Na Tiko mai na Lekutu 11–14; 20–24; 27

Ena Na Tiko mai na Lekutu 11:11–17, 24–29, raica na leqa a sotava o Mosese kei na kena iwali a vakatura mai na Kalou. Na cava o nanuma a vakaibalebaletaka o Mosese ena nona kaya ni a diva me “ra sa parofita na tamata kecega i Jiova”? (tikina e 29). Ni o vakasamataka vakatitobu na taro oqo, vaqara na kena isau eso ena itukutuku nei Peresitedi Russell M. Nelson “Na iVakatakila ki na Lotu, Na iVakatakila ki na Noda Bula” (Liaona, Me 2018, 93–96).

Ni da kaya ni rawa ni da ciqoma kece na ivakatakila, e sega ni kena ibalebale ni da rawa ni liutaki ira kece na tamata ni Kalou me vakataki Mosese. Na ka a volai e Na Tiko mai na Lekutu 12 e vakamatatataka na tikina oqo. Na ivakasala cava o kunea ena wase oqo? Na cava o vakila e vinakata na Turaga mo kila me baleta na ivakatakila yadua kei na vakamuria na parofita?

Raica talega na 1 Nifai 10:17; Vunau kei na Veiyalayalati 28:1–7; Dallin H. Oaks, “Rua na Sala ni Veitaratara,” Liaona, Nove. 2010, 83 – 86.

Eso na tamata era kurabui ni ra kila ni o Mosese, na iliuliu qaqa ka a tu e matai Fero ka vakayacora na cakamana veivakurabuitaki ena kaukauwa ni Turaga, a “uasivi ena yalomalumalumu” talega (Na Tiko mai na Lekutu 12:3). Na cava na kena ibalebale meda yalomalumalumu? Vakasamataka mo vulica na ivakamacala nei Elder David A. Bednar ena “Yalomalua ka Yalomalumalumu” (Liaona,, Me 2018, 30–33) se ena “Yalomalumalumu, Yalomalua” ena iDusidusi ki na iVolanikalou (Valenivola ni Kosipeli).

Na cava o vulica mai na ivakaraitaki nei Mosese ni yalomalumalumu e Na Lako Yani 18:13–25; Na Tiko mai na Lekutu 11:26–29; Na Tiko mai na Lekutu 12; Iperiu 11:24–27; kei na Mosese 1:10–11? Sa rawa talega mo vakasamataka vakatitobu na sala a vakaraitaka kina na iVakabula na yalomalumalumu (raica na Maciu 11:29; 27:11–14; Luke 22:41–42; Joni 13:4–5). Na cava era vakavulica vei iko na ivakaraitaki eso oqo?

Ni o wilika Na Tiko mai na Lekutu 13–14, tovolea mo biuti iko ena nodra itutu na Isireli. Na cava o nanuma era vinakata kina mera “lesu tale ki Ijipita”? (Na Tiko mai na Lekutu 14:3). O na vakamacalataka beka vakacava na “yalona” tale kadua o Kelepi? (Na Tiko mai na Lekutu 14:24). Na cava e vakauqeti iko me baleta na vakabauta nei Kelepi kei Josua, ka mo na vakayagataka vakacava na nodrau ivakaraitaki ki na veika o sotava tiko?

Era a kila tu na parofita ni iVola i Momani na italanoa e kune e Na Tiko mai na Lekutu 21:4–9 ka kila vakavinaka na kena bibi vakayalo. Wilika na nodra ivakavuvuli me baleta na italanoa oqo ena 1 Nifai 17:40–41; Alama 33:18–22; kei na Ilamani 8:13–15. Oqo eso na taro mo vakasamataka vakatitobu ni o wiliwili voli:

• Na cava e rawa ni matataka na gata parasa?

• Na cava e rairai matataka na laukata ena gata?

• O ira na Isireli mera “raica na gata parasa” (Na Tiko mai na Lekutu 21:9) mera vakabulai kina. Na cava o nanuma ni ra a sega ni via raica kina eso vei ira? E sa bau yaco beka vei iko e dua na ka vata oqori?

• Na cava o sa vakauqeti kina mo cakava mo “rai vua na Luve ni Kalou ena vakabauta” ka vakabulai? (Ilamani 8:15).

Na wiliki ni veitikina oqo ena rawa ni vakananumi iko ena so tale na gauna ena ivolanikalou ni gadrevi vei ira na tamata mera vakanamata tikoga vei Karisito. Me kena ivakaraitaki, vakatauvatana na itukutuku ni Na Tiko mai na Lekutu 21:4–9 kei na Maciu 14:25–31 kei na 1 Nifai 8:24–28 (raica talega na iyaloyalo eso ena mua ni ituvatuva ni macawa oqo). Na cava e rawa ni dau kauti keda tani mai vei Karisito? E dau vakalougatataki ira vakacava na tamata era vakanamata tikoga Vua?

Raica talega na “Niu sa Nanumi Kemuni” (Sere ni Lotu, naba 79).

Ni a mai kila o Peleki, na tui Moapi, ni ra sa gole tiko mai na Isireli, a kacivi Pelami, e dua na tagane ka kilai tu ni dau cavuta na veivakalogatataki kei na vosavakacacataki. E vinakata vei koya o Pelaki me vosavakacacataki ira na Isireli. Raica na sala a saga kina o Peleki me vakauqeti Pelami (raica Na Tiko mai na Lekutu 22:5–7, 15–17), ka vakasamataka na veitemaki o rairai sotava mo vorata na loma ni Kalou. Na cava e vakauqeti iko me baleta na kena isau mai vei Pelami e Na Tiko mai na Lekutu 22:18, 38; 23:8, 12, 26; 24:13? E ka ni rarawa, ni a qai rawai emuri o Pelami ka cakitaki Isireli (raica Na Tiko mai na Lekutu 31:16; Juta 1:11). Vakasamataka vakatitobu na sala o rawa ni yalodina tikoga kina vua na Turaga ena dela ni veivakasaurarataki mai vei ira na tani.

• Tarogi ira na luvemu kevaka era nanuma eso na cakamana a vakayacora na Turaga me vukei ira na Isireli (raica “Na Mate Veitauvi e Ijipita” kei na “Na Lako Sivia” ena iTalanoa eso mai na Veiyalayalati Makawa, 67–74). Oti mo qai vakalekalekataka vei ira Na Tiko mai na Lekutu 11:4–10, ka vakabibitaka ni ra sa guilecava na Isireli na nodra veivakalougatataki ka ra sa vosakudrukudru tiko. Na veivakalougatataki cava beka eda dau guilecava ena so na gauna?

• Ni o lagata se vakarorogo ki na dua na sere me baleta na vakavinavinaka, me vaka na “Wilika Na Nomu Kalougata” (Sere ni Lotu, naba 144), sa rawa mera droinitaka na luvemu na iyaloyalo ni veivakalougatataki eso sa solia vei ira na Turaga.

• Mo vakamacalataka kina Na Tiko mai na Lekutu 12, e rawa ni o tukuna vei ira na luvemu ni a rarawa na Turaga vei Eroni kei Miriama, na taci Mosese kei na ganena. Sureta mera wilika Na Tiko mai na Lekutu 12:1–8 me kunei kina na vuna. Tovolea mo vakayagataka na iVola ni iYaloyalo Vakosipeli me vukei ira mera kunea na ivakaraitaki eso ni tamata ena ivolanikalou era a rokova na parofita ni Turaga ka ra vakalougatataki. Eda na vakalougatataki vakacava ni da muria na parofita ni Turaga?

• E rawa ni o vakayagataka na “Mosese kei na Gata Parasa” ena iTalanoa eso mai na Veiyalayalati Makawa, 83–84, me vukei ira na luvemu mera vulica na veika a yaco e Na Tiko mai na Lekutu 21:6–9. E vakataki Jisu Karisito vakacava na gata parasa? (raica na Joni 3:14–15). Era na marautaka beka na luvemu na nodra bulia e dua na gata mai na pepa ka vola kina eso na ka rawarawa era rawa ni cakava mera “rai vua na Luve ni Kalou ena vakabauta” (Ilamani 8:15).

  

  1:2

• Mera digitaka na gone qase cake dua vei ira na ivolanikalou oqo ka wasea na veika e vakuria ki na nodra kila na italanoa: 1 Nifai 17:41; Alama 33:18–20; Ilamani 8:13–15; Vunau kei na Veiyalayalati 6:36.

• Vakalekalekataka Na Tiko mai na Lekutu 22:1–18 vei ira na gone, ka vakabibitaka na nona sega ni via vosavakacacataki ira na tamata ni Kalou o Pelami, e dina ga ni a rokovi koya ka solia vua na iyau o Pelaki, na tui Moapi. Qai vukei ira na luvemu mera vakasaqara na vei malanivosa ena veitikina oqo ka ra nanuma ni vakaraitaka na yalodina nei Pelami me muria na Kalou: Na Tiko mai na Lekutu 22:18; 23:26; 24:13. Sureti ira na gone mera digia e dua na malanivosa era taleitaka ka vola ena dua na kadi me vukei ira mera nanuma tiko mera talairawarawa vua na Turaga.