Nai Vakatekivu 6–11; Mosese 8

O raica beka e dua na ka ena ivakamacala ni gauna nei Noa ka vaka me tautauvata kei na ituvaki ena noda gauna oqo? Vakabibi, raica na Mosese 8:15–24, 28. Na cava o raica ni tokaruataki?

E dua na ka tautauvata bibi o na raica oya ni a kacivi Noa na Kalou me parofita, ka sa kaciva talega o Koya e dua na parofita nikua. Vakasamataka mo vola na dina eso o vulica me baleti ira na parofita mai na Mosese 8:13–30. E vakataki Noa vakacava na noda parofita bula? E dina sara, na parofita ni Turaga nikua e sega ni soli ivakasala ni Waluvu se sureti keda meda veivuke ena kena tara e dua na waqa. Ia na cava e vakasalataki keda tiko kina o koya? Kei na cava e sureti keda tiko kina meda cakava? Me vukea na kena saumi na taro oqo, sa rawa mo railesuva e dua na iwase mai na Nodra iVakavuvuli na Peresitedi ni Lotu ena Valenivola ni Kosipeli, vakabibi na iwasewase ni “Veisureti kei na Veivakalougatataki Yalataki.” De dua o na digitaka e dua na ivakasala kei na dua na veisureti e vaka me bibi sara vei iko.

A vakavulica o Elder Allen D. Haynie, “Sa digitaka tu na Tamada lomani e Lomalagi na ivakarau ni kena vakatakilai na dina vei ira na Luvena mai vua na parofita” (“Dua na Parofita Bula ni Gauna Oqo,” Liaona, Me 2023, 25). Vakasamataka mo vulica na itukutuku nei Elder Haynie, ka vaqara na vuna e ivakatakilakila kina ni loloma ni Tamada Vakalomalagi na noda parofita. Sa vukei iko vakacava na nomu muria na parofita ni Turaga mo vakila na bula taqomaki ena veisiga mai muri?

Raica talega na Ulutaga kei na Taro (Topics and Questions), “Prophets,” Valenivola ni Kosipeli; “Na Cava na Vuna Era Tiko Kina na Parofita?” (vidio), Valenivola ni Kosipeli.

1:37

Eso na tamata era vakataroga tiko na lewa dodonu ni Kalou ni vakauta mai e dua na waluvu me “vakarusa na tamata” (Nai Vakatekivu 6:7). A vakamacalataka o Elder Neal A. Maxwell ni ena gauna ni Waluvu Levu, “na ca sa yaco ki na dua na vanua ni veivakarusai ni galala ni digidigi ka sega ni rawa kina ni ra talai mai eke na yalo, ena lewa dodonu” (We Will Prove Them Herewith [1982], 58). O na rairai vakasamataka tale ga na sala e dua kina na loloma cecere na Waluvu. Na cava o raica ena Na iVakatekivu 6:5–13 ka vakaraitaka na loloma cecere kei na loloma ni Turaga vei ira na tamata?

Me vaka Nai Vakatekivu 9:8–17, na cava e rawa ni kauta mai ki na nomu vakasama e dua na drodrolagi? Na cava e vakuria ki na nomu kilaka na iVakadewa nei Josefa Simici ni iVakatekivu wase 9:21–25 (ena ikuri ni iVola Tabu)? O na rairai vakasamataka talega mo vola eso tale na ka (me vakataka na ivakatakarakara, iyaya, se dua tale na ka) sa solia vei iko na Kalou me vakananumi iko ena nomu veiyalayalati. Na cava era vakavulica vei iko na veika oqo? Era vukei iko vakacava mo nanuma tiko?

Raica talega na Gerrit W. Gong, “Dau Nanumi Koya Tikoga,” Liaona, Me 2016, 108–11; “Reverently and Meekly Now,” Sere ni Lotu, naba 185.

Na kedra itukutuku na tamata mai Pepeli ni ra taracake tiko e dua na vale cecere e vakarautaka e dua na duidui talei ki na itukutuku i Inoki kei ira na nona tamata era tarai Saioni cake tiko, okoya o ni a vulica ena macawa sa oti. Oi rau ruarua na ilawalawa tamata oqo era a saga tiko mera yacovi lomalagi ia ena sala e duidui. Era a rawati lomalagi vakacava na tamata i Saioni? (raica na Mosese 7:18–19, 53, 62–63, 69). Na cava o vulica mai Na iVakatekivu 11:1–9 kei na Ilamani 6:26–28 me baleti ira na tamata i Pepeli? Na cava e vakavulica vei keda oqo me baleta na noda dui sasaga meda lesu tale ki na iserau ni Kalou? Na cava sa vakarautaka na Kalou me vukei keda meda “yacovi lomalagi”? Na iVakatekivu 11:4; raica talega na Joni 3:16).

• E levu na gone era taleitaka na italanoa kei Noa kei na waqa. Vakasamataka mo solia vei ira na luvemu na madigi mera wasea na veika era kila me baleta na ka oqo. Me vukei ira, e rawa ni o vakayagataka na iyaloyalo ena ituvatuva oqo, “Noa kei na Nona Matavuvale” ena iTalanoa eso mai na Veiyalayalati Makawa (22–25), kei na ikatolu ni qaqa ni “Vakamuria na Parofita” (iVolanisere ni Gonelalai, 58). Era na marautaka na luvemu mera matanataka eso na tiki ni italanoa—me ivakaraitaki, ena nodra vakayagataka e dua na iyaya me tara kina na waqa se lako voli me vaka na manumanu ni ra vodo tiko ki waqa.

• Ni o veivosakitaka vata na veika baleti Noa, vukei ira mera raica na noda sa kalougata ni dua tiko na parofita ni Kalou nikua. Vukea mera vakasaqaqara na gone ena Mosese 8:16–24 mera kunea na veika a vakatavulica o Noa ka ra se vakatavulica tikoga na parofita ni Turaga edaidai. Eda na vakalougatataki vakacava ni da talairawarawa kina vei ivakavuvuli oqo?

• Era na marautaka beka na luvemu mera droinitaka se rokataka tiko e dua na drodrolagi ni o tukuna tiko na ka e matataka (raica talega na iVakadewa nei Josefa Simici, Nai Vakatekivu 9:21–25 [ena ikuri ni iVola Tabu]). Na cava a vinakata na Kalou me vakasamataka o Noa kei na nona vuvale ena veigauna era raica kina e dua na drodrolagi?

• Vakaraitaka vei ira na gone e dua na ka e nomu ka dau vakananumi iko ena dua na ka bibi ena nomu bula, me vaka e dua na mama ni vakamau, dua na itaba se dua na ivolaniveisiga. Sureti ira na gone mera wasea na nodra dui ivakaraitaki. Oqo ena rawa ni veimuataki ki na dua na veivosaki me baleta na veika e vukei keda meda nanuma tiko na noda veiyalayalati, me vaka na sakaramede, okoya e vukei keda meda dau nanuma na noda veiyalayalati ni papitaiso meda muri Jisu Karisito (raica na Vunau kei na Veiyalayalati 20:75–79).

• E rawa ni lasa mo ni tara e dua na vale cecere mai na buloko se so tale na iyaya vata kei ira na luvemu. Ni o cakava qori, vakamacalataka ni ra nanuma na tamata i Pepeli ni ra rawa ni yaco i lomalagi ena nodra tara e dua na vale cecere. Oti mo ni qai raica vata e dua na iyaloyalo ni iVakabula ka tarogi ira na luvemu se vukei keda vakacava o Koya meda yaco ki lomalagi. Oti mo ni qai veivosakitaka vakayadua me baleta na veika e rawa ni o cakava mo muria kina na iVakabula.

• Me ikuri ni wiliki ni italanoa ni vale cecere mai Pepeli ena Nai Vakatekivu 11:1–9, o iko kei ira na luvemu e rawa ni wilika na Ilamani 6:28. Me vaka e tukuni ena tikina oqo, na cava era tara kina na vale cecere na tamata i Pepeli? Na cava e cala kina na tara na valececere oqo me sala ni yacovi lomalagi? Oti qai vakasaqara ena 2 Nifai 31:20–21 kei na Ilamani 3:28 mo kunea kina na sala dodonu ni yacovi lomalagi. Na ivakasala cava e rawa ni da solia vei ira na tamata e Pepeli?