Siganimate

E vuqa na malanivosa ena Veiyalayalati Makawa e dusia tu na nona veiqaravi kei na isoro ni veivakaduavatataki na iVakabula. Na ituvatuva e ra e tuvai tu kina eso vei ira na malanivosa oqo. Ni o wilika na veitikina oqo, na veivakauqeti cava e yaco mai vei iko me baleta na iVakabula?

Na parofisai eso e vakavulica na veika me baleta na iVakabula era vuqa tu ka matata cake sara ena iVola i Momani. Vakasamataka na sala e vaqaqacotaki kina na nomu vakabauta ena veimalanivosa vakaoqo: 1 Nifai 11:31–33; 2 Nifai 25:13; Mosaia 3:2–11; Alama 7:10–13.

Era tomana tikoga na parofita ni gauna oqo me wasea na nodra ivakadinadina bibi i Jisu Karisito kei na Nona ilesilesi ni veisorovaki. Ni o vakarorogo ki na koniferedi raraba ena mua ni macawa ni Siganimate oqo, vola sara toka na ivakadinadina eso i Karisito o rogoca. Na cava beka era vakatavulica vei iko me baleti Koya?

Na Siganimate e gauna rekitaki, baleta ni gauna ni marautaki ni Veisorovaki kei na Tucaketale ni iVakabula. Ia, ena gauna mada ga ni Siganimate, e vuqa na tamata era sega ni vakila na reki ena vuku ni inaki eso. Na cava o rawa ni cakava mo vakatetea kina na vakacegu kei na reki ni iVakabula ena Siganimate oqo?

E dua na vakasama oya me kunei na itukutuku ena ivolanikalou me baleta na vakacegu kei na reki e solia tu o Jisu Karisito, me vakaoqo: Same 16:8–11; 30:2–5; Aisea 12; 25:8–9; 40:28–31; Joni 14:27; 16:33; Alama 26:11–22. Vakasamataka na sala mo wasea kina na itukutuku oqo vei ira tale eso. Me kena ivakaraitaki, de dua e rawa ni o cakava na kadi eso ni Siganimate mo wasea kina, ka yavutaki ena itukutuku oqo. Masulaka me baleti ira era gadreva mera ciqoma na nomu veikidavaki ni Siganimate. O na rairai nanuma talega mo wasea na nomu itukutuku ena sala ni vakauitukutuku raraba, na vanua era rawa ni raica kina e vuqa na tamata.

Sere ni lotu me baleti Karisito kei na Tucaketale, me vaka na “Sa Tucake!” (Sere ni Lotu, naba 199), e rawa talega ni vukei keda meda vakila na vakacegu kei na reki ena Siganimate. Vakasaqara na malanivosa ena serenilotu, ena nomu nanuma, mo taura vinaka kina na reki ni Siganimate.

Raica talega na Jeffrey R. Holland, “Sega ni vaka e Solia ko Vuravura,” Liaona, Me 2021, 35–38; Mark S. Palmer, “Noda Rarawa Ena Vuki me Reki,” Liaona, Me 2021, 88–90.

Oqo e dua na itaviqaravi ka na rawa ni vukei iko mo raica e vuqa na veivakalougatataki e yaco mai vei Jisu Karisito kei na Nona Veisorovaki. Wilika na ivolanikalou e ra me baleta na veika e vukei keda kina o Jisu Karisito meda vakamalumalumutaka. Tovolea mo tuvanaka na veimalanivosa ki na iwasewase eso oqo: ivalavala ca, mate, veivakatovolei, kei na malumalumu (eso na malanivosa ena rawa ni veirauti kei na sivia e dua na iwasewase). Ni o vakawilika, na veivakauqeti cava e votu vei iko me baleta na kaukauwa ni iVakabula?

• Aisea 61:1–3

• Isikeli 36:26–28

• Maciu 11:28–30

• Luke 1:46–55

• Roma 8:35-39.

• Alama 7:10–13

• Alama 11:42–45

• Alama 58:11

• Moronai 10:32–33

• Vunau kei na Veiyalayalati 19:15–19

• Mosese 5:9–12

O na vakamacalataka vakacava vua e dua na itokani e sega ni lotu Vakarisito na vuna e bibi kina vei iko o Jisu Karisito? Na itukutuku nei Elder Ahmad S. Corbitt “O Kila Li Na Vuna Au Vakabauti Karisito Niu Lotu Vakarisito?” (Liaona, Me 2023, 119–21) ena rawa ni veivuke.

Raica talega na Reyna I. Aburto, “Sa Sega Kina Na Kaukauwa ni iBulubulu,” Liaona, Me 2021, 85–87; Ulutaga kei na Taro “Veisorovaki nei Jisu Karisito,” ”Tucake tale ,” Valenivola ni Kosipeli.

Na cava o vulica mai na veitikina oqo me baleta na isau a mai sauma o Jisu Karisito baleta na nomu vakabulai: Aisea 53:3–5; Mosaia 3:7; Vunau kei na Veiyalayalati 19:16–19? Na isau cava beka a sauma na Tamada Vakalomalagi? (raica na Joni 3:16).

• Na macawa ni Siganimate sa gauna vinaka mo vakavulici ira kina na luvemu me baleta na veika a cakava na iVakabula e Kecisemani kei na kauveilatai ena vukuda. E rawa ni o tekivu ena nomu vakaraitaka vei ira na iyaloyalo eso e ra ka laiva me ra veivosakitaka na veika e yaco tiko ena iyaloyalo. Ni ra raica tiko na luvemu na iyaloyalo, sa rawa mo wilika na veitikina ka vakamacalataka na veika a yaco oqo (raica na Maciu 26:36–46; 27:35–50; Luke 22:39–46; Joni 19:16–30). E rawa ni ra dusia na luvemu na veika matailalai ena iyaloyalo era rogoca ena veitikina.

• Eda sa vakalougatataki vakacava ena vuku ni solibula nei Jisu ena vukuda? Vukei ira na luvemu mera vakasaqara na vosa kei na malanivosa e sauma na taro oqo ena Aisea 53:4–12; Alama 7:11–13; kei na Vunau kei na Veiyalayalati 19:16–19. Wasea vakai kemuni na nomuni nanuma me baleta na iVakabula ni o ni wilika oti na ivolanikalou oqo.

• E rawa ni o vakayagataka na tabana ni itaviqaravi ena macawa oqo se so tale na iyaloyalo ena ituvatuva oqo mo tukuna kina vei ira na luvemu na italanoa ni Tucaketale (raica talega na “Sa Tucake Tale o Jisu,” e Na iTukuni ena Veiyalayalati Vou, 139–44). Qai laiva mera tukuna lesu vei iko na luvemu na italanoa.

• Vakasamataka na sala o na vukei ira kina na luvemu mera kune reki vei Karisito ena Siganimate oqo. Me kena ivakaraitaki, e rawa ni o ni lagata vata e dua na sere taleitaki ni Siganimate, me vakataka na “Sa Tucake Ko Jisu” (Sere ni Lotu, naba 200) se “Kecisemani” (Valenivola ni Kosipeli). Me laurai eso tale na sere me baleta na Tucaketale, sa rawa ni o raica ena ituvatuva vakaiulutaga ni Sere ni Lotu kei na iVolanisere ni Gonelalai. O iko kei ira na luvemu e rawa ni wasea vakai kemuni na vuna o ni taleitaka kina na sere eso oqo kei na veika o ni vakila ni ko ni lagata. Na cava era vakavulica vei keda me baleti Tamada Vakalomalagi kei Jisu Karisito?

• Na Valenivola ni Kosipeli e tiko kina eso na vidio ni Siganimate ka ra na rairai marautaka na luvemu. De dua e rawa ni o laiva mera digitaka e dua mera sarava. Tarogi ira se cava era sa vulica me baleti Jisu Karisito mai na vidio. Sa rawa talega mo kerei ira mera vakalekalekataka na itukutuku ni vidio ena dua ga na iyatuvosa.

• Ni o sarava vata kei ira na luvemu na koniferedi raraba ena mua ni macawa ni Siganimate oqo, vukei ira mera raica ni ra wasea kina na ivakadinadina digitaki eso ni iVakabula na nodra ivakadinadina ni Tucaketale. De dua e rawa ni o cakava kina e dua na qito—sureti ira mera tucake ena veigauna kece era rogoca kina na vosa me vaka na Siganimate se Veisorovaki se Tucaketale. Wasea vakai kemuni na vuna o ni vakavinavinakataka kina na nodra ivakadinadina na parofita bula me baleta na iVakabula.