Na Lako Yani 7–13

E nuitaki ni na sega vakadua ni veisaqasaqa na lomamu kei na loma ni Kalou me vakataki Fero. Ia, e tiko ga vei keda kece na gauna e sega ni malumu kina na yaloda me vaka e dodonu me vakakina. Na cava e matata vei iko me baleta na nona sauma o Fero na mate veitauvi eso e Na Lako Yani 7:14–25; 8:5–32; 9:1–26; 10:12–29; 12:29–33? Raica na ivakamacala ena iVakadewa nei Josefa Simici e Na Lako Yani 7:3, 13; 9:12.

Na cava na vuna e ivakamacala vinaka kina ni yaloi Fero na “kaukauwa”? Vakasamataka mada na cava o vulica mai na veitikina oqo me baleta na yalo malumu: 1 Nifai 2:16; Mosaia 3:19; Alama 24:7–8; 62:41; Ica 12:27. Ni o wilika na revurevu ni yalo kaukauwa nei Fero, vakasamataka vakatitobu na ituvaki ni yalomu. Na veisau cava eso o vakila e gadrevi mo cakava?

Na sala duadua ga vei ira na Isireli mera vakabulai mai na ikatini ni mate veitauvi, ka vakamacalataki e Na Lako Yani 11:4–5, oya mera vakamuria vakadodonu sara na idusidusi a solia na Turaga vei Mosese e Na Lako Yani 12, e dua na soqo vakalotu ka vakatokai na Lakosivia. Na Lakosivia e vakavulica vei keda ena ivakatakarakara ni, me vaka ga ni a sereki ira na Isireli na Turaga mai na nodra vakabobulataki e Ijipita, sa rawa talega me sereki keda mai na veivakabobulataki ni ivalavala ca. Mo dikeva kina na ivakatakarakara oqo e Na Lako Yani 12:1–42, sa rawa mo vakayagataka e dua na ivolakabi vakaoqo:

Na cava tale o rawa ni kunea ena idusidusi kei na ivakatakarakara eso ni Lakosivia ka vakananumi Jisu Karisito kei na nona Veisorovaki vei iko? Na cava e vakatura vei iko na ivakatakarakara oqori ena ivakarau me ciqomi kina na veivakalougatataki ni Nona Veisorovaki?

A vakaroti ira na Isireli na iVakabula mera dau vakananuma na Lakosivia ena veiyabaki me vukei ira mera nanuma ni a sereki ira o Koya, ni oti mada ga ni sa yaco me dua na vakanananu vakayawa na nodra tiko vakavesu. Ni o wilika tiko na Nona ivakaro e Na Lako Yani 12:14–17, 24–27; 13:1–16, vakasamataka mada na veika o cakava tiko mo dau nanuma kina na veivakalougatataki ni Kalou vei iko. O na maroroya vakacava na ivakananumi oqori “ena [nomu] veitabatamata”? (raica Na Lako Yani 12:14, 26–27).

Na veika tautauvata cava soti o raica rawa me baleta na kanavata ni Lakosivia kei na sakaramede? Na cava o rawa ni cakava mo “dau nanumi” Jisu Karisito tikoga kina? (Moronai 4:3; 5:2).

O rawa talega ni vakasamataka na veika tale eso e vinakata na Turaga mo dau nanuma; raica, me kena ivakaraitaki, na Ilamani 5:6–12; Moronai 10:3; Vunau kei na Veiyalayalati 3:3–5, 10; 18:10; 52: 40.

Raica talega na Kevin W. Pearson, “E se Lomamu Tikoga?,” Liaona, Nove. 2022, 67–69; “Dau Nanumi Koya Tikoga” (vidio), Valenivola ni Kosipeli; “Nanumi Nona Rube,” Sere ni Lotu, naba 109.

5:27

• Na mate veitauvi eso e vakamacalataki e Na Lako Yani 7–11 a vakaraitaka vei ira na kai Ijipita kei ira na Isireli ni sa tu vua na Turaga na kaukauwa cecere. Ena vukei ira na luvemu na Turaga ena nodra bula taucoko ni ra vakabauta na Nona kaukauwa. Me vukei ira mera vuli mai na italanoa oqo, sa rawa mo solia vei ira yadua na gone e dua na pepa ka wasei vaka 10 na iwasewase, ka sureti ira mera droinitaka na iyaloyalo ni mate veitauvi e vakamacalataki ena veitikina oqo: Lako Yani 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7 (raica talega na “Na Mate Veitauvi e Ijipita” ena iTalanoa eso mai na Veiyalayalati Makawa, 67–69). Wilika vata Na Lako Yani 7:5 kei na 9:14 me vakamacalataka na vuna a tala kina na Turaga na mate veitauvi eso ki Ijipita.

  

  2:3

• Wasea vata kei ira na gone na sala sa vakaraitaka kina vei iko na Turaga “ni sa sega e dua me tautauvata kei [Koya] e vuravura taucoko” (Na Lako Yani 9:14). Mera wasea na gone era kila vakacava ni sa kaukauwa sara na Turaga.

• Me vukei ira na luvemu mera raitayaloyalotaka na ibalebale ni yalo malumu, ena rawa ni marautaki mo vakaraitaka vei ira e dua na ka e kaukauwa, me vaka e dua na vatu, kei na dua tale e malumu ka vakamalumalumutaki, me vaka na sipaji. E rawa talega ni o sovaraka yani kina na wai mo vakaraitaka na kena rawarawa ni ciqoma na vosa ni Turaga e dua na yalo malumu. Oti mo ni qai wilika vata e vica na tikina ka vakamacalataka se a sauma vakacava o Fero na mate veitauvi a vakatala yani na Turaga (raica na Lako Yani 8:28–32; 9:7). O cei vei rau na ka ivakaraitaki e matataka vinaka duadua na yalo se na itovo ni rai nei Fero? Na cava na kena ibalebale mo yalo malumu? (raica na Mosaia 3:19).

• O iko kei ira na luvemu e rawa ni vola eso na ka e rawa ni vakaraitaka ni sa kaukauwa na yaloda (me vaka beka oqo, ena nomu vakayagataka na vosa ca se sega ni via wasea). Eda na vakaraitaka vakacava vua na Turaga ni da vinakata me malumu na yaloda?

• Na Lakosivia a vakavulici ira na Isireli mera vakanamata vua na iVakabula kei na Nona solibula ena vukuda. Ni o vakadikeva vata Na Lako Yani 12:1–13 vukei ira na luvemu me ra raica na isema ni veika matailalai ni Lakosivia kei na Veisorovaki i Jisu Karisito (raica talega na “Na Lakosivia” ena iTalanoa eso mai na Veiyalayalati Makawa, 70–74). Kena ivakaraitaki, o Jisu e vakataka beka vakacava na lami e vakamacalataki ena tikina e 5?

  

  2:54

• Nikua, eda dau taura na sakaramede meda nanuma kina na solibula i Jisu. E rawa ni o vakaraitaka vei ira na luvemu e dua na iyaloyalo ni sakaramede ka tukuna na sala e vukei keda kina na cakacaka vakalotu oqo meda nanumi Jisu Karisito. Sa rawa mo vukei ira na luvemu mera kunea na vosa “nanuma” ena masu ni sakaramede (raica na Moronai 4–5). Se lagata vata e dua na sere ni lotu taleitaki me baleta na sakaramede, ka vukei ira na luvemu mera raica na yalo vakacegu era vakila ni ra vakasamataka na iVakabula. Eda na vakasaqara vakacava na yalo oqori ni da taura na sakaramede?