“20–26 ni Epereli. ‘A Ka Kecega Sa Kaya ko Jiova Keimami Na Cakava’: Na Lako Yani 19–20; 24; 31–34,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
“20–26 ni Epereli. ‘A Ka Kecega Sa Kaya ko Jiova Keimami Na Cakava,’” Lako Mai, Mo Muri Au: Veiyalayalati Makawa 2026
Mosese kei na Vatu Raraba, mai vei Jerry Harston (matailalai)
20–26 ni Epereli: “A Ka Kecega Sa Kaya ko Jiova Keimami Na Cakava”
Na Lako Yani 19–20; 24; 31–34
E dina ga ni ra a vosakudrukudru ka vakatitiqa na luvei Isireli ena veigauna sa oti, ena gauna a wilika kina o Mosese na lawa ena ruku ni Ulunivanua o Saineai, era a cakava na veiyalayalati oqo: “A ka kecega sa kaya ko Jiova keimami na cakava, ka talairawarawa” (Na Lako Yani 24:7). A qai kacivi Mosese na Kalou ki na ulunivanua, ka tukuna vua me tara e dua na vale tabu “me’u tiko kina ena kedra maliwa” (Na Lako Yani 25:8).
Ia ni a tiko voli o Mosese ena dela ni ulunivanua me vulica na ivakarau me maliwai ira kina na Isireli na iserau ni Kalou,era a tiko na kai Isireli ena ruku ni ulunivanua ka cakava tiko e dua na matakau koula mera qarava. Ni oti ga vakalailai na nodra yalataka “me kakua vei [ira] na Kalou tani,” era “sa lako tani vakatotolo” mai na nodra yalayala (Na Lako Yani 20:3; 32:8; raica talega Na Lako Yani 24:3). Sa dua na vuki e kidroataki, ia eda kila mai na veika e sotavi ni vakabauta kei na yalodina e rawa ni dau rawai ena so na gauna ena yalototolo, rere, se vakatitiqa. Ni da vakasaqara na iserau ni Turaga ena noda bula, e veivakauqeti ni da kila ni a sega ni biuti ira na Isireli makawa na Turaga ka na sega ni biuti keda o Koya—ni sa “yalololoma ka daulomasoli, vosota vakadede, ka levu na nona yalovinaka kei na dina” (Na Lako Yani 34:6).
Vakasama eso ni Vuli e Vale kei na Lotu
Na Lako Yani 19:3–6
O ira na tamata ni veiyalayalati ni Turaga era sa iyau vakamareqeti Vua.
A vakavulica o Peresitedi Russell M. Nelson: “Ena Veiyalayalati Makawa, na vosa vaka-Iperiu ka vakadewataki mai kina na peculiar (matalia) sa ikoya na segullah,, ka kena ibalebale na ‘iyauqaqa yaga dina,’ se na ‘iyau talei.’ … Vei keda meda cavuti ni da tamata matalia mai vei ira na italai ni Turaga e sa dua na veivakacaucautaki ena ivakarau cecere duadua” (“Gone ni Veiyalayalati,” Ensign, Me 1995, 34). E tarai iko vakacava na vosa nei Peresitedi Nelson me baleta nomu kila Na Lako Yani 19:3–6? Sa vakaraitaka vakacava vei iko na Turaga ni dau vakamareqeti iko o Koya?
Lako Yani 19:10–11, 17
Na veika tabu e sotavi e gadrevi kina na vakavakarau.
A kaya na Turaga vei Mosese ni o ira na luvei Isireli e gadrevi mera vakavakarau ni se bera ni ra “veitata kei na Kalou” (Na Lako Yani 19:10–11, 17) ka maroroya e dua na veiyalayalati vata kei Koya (raica Na Lako Yani 19:5). O na vakavakarau vakacava ki na veika vakayalo o sotava, oka kina na sakaramede kei na cakacaka vakalotu ni valetabu? E rawa vakacava mo vukei ira na tani mera vakavakarau? Na cava o vulica me baleta na vakavakarau mai na Luke 6:12–13; Inosi 1:2–6; Alama 17:2–3?
Na ulunivanua oqo mai Ijipita e dau vakabauti tu me Ulunivanua o Saineai.
Na Lako Yani 20:1–17
Na talairawarawa ki na ivakaro ni Kalou e dau kauta mai na veivakalougatataki.
Ni ra soqoni vata na Isireli ena ruku ni Ulunivanua o Saineai, era a rogoca na domo ni Kalou ni solia mai na Vunau e Tini (raica Nai Vakarua 4:12–13). Oqo, e dina sara, e sega ni ivakaro duadua ga ni Kalou—e vuqa tale era tu ena ivolanikalou. Okoya gona ni o wilika Na Lako Yani 20:1–17, tarogi iko se cava e vakabibitaka kina vakatabakidua na Kalou na kena e tini oqo. Oqo e dua na tepeli isabolo e rawa ni o vakayagataka ni o vakasamataka vakatitobu na bibi ni Vunau e Tini ena nomu bula:
|
iVakaro |
Ena dua tale na kena itukutukuni, sa kerei au tiko na Turaga me’u … |
Veivakalougatataki e yaco mai ena bulataki ni ivakaro oqo |
|---|---|---|
-
E vukei iko vakacava na nomu muria na ivunau e tini oqo mo maroroya kina na ivakaro cecere e rua a solia o Jisu ena Maciu 22:34–40?
-
Na cava soti na veika e rawa ni o temaki kina mo vakaliuca cake mai Vua? Na veivakalougatataki cava o sa raica ena nomu vakaliuca na Kalou?
-
O na sauma vakacava vua e dua e tukuna ni a soli na iVunau e Tini ena dua na gauna balavu sa oti ka sa sega ni vakayagataki nikua? Na ivakaraitaki cava mai na nomu bula o na wasea me tiki ni nomu isaunitaro? Ena vukea vakacava na serenilotu “Lawa Ni Turaga” (Sere ni Lotu, naba 69) na ivakarau o vakamacalataka kina na ivakaro ni Kalou vei ira tale eso?
-
Sa vakayacora vakacava na Turaga na yalayala e Na Lako Yani 20:6 ena nomu bula?
Raica talega “Na iVakaro Cecere—Lomana na Turaga,” ena Nodra iVakavuvuli na Peresitedi ni Lotu: Ezra Taft Benson (2014), 37–45; Dallin H. Oaks, “Me Kakua Vei Iko na Kalou Tani,” Liaona, Nove. 2013, 72–75; Ulutaga kei na Taro (Topics and Questions), “iVakaro (Commandments),” Valenivola ni Kosipeli.
Na Lako Yani 24:1–11
Na noqu caka veiyalayalati e vakaraitaka noqu lomasoli me’u talairawarawa ki na lawa ni Kalou.
Ni o wilika Na Lako Yani 24:3–8, vakasamataka na veiyalayalati o sa cakava kei na Kalou. E dina ni okati ena veiyalayalati i Isireli na soqo vakalotu eso e duidui mai na veika e gadreva na Kalou nikua, o na rairai raica eso na ka e tautauvata. Kena ivakaraitaki, na tikina e 4, 5, kei na 8 e tukuni kina na icabocabo ni soro, na isoro manumanu, kei na dra. Na cava era matataka na veika oqo, ka ra semati vakacava kina nomu veiyalayalati?
Na Lako Yani 32–34
Na ivalavala ca sa ikoya na vuki tani mai vua na Kalou; na veivutuni sa ikoya na vuki yani Vua ka lako tani mai na ca.
Tovolea mo biuti iko ena nodra ituvaki na Isireli—o sa tiko ena lekutu, sa lako tu o Mosese me 40 na siga, ka sa tu ena nomu veisiga ni mataka e dua na veisaqasaqa kei ira na kai Kenani ena vanua yalataki (raica Na Lako Yani 32:1–8). Na cava o nanuma era a vinakata kina na Isireli e dua na matakau koula? Na cava e vakauqeti iko baleta na kerekere nei Mosese vua na Turaga e Na Lako Yani 33:11 – 17?
Dina ga ni bibi na nodra ivalavala ca na Isireli, na italanoa oqo e oka talega kina e dua na itukutuku ni loloma veivueti kei na veivosoti ni Kalou. Na cava o vulica e Na Lako Yani 34:1–10 me baleta na iVakabula? (raica Na Lako Yani 32:30–32; Mosaia 14:4–8; 15:9; Vunau kei na Veiyalayalati 45:3–5).
Na Lako Yani 31:13–16
Na Siga ni Vakacecegu e dua na ivakatakilakila.
A vakamacalataka o Peresitedi Russell M. Nelson: “Ni’u se cauravou, au dau vakadikeva na nodra cakacaka eso era a vola na veika mera cakava kei na veika mera kakua ni cakava ena Siga ni Vakacecegu. Ia e muri, au sa qai kila rawa mai na ivolanikalou ni noqu ivakarau kei na itovo ena Siga ni Vakacecegu sa dua na ivakatakilakila mai vei au ki vua na Tamaqu Vakalomalagi [raica Na Lako Yani 31:13; Isikeli 20:12, 20]. Ena kila oqori, sa sega tale ni gadrevi me’u vola na veika me’u cakava se kua. Ni gauna me’u vakatulewataka kina se vinaka se ca e dua na itavi e na Siga ni Vakacecegu, au tarogi au ga, ‘Na ivakatakilakila cava au vinakata me’u vakaraitaka vua na Kalou?’ Na taro oya e vakamatatataka vakavinaka na noqu digidigi baleta na Siga ni Vakacecegu” (“Me Ka e Rekitaki na Siga ni Vakacecegu,” Liaona, Me 2015, 130). Vakasamataka vakatitobu na ivakatakilakila cava o via solia vua na Kalou ena nomu rokova na Siga ni Vakacecegu.
Na Lako Yani 34:1–4
Na cava na duidui ni rua na vatu raraba e cakava o Mosese?
Ni sa lako sobu mai na ulunivanua o Mosese, a kauta mai na lawa ka volai toka ena vatu raraba. Ni sa raica ni ra sa voroka na nodra veiyalayalati na Isireli, a voroka na vatu raraba o Mosese (raica Na Lako Yani 31:18; 32:19). A qai vakaroti Mosese e muri na Kalou me cakava e dua tale na wasewase ni vatu raraba ka kauta lesu ki na ulunivanua (raica Lako Yani 34:1 – 4). Na iVakadewa nei Josefa Simici ni Lako Yani 34:1 – 2 (ena ikuri ni ivakamacala ni iVola Tabu) e vakamatatataka ni imatai ni wasewase ni vatu raraba a oka kina na veicakacaka vakalotu ni “ivakarau tabu” ni Kalou, se na Matabete i Melikiseteki. Na ikarua ni wasewasee oka kina na “lawa ni ivakaro vakayago.” Oqo e dua na lawa lailai ka qaravi mai na “matabete lailai” (raica na Vunau kei na Veiyalayalati 84:17–27), ka kena inaki me vakarautaki ira na Isireli me baleta na lawa kei na matabete cecere, me rawa kina ni ra curu yani ki na iserau ni Kalou.
Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.
Vakasama eso ni Nodra Vakatavulici na Gonelalai
Na Lako Yani 20:3–17
E solia na Kalou na ivakaro baleta ni vinakata me’u bula marau.
-
Na cava o rawa ni cakava me ka ni lasa kina vei ira na luvemu na vulici ni iVunau e Tini? Ni o ni wilika vata Na Lako Yani 20:3–17 mera vukei iko na luvemu mo kunea se droinitaka e dua na iyaloyalo me matataka yadudua na iVunau e Tini. Sa na qai rawa ni ra veivukevuke na luvemu ena nodra digitaka e dua na iyaloyalo ka veivosakitaka na sala e rawa ni ra bulataka kina na ivakaro oya. Wasea vakai kemuni na sala e kauta mai kina na marau na bulataki ni ivakaro oya.
-
E rawa talega ni o ni lagata vata e dua na sere me vaka na “Talairawarawa ki na iVunau” (iVolanisere ni Gonelalai, 68). Vukei ira na luvemu mera kunea na qaqana ena sere ka vakavulica vei ira na vuna e vinakata kina na Kalou meda muria na Nona ivakaro.
Ni ra wasea na gone na veika vakayalo era sotava, ena tubu na nodra ivakadinadina. Na taro o taroga e rawa ni vakayaloqaqataki ira na gone mera wasea na nodra nanuma baleta na iVakabula, kei na sala sa vakalougatataki ira kina na bulataki ni kosipeli (raica na Veivakavulici ena iVakarau ni iVakabula, 32). Ni ra vakayacora oqo, era sa tukuna tiko kina na nodra ivakadinadina. Vakasamataka na sala o rawa ni cakava kina oqo ni o veivosakitaka na veivakalougatataki e yaco mai ena bulataki ni iVunau e Tini.
Na Lako Yani 20:12
E vinakata na Turaga me’u rokovi rau na noqu itubutubu.
-
Vukei ira na luvemu mera vulica na malanivosa “Mo vakarokorokotaki rau na tamamu kei na tinamu” (Na Lako Yani 20:12). O na gadreva beka mo vakamacalataka ni o “vakarokorokotaka” e dua e rawa ni kena ibalebale mo rokovi ira se me kauta mai vei ira na marau. Na cava a cakava o Jisu me rokova kina na tinana vakayago kei na Tamana Vakalomalagi? (raica na Luke 2:48–51; Joni 19:26–27). De dua e rawa ni ra veivukevuke na luvemu mera vakatasuasuataka na veika e rawa ni ra cakava mera rokovi ira kina na nodra itubutubu, ni ra kilakila mai na vo ni gone na cava era cakava tiko.
Na Lako Yani 31:13, 16–17
Na Rokovi ni Siga ni Vakacecegu sa ivakatakilakila ni noqu lomana na Turaga.
-
Era na marautaka beka na luvemu na nodra raica na ivakaraitaki ni ivakatakilakila eso—me vakataka na ivakatakilakila ni gaunisala se ivakatakilakila ena dua na vale. Na cava na kedra inaki na ivakatakilakila eso? Sa qai rawa ni ra vakaraica na luvemu na vosa “ivakatakilakila” e Na Lako Yani 31:13, 16–17. Na cava a kaya na Turaga ni sai ivakatakilakila vei keda kei Koya? Wasea vei ira na gone me baleta eso na sala o dau tovolea kina kei na nomu matavuvale me vakaraitaka na nomudou lomana na Turaga ena Siga ni Vakacecegu.
Droini kei Mosese ni taura tu na Vunau e Tini, mai vei Sam Lawlor (matailalai)
Na Lako Yani 32:1–8, 19–24; 34:6–7
Au na sega ni “lako tani” mai na sala ni Kalou.
-
Tovolea mo vakayagataka na “Mosese ena Ulunivanua ko Saineai” (ena iTalanoa eso mai na Veiyalayalati Makawa, 77–82) me vukei ira na luvemu mera vulica na italanoa e Na Lako Yani 32:1–8, 19–24. Na cava a cala kina vei ira na Isireli mera sokalou ki na dua na ivakatakarakara ka sega kivua na Kalou?
2:55Moses on Mount Sinai
-
Ena rairai marautaki beka na kena tauyavutaki e dua na sala ena vuloa (se kunei e dua volekata na nomu itikotiko) me vakaraitaka na veivosa oqo e Na Lako Yani 32:8: “Era sa lako tani vakatotolo mai na sala.” Ni ra lako tiko ena sala, era na rawa ni veivosakitaka na luvemu na veitemaki eda sotava meda lako tani kina mai vua na Kalou. Na cava ena vukei keda meda tiko ga ena sala ni Kalou—ka lesu tale kina kevaka eda sa lakosese? (raica Na Lako Yani 34:6–7).
Me baleta na vakasama tale eso, raica na ilavelave ni mekasini ni iTokani ni vula oqo.