Na Mataqali i Isireli

Ena dua na vanua ena loma ni lekutu ena tokalau kei Kenani, a waraka voli ena nuiqawaqawa o Jekope na nodrau na sota kei na nona isanidrua, ko Iso. Na iotioti ni gauna a raici Iso kina o Jekope, rauta ni 20 na yabaki sa oti, ni a vinakata kina o Iso me vakamatei koya. A veimulomulo tiko ena bogi taucoko ena lekutu o Jekope, ni vakasaqara e dua na veivakalougatataki mai vua na Kalou. Ena vuku ni vakabauta nei Jekope, gugumatua kei na yalodina, a sauma mai na Kalou na nona masu. Ena bogi o ya a veisautaki na yacai Jekope me Isireli, e dua na yaca ka kena ibalebale, ena maliwa ni veika tale eso, “sa tiko vata kei na Kalou” (Nai Vakatekivu 32:28, ivakamacala e botonab).

Oqo na imatai ni gauna me basika kina na yaca Isireli ena i Vola Tabu, ka sa dua na yaca e tu ena loma taucoko ni ivola kei na itukutuku taucoko ni veigauna. A yaco totolo me dau cavuti na yaca oya ki na vuqa ka sega ni dua ga na tamata. E a 12 na luvena tagane o Isireli, ka ra vakatokai vata na nodra kawa me “na mataqali i Isireli,” na “yavusa i Isireli,” o “ira na luvei Isireli,” se o ira na “Isireli.”

Ena itukutuku ni veigauna, era dau vakabibitaka na luvei Isireli na kawa era vu mai kina ena yavusa e tinikarua i Isireli. Na nodra laini ni kawa sa dua na tiki bibi ni kedra ivakatakilakila ni veiyalayalati. A kaya na iApositolo o Paula ni o koya a vu mai “na yavusa i Penijamini” (Roma 11:1). E dua na vuna a talai iratou lesu kina na luvena tagane o Liai me ratou lai kauta mai na peleti parasa, oya ni ra tu ena peleti na kedra “itukutuku ni kawa na nona qase” (1 Nifai 5:14). A qai kila kina o Liai ni o koya e kawa i Josefa, kei na nodra kila na nona kawa na kedra isema ki na mataqali i Isireli e a ka bibi sara vei ira ena veiyabaki e muri.

Ena loma ni Lotu nikua, ena rawa ni o rogoca me baleti Isireli ena ivakaraitaki eso me vaka na “nodra vakasokomuni na Isireli.” Eda dau lagata me baleta na “Na Noda iVakabula,” na “Nuinui Nei Isireli,” kei na “Matabete Kei Isireli.” Ena veigauna vaqori, eda sega ni cavuta se lagata wale tikoga me baleta na matanitu i Isireli ena gauna makawa se na matanitu o Isireli nikua. Ia, eda tukuni ira tiko o ira era sa vakasokumuni mai na veimatanitu ni vuravura ki na Lotu i Jisu Karisito. Eda tukuni ira tiko na tamata ka ra sasaga tikoga vua na Kalou, era sa vakasaqara tiko vagumatua na Nona veivakalougatataki, kei ira era, ena papitaiso, sa yaco me Nona tamata ni veiyalayalati. Ena vosa nei Peresitedi Russell M. Nelson, ni da lewe i Isireli e kena ibalebale “me qaqa tikoga na Kalou ena noda bula, … me laiva na Kalou me dau veivakayarayarataki bibi duadua ena noda bula.”

Na nomu veivakalougatataki vakapeteriaki e tukuna na nomu isema ki na dua na yavusa ni mataqali i Isireli. Oqori e levu cake mai na dua walega na tiki taleitaki ni tuvakawa ni matavuvale. E vauci tale ga ena nomu gauna oqo kei na gauna se bera mai. Ni o dua na tiki ni mataqali i Isireli e kena ibalebale ni tiko na kemu isema vakaveiyalayalati kei na Tamada Vakalomalagi kei Jisu Karisito. E kena ibalebale ni o iko, me vakataki Eparaama, e kemu inaki mo “vu ni veivakalougatataki” vei ira na luve ni Kalou (Nai Vakatekivu 12:2; Eparaama 2:9–11). E kena ibalebale, ena vosa nei Pita, “koi kemudou na itabatamata digitaki, a matabete vakaturaga, a matanitu yalosavasava, a tamata sa taukena na Kalou; mo dou vakaraitaka kina na nona vinaka sara o koya ka kacivi kemudou mai na butobuto ki nona rarama e veivakurabuitaki” (1 Pita 2:9). E kena ibalebale mo laiva “me qaqa tikoga na Kalou”—ni o iko e dua dau “gumatua vua na Kalou” ni o rokova na nomu veiyalayalati vata kei Koya.