“Vakasama me Nanumi Tiko: Na Veiyalayalati,” Lako Mai, Mo Muri Au—Me Baleta na Vuvale kei na Lotu: Veiyalayalati Makawa 2026 (2026)
“Na Veiyalayalati,” Lako Mai, Mo Muri Au: 2026
Vakasama me Nanumi Tiko
Na Veiyalayalati
Ena Veiyalayalati Makawa taucoko, o na dau wilika wasoma kina na vosa veiyalayalati. Nikua eda dau nanuma ni veiyalayalati e yalayala tabu vua na Kalou, ia ena vuravura makawa, na veiyalayalati sa tiki bibi talega ni nodra veimaliwai vakai ira na tamata. Me baleta na nodra taqomaki kei na nodra bula, era a gadreva na tamata me rawa ni ra veivakabauti vakai ira, ka sa dua na sala me vakadeitaki kina na veivakabauti o ya na veiyalayalati.
O koya gona ni a vosa na Kalou vei Inoki, Noa, Mosese, kei na so tale me baleta na veiyalayalati, a sureti ira tiko me ra bukia na isema ni veivakabauti vata kei Koya. Eda vakatoka na veiyalayalati oqo me veiyalayalati vou ka tawavakaiyalayala se na veiyalayalati vaka-Eparaama—e dua na idusidusi ki na veiyalayalati a cakava na Kalou vei Eparaama kei Sera ka qai vakavoui vata kei ira na nodrau kawa o Aisake kei Jekope (ka vakatokai talega me o Isireli). Ena Veiyalayalati Makawa, a kilai walega me vaka “na veiyalayalati.” O na raica ni Veiyalayalati Makawa e kedra italanoa na tamata era raici ira ni nodra ivotavota vakawa na veiyalayalati oqo—na tamata ni veiyalayalati.
Na Veiyalayalati vaka-Eparaama e se ka bibi tikoga nikua, vakabibi vei ira na Yalododonu Edaidai. Cava na vuna? Baleta ni da sa tamata talega ni veiyalayalati, se da kawa dina i Eparaama, Aisake, kei Jekope se sega. Ena vuku ni ka oqo, sa ka bibi me da kila se cava na Veiyalayalati vaka-Eparaama kei na kena yaga vei keda nikua.
Na Cava na Veiyalayalati vaka-Eparaama?
A vinakata o Eparaama me “dau segata na bula dodonu” (Eparaama 1:2), a mani sureti koya kina na Kalou ki na dua na isema ni veiyalayalati. A sega ni kena imatai o Eparaama me tu vua na gagadre oya, ka sega talega ni kena imatai me ciqoma e dua na veiyalayalati. E a dua, mai na veika kece, na veiyalayalati tawavakaiyalayala. A vakasaqara o Eparaama “na nodra veivakalougatataki na noqu qase” (Eparaama 1:2)—na veivakalougatataki a soli ena veiyalayalati vei Atama kei Ivi qai muria vei ira era segata vagumatua na veivakalougatataki oqo.
Na veiyalayalati ni Kalou vata kei Eparaama a yalataki kina na veivakalougatataki vakasakiti eso: na ivotavota vakawa ni vanua, e dua na kawa levu, ciqoma na cakacaka vakalotu ni matabete, kei na dua na yaca me dau dokai tu ena veitabatamata sa bera mai. Ia na veivakalougatataki oqori a sega ni o koya walega na veivakalougatataki eratou na ciqoma o Eparaama kei na nona matavuvale ia sa baleta talega na veivakalougatataki eratou na kena idewadewa kina vei ira na vo ni luve ni Kalou. “Ko na vu ni veivakalougatataki,” a kaya na Kalou, “ena kalougata talega ena vukumu na veimataqali kecega e vuravura” (Nai Vakatekivu 12:2–3).
A solia beka na veiyalayalati oqo vei Eparaama, Sera, kei ira na nodrau kawa e dua na itutu dokai ena kedra maliwa na luve ni Kalou? Ena vakasama walega ni sa dua na ka dokai me ra vakalougatataki kina o ira na tani. Na kawa i Eparaama me na “kauta kina na nona cakacaka kei na Matabete ki na veivanua kecega,” ni wasea yani “na veivakalougatataki ni Kosipeli, sai koya na veivakalougatataki ni veivakabulai, io na bula tawamudu” (Eparaama 2:9, 11). Ni ra sa tamata ni veiyalayalati ni Kalou e sega ni kena ibalebale ni ra vinaka cake mai vei ira tale eso; ia sa kena ibalebale ni sa nodra itavi me ra vukei ira na tani me ra vinaka cake.
Na veiyalayalati oqo sai koya na veivakalougatataki a gadreva tu o Eparaama. Ni oti nona ciqoma, a kaya ko Eparaama e lomana, “Au sa vakasaqarai kemuni matua sara koi au na nomuni tamata; ia oqo au sa kunei kemuni” (Eparaama 2:12).
Oqori ena vica vata na udolu na yabaki sa oti, ia na veiyalayalati oqo sa vakalesuimai ena noda gauna oqo. Ka sa vakayacori tiko ena gauna oqo ena nodra bula na tamata ni Kalou. Na vakayacori ni veiyalayalati sa totolo cake tiko ena veisiga e muri oqo ni toso tiko na cakacaka ni Kalou, ka vakalougatataka na matavuvale e vuravura raraba. Ka sa rawa vua e dua, me vakataki Eparaama, e vinakata me cecere cake nona daumuria na ivalavala dodonu—e dua e dau vakasaqara vagumatua na Turaga—e rawa ni vakaitavi kina.
Na Cava na Kena iBalebale vei Au na Veiyalayalati vaka-Eparaama?
O iko e dua na gone ni veiyalayalati. O cakava e dua na veiyalayalati kei na Kalou ni o sa papitaiso kei na nomu vakaivotavota ena sakaramede. Ka o ciqoma na taucoko ni veiyalayalati ena cakacaka vakalotu tabu ni valetabu.
Mai na veiyalayalati kei na cakacaka vakalotu oqo, eda sa yaco kina me tamata ni Kalou. Eda sa vauci Vua “ena ivau tawamudu.” “Ni da sa veiyalayalati kei na Kalou,” a vakavulica o Peresitedi Russell M. Nelson, “eda sa biuta kina na vanua tawaveitovaki me tawamudu. Ena sega ni vakanadakuya na Kalou na Nona veiwekani kei ira era bulia na ivau vakaoqo kei Koya. E ka dina, ni o ira kece era sa veiyalayalati kei na Kalou era na rawata e dua na mataqali loloma kei na yalololoma digitaki. … Ena vuku ni noda veiyalayalati kei na Kalou, ena sega vakadua ni oca ena Nona sasaga me vukei keda, ka da na sega vakadua ni vakatikitikitaka na Nona dauvosota vakayalololoma vei keda.” Ko na raica oqo ena kedra itukutuku na tamata ni veiyalayalati ni Kalou ena Veiyalayalati Makawa, ka o na raica ena nomu bula ni o dua vei ira na Luvena ni veiyalayalati.
Kakua ni Rere, mai vei Dan Wilson
Sai koya oqo na kila vakamareqeti e soli wale vei keda ena vuku ni kena sa Vakalesui mai na veiyalayalati vaka-Eparaama mai vua na Parofita o Josefa Simici. O koya ni o wilika na veiyalayalati ena Veiyalayalati Makawa, kakua ni vakasamataka walega na isema ni Kalou vata kei Eparaama, Aisake, kei Jekope. Vakasamataka talega na Nona isema vei iko. Ni o wilika me baleta na yalayala ni kawa e sega ni wiliki rawa, kakua ni nanumi ira ga na milioni vakamilioni era kacivi Eparama tu nikua me tamadra. Vakasamataka talega na yalayala ni Kalou vei iko me baleta na matavuvale tawamudu kei na tubu tawamudu. Ni o wilika me baleta na yalayala ni ivotavota vakawa ni vanua, kakua ni nanuma walega na vanua a yalataki vei Eparaama. Vakasamataka talega na icavacava vakasilesitieli ni vuravura vakaikoya—e dua na ivotavota vakawa ka yalataki vei ira na “yalomalua” ka “waraka na Turaga” (Maciu 5:5; Same 37:9, 11). Ka ni o wilika na yalayala ni ra na vakalougatataka na tamata ni veiyalayalati ni Kalou “na veimataqali kecega e vuravura” (Eparaama 2:11), kakua ni vakasamataka walega na cakacaka vakalotu nei Eparaama se o ira na parofita era a taravi koya sobu mai. Vakasamataka talega na veika e rawa ni o cakava—me vaka e dua na imuri ni veiyalayalati i Jisu Karisito—mo dua na veivakalougatataki ki na veimatavuvale era tu wavoliti iko.