Na Valecavu kei na Solibula

Ni vakaroti Mosese na Kalou me tara e dua na valecavu ena nodra keba na Isireli, a kaya kina o Koya na kena inaki: “me’u tiko kina ena kedra maliwa” (Na Lako Yani 25:8). Ena loma ni valecavu, e matataki na iserau ni Kalou ena kato ni veiyalayalati—e dua na kato kau, ka robota na koula, ka lewena tu na ivolatukutuku ni veiyalayalati ni Kalou kei ira na Nona tamata. A maroroi tu na kato ena rumu tabu duadua, e loma duadua sara, ka tawasei tu mai na vo ni valecavu ena dua na ilati. Na ilati oqo e rawa ni ivakatakarakara ni noda tawasei tani mai na iserau ni Kalou ena vuku ni Lutu, ka vakakina na noda sala lesu Vua—mai vua na iVakabula.

Vakavo ga o Mosese, eda kila ni dua ga na tamata e rawa ni curuma na “tikina tabu sara” (Na Lako Yani 26:34)—oya na bete levu. Me vakataki ira na bete tale eso, sa dodonu me savai ka lumuti taumada ka vakaisulu ena isulu tabu e ivakatakarakara ni nona itutu. Vakadua ga e veiyabaki, ena siga e vakatokai na Siga ni Veisorovaki, ena cabora na bete levu na isoro ena vukudra na tamata ni bera ni qai curuma taudua yani na valecavu. Ena ilati, ena vakama o koya na kau boi vinaka. Na kubou boi vinaka ni cabe cake tiko ki lomalagi e matataka na nodra masu na tamata ni sa cabe cake vua na Kalou. Ni oti ena qai lako sivita na ilati na bete levu, ka kauta voli na dra mai na dua na manumanu cabori, ka lakova yani na itikotiko vakatui ni Kalou, ka vakatakarakarataki ena kato ni veiyalayalati.

Ni o kila na veika o kila baleti Jisu Karisito kei na nona itavi ena ituvatuva nei Tamada Vakalomalagi, e rawa beka ni o raica na sala e dusimaki keda kina na valecavu kivua na iVakabula? Me vaka ga na kena matataka na valecavu kei na kato na iserau ni Kalou ena kedra maliwa na Nona tamata, o Jisu Karisito e a iserau ni Kalou ena kedra maliwa na Nona tamata. Me vakataka na bete levu, o Jisu Karisito sa ikoya na Dauveisorovaki ena keda maliwa kei na Kalou na Tamada. A lako curuma na ilati me mai vakamamasu ena vukuda mai na dra ni Nona veisorovaki.

Eso na ituvaki ni valecavu i Isireli e rawa ni rogorogo matau vei iko, vakabibi kevaka o sa lesu mai na valetabu mo ciqoma na nomu cakacaka vakalotu. Na valetabu sa vale ni Turaga—na Nona itikotiko ena kedra maliwa na Nona tamata. Me vakataka na tikina tabu sara ena valecavu, na rumu ni valetabu vakasilesitieli e matataka na iserau ni Kalou. Meda curu kina, e dodonu taumada meda vakasavasavataki ka lumuti. Eda daramaka na isulu tabu. Eda cakava na veiyalayalati. Eda masu ena dua na icabocabo ni soro ka cabe cake kina na masu vua na Kalou. Ka da qai curuma e dua na ilati ki na iserau ni Kalou.

E rairai na veika bibi duadua beka ena valetabu ni gauna oqo kei na valecavu ni gauna makawa sai koya ni rau, kevaka e kilai vakadodonu sara, erau vaqaqacotaka na noda vakabauti Jisu Karisito ka vakasinaiti keda ena vakavinavinaka ena vuku ni Nona veisorovaki. E vinakata na Kalou mera curu kece ki na Nona iserau o ira kece na luvena; E vinakata o Koya e dua na “matanitu bete” kei na marama bete (Lako Yani 19:6). Ia na noda ivalavala ca ena tarovi keda mai na noda rawata na veivakalougatataki oya, ni sa “sega ni dua na ka tawasavasava ena tiko rawa kei na Kalou” (1Nifai 10:21). Ia na Kalou na Tamada sa talai Jisu Karisito, na noda “bete levu ena ka vinaka ena muri mai” (Iperiu 9:11). Ena cereka vei keda o Koya na ilati ka vakaukauwataki ira kece na tamata ni Kalou mera “toro doudou kina ki na itikotiko vakaturaga loloma, meda vinakati kina” (Iperiu 4:16).

Nikua, na inaki ni valetabu e levu cake sara mai na noda rawata na bula vakacerecerei ena vukuda ga. Ni da sa ciqoma oti na noda dui cakacaka vakalotu kei na caka veiyalayalati kei na Kalou, sa rawa ni da tu e vukudra na tubuda, ka ciqoma na cakacaka vakalotu ena vukudra. Ena dua na vakasama, e rawa ni da vaka na bete levu makawa—kei na Bete Levu Cecere—ka dolava na sala ki na iserau ni Kalou vei ira na tani.

Na ivakavuvuli ni veisorovaki kei na veivakaduavatataki e dau vakatavulici vakaukauwa ena ivakarau makawa ni sorovaki manumanu, ka sa tu makawa mai ni se bera na lawa i Mosese. Rau a vakacabo isoro o Atama kei Ivi. Erau a kila na kena ivakatakarakara me baleta na solibula ni iVakabula. Ka rau a vakavulica oqo vei ira na luvedrau.

Na ivakatakilakila ni sorovaki manumanu e vaka sara ga na kena mositi na siga ni Veisorovaki makawa kei Isireli (“Yom Kippur” ena vosa vaka-Iperiu). Na kena gadrevi na soqoni vakayabaki oqo a vakaraitaki e Na Vunau ni Soro 16:30: “Ni dou na sorovaki ena siga ko ya mo dou vakasavasavataki, dou na savasava kina mai na nomudou ivalavala ca kecega ena mata i Jiova.” Oqo a rawa kina me dau tiko ga na iserau ni Kalou ena kedra maliwa na tamata. A rawati na veisorovaki oqo ena veimataqali soqoni duidui. Ena dua vei ira oqo, a vakamatei e dua na me vaka isoro ni nodra ivalavala ca na tamata, ka qai kauta na bete levu na dra ni me ki na tikina tabu sara. E muri, a qai tabaka ena ligana na bete levu e dua na me bula ka vakatusa na nodra ivalavala ca na luvei Isireli—e vakatakilakilataki na kena tokitaki na ivalavala ca oya ki vua na me. A qai vakasevi tani na me mai na keba i Isireli.

Ena kena ivakarau oqo, sa vakatakarakarataki Jisu Karisito na me, ena nona taura na nodra itutu na tamata ivalavala ca. Na valavala ca me kakua ni vakatarai ena iserau ni Kalou. Ia mai na nodra vakarusai se vakasavi tani na tamata ivalavala ca, sa vakarautaka kina na Kalou e dua tale na sala—ena kena vakamatei se vakasavi tani na me. “Ia na me ena colata na nodra cala kecega” (Na Vunau ni Soro 16:22).

Na ivakatakilakila ni ivakarau oqo e dusia na sala sa vakarautaka tu na Kalou me kauti keda lesu tale ki na Nona iserau—o Jisu Karisito kei na Nona Veisorovaki. Na iVakabula sa “colata ko koya na noda rarawa, ka sa colata na rarawa ni lomada,” io na “noda caka cala kecega” (Aisea 53:4, 6). A tu ena vukuda, ka solia na Nona bula me sauma kina na itotogi ni ivalavala ca, ka qai mai vakadrukai mate ena Nona Tucaketale. Na isoro i Jisu Karisito sai koya na “ilutua ka iotiioti ni isoro; io, e sega ni sorovaki kina na tamata, se manumanu yavaiva” ia e dua e “tawayalani ka isoro tawamudu“ (Alama 34:10). Sai Koya na vakataucokotaki ni veika kecega e dusi ena veisorovaki ni gauna makawa.

Ena vuku ni ka oqo, ni sa oti na Nona solibula, a kaya o Koya, “Ia mo ni kakua tale ni vakadavea na dra; ka, vakacabora vei au … sa cava eke na nomuni isoro. Ia mo ni na cabora ga me isoro vei au na yaloraramusumusu kei na yalo bibivoro” (3 Nifai 9:19–20).

Ni gauna o kunea kina na veimalanivosa ena Veiyalayalati Makawa me baleta na solibula kei na valecavu (se, e muri, na valetabu)—ka o na kunea kina e levu vei ira—nanuma tiko ni sa inaki taumada ni ka kece oya me vaqaqacotaka na nomu vakabauta na Mesaia, o Jisu Karisito. Semata na veika o wilika ka vulica ena nomu sokalou ena Nona vale. Mo vagolea Vua na yalomu kei na nomu vakasama. Vakasamataka vakatitobu na veika sa vakayacora o Koya me kauti iko lesu mai kina ki na iserau ni Kalou—kei na veika mo na cakava mo muri Koya.