Na Lako Yani 1–6

Na cava e uqeti iko me baleti ira na yalewa e vakamacalataki e Na Lako Yani 1–2? Era a veivuke vakacava ena kena vakayacori na ituvatuva ni Kalou me baleti ira na Nona tamata? Na cava e vakavulica vei iko na nodra sasaga me baleta na veiqaravi ena cakacaka ni Kalou?

Ni bera ni o tekivu wilika na Lako Yani, o na rairai vakasamataka beka e dua na dredre o sotava tiko—e dua na ka o nuitaka ni na sereki iko mai kina na Turaga. Na vosa kei na malanivosa cava e Na Lako Yani 1–3 e tautauvata kei na tiko vakavesu vakayalo se so tale na ka eda sotava tu nikua? Raica talega na nodra vakasaqara na veisereki na luvei Isireli kei na sala a sauma kina na Turaga (raica, me kena ivakaraitaki, Na Lako Yani 2:23–25; 3:7–8). Sa “lako sobu mai [me] vakabulai” iko vakacava beka na Turaga?

Ena ivola taucoko ni Lako Yani, o na rairai raica talega eso na ka e tautauvata kina o Mosese kei Jisu Karisito (raica Nai Vakarua 18:18–19; 1 Nifai 22:20–21). Me kena ivakaraitaki, na cava o raica ni tautauvata e Na Lako Yani 1:22; 2:1–10 kei na Maciu 2:13–16? Se vei rau Na Lako Yani 24:18 kei na Maciu 4:1–2? Na cava o nanuma ni vinakata na Turaga mo kila me baleti Koya kei na Nona kaukauwa?

E rawa beka ni o vakasamataka e dua na gauna a vakasinaiti iko kina e dua na ka ena qoroqoro kei na kurabui? Na cava o a qai cakava? O na vakamacalataka vakacava na veika o vakila e lomamu?

Ni o vakasamataka tiko oqori, wilika Na Lako Yani 3:1–6. Na cava o taleitaka me baleta na veika veivakauqeti a sotava o Mosese? Na cava a cakava o Mosese me vakaraitaka kina na nona vakarokorokotaka na Kalou? Na isema cava o raica me baleta na nona ivalavala kei na nona vakarokorokotaka na veika tabu?

Na wiliki ni veitikina oqo ena rawa ni vakauqeti iko mo vakasamataka na veika tabu kei na veivanua tabu ena nomu bula. Na cava era sa ka tabu kina vei iko? E duidui vakacava na nomu qaravi ira mai na veika matau raraba eso? Me dusimaka na nomu vakasamataka vakatitobu, sa rawa mo raica na iwasewase ka kena ulutaga “Nanuma tiko na Yalayala” ena itukutuku nei Elder David A. Bednar “Vosa ni Yalayala e Levu Sara ka Talei” (Liaona, Nove. 2017, 91–93). E rawa talega ni o lagata se vakarorogo ki na dua na serenilotu e vakauqeta na qoroqoro, me vakataka na “Loloma i Jisu” (Sere ni Lotu, naba 110) ka vakasamataka vakatitobu na veika e baleta na kosipeli e vakurabuitaki iko.

E dina sara, ena gauna mada ga eda sa sotava kina na veika vakayalo totoka, e tiko na rerevaki ni kena dau vakawaleni na veika tabu. O na levea vakacava beka oqo? Oqo e rua na itukutuku e vakamacalataka na ka oqo; digia e dua, ka vaqara kina na itukutuku e vukei iko: Ulisses Soares, “Meda Qoroi Karisito kei na Nona Kosipeli” (Liaona, Me 2022, 115–17); Gérald Caussé, “E se Totoka Tiko Beka Ga vei Kemuni?” (Liaona, Me 2015, 98–100).

Raica talega na Vunau kei na Veiyalayalati 6:10–12; 63:64.

Nikua eda kilai Mosese tu ni dua na parofita ka iliuliu cecere. Ia o Mosese a sega ni raici koya me vakakina ena imatai ni gauna a kacivi koya kina na Turaga. Ni ko wilika Na Lako Yani 3–4, vola na veika a kauwaitaka o Mosese kei na sala a sauma yadudua kina na Turaga. Na cava o kunea ena wase e rua oqo, ena rawa ni vakauqeti iko ni o vakila ni o sega ni veiganiti? Na gauna cava o sa bau raica kina na Kalou ni vakaukauwataki iko se o ira tale eso me cakava na Nona cakacaka?

Raica talega “The Church Gives Us Opportunities to Assist in God’s Work” ena “Church Organization” ena Topics and Questions, Valenivola ni Kosipeli.

E rawa ni veivakayalolailaitaki ni sega ni cakacaka tiko na noda sasaga yalodina meda caka vinaka—ni da tovolea tiko meda cakava na loma ni Turaga ia eda sega ni raica na veika eda namaka. Mo vulica na veika vata oqo a sotava o Mosese, wilika Na Lako Yani 5:4–9, 20–23. A vukei Mosese vakacava na Turaga me ulabaleta na nona yalolailai? (raica Na Lako Yani 6:1–13). Sa vukei iko vakacava na Turaga mo kitaka tikoga na Lomana?

Raica talega na Jeffrey R. Holland, “Waraka tiko na Turaga,” Liaona, Nove. 2020, 115–17.

• E a dua na itavi levu vei Mosese me sereki ira na Isireli mai na veivakabobulataki. Ia a sega ni rawa vua me rawata oqo kevaka era a sega ni taqomaki ka qaravi koya na tinana, ganena, na luvei Fero yalewa, kei ira na yalewa yalodina tale eso. Vukei ira na luvemu mera vulica na veika baleti ira na yalewa oqo e Na Lako Yani 1:15–20; Na Lako Yani 2:2–10 (raica talega Na Tiko mai na Lekutu 26:59); kei Na Lako Yani 2:16–21. E rawa talega ni o vakayagataka na tabana ni itaviqaravi ena macawa oqo kei na “Gone o Mosese” (ena iTalanoa eso mai na Veiyalayalati Makawa, 61–63) mera tukuna kina na nodra italanoa. Era a vukea vakacava na yalewa oqo na kena vakayacori na ituvatuva ni Kalou? Veivosakitaka vakai kemuni me baleti ira na tamata o ni dau qoroya ka ra veivuke ena cakacaka ni Kalou, oka kina ena sala lalai ka rawarawa eso. Eda na muria vakacava beka na nodra ivakaraitaki?

  

  1:36

• Ni o ni wilika vata oti Na Lako Yani 3:1–5 kerei ira na luvemu mera vakalekalekataka na veitikina oqo ena nodra vosa ga (raica talega na “Mosese na Parofita” ena iTalanoa eso mai na Veiyalayalati Makawa, 64–66). A vakaraitaka vakacava o Mosese na vakarokoroko ena iserau ni Turaga? Na sala cava e vinakata na Turaga meda vakaraitaka kina na vakarokoroko? Sa rawa talega mo kerei ira na luvemu mera vukei iko me kunea (se droinitaka) na iyaloyalo ni veivanua se itaviqaravi tabu e dodonu meda vakarokoroko kina. Na cava e rawa ni da kitaka me caka kina me dua na vanua tabu na noda itikotiko?

  

  1:26

• Lagata vata e dua na sere ni vakarokoroko, me vaka na “Sega Walega ni Vakarokoroko” (iVolanisere ni Gonelalai, 12). Ni o cakava vakakina, e rawa ni ra kunea na luvemu na vosa se malanivosa e vakamacalataka na ibalebale ni vakarokoroko. Kevaka eda kauta mai e dua na itokani ki lotu ena imatai ni gauna, eda na vakamacalataka beka vakacava na ibalebale ni vakarokoroko?

• Ni o vakayagataka na itukutuku e Na Lako Yani 3; 4:1–17, laivi ira na luvemu mera veivukevuke ena vakatotomuri Mosese. Ena rairai marautaki beka me okati kina na iyaya rawarawa eso, me vakataka na cina livaliva kei na dua na kau me matataka na vunikau kama. Vukei ira na luvemu mera raica na veika a vakila o Mosese me baleta na ilesilesi a solia vua na Turaga (raica Na Lako Yani 3:11; 4:1, 10). De dua e rawa ni o veiwaseitaka vakai kemuni na gauna o ni a vakila kina na veika vata oqori. Na ivakasala cava e rawa ni da wasea vei Mosese me vukei koya? Wilika me baleta na sala a vakayaloqaqataki Mosese kina na Turaga e Na Lako Yani 3:12; 4:2–9, 11–12. Tukuna vei ira na gone na sala sa vukei iko kina na iVakabula mo vakayacora e dua na veikacivi, muria e dua na veivakauqeti, se cakava e dua tale na ka a dredre vei iko.