“Abril 13–19. ‘Agtalnakayo, ket Makitayo ti Panangisalakan ti Apo: Exodo 14–18,’” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)

“Abril 13–19. ‘Agtalnakayo ket Makitayo ti Panangisalakan ti Apo,’” Umaykayo, Sumurot Kaniak: Daan a Tulag 2026

Abril 13–19: “Agtalnakayo ket Makitayo ti Panangisalakan ti Apo”

Exodo 14–18

Saan a makaballasiw dagiti Israelita. Adda iti maysa a bangir ti Nalabaga a Baybay, ken umas-asidegen iti maysa a bangir ti buyot ni Faraon. Kasla saan a makapagpaut ti panaglibasda manipud iti Egipto. Ngem adda mensahe ti Dios para kadagiti Israelita a kayatna a laglagipenda para kadagiti kaputotan: “Dikayo agbuteng. … Ni Jehova makibakalto gapu kadakayo” (Exodo 14:13–14).

Manipud iti dayta a panawen, idi kasapulan dagiti tao ti Dios ti pammati ken tured, insaritada daytoy nga estoria. Idi tarigagayan ni Nephi ti mangparegta kadagiti kakabsatna, kinunana, “Agpapigsatayo a kas ken ni Moises; gapu ta pudno nga imbagana iti danum ti Nalabaga a Baybay ket nagbingay ti danum ket bimmallasiw dagiti ammatayo, manipud iti pannakabalud, iti namaga a daga” (1 Nephi 4:2). Idi tarigagayan ni Ari Limhi dagiti balud a taona a “yangad[da] dagiti uloda, ket agrag-o[da],” impalagipna kadakuada daytoy isu met la nga estoria (Mosiah 7:19). Kasta met ti inaramid ni Alma, idi tarigagayanna nga agpaneknek iti anakna maipapan iti bileg ti Dios (kitaen iti Alma 36:28). Ket no mariknatayo a naibaludtayo—no kasapulantayo ti dakdakkel pay bassit a pammati a “makita ti panangisalakan ti Apo”—mabalintayo a lagipen no kasano “ti panangisalakan ti Apo iti Israel iti daydi nga aldaw” (Exodo 14:13, 30).

Dagiti Kapanunotan iti Panagsursuro iti Pagtaengan ken iti Simbaan

Exodo 14; Exodo 15:1–21

Makaaramid ti Apo iti “naindaklan nga aramid” iti biagko.

Bayat ti panangbasam iti Exodo 14:1–10, panunotem no kasano ti narikna koma dagiti Israelita idi makitada nga umas-asidegen ti buyot ti Faraon. Nalabit a mariknam a kasapulam ti milagro tapno makalasat iti narigat a karit a pakaipaspasanguam. Ania ti masursurom manipud iti Exodo 14:13–31 a makatulong kenka a manggun-od iti bileg ti Dios iti biagmo? Utobem no kasano a nakitamon ti bilegna iti napalabas. Ania ti nasursurom maipapan Kenkuana manipud kadagitoy a padas?

TiExodo 15:1–19 ket maysa a kanta ti pammadayaw a kinanta dagiti Israelita kalpasan a biningay ti Apo ti Nalabaga a Baybay. Ania dagiti ragup ti balikas iti daytoy a kanta a masarakam a nangnangruna a napnuan iti kaipapanan? Mabalin nga adda himno a mariknam a kantaen no adda nakaskasdaaw nga inaramid ti Apo para kenka, kas iti “Redeemer of Israel” (Hymns, no. 6). Ibilang ti panangkanta wenno panangdengngeg iti daytoy kas paset ti panagadal ken panagdaydayawmo.

Kitaen met iti Doktrina ken Katulagan 8:2–3.

Exodo 15:22–27; 16:1–15; 17:1–7

Maaramid ti Apo a nasam-it dagiti napapait a banag.

Ti panangbasam maipapan iti panagdaliasat ti Israel ket mangiturong kenka a mangpanunot maipapan kadagiti banag iti biagmo a kasla “napait” kas iti dandanum ti Mara (kitaen iti Exodo 15:23–27). Kasano nga inaramid ti Apo a nasam-it dagiti napait a banag iti biagmo? Ania ti pateg dagitoy a padas iti biagmo?

Makitamto ti ad-adu pay a pagarigan dagiti napait a padas dagiti Israelita iti Exodo 16 ken 17. Makagargari ti agbalin a kritikal iti panagtanabutob wenno panagreklamoda, ngem bayat ti panagbasam, panunotem no kasta met laeng ti inaramidmo. Ania ti masursurom manipud kadagiti padas dagiti Israelita a makatulong kenka a di unay agdaydayamudom ken agtalekka iti ad-adda pay iti Dios? Ania ti isuro kenka dagitoy a bersikulo maipapan iti Dios?

Kitaen met iti 1 Nephi 2:11–12.

dagiti Israelita nga agum-ummong iti mana — Dagiti Israelita nga agum-ummong iti mana. Neo-gothic fresco, Trnava (detalye)

Exodo 16

Idiaya ti Apo kaniak ti inaldaw a naespirituan a pannakataraon.

Gapu ta kasapulantayo amin ti mangan, masansan nga idilig ti Apo dagiti naespirituan a banag iti taraon. Sapulenyo dagiti naespirituan nga adalenna kadagiti padas dagiti Israelita iti mana iti Exodo 16. Kas pagarigan, ania ti masarakam kadagiti instruksion ti Apo iti Exodo 16:16, 19, 22–26 a mayaplikar iti naespirituan a pannakataraonmo?

Tapno matakuatan dagiti dadduma pay nga adalen a mabalin a kayat ti Apo a masursurom manipud iti daytoy a milagro, utobem dagiti saludsod a kas kadagitoy:

Ania ti ited ti Apo kenka a maipada iti inaldaw a mana nga intedna kadagiti Israelita?
Ania ti maaramidtayo a maipada iti panangummong iti mana?

Mabalin a makasarakka kadagiti nayon a pannakaawat iti maysa wenno ad-adu pay kadagitoy a video: “Daily Bread: Pattern,” “Daily Bread: Experience,” ken “Daily Bread: Change” (Gospel Library).

Panunotem ti dadduma pay a banag, malaksid iti pannangan, nga inaldaw nga aramidem. Apay a nasken nga inaldaw nga aramiden ti sumagmamano a banag tapno agbalin nga epektibo? Ania ti mariknam a makaparegta nga aramiden tapno agsapul kadagiti inaldaw a naespirituan a padas?

Kitaen met iti Dieter F. Uchtdorf, “Daily Restoration,” Liahona, Nob. 2021, 77–79; “Daily Restoration” (video), Gospel Library.

Exodo 17:1–7

Ni Jesucristo ti naespirituan a batok ken nabiag a danumko.

Panunotem maipapan iti Mangisalakan bayat ti panangbasam iti Exodo 17:1–7. Kasano a maipada ni Jesucristo iti maysa a bato kenka? (kitaen iti Salmo 62:6–7; Helaman 5:12). Kasano a maipada Isuna iti danum? (kitaen iti Juan 4:10–14; 1 Taga Corinto 10:1–4; 1 Nephi 11:25).

Agsapul kadagiti pisikal a banag a mangpaneknek maipapan ken Cristo. Tunggal iladawan dagiti nasantuan a kasuratan dagiti banag a mabalin a simbolo ni Jesucristo, kas iti Exodo 17:1–7 ,mabalin a gundaway dayta para iti maysa a banag nga adalen. Ti panangkita wenno panangsagid iti maysa a bato wenno danum ket mabalin nga ad-adda a mangpalaka iti pannakaawat no kasano a maipada ken ni Jesucristo dagitoy a banag. No mabalinmo nga iraman ti adu a panagrikna iti panagsursuro, ad-adda a nakallalagip ken makaaringto daytoy.

Exodo 17:8–16; 18:13–26

Agtitinnulong dagiti disipulo a ”mangibaklay iti dadagsen” ti panangaramid iti trabaho ti Apo.

Mabalin nga adda dagiti gundaway iti biagmo a mabalinmo ti makilangen ken Moises—no agpampannuray kenka dagiti dadduma, ngem “[marikna] a nadagsen dagiti imam” . (Exodo 17:12). No dadduma, mabalin nga ad-addaka pay a kas kada Aaron, Hur, ken Jetro, a nangsuporta ken Moises. Ikabilmo ti bagim iti posision ti tunggal maysa kadagitoy a tao bayat ti panagbasam iti Exodo 17:8–16; 18:13–26, ket kitaem no ania ti isuro kenka ti Apo maipapan iti aramidna.

Kitaen met iti Mosiah 4:27; 18: 8–9.

Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Exodo14:5–22

Makaaramid ti Apo iti “naindaklan nga aramid” iti biagko.

Idi pinagsina ti Apo ti Nalabaga a Baybay, nakita ni Moises ken dagiti Israelita no kasano ti kadakkel ti bilegna. Bay-am a tulongannaka dagiti annakmo a mangpanunot iti makaay-ayo a wagas a panangipabuya manen iti estoria manipud iti Exodo 14:5–22 (kitaen met iti “Ti Fiesta ti Paskua” iti Dagiti Estoria iti Daan a Tulag, 70–74). Nalabit aa mabalinmo ti mangipuesto kadagiti tugaw wenno ules ket “bingayem” a kas iti Nalabaga a Baybay. Kalpasanna mabalinyo nga ibinglay iti tunggal maysa no kasano a nakitayon ti bileg ti Apo iti biagyo.

2:54
The Passover
Ania ti mainayon ti Doktrina ken Katulagan 8:2–3 iti pannakaawattayo iti estoria iti Exodo 14? Ibilang ti panangisaritam kadagiti annakmo maipapan ti maysa a padas idi imbaga kenka ti Espiritu Santo ti maysa a banag iti panunotmo wenno pusom, ket awisem ida nga agsarita maipapan kadagiti padasda. Mabalinyo ti agkansion iti maysa a kanta maipapan iti Espiritu Santo, kas iti “Let the Holy Spirit Guide” (Children’s Songbook, 143).

Exodo 15:22–25

Maaramid ti Apo a nasam-it dagiti napapait a banag.

Mabalin a makainumka ken dagiti annakmo iti nasam-it ken napait bayat ti panagadalyo iti Exodo 15:22–25 nga aggigiddan. Kasano nga inaramid ti Mangisalakan a “nasam-it” dagiti “napait” a padastayo iti biag?

Exodo 15:23–25; 16:14–15; 17:1–6

Ni Jesus ti Sibibiag a Danumko, ti Tinapay ti Biagko, ken ti Batok.

Bayat ti panangbasam ken dagiti annakmo iti Exodo 15:23–25; 16:14–15; 17:1–6, bay-am a tulongandaka a mangsapul kadagiti banag a makatulong a mangisarita iti tunggal estoria—kas iti maysa a sanga (a mangpaimbag iti danum iti Mara), maysa a garapon wenno banga (a napunno iti mana), ken maysa a bislak ken bato (para iti danum iti Horeb). Kasano a mangipalagip kadatayo dagitoy nga estoria no ania ti inaramid ni Jesucristo para kadatayo? Kas paset ti panaglilinnawagyo, mabalinmo a basaen ti Mateo 7:24–27; Juan 4:10–14; 6:29–35, 48–51; Helaman 5:12; Doktrina ken Katulagan 20:77, 79.

naipinta a ladawan a mangipakpakita kada Moises, Aaron, ken Hur — Maysa iti Sango ni Dios, ni Joseph Brickey (detalye)

Exodo 17:8–16; 18:13–26

Makatulongak a “mangibaklay iti dadagsen” a makipagannong iti aramid ti Apo.

Basaen ti Exodo 17:8–16, ket mabalinmo nga awisen ti maysa nga ubing a mangingato kadagiti imada iti tangatang. No mabannog ti ubing, makatulong ti dadduma pay nga ubbing, kas iti panangtulong da Aaron ken Hur ken Moises. Ania ti isuro daytoy nga estoria maipapan no kasano a makatulongtayo iti pagarian ti Dios nga agballigi? Mabalinmo met a basaen ti Exodo 18:13–26 ket pagsaritaan dagiti nadagsen a pagrebbengan dagiti tao nga agserserbi iti wardyo. Ania ti mabalintayo nga aramiden ita a makatulong kadagiti lidertayo iti Simbaan, kas met laeng iti panagtulong da Aaron ken Hur ken ni propeta Moises?

Para iti ad-adu pay, kitaen iti isyu ti magasin a Friend iti daytoy a bulan.

Ni Moises a mangisinsina iti Nalabaga a Baybay — Panagballasiw iti Nalabaga a Baybay, ni Otto Semler

panid ti aktibidad iti Primary: Makaaramid ti Apo iti “naindaklan nga aramid” iti biagko — Panagballasiw iti Nalabaga a Baybay, ni Otto Semler