Na Lako Yani 14–18

Ni o wilika Na Lako Yani 14:1–10, vakasamataka mada na veika era na nanuma na Isireli ni ra raica ni sa toro voleka mai na mataivalu nei Fero. De rairai o vakila ni o gadreva e dua na cakamana mo uabaleta kina e dua na bolebole dredre o sotava tiko. Na cava o vulica mai Na Lako Yani 14:13–31 ka vakauqeti iko mo vakasaqara na kaukauwa ni Kalou ena nomu bula? Vakasamataka vakatitobu na sala o sa raica kina na Nona kaukauwa ena veigauna sa oti. Na cava o sa vulica me baleti Koya mai na veika sotavi oqo?

Na Lako Yani 15:1–19 e dua na sere ni veivakacaucautaki era a lagata na Isireli ni tawasea oti na Turaga na Wasa Damudamu. Na malanivosa cava ena sere oqo o raica ni vakaibalebale vakalevu cake? De dua e tiko e dua na serenilotu o vakila ni o via lagata ni sa cakava oti na Turaga e dua na ka veivakurabuitaki vei iko, me vakataka na “Na Noda iVakabula” (Sere ni Lotu, naba 5). Vakasamataka mo lagata se vakarogoca me tiki ni nomu sokalou nikua.

Raica talega na Vunau kei na Veiyalayalati 8:2–3.

Na wiliwili me baleta na ilakolako i Isireli ena rawa ni muataki iko mo vakasamataka na veika ena nomu bula ka vaka mera sa “gaga” me vaka na wai e Mara (raica Na Lako Yani 15:23–27). Sa cakava vakacava na Turaga na veika gaga ena nomu bula mera kamikamica? Sa yaga beka vakacava ki na nomu bula na veika o sotava oqo?

O na raica e levu tale na ivakaraitaki ni veika rarawa era sotava na Isireli e Na Lako Yani 16 kei na 17. E veitemaki mo vakalewai ira ena nodra vosakudrukudru se kudruvaka, ia ni o wiliwili tiko, vakasamataka kevaka o sa bau cakava talega vakakina. Na cava o sa vulica mai na veika era sotava na Isireli ka rawa ni vukei iko mo kakua soti ni dau vosakudrukudru ka nuitaka vakalevu cake ga na Kalou? Na cava beka era vakatavulica vei iko na veitikina oqo me baleta na Kalou?

raica talega na 1 Nifai 2:11–12.

Me vaka ni da gadreva kece meda kana, e dau vakatauvatana na Turaga na veika vakayalo ki na kakana. Vakasaqara na Nona lesoni vakayalo ena veika era sotava na Isireli vata kei na mana e Na Lako Yani 16. Me vaka beka oqo, na cava o kunea ena ivakasala ni Turaga e Na Lako Yani 16:16, 19, 22–26 ka baleta na nomu vakani vakayalo?

Me kunei eso tale na lesoni ena vinakata na Turaga mo vulica mai na cakamana oqo, vakasamataka vakatitobu na taro vakaoqo:

• Na cava e solia vei au na Turaga e tautauvata kei na mana ni veisiga a solia o Koya vei ira na Isireli?

• Na cava au rawa ni cakava ka na tautauvata kei na kumuni mana?

O na raica beka eso tale na ikuri ni rai ena dua se sivia na vidio oqo: “Daily Bread: Pattern,” “Daily Bread: Experience,” kei na “Daily Bread: Change” (Valenivola ni Kosipeli).

2:52

3:12

3:0

Vakasamataka eso tale na ka, mai na kana walega, o dau cakava e veisiga. Na cava e dodonu me dau caka kina e veisiga na veika eso me mana kina? Na cava o sa vakauqeti kina mo cakava mo vakasaqara kina na veika vakayalo e veisiga?

Raica talega na Dieter F. Uchtdorf, “Veivakalesuimai e Veisiga,” Liaona, Nove. 2021, 77–79; “Daily Restoration” (vidio), Valevola ni Kosipeli.

5:27

Vakasamataka me baleta na iVakabula ni o wilika Na Lako Yani 17:1–7. E tautauvata vakacava kei na vatu vei iko o Jisu Karisito? (raica na Same: 62:6–7; Ilamani 5:12). E tautauvata vakacava kei na wai o Koya? (raica na Joni 4:10–14; 1 Korinica 10:1–4; 1 Nifai 11:25).

Ena so beka na gauna ena nomu bula e rawa ni o vakataki Mosese—ni ra vakararavi tiko vei iko eso tale, ia “sa bibi mai na liga[mu]” (Na Lako Yani 17:12). Ena so tale na gauna, o na rairai vakataki Eroni, Uri, kei Jecoro, ena tokoni Mosese. Biuti iko ena nodra itutu na tamata yadua oqori ni o wilika Na Lako Yani 17:8–16; 18:13–26, ka raica na veika e vakavulica vei iko na Turaga me baleta na Nona cakacaka.

Raica talega na Mosaia 4:27; 18:8–9.

• Ni tawasea na Turaga na Wasa Damudamu, era raica kina o Mosese kei ira na Isireli na Nona kaukauwa. Mera vukei iko na luvemu me vakasamataka e dua na sala lasa me vakatasuasuataki kina na italanoa e Na Lako Yani 14:5–22 (raica talega “Na Lako Sivia” ena iTalanoa eso mai na Veiyalayalati Makawa, 70–74). De dua e rawa ni o vakarautaka na idabedabe se itutuvi ka “wasea” me vaka na Wasa Damudamu. Oti mo ni qai wasea vakai kemuni na sala o ni sa raica kina na kaukauwa ni Kalou ena nomuni bula.

  

  2:54

• Na cava e kuria na Vunau kei na Veiyalayalati 8:2–3 ki na noda kilamatata na italanoa e Na Lako Yani 14? Tukuna vei ira na luvemu me baleta e dua na gauna a tukuna kina vei iko na Yalo Tabu e dua na ka ena nomu vakasama se lomamu, ka sureti ira mera tukuna na veika era sotava. E rawa talega ni o ni lagata e dua na sere me baleta na Yalo Tabu, me vaka na “Yalo Tabu Liutaka” (Sere ni Lotu, naba 81).

• De dua o iko kei ira na luvemu e rawa ni gunuva e dua na ka kamica ka dua na ka gaga ni o vulica vata tiko Na Lako Yani 15:22–25 . Sa cakava vakacava beka na iVakabula me “kamikamica” na veika “gaga” eda sotava ena noda bula?

• Ni o wilika kei ira na luvemu na Na Lako Yani 15:23–25; 16:14–15; 17:1–6, laiva mera vukei iko mo kunea na iyaya me vukea na kena tukuni na italanoa yadua—me vaka e dua na tabanikau (me vakabula na wai mai Mara), dua na joke se kuro (me tawa ena mana), kei na vatu (me baleta na wai e Orepi). E vakananuma vakacava vei keda na italanoa eso oqo na veika sa cakava vei keda o Jisu Karisito? Me tiki ni nomuni veivosaki, o ni rawa ni wilika na Maciu 7:24–27; Joni 4:10–14; 6:29–35, 48–51; Ilamani 5:12; Vunau kei na Veiyalayalati 20:77, 79.

• Ni o wilika Na Lako Yani 17:8–16, e rawa ni o sureta e dua na gone me dodoka cake na ligana e macawa. Ni sa oca na gone oqori, e rawa ni ra veivuke eso tale na gone, ena sala erau a vukei Mosese kina o Eroni kei Uri. Na cava e vakavulica na italanoa oqo me baleta na sala e rawa ni da vukea kina na qaqa ni matanitu ni Kalou? E rawa talega ni o wilika Na Lako Yani 18:13–26 ka veivosakitaka na nodra itavi bibi na tamata era veiqaravi tiko ena nomu tabanalevu. Na cava e rawa ni da cakava nikua meda vukei ira kina na noda iliuliu ni Lotu, me vaka ga na nodrau a vukea na parofita o Mosese o Eroni kei Uri?