Nai Vakatekivu 12–17; Eparaama 1–2

“Eda sa vakauqeti kece mai na noda matavuvale [kei] na noda itovo vakavanua,” a vakavulica o Elder Neil L. Andersen, “ia au vakabauta ni tiko e dua na vanua e lomada ka da lewa ka bulia yadua. … Kena itinitini, na noda gagadre e loma ena soli ki na bula ka ra na laurai ena noda digidigi kei na noda ivalavala” (“Educate Your Desires, Elder Andersen Counsels,” ChurchofJesusChrist.org). Vakasamataka mada na sala e vakaraitaka kina na Eparaama 1:1–19 na veika e vakavulica o Elder Andersen. E rawa beka ni veivuke na taro eso vakaoqo:

• Na cava a gadreva o Eparama? A laurai vakacava na nona gagadre ena nona ivalavala? A tokona vakacava na Kalou na nona gagadre?

• Na cava soti na nomu gagadre? Era laurai vakacava ena ka o cakava? E tokoni iko kina vakacava na Kalou?

• Na itukutuku cava ena veitikina oqo e baleti ira era sega ni dau gadreva na buladodonu o ira na nodra matavuvale?

E dua vei ira na gagadre levu duadua nei Eparaama kei Sera—me rau vakaluveni—a sega ni vakayacori me vuqa na yabaki (raica na Nai Vakatekivu 15:1–6). Na cava o vulica mai na Iperiu 11:8–13 me baleta na nodrau sotava o Eparama kei Sera na veivakatovolei oqo? E vukei iko vakacava na iVakabula mo “ciqoma” na Nona yalayala, kevaka sara mada ga era tu “vakayawa”?

Raica talega na “Deliverance of Abraham” (video), Valenivola ni Kosipeli.

1:38

Na cava e bibi kina mo kila na veiyalayalati a cakava na Kalou kei Eparaama? Baleta ni vinakata na Kalou me cakava e dua na veiyalayalati vata oqori kei iko. A yalataka o Koya ni veiyalayalati oqo ena tomani tiko vei ira na coke i Eparaama, se na nona “kawa,” ka vakakina “ko ira kecega sa vakabauta na Kosipeli… [era] na okati me nomu kawa” (raica na Eparaama 2:10–11). Ena dua tale na kena itukutukuni, ena tomani tikoga vei iko na veiyalayalati—ni ko sa papitaiso ka vakataucoko cake ena gauna o cakava kina na veiyalayalati ena valetabu (raica na Kalatia 3:26–29; Vunau kei na Veiyalayalati 132:30–32).

Ena vuku ni ka oqori, o na vinakata beka mo vulica na Eparaama 2:6–11 ka vola na veika dina, a yalataka sara ga na Kalou vei Eparaama kei Sera (raica talega Nai Vakatekivu 12:1–3; 13:15–16; 15:1–6; 17:1–8, 15–22). Ena rawa vakacava me yaga talega vei iko na veivakalougatataki oqo?

Eso vei ira na yalayala oqo e tu na kena tautauvata tawamudu. Era vakayacori tawamudu vakacava na yalayala me vaka e dua na vanua ni ivotavota vakawa se dua na kawa levu? (raica na Vunau kei na Veiyalayalati 131:1–4; 132:20–24, 28–32).

Me ikuri ni veivakalougatataki yalataki, a kaya na Kalou vei Eparaama me “vu ni veivakalougatataki” (Nai Vakatekivu 12:2; vakaikuritaki). Na cava beka o nanuma e kena ibalebale oqo? E rawa vakacava mo vu ni veivakalougatataki? (raica na Eparaama 2:11).

Me vakavulica na veiyalayalati, a vosa o Elder Dale G. Renlund me baleta na ua loka ena Uciwai na Amazon, ka vosa o Peresitedi Emily Belle Freeman me baleta na nona lakova e dua na salatu vatu kei na kavoro ni qurulasawa (raica na “Rawata na Kaukauwa va‑Kalou mai na Veiyalayalati,” Liaona, Me 2023, 35–37; “Lako ena Veimaliwai ni Veiyalayalati kei Karisito,” Liaona, Nove. 2023, 76–79). Vakasaqara e dua se ruarua na itukutuku oqo me baleta na iyatuvosa ka vukea na kena saumi na taro “Na cava e vinakata kina na Kalou me’u caka veiyalayalati kei Koya?”

Raica talega na Ulutaga kei na Taro (Topics and Questions), “Abrahamic Covenant,” Volanivuli ni Kosipeli; “Thoughts to Keep in Mind: The Covenant,” ena ivurevure oqo.

Raitayaloyalotaka mada ni o vakaveikilaitaki Melikiseteki tiko vua e dua e sega ni kilai koya. Na cava beka o na kaya? Vakaraica na vakasama eso ena iVakadewa i Josefa Simici, Nai Vakatekivu 14:26–27, 33–38 (ena ikuri ni iVolatabu); Alama 13:13–19; Vunau kei na Veiyalayalati 107:1–4. Na itovo Vakarisito cava o raica ena ivakamacala eso oqo me baleti Melikiseteki? E tara vakacava na nomu raica na Matabete i Melikiseteki na nomu vulica na bula nei Melikiseteki?

Na cava o vulica me baleta na ivakarau ni bula nei Eparaama me baleta na iyau mai Na iVakatekivu 14:18–24 kei na iVakadewa nei Josefa Simici, Nai Vakatekivu 14:36–40 (ena ikuri ni iVolatabu)? Me ivakaraitaki, dikeva mada na nona vosa vua na tui Sotoma ena Nai Vakatekivu 14:23. Sa tara vakacava na nomu rai me baleta na ilavo na nomu talairawarawa ki na lawa ni ikatini?

Ni o wilika Na iVakatekivu 16, o na rairai vakasamataka beka e dua na gauna o nanuma ni o sa vakalolomataki tiko kina, me vakataki Eka. Me kilai tiko ni “Isimeli” e kena ibalebale na “Kalou e rogoca.” Sa vakaraitaka vakacava vei iko na Kalou ni sa rogoci iko o Koya?

Raica talega na “Na Masu Lo,” Serenilotu, naba 82.

• Ni o wilika kei ira na luvemu na Eparaama 1:18 kei na 2:8, sureti ira mera vakarogoca me baleta na tiki ni yago e cavuti ena tikina ruarua. De dua e rawa ni o qitotaka e dua na qito ka bobo kina na matana e dua na gone ka o qai liutaki koya ena dua na vanua ena ligana. Oti mo qai tukuna na kena vakilai ni liutaki keda o Jisu Karisito ena ligada se taqomaki keda.

• Era na marautaka beka na luvemu mera matanataka na italanoa mai Na iVakatekivu 13:5–12, ka mera vakataki Eparama, Loti, kei ira na ivakatawa ni manumanu. Eda na muria vakacava na ivakaraitaki nei Eparaama ni da dauveivakacegui vata kei na noda matavuvale se itokani? Tovolea mo vakatasuasuataka na nodra isaunitaro.

• Vakasamataka mo vakaraitaka vei ira na luvemu e dua na koniteina nuku, na kalokalo ni lomalagi ena bogi, se na iyaloyalo ena mua ni ituvatuva oqo. Oqo ena vukei ira mera kila vakavinaka na yalayala ni Kalou e Nai Vakatekivu 13:16; 15:1–6. Veivosakitaka na sala o sa vulica kina mo nuitaka na yalayala ni Kalou, ena gauna mada ga e vaka me dredre kina.

• Mo vakavulici ira na luvemu me baleta na veiyalayalati, kerei ira mera tukuna vei iko e dua na gauna era a yalayala kina se dua a yalayala vei ira. Kevaka e veivuke, wasea eso na nomu ivakaraitaki vakai iko—oka kina na veiyalayalati o sa cakava vua na Kalou ena papitaiso se ena valetabu. Sa tara vakacava na nomu veimaliwai kei na Kalou na nomu veiyalayalati? Digia e vica na malanivosa mai Nai Vakatekivu 15:1–6; 17:1–8; Eparaama 2:9–11 mo wasea kina eso na veivakalougatataki a yalataka na Kalou vei Eparaama kei Sera.

• Me vukei ira na luvemu mera vakavakarau mera veiyalayalati kei na Kalou ni ra papitaiso, sa rawa mo vakayagataka eso na vakasama ni itaviqaravi e vakaturi tiko ena ikuri A se ikuri B.

• Ni a vakaleqai na bula nei Eparaama, a kaci vua na Kalou o koya. Ni tiko duadua o Eka ena lekutu, a vulica ni rogoci koya na Kalou. Vakasamataka mo wasea na rua na italanoa oqo vei ira na luvemu: “Eparaama kei Sera” kei na “Eka” ena iTalanoa eso mai na Veiyalayalati Makawa, 28–31, 32–33. Na cava eda vulica me baleta na Kalou mai na italanoa e rua oqo? Oti sa na qai rawa ni o wasea vakai kemuni na veika o ni sa sotava ena gauna o ni vakila kina ni sa rogoci kemuni na Kalou. Na sere me vakataka na “Tamaqu Mai Lagi” (iVolanisere ni Gonelalai, 6) ena rawa ni vaqaqacotaka na ivakavuvuli oqo.

2:20

1:23