay dagiti panagibasar Kenkuana, kas iti panangipakdaar ni Isaias “Ta nayanak ti maysa nga ubing kadatayo: … ket ti naganna maawaganto iti … Ti Prinsipe ti Kappia” (Isaias 9:6). Iti dadduma a lugar, nalalaing ti panangibagi iti Mangisalakan, babaen kadagiti simbolo ken pagpapadaan—kas pagarigan, babaen kadagiti panangiladawan dagiti panangisakripisio iti ayup wenno ti salaysay ni Jose iti panangpakawanna kadagiti kakabsatna ken panangisalakan kadakuada manipud iti panagbisin.
Silaw ti Lubong, ni Scott Sumner
No sapulem ti dakdakkel a pammati iti Mangisalakan bayat ti panagadalmo iti Daan a Tulag, masarakamto daytoy. Nalabit a daytoy ti mabalin a panggep a tun-oyen ti panagadalmo iti daytoy a tawen. Ikararagmo a tarabayennakanto ti Espiritu a mangsapul ken agpokus kadagiti binatog, estoria, ken padto a mangyas-asidegto kenka ken ni Jesucristo.
Nadiosan a Nataginayon
Saanmo a namnamaen ti Daan a Tulag a mangidatag iti naan-anay ken husto a pakasaritaan ti sangkataw-an. Saan a dayta ti pinadas a parnuayen dagiti orihinal nga awtor ken mannurat. Ti dakdakkel a pakaseknanda ket ti mangisuro iti maysa a banag maipapan iti Dios—maipapan iti planona para kadagiti annakna, maipapan iti kaipapanan ti agbalin a natulagan a taona, ken maipapan iti no kasano a masarakan ti pannakasubbot no ditayo agtungpal kadagiti katulagantayo. No dadduma inaramidda daytoy babaen ti panangisarita kadagiti pasamak a mainaig kadagiti pakasaritaan kas ti pannakaawatda kadagitoy, a pakairamanan dagiti estoria manipud iti biag dagiti naindaklan a propeta. Ti Genesis ti maysa a pagarigan daytoy, ken kas met dagiti libro iti Josue, Dagiti Uk-ukom, ken 1 ken 2 Ar-ari. Ngem saan a pinanggep ti dadduma pay a mannurat iti Daan a Tulag nga agbalin a pakasaritaan. Ketdi, nangisuroda babaen dagiti aramid ti arte kas iti daniw ken literatura. Maitutop ti Salmo ken ti Proverbio iti daytoy a kategoria. Ken kalpasanna adda dagiti napapateg a balikas dagiti propeta, kas kada Isaias ken Malakias, a nagsao iti balikas ti Dios iti nagkauna nga Israel—ken, babaen ti milagro ti Biblia, agsaritada pay laeng kadatayo iti agdama.
Ammo kadi ti amin dagitoy a propeta, mannaniw, mannurat a basaento dagiti tao iti sangalubongan dagiti balikasda kalpasan ti rinibribu a tawen? Ditayo ammo. Ngem masdaawtayo a daytoy ti eksakto a napasamak. Bimmangon ken natnag dagiti nasion, naparmek dagiti siudad, nagbiag ken natay dagiti ari; ngem rinimbawan ti Daan a Tulag amin dagitoy, manipud iti henerasion agingga iti henerasion, manipud iti para surat agingga iti para surat, manipud iti patarus agingga iti patarus. Siempre napukaw wenno nabaliwan ti sumagmamano a banag, ngem uray no kaskasano namilagruan a nataginayon ti kaaduanna.
Propeta iti Daan a Tulag, ni Judith A. Mehr (detalye)
Dagitoy ti sumagmamano laeng a banag a laglagipen bayat ti panangbasam iti Daan a Tulag iti daytoy a tawen. Nalabit a tinaginayon ti Dios dagitoy a nagkauna a sinurat gapu ta am-ammonaka ken no ania ti pagpaspasaram. Nalabit nga insaganana ti naespirituan a mensahe para kenka kadagitoy a balikas, maysa a banag a mangyas-asidegto kenka Kenkuana ken mangbangon iti pammatim iti planona ken ti Patpatgenna nga Anak. Nalabit nga iturongnakanto iti maysa a binatog wenno nalawag a pannakaammo ken pannakaawat a mangparaburto iti maysa a tao nga am-ammom—maysa a mensahe a maibinglaymo iti maysa a gayyem, kapamilia, wenno kapada a Santo. Nakaad-adu dagiti posibilidad. Saan kadi a makapagagar a panunoten dayta?
Insurat ni Nephi, “Naragsak ti kaunggak kadagiti nasantuan a kasuratan” (2 Nephi 4:15). Mabalin a kasta met laeng ti mariknam bayat ti panangbasam iti adu kadagiti isu met laeng a balikas a binasa ni Nephi—ti awagantayo itan iti Daan a Tulag.
Dagiti Libro iti Daan a Tulag
Kadagiti kaaduan a bersion a Kristiano ti Daan a Tulag, agduduma ti pannakaurnos dagiti libro manipud iti no kasano ti pannakaurnosda idi damo a naummong iti maysa a koleksion. Ngarud idinto a ragupen ti Bibilia a Hebreo dagiti libro iti tallo a kategoria—ti linteg, dagiti propeta, ken dagiti sinurat—kaaduan a Biblia a Kristiano ti mangurnos kadagiti libro iti uppat a kategoria: linteg (Genesis–Deuteronomio), pakasaritaan (Josue–Ester), dagiti libro ti daniw (Job–Kanta ni Solomon), ken dagiti propeta (Isaias–Malakias).
Apay a napateg dagitoy a kategoria? Gapu iti panangammo no ania a kita ti libro nga ad-adalem makatulong kenka a makaawat no kasano nga adalen daytoy.
Daytoy ti maysa a banag a laglagipen bayat ti panangrugim a panangbasa iti “linteg,” wenno ti umuna a lima a libro ti Daan a Tulag. Dagitoy a libro, a patien nga insurat ni Moises, nalabit a tinagikua ti adu a para surat ken para tipon iti panaglabas ti panawen. Ket ammotayo nga, iti panaglabas dagiti siglo, “adu a paset a nalawag ken kapatgan” ti naikkat iti Biblia (kitaen iti 1 Nephi 13:23–26). Ngem latta, dagiti libro ni Moises ket dagiti naparegta a balikas ti Dios, nupay maipada dagitoy—iti ania man nga aramid ti Dios a naipasa kadagiti mortal—maipasango kadagiti pagkurangan ti tao (kitaen iti Moises 1:41; Pagannurotan ti Pammati 1:8). Dagiti balikas ni Moroni, a maitudtudo a sagrado a kasuratan ti Libro ni Mormon a timmulonganna nga inummong, ket makatulong ditoy, “No adda riro, nagkurangan dagiti tao; gapuna, saanyo nga uyawen dagiti banag ti Dios” (panid ti paulo ti Libro ni Mormon). Iti sabali a pannao, saan a nasken nga awan biddut ti tao iti libro ti nasantuan a kasuratan tapno agbalin a balikas ti Dios.