“26 ni Janueri–1 ni Feperueri. ‘Vakatavulica Raraba Yani na Veika Oqo vei Ira na Luvemu’: Nai Vakatekivu 5; Mosese 6,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
“26 ni Janueri–1 ni Feperueri. ‘Vakatavulica Raraba Yani na Veika Oqo vei Ira na Luvemu’,” Lako Mai, Mo Muri Au: 2026
Vinaka Cake Mai na Parataisi, mai vei Kendal Ray Johnson
26 ni Janueri–1 ni Feperueri: “Vakatavulica Raraba Yani na Veika Oqo vei Ira na Luvemu”
Nai Vakatekivu 5; Mosese 6
E dua na iwase levu ni Nai Vakatekivu 5 e ituvatuva ni itabatamata mai vei Atama kei Ivi ki vei Noa. Eda wilika kina e vuqa na yaca, ia eda sega ni vulica e levu na ka me baleti ira. Eda qai wilika na laini taleitaki ka sega ni vakamacalataki rawa oqo: “Ka rau sa daulako vata kei na Kalou ko Inoki: a sa yali eke; ka ni sa kauti koya tani na Kalou” (Nai Vakatekivu 5:24). Sa dina sara e tiko kina e dua na italanoa! Ia ni sega na ikuri ni ivakamacala, sa tomani tale na ituvatuva ni veitabatamata.
Eda vakavinavinaka, ni vakatakila mai na Mosese 6 na veika matailalai ni italanoa kei Inoki—ka sa dua dina na italanoa. Eda vulica me baleta na yalomalumalumu nei Inoki, na nona lomaleqa, na veika a raica rawa vua na Kalou, kei na cakacaka levu a vakayacora me vaka ni parofita ni Kalou. Eda raica rawa talega e dua na iyaloyalo matata ni matavuvale nei Atama kei Ivi ni sa toso tiko yani ena veitabatamata. Eda wilika me baleta na “lewe vuqa” nei Setani ia me baleti ira talega na itubutubu era vakavulici ira na gone ena “ivakavuvuli kece ni Kalou” (Mosese 6:15, 21). E talei vakalevu cake na veika eda vulica me baleta na ivunau era vakavuvulitaka na itubutubu: na vakabauti Jisu Karisito, veivutuni, papitaiso, kei na ciqoma na Yalo Tabu (raica na Mosese 6:50–52). Na vunau o ya, me vaka na matabete e salavata kaya, “a tu mai na ivakatekivu, ena tu talega ena ivakataotioti kei vuravura” (Mosese 6:7).
Vakasama eso ni Vuli e Vale kei na Lotu
Na ivalavala ca e yalana na noqu rawa ni raica, vakila, ka rogoca na veika ni Kalou.
Ni o vulica na Mosese 6:26–36, na cava o vulica me baleta na revurevu ni ivalavala ca? O sa raica vakacava beka na revurevu eso oqo? Na itovo cava so a tu vei Inoki ka vukei koya me valuta na revurevu oqo? A qai vakalougatataki koya vakacava kina na Kalou?
Na Kalou e kacivi au me’u cakava na Nona cakacaka se mani cava ga na noqu malumalumu.
Kevaka o sa vakadrukai ena veika sa kacivi iko kina na Turaga mo cakava, o sa sega ni tiko duadua. O Inoki sara mada ga a vakakina ni kacivi koya na Turaga me dua na parofita. Ni o wilika na Mosese 6:26–36, vaqara na cava na vuna a vakadrukai kina o Inoki kei na ka a tukuna na Turaga me solia vua na yaloqaqa.
Ena tikina e 37–47, o rawa ni vaqara kina na sala eso a tokoni Inoki kina na Turaga ka vakaukauwataki koya me cakava na Nona cakacaka (raica talega na Mosese 7:13). Ena rawa beka mo vakatauvatana na veika a sotava o Inoki kei na so tale na parofita era a nanuma ni sega ni ganiti ira, me vakataki Mosese (raica na Lako Yani 4:10–16), Jeremaia (raica na Jeremaia 1:4–10), Nifai (raica na 2 Nifai 33:1–4), kei Moronai (raica na Ica 12:23–29). Na cava o nanuma e vinakata na Kalou mo vulica mai na veivolanikalou oqo me baleta na cakacaka sa solia vei iko mo cakava?
Sa Vakatubura na Turaga e Dua na Daurairai (Mosese 6:36), mai vei Eva Timothy
E vuqa na iapositolo kei na parofita ni gauna oqo era sa vakaraitaka na nodra kauwai me vakataki Inoki ni ra a vakamacalataka na lomadra ni ra ciqoma na nodra veikacivi. Me ivakaraitaki, raica na ivakadinadina nei Elder Ulisses Soares ena “Era Vosa na Parofita ena Kaukauwa ni Yalo Tabu” (Liaona, Me 2018, 98–99).
Na cava o rawa ni vulica mai vei ira na parofita kei na iapositolo oqo me baleta na nomu nanuma ni o tawayaga? Na gauna cava o sa bau vakila kina ni vukei iko na iVakabula ena Nona kerei iko mo cakava na veika dredre? Vakasamataka mo vola e vica na ka o na sotava ena veisiga ni mataka ena gauna o na gadreva kina mo vakararavi ki na veivuke ni iVakabula. O na torova yani vakacava na veika yaco oqo ena nomu vakabauti Jisu Karisito?
Raica talega na David A. Bednar, “Ko na Tu vei Au, Kau na tu vei Iko; O Koya mo Lako kina Vata kei Au,” Liaona, Me 2023, 123–25; “Au Lako Ke Ko Ni Lewa,” Sere ni Lotu, naba 164.
A vunautaki mai na ivakatekivu na kosipeli i Jisu Karisito.
Baleta ni tu vei keda na ivola i Mosese, eda kila ni Kalou sa vakavulica tiko vei ira na Luvena na sala mera kunea kina na veivueti me tekivu sara mai vei Atama kei Ivi. Ni o vulica na Mosese 6:48–68, vaqara na cava e dodonu meda kila ka cakava meda vueti kina. Raica na taro nei Atama ena tikina e 53. O sa bau vakasamataka beka oya? Na cava o vulica mai na isaunitaro ni Turaga ena tikina e 53–65? O na rairai nanuma beka na veitikina oqo me itukutuku ni Turaga ena lotu ni papitaiso nei Atama. Na cava o vulica me baleta na papitaiso mai na Nona itukutuku? Na cava o nanuma ni vakatauvatana kina o Koya na papitaiso ki na “sucu tale”? (tikina e 59). Na cava o rawa ni cakava mo tomana tikoga nomu “sucu tale” ena nomu bula taucoko?
Vakaraica na ivakatakilakila. Ena ivolanikalou, na iyaya se veika a yaco e rawa ni matataka se vakatakarakarataka na dina vakayalo, vakabibi na dina me baleta na iVakabula (raica na Veivakavulici ena iVakarau ni iVakabula, 7). Na ivakatakarakara eso oqo e rawa ni vakavutuniyautaka na nomu kilai Koya kei na Nona ivunau. Me ivakaraitaki, na cava o vulica mai na ivakatakarakara ni yalo kei na daliga ena Mosese 6:27, na mata kei na soso ena Mosese 6:35, se na wai ena Mosese 6:59–60?
“Mo dou vakatavulica raraba yani na veika oqo vei ira na nomudou kawa.”
Ni oti na nona vakavulica vei Atama na dina ni kosipeli i Jisu Karisito, ena Mosese 6:51–63, a kaya na Turaga vei Atama me vakavulici ira ki na veitabatamata mai muri. Vakasamataka mo cakava e dua na lisi ni vei dina eso oqo. (Ena rawa ni veivuke me wasei na tikina oqo ki na veitikina lalai eso, me vaka na tikina e 51–52, 53–57, 58–60, 61–63). Na cava e yaga vakalevu sara kina na dina oqo vei ira na itabatamata era tubucake tiko mai nikua? Na cava soti tale o rawa ni vulica mai na ivakaro ni Turaga vei ira na itubutubu ena Mosaia 4:14–15 kei na Vunau kei na Veiyalayalati 68:25–28; 93:40–50?
Nomu wilika me baleta na “ivola ni ivakananumi” eratou a maroroya na matavuvale nei Atama kei Ivi e rawa ni vakauqeta na nomu matavuvale me cakava ga na nomudou ivola ni ivakananumi. Na cava o vakila ni na vinakata beka na Turaga mo okata kina? Vakasamataka mo maroroya na itukutuku mai na nomu ivola ni ivakananumi ena FamilySearch.org.
Raica talega na Dieter F. Uchtdorf, “O Jisu Karisito E Nodra iSakisaki na iTubutubu,” Liaona, Me 2023, 55–59; “Veisusugi: Tara na Yalodra na Noda iTabagone,” “Ia na Cava na Vuna?” (vidio), Valenivola ni Kosipeli.
Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.
Vakasama eso ni Nodra Vakatavulici na Gonelalai
E rawa ni vukei au na Kalou me’u cakava na veika dredre.
-
Ena gauna a kacivi kina o Inoke me vunautaka na kosipeli, a leqataka de na druka. Ia a vukei koya na Kalou. Wilika vata na italanoa oqo ena Mosese 6:26–34 (raica talega na “Inoki na Parofita” ena iTalanoa eso mai na Veiyalayalati Makawa, 19–21). Na cava a nanuma kina o Inoki ni na sega ni rawa ni vunautaka na kosipeli? (raica na Mosese 6:31). A vukei Inoki vakacava na Kalou? (raica na Mosese 6:32–34; 7:13).
-
Era na marautaka beka na luvemu na nodra wasea se vakatasuasuataka eso tale na ivakaraitaki ni nona vukei ira na tamata na Kalou mera cakava na veika dredre—me vaka beka vei, Noa, Tevita, Amoni, se Samuela na Leimanaiti (raica na iVola ni iYaloyalo Vakosipeli, naba 7, 19, 78,81). E rawa talega ni o wasea e dua na ka o sa sotava ka laiva vei ira na luvemu me ra tukuna na sala e vukei ira kina na Kalou me ra cakava na veika dredre.
Na vakabauti Karisito, veivutuni, papitaiso, kei na ciqomi ni Yalo Tabu e vakarautaki au me’u lesu tale vua na Kalou.
-
A vakavulici Atama na Kalou ena ka eda gadreva me cakava meda lesu kina Vua—meda vakabauti Jisu Karisito, veivutuni, papitaisotaki, ka ciqoma na isolisoli ni Yalo Tabu. Vukei ira na luvemu mera kunea na ivakavuvuli oqo ena Mosese 6:52, 57. Oti sa na qai rawa ni o vukei ira mera vola e dua na vosa lekaleka me baleta e dua na ivakavuvuli. Na vosa yadua e rawa ni oka kina e dua na ivolanikalou mai na Mosese 6, e dua na ka sotavi, ka dua na ivakadinadina. Kerei ira mera veiwaseitaka na nodra droini vakai ira.
-
E rawa talega ni o vakaraitaka na iyaloyalo eso e matataka na imatai ni ivakavuvuli ni kosipeli (raica na ikava ni yavu ni vakabauta). Biuti ira ena dua na laini ka mua ki na dua na iyaloyalo kei Jisu Karisito. Ni o wilika na Mosese 6:52, sa rawa vei ira na luvemu mera tucake tikiva na iyaloyalo dodonu ni ra rogoca na vosa e matataka na iyaloyalo oya.
-
Era na marautaka beka na luvemu na lagasere ka vakavulica na ivakavuvuli ena Mosese 6:52, me vaka na “Vakabauta,” “Vaqara Drodrolagi Ni Bula Vesu No,” kei na “Jisu Karisito” (iVolanisere ni Gonelalai, 50, 53, 56). Vukei ira mera kunea na ivakavuvuli eso oqo ena Mosese 6:52.
E vinakati ira na itubutubu na Tamada Vakalomalagi mera vakavulici ira na luvedra.
-
Mo vakayaloqaqataki ira na luvemu mera tokoni ira na nodra itubutubu ena nodra itavi vaka qasenivuli ni kosipeli, vakasamataka mo kerea e dua na gone me wilika na Mosese 6:58 ka raica na ivakaro a solia na Kalou vei ira na itubutubu. Oti o rawa ni qai vakaraitaka e dua na iyaloyalo kei Atama kei Ivi ni rau vakavulici ira tiko na luvedrau (me vakataka na kena ena mua ni ituvatuva oqo) ka laivi ira na luvemu mera veivosakitaka na veika era raica ena iyaloyalo. E rawa ni ra droinitaka na luvemu na iyaloyalo ni nodra matavuvale ni ra wilika vata na ivolanikalou, masu vata, se qito vata.
Me baleta na vakasama tale eso, raica na ilavelave ni mekasini ni iTokani ni vula oqo.