Na Lako Yani 35–40; Na Vunau ni Soro 1; 4; 16; 19

Na Lako Yani 35–40 e vakamacalataka na nodra sasaga na Isireli me ra tara e dua na valecavu, ka na vukei ira kina na vei cakacaka vakalotu tabu mera yaco mera tamata savasava. Ni o wilika na veiwase oqo, vakasaqara na veika a kerea na Turaga vei ira na Nona tamata mera biuta ena valecavu. Na cava beka e rawa ni matataka na iyaya eso oqo? Na cava era vakatura vei iko me baleta na kena tubu cake na bula savasava? Vakasamataka vakabibi na sala e vagolea kina na nomu vakasama kivua na iVakabula na veika oqori. E dua na teveli vakaoqo ena rawa ni vukei iko:

E dina sara, na noda tu walega ena veivanua tabu e sega ni vakasavasavataki keda. Na Vunau ni Soro 19 e vakamacalataka na lawa kei na ivakaro a solia na Turaga me vukei ira na Isireli mera tubu cake ena savasava. Na cava o raica ena ivakaro oqo ena rawa ni vukei iko mo vakasaqara na savasava mai vua na Turaga? Na cava o sa vakauqeti kina mo cakava mo bulataka vakalevu cake kina na ivakavuvuli oqo?

Raica talega na Henry B. Eyring, “Yalo Savasava kei na iTuvatuva ni Bula Marau,” Liaona, Nove. 2019, 100–103; “The Tabernacle” (vidio), Valenivola ni Kosipeli.

7:19

Ena yabaki ni oti na nodra biuti Ijipita, na nodra veimaliwai na luvei Isireli vata kei Jiova e rawa ni vakamacalataki ni sega ni tudei sara. Ia, ni o wilika Na Lako Yani 35:4–35 kei na 36:1–7, raica na nodra a vakaio na Isireli ki na ivakaro mera tara na valecavu. Na cava o vulica mai vei ira na Isireli ka rawa ni vukei iko mo qarava vakavinaka cake na Turaga?

Ena sega beka ni kerea vei iko na kaukamea talei, lineni, se kau me baleta na valecavu. Na cava sa solia tu vei iko na Turaga, kei na cava e kerea tiko vei iko o Koya mo solia? Na gauna cava sa “uqeti … na [lomamu] me lako mai ki na cakacaka”?

Raica talega na Ulutaga kei na Taro (Topics and Questions), “Sacrifice,” Valenivola ni Kosipeli.

Na Lako Yani 40:12–14 e vakaibalebaletaki ki na cakacaka vakalotu makawa ka ra sa qaravi talega ena noda gauna oqo ena vale ni Turaga. Oqo eso tale na tikina ka rawa ni vukei iko mo vulica na sala e vakadinadinataki Jisu Karisito kina na cakacaka vakalotu oqo:

• Vakasavasavataki: Na Same 51:2; Isikeli 36:25–27

• Vakaisulu ena isulu tabu: Aisea 61:10; Maciu 22:11–14; Nai Vakatakila 19:7–8

• Lumuti: Luke 4:18–19; Cakacaka 10:38

E vuqa na ivola ni Vunau ni Soro eda na rairai vulagi kina—na sorovaki ni manumanu yavaiva, na ivalavala ni sokalou ka oka kina na dra kei na wai, kei na lawa e lewai kina na veika matailalai ni bula. Ia na ivakarau ni sokalou kei na lawa oqo a nakiti me vakatavulica na ivakavuvuli e kilai levu tu—na veivutuni, na savasava, kei na Veisorovaki ni iVakabula. Mo kunea na ivakavuvuli oqo ni o wilika Na Vunau ni Soro 1:1–9; 4; 16, vakasamataka na taro eso vakaoqo:

• Na vosa se malanivosa cava au raica ka vakananumi au me baleti Jisu Karisito kei na Nona isoro ni veisorovaki?

• Na cava au vulica mai na isoro eso oqo me baleta na solibula ni iVakabula?

• Au sa vakataki ira vakacava na tamata era a cabora na isoro eso oqo?

Sa sega tale ni gadreva na Turaga na isoro manumanu. Ia na isoro e se ivakavuvuli bibi tikoga ni kosipeli. Me vulici na mataqali isoro e gadreva na Turaga, vulica na 3 Nifai 9:19–20; Vunau kei na Veiyalayalati 64:34. O sa cabora tiko vakacava na mataqali isoro vakaoqo? Na cava e vakavulica vei iko na Mosese 5:7 me baleta na ivakarau mo raica kina na nomu isoro?

Raica talega na “Vakasama me Nanumi Tiko: Na Valecavu kei na Solibula.”

• Ena mua ni ituvatuva oqo sa tiko kina e dua na iyaloyalo ni nodra valecavu na Isireli ena lekutu. O na rairai vinakata beka mo raica vata kei ira na luvemu ka tarogi ira se iyaya cava ena gadrevi me tara kina na valecavu. Oti mo ni qai wilika vata Na Lako Yani 35:20–29 me kilai kina na sala a vakarautaki kina na veika oqo. Sa sureti keda vakacava na Turaga meda cau ki na tarai cake ni Nona matanitu?

• Vakasamataka mo wilika vata kei ira Na Lako Yani 36:1 mo kila kina na veika a solia na Turaga vei Pisalieli kei Aoliapi me vukea na kena tarai cake na valecavu. Sa na qai rawa ni o veivosakitaka kei ira na luvemu na veika o vakila ni sa solia vei ira na Turaga mera veivuke ena kena tarai cake na Nona matanitu. E rawa vakacava ni da vakayagataka na veika oqo meda vakalougatataki ira kina na tani?

• Na Lako Yani 40:17–34 e volai kina na veika era a tiki ni valecavu i Isireli. De dua o iko kei ira na luvemu e rawa ni kunei ira ena veitikina oqo kei na iyaloyalo ni valecavu ena mua ni ituvatuva oqo. Veivosakitaka na sala e rawa ni vakavulica kina na veitiki ni valecavu yadua na veika me baleta na iVakabula se Tamada Vakalomalagi. Me vaka beka oqo, na kato ni ivakadinadina e rawa ni vakananuma vei keda na ivakaro ni Kalou, na icabocabo ni soro e rawa ni vakananuma vei keda na isoro i Jisu Karisito, kei na so tale.

• Na vanua tabu cava so e tu vei keda nikua e vukei keda meda vakila ni da voleka cake vei Jisu Karisito? Me tiki ni veivosaki oqo, sa rawa mo sarava vata na vidio “Temples” (Valenivola ni Kosipeli). E rawa talega ni o lagata e dua na sere me vakataka na “Holy Places” (Valenivola ni Kosipeli). Wasea vakai kemuni na veika o ni vakila me baleta na veivanua tabu me vaka na valetabu.

5:41

• Na isoro manumanu e vakamacalataki ena Veiyalayalati Makawa a kena inaki me vakavulici ira na luvei Isireli me baleta na veivosoti ena vukui Jisu Karisito. Vakasamataka mada na sala e rawa ni cakava vakakina vei ira na luvemu na wilika me baleta na isoro eso oqo. E rawa ni o vakaraitaka na iyaloyalo eso kei Jisu Karisito e Kecisemani kei na kauveilatai (raica na iVola ni iYaloyalo Vakosipeli, naba 56,57) ni o wilika vata kei ira na gone Na Vunau ni Soro 1:1–4. Vukei ira mera kunea na vosa se malanivosa e vakananuma vei ira na isoro i Jisu Karisito.

• E rawa talega ni o wilika vata na 3 Nifai 9:19–20 mo kila kina na veika eda vakaroti meda cabora me isoro ka sega ni manumanu. Na cava na kena ibalebale mo cabora na yalo raramusumusu kei na yalo bibivoro vua na Turaga? Raica na iDusidusi ki na iVolanikalou, “Yalo Raramusumusu” (Valenivola ni Kosipeli) me vukea na kena saumi na taro oqo.