Mosese 7

Ena imatai ni gauna a vulica kina na Parofita o Josefa Simici me baleti Inoki kei na nona Koro Savasava, a vakauqeti o koya. A “kila o koya ni sa yaco mai na siga ena tauyavutaka tale kina na Turaga na Saioni e vuravura” (Yalododonu, 1:108–9), ka tekivuna o koya e dua na sasaga ni bula taucoko me tarai Saioni cake. Na wiliki ni Mosese 7 ena rawa ni vakauqeti iko mo tomana tiko na sasaga oya nikua.

O na rawa beka ni tekivu ena nomu vakadikeva na taro “Na cava o Saioni?” kei na “E duidui vakacava mai na vo ni vuravura?” Vakasamataka mo vola na isaunitaro eso ena yaco mai vei iko ni o vulica na Mosese 7, vakabibi na tikina e 16–21, 27, 53, 62–69.

Na nomu isaunitaro ki na veitaro oqo ena rawa ni vakamatatataka ni se levu tiko ga na cakacaka meda cakava me tarai cake kina o Saioni. Me da cakava li vakacava? Ena rawa ni veivuke mo vakasamataka na gauna eso o vakila kina ni o “yalovata ka duavata ena nomu vakasama” kei na dua tale (Mosese 7:18). De dua ena tabanalevu, matavuvale, se ilawalawa ena vanua ni cakacaka se koronivuli. Na cava era cakava na tamata mera bulia kina na duavata dodonu?

Oqo eso tale na ivurevure e rawa ni o vakadikeva mo kunea kina na vakasama kei na veivakauqeti. Digitaka e dua se sivia mo vulica, ka qai vola na veika o vakila ni o vakauqeti mo cakava mo tarai Saioni cake kina:

• Filipai 2:1–4; 4 Nifai 1:15–18; Vunau kei na Veiyalayalati 97:21; 105:5.

• Ulisses Soares, “Veitacini Tagane kei na Yalewa vei Karisito,” Liaona, Nove. 2023, 70–73.

• D. Todd Christofferson, “Duabau vei Karisito,” Liaona, Me 2023, 77–80.

Na cava na kena ibalebale vei iko me nomu Tui ko Jisu Karisito? Raica mada na icavuti tale eso i Jisu Karisito ena tikina oqo. Na cava beka era vakatavulica vei iko me baleti Koya? Na cava o nanuma ni kena ibalebale me da lako mai “ena matamata ka [kaba] cake mai [Vua]”?

Raica talega na “Bau Mai Na Tui Ni Tui,” Serenilotu, naba. 30.

Eso na tamata era raica na Kalou me vaka e dua na kabula duatani ka sega ni vakila tu na veika e yaco vei keda. A rawata o Inoki e dua na rai duidui me baleta na Kalou ena raivotu e volai ena Mosese 7. Na cava a vulica o koya me baleta na Kalou—kei na cava o vulica—ena tikina e 28–40? Na cava o nanuma ni kurabui kina o Inoki ni raica na Kalou ni tagi? Na cava e bibi kina vei iko mo kila oqori?

Ni toso tiko na raivotu, a tagi tale ga o Inoki. Ia e wasea tale ga vua na Kalou na vuna eso me reki kina. Vakasaqarai ira ena Mosese 7:41–69. Na cava o vulica mai na raivotu nei Inoki ka na rawa ni vukei iko me “tacake na yalomu, ka mo marau,” e dina ga ni “rarawa vakalevu” na nomu bula (tikina e 44)?

Raica talega na Jeffrey R. Holland, “The Grandeur of God,” Liaona, Nove. 2003, 70–73.

Na raivotu nei Inoki, vakabibi na veika e volai ena Mosese 7:59–67, e dua vei ira na imatai ni parofisai ni itukutuku makawa me baleta na iKarua ni Lako Mai ni iVakabula. Na cava e vakauqeti iko me baleta na sala e vakamacalataka kina na veitikina oqo na iotioti ni veisiga? Kena ivakaraitaki, vakasamataka mada na nomu vakila na parofisai mai na tikina e 62 ni sa vakayacori tiko. Na cava e vakavulica vei iko na veimalanivosa oqo me baleta na cakacaka ni Kalou ena iotioti ni gauna?

Raica talega na Henry B. Eyring, “Marama e Saioni,” Liahona, Nove. 2020, 67–69.

• Me vukei ira na luvemu mera vulica me baleti Inoki kei Saioni, sa rawa mo vakayagataka na “Inoki na Parofita” ena iTalanoa eso mai na Veiyalayalati Makawa (19–21) se na ikarua ni qaqani “Vakamuria na Parofita” (iVolanisere ni Gonelalai, 58). Oti qai kerei ira mera vukei iko me tukuna tale na italanoa ena nodra vosa ga. Na iyaloyalo eso kei Inoki ena ituvatuva oqo ena rawa ni veivuke.

• Oqo e dua na sala mo vukei ira kina na luvemu mera kila na ibalebale ni “yalovata ka duavata ena nodra vakasama” (Mosese 7:18): Cakava e dua na uto pepa ka kotiva vakavica, me rauta mera yadua kece na gone. Mera vola na yacadra ena nodra tikina ka cakacaka vata mera biuta vata na uto pepa. Ni ra cakava tiko, veivosakitaka e dua na ka o taleitaka me baleta na gone yadua.

• Kerei ira na gone mera wilika na levu ni gauna e basika kina na vosa “Saioni” ena Mosese 7:18–21, 62–63, 68–69. Ena veigauna kece era kunea kina na vosa, vukei ira mera raica na ka e tukuna na tikina oya me baleti Saioni (raica talega na iDusidusi ki na iVolanikalou, “Saioni,” Valenivola ni Kosipeli). Ena rawa vakacava meda vakai ira vakalevu cake na tamata era tukuni ena veitikina oqo?

• Mo vakamacalataka kina na Mosese 7:32–33 vei ira na luvemu, sa rawa mo veivosakitaka me baleta e dua na digidigi era cakava wale tikoga oqo. Oti qai rawa ni o wilika vata na veitikina mo kila kina na ka e vinakata na Tamada Vakalomalagi meda digitaka. Na digidigi cava e rawa ni da cakava me vakaraitaka ni da sa digitaki Koya? De dua e rawa ni ra veivukevuke na luvemu ena nodra vakatasuasuataka e dua vei ira na digidigi oqo ka ra kilakila na kena vo na cava e matataka tiko.

• Ena Mosese 7:59, a taroga kina vua na Turaga o Inoki e dua na taro. Sureti ira na luvemu mera kunea, ka qai kerei ira mera kunea na kena isau ena tikina e 60. O na rairai veivosakitaka talega kei ira e dua na gauna era a namaka tiko kina e dua me lesu mai vale. Tarogi ira se cava era vakila kei na veika era cakava me ra vakavakarau kina. Eda na vakavakarau vakacava me lesu mai o Jisu?

• Vakaraitaka eso na iyaloyalo ni veigauna a rairai kina na iVakabula vei ira na tamata (vaka na iVola ni iYaloyalo Vakosipeli, naba 60, 82, 83, kei na 84). Na cava era cakava tiko na tamata ena iyaloyalo? Na cava era na vakila beka na tamata ni ra sota kei Jisu? Lagata na sere me baleta na iKarua ni Lako Mai ni iVakabula, me vaka na “Ena Lesu Tale Beka Mai” (iVolanisere ni Gonelalai,, 46), ka tarogi ira na gone se cava era nanuma ni na yaco ni lesu tale mai o Jisu. Me ra wasea na gone na veika era vakila me baleta nodra na raici Jisu ena Nona lesu tale mai.