Nai Vakatekivu 18–23

Na Turaga sa dau vakayacora na yalayala lagilagi vei ira na yalodina, ia ena so na gauna na ituvaki ni noda bula e rawa ni vakavuna me da taroga se na rawa beka vakacava ni vakayacori na yalayala oya. E a vaka beka oya na nodrau nanuma o Eparaama kei Sera. Na cava o vulica rawa mai na veika erau a sotava? E rawa ni veivuke me tekivu na nomu vuli ena nomu railesuva na veika a yalataka na Turaga ena Nai Vakatekivu 17:4, 15–22. Na cava erau a cakava o Eparaama kei Sera? (raica na iVakadewa nei Josefa Simici, Nai Vakatekivu 17:23 [e Nai Vakatekivu 17:17, ivakamacala e ra b]; Nai Vakatekivu 18:9–12). A sauma vakacava na Turaga me vukei rau me vakalevutaka nodrau vakabauta na Nona yalayala? (raica Nai Vakatekivu 18:14).

Na cava o kunea ena veitikina oqo ka tara cake na nomu vakabauta? Na veika cava tale eso—ena nomu bula se nona e dua tale—sa vaqaqacotaka na nomu vakabauta ni Turaga ena vakayacora na Nona yalayala ena Nona gauna kei na sala ga? O na rairai vakasamataka talega na sala mo tokona kina na nomu vakabauta ni sega ni ciqomi na veivakalougatataki yalataki ena bula oqo. Na ivakasala cava o kunea ena Iperiu 11:8–13 kei na itukutuku nei Peresitedi Russell M. Nelson “Sa Tucaketale na Karisito; Na Vakabauti Koya ena Tosoya na Ulunivanua”? (Liaona, Me 2021, 101–4).

Raica talega na Vunau kei na Veiyalayalati 88:68.

Na lesoni cava o sa vulica me baleta na dro tani mai na ca ni o wilika baleti Loti kei na nona matavuvale? Me ivakaraitaki, na cava e vakurabuitaki iko me baleta na ka a kaya ka cakava na agilosi me vukei Loti kei na nona matavuvale me ratou dro kina mai na veivakarusai? (raica Nai Vakatekivu 19:12–17). E vukei iko kei na nomu matavuvale vakacava na Turaga mo dro se kunea na veitaqomaki mai na veivakayarayarataki ca ni vuravura? Vakasamataka na ituvaki eso o na temaki kina mo “[rai] kimuri” (tikina e 26) ena gauna e dodonu mo rai tiko kina ki liu ena vakabauta na iVakabula. Na cava e vakuria na Luke 9:62 ki na nomu kila vinaka na vakasama oqo?

Raica talega na iVakadewa nei Josefa Simici, Nai Vakatekivu 19:9–15 (ena ikuri ni iVolatabu).

A vakavulica o Elder Jeffrey R. Holland:

“E matata, ni leqa nei wati Loti ni a sega walega ni rai lesu tiko; ia e yalona a vinakata tiko me lesu tale. E kena irairai ni se bera mada ga ni lakosivita na iyalayala ni koro, sa nanuma lesu tale o koya na veika a tu mai Sotoma kei Komora. …

“A rawa sara ga vei wati Loti me rai vuki ena yalo ca vua na Turaga ena vuku ni Nona kaya vua na veika me na biuta laivi tu yani. … Koya gona ni a sega walega ni rai lesu; a rai lesu o koya ena gagano. Me vakalekalekataki ga, na nona semati ki na veika sa oti a uabaleta na nona nuidei ki na veisiga ni mataka. Kena irairai, ni a tiki sara mada ga ni nona ivalavala ca.

“… Au sa vakamasuti kemuni mo ni kakua ni malele tiko ki na veisiga sa oti yani se mo ni gaganotaka matewale na veisiga sa oti, se mani vakacava sara na vinaka ni veisiga e nanoa oya. Na veika sa sivi meda vuli mai kina ia me kakua ni da bula tiko kina. Eda railesu meda taura mai kina na veika vinaka ena veika eda sotava ka sega ni kena dravusa. Ni gauna eda sa vulica rawa kina na veika e dodonu meda kila ka kauta tu vata kei keda na veika vinaka mai na veika eda sa sotava oti, meda sa qai rai ki liu ka nanuma tiko ni vakabauta sa dau dusi tikoga ki na veisiga ni mataka. …

“… Na malele tiko ki na bula sa oti, oka kina na cala sa oti, e sega ni dodonu! E sega ni kosipeli i Jisu Karisito. …

“Vei ira [na tamata] ni veitabatamata kecega, au kaci yani, ‘Dou nanuma na wati Loti’ [Luke 17:32]. Na vakabauta e baleta na veisiga ni mataka. Na vakabauta e taraicake ena veigauna sa oti ia sega ni gadreva me tiko ga kina. Na vakabauta e nuitaka ni tu vua na Kalou na veika cecere me baleti keda yadua, ka sai Karisito dina na ‘bete levu ena ka vinaka ena muri mai’ (Iperiu 9:11)” (“The Best Is Yet to Be,” Ensign,, Janu. 2010, 24, 26–27).

E dina ga ni da sega ni kila na vuna kece a vakaroti Eparaama kina na Kalou me vakacabori Aisake me isoro; eda kila ni a vakatovolei kina na nona vakabauta na Kalou. Eda kila talega ni a “ivakatakarakara ni Kalou kei na Luvena e Duabau ga” (Jekope 4:5). Ni o wilika Nai Vakatekivu 22:1–19, e rawa ni o vaqara na ivakatakarakara se vakatautauvata ni nona vakacabori Aisake o Eparaama kei na nona vakacabora na Tamana na Luvena, o Jisu Karisito. Vakasamataka mo vola na veika o kunea ena ivolakabi vakaoqo:

Na ivakatakarakara se vakatautauvata cava ki na isoro ni veisorovaki ni iVakabula o kunea ni vakaibalebale vakalevu duadua? Vakasamataka mo lagata se wilika na qaqa ni dua na serenilotu e vakaraitaka na nona lomani keda na Tamada Vakalomalagi, me vaka na “Sa Tala Mai na Luvena,” Sere ni Lotu, naba 187. O na rairai vola talega na nomu nanuma me baleta na Tamada Vakalomalagi kei Jisu Karisito kei na Nodrau solibula ena vukumu.

Kevaka o vinakata mo vulica eso tale na ka me baleta na solibula ni noda iVakabula, vakasamataka mo wilika na itukutuku nei Peresitedi Jeffrey R. Holland “Raica na Lami ni Kalou” (Liaona, Me 2019, 44–46). Na cava e sa rui ivakatakarakara kaukauwa kina ni Luve ni Kalou na lami? Na cava e vakavulica o Peresitedi Holland ka vakalevutaka na nomu vakarokorokotaka na isolisoli nei Tamada Vakalomalagi?

Raica talega na “Akedah (The Binding)” (vidio), Valenivola ni Kosipeli.

12:57

• Me vulici na nodrau vakararavi o Eparaama kei Sera ki na yalayala ni Kalou, sa rawa vei iko kei ira na luvemu me veivosakitaka e dua na gauna era a waraka kina e dua na ka era a vinakata dina. Oti mo qai raica na iyaloyalo kei Sera kei Aisake ena itekivu ni ituvatuva oqo ka veivosakitaka na yalayala a cakava na Kalou vei Sera kei Eparaama (raica talega na “Eparaama kei Sera,” ena iTalanoa eso mai na Veiyalayalati Makawa, 28–31). Vukei ira na gone mera vakasamataka na veika sa yalataka na Kalou vei keda kevaka eda yalodina tiko. Vakayaloqaqataki ira mera dau vosota ka nuitaka ni na maroroya na Kalou na Nona yalayala.

  

  2:20

• Me vukei ira na luvemu mera vulica na bibi ni dina ena Nai Vakatekivu 18:14, sa rawa mo vola na vosa yadua mai na imatai ni iyatuvosa ni tikina o ya ena veitiki ni pepa duidui eso. Qai wakia vata na veitiki ni pepa, ka sureti ira na gone mera tuvana na veivosa oqori ena kena itutu dodonu. Oti sa rawa mo qai wilika kei ira na luvemuni na Nai Vakatekivu 17:15–21; 21:1–7 me kunei kina e dua na ivakaraitaki ni dua na ka a cakava na Turaga ka vaka me dredre. Wasea vei ira na luvemu na nomu vakabauta ni na vakayacora na Turaga na Nona yalayala, kevaka sara mada ga era dredre se taura e dua na gauna balavu.

• Tarogi ira na luvemu me baleta na ituvaki eso e rawa ni sureti ira kina e dua mera cakava e dua na ka era kila ni sega ni dodonu. E rawa vakacava ni da “dro” mai na veituvaki vakaoqo? Vakalekalekataka Nai Vakatekivu 19:15–26 ena nomu vakamacalataka ni o Loti kei nona matavuvale eratou a vakaitikotiko ena dua na koro ca sara, ka qai vakaroti ratou na agilosi me ratou biuta. Ni o wilika vata kei ira na luvemu na tikina e 15–17, 26, tarogi ira se cava beka na kena ibalebale vei keda nikua meda “dro” mai na ca ka “kakua ni rai ki muri” (tikina e 17).

• Na vakayagataki ni iyaloyalo eso i Eparaama kei Aisake kei na Vakoti ena Kauveilatai (raica na iVola ni iYaloyalo Vakosipeli, naba 9, 57) e rawa ni vukei ira na luvemu me vakatauvatana na italanoa e Nai Vakatekivu 22 kei na isoro ni iVakabula (raica na Maciu 27:26–37). Na cava eda rawa ni vulica me baleta na Tamada Vakalomalagi kei Jisu Karisito mai na italanoa kei Eparaama kei Aisake kei na Vakoti ena Kauveilatai? (Raica talega na “Eparaama kei Aisake,” ena iTalanoa eso mai na Veiyalayalati Makawa, 34–37.)

  

  2:0

• E rawa beka ni o vakasamataka e dua na qito rawarawa mo qito vata kina kei ira na luvemu ka gadrevi kina mera muria na veidusimaki? De dua na idusidusi eso e rawa ni veimuataki ki na dua na iyaloyalo vunitaki ni iVakabula. Na qito oqo ena rawa ni vakauqeta e dua na veivosaki me baleta na veika sa vakarota vei keda na Tamada Vakalomalagi meda cakava me rawa ni da bula vata tale kina kei Koya kei Jisu Karisito. Vakasamataka me lagati vata e dua na sere me vaka na “Talairawarawa ki na iVunau” (iVolanisere ni Gonelalai,, 68). Sa rawa ni veivuke talega na tabana ni itaviqaravi ena macawa oqo.