“19–25 ni Janueri. Na Lutu nei Atama kei Ivi: Nai Vakatekivu 3–4; Mosese 4–5,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
“19–25 ni Janueri. Na Lutu nei Atama kei Ivi,” Lako Mai, Mo Muri Au: 2026
Atama kei Ivi, mai vei Douglas M. Fryer
19–25 ni Janueri: Na Lutu nei Atama kei Ivi
Na iVakatekivu 3–4; Mosese 4–5
Taumada, a vaka beka me dua na leqa levu na italanoa ni Lutu nei Atama kei Ivi. Erau a vakasavi tani mai na Were totoka o Iteni o Atama kei Ivi. Erau a vakatalai ki na dua na vuravura ni mosi, rarawa, kei na mate (raica Nai Vakatekivu 3:16–19). Ka rau a tawasei tani mai vua na Tamadrau Vakalomalagi. Ia na dina a vakalesui mai vua na Parofita o Josefa Simici ena ivola i Mosese e solia vei keda e dua na rai duatani me baleta na Lutu.
Io, e a totoka tu na Were o Iteni. Ia ko Atama kei Ivi erau a gadreva e dua na ka levu cake mai na veika totoka e wavoliti rau tu. Erau a gadreva—ka da gadreva taucoko—e dua na madigi ni tubu. Na biubiu mai na Were o Iteni a imatai ni ikalawa gadrevi me baleta na lesu tale vua na Kalou ka qai yaco me vakataki Koya. Kena ibalebale oya na sotavi ni veisaqasaqa, caka digidigi, caka cala, vulica me veivutuni, kei na vakanuinui vua na iVakabula, o koya e rawa kina ena Nona Veisorovaki na toso ki liu kei na “reki ni noda vueti” (Mosese 5:11). O koya gona ni o wilika na Lutu nei Atama kei Ivi, kakua ni vakanamata ena leqa levu ia ena veika ena rawa—sega ena parataisi sa yali mai vei rau o Atama kei Ivi ia ena lagilagi eda na rawata mai na nodrau digidigi.
Vakasama eso ni Vuli e Vale kei na Lotu
Na iVakatekivu 3; Mosese 4
Na Lutu a dua na tiki bibi ni ituvatuva ni Kalou.
E dina ni a vakavuna na nodrau digidigi o Atama kei Ivi na vuqa na dredre eda sotava ena bula oqo. Ia e sega ni kena ibalebale oqori ni da veivutunitaka na nodrau digidigi. Ni o wilika Na iVakatekivu 3 kei na Mosese 4, o na tarogi iko beka, na cava a bibi kina na Lutu ki na ituvatuva ni Kalou?
Me vaka ena Mosese 5:9–12, na cava erau nanuma o Atama kei Ivi me baleta na Lutu? O na vakayagataka vakacava na nodrau vosa ena veika o sotava ena vuravura lutu oqo? Na cava tale o vulica mai na 2 Nifai 2:19–25?
Raica talega na Mosaia 3:19; Alama 12:21–37; kei na Vunau kei na Veiyalayalati 29:39–43.
Biuti Iteni, mai vei Annie Henrie Nader
Nai Vakatekivu 3:1–7; Mosese 4:22–31; 5:4–15
E solia o Jisu Karisito na inuinui kei na veivueti.
Na italanoa i Atama kei Ivi e dua e baleta na inuinui kei na veivueti mai vei Jisu Karisito. Mo raica na vuna, o na rawa ni tekivu ena nomu vakasaqara na vua ni Lutu e Nai Vakatekivu 3:1–7; Mosese 4:22–31 ka makataka se vola na veika o kunea. E tarai iko vakacava na kena macala eso oqo? O sa na qai rawa ni vakasaqaqara ena Mosese 5:4–15, ka vaqara na ituvatuva ni Kalou me vueti keda mai na veika oqo. Na cava erau a “marau kina” o Atama kei Ivi ni oti na nona sikovi rau na agilosi? Na cava o vulica mai vei rau me baleta na ituvatuva nei Tamada Vakalomalagi?
Raica talega na “Because of Him” (video), Vale niVolavola ni Kosipeli.
Because of Him
Nai Vakatekivu 3:16; Mosese 4:22
Na cava beka na kena ibalebale me “lewai” Ivi o Atama?
Na mala ni ivolanikalou oqo sa dau tauri cala ena vuqa na gauna me kena ibalebale ni donu tu kevaka e dau voravora na itovo ni tagane vua na watina. Ena noda gauna oqo, era sa vakavulica na parofita ni Turaga ni dodonu vei rau na veiwatini me rau raici rau vaka-itokani tautauvata ena nodrau qarava na nodrau itavi vakalou ena matavuvale (raica na “Na Matavuvale: Ai Vakaro ki Vuravura Raraba” [Valenivola ni Kosipeli]). Erau a vakamacalataka o Elder Dale G.Renlund kei Sisita Ruth Lybbert Renlund ni dua na tagane vakawati bula dodonu “ena vakasaqara me veiqaravi; ena vakadinadinataka na cala ka kere veivosoti; ena totolo me veivakacaucautaki; ena dau kauwaitaka na veika era vinakata na lewe ni matavuvale; ena vakila na bibi ni itavi me vakarautaka na veika ni bula ka veitaqomaki ki na nona matavuvale, ena doka ka rokova sara na watina. … E na vakalougatataka na nona matavuvale” (The Melchizedek Priesthood: Understanding the Doctrine, Living the Principles [2018], 23).
Au gadreva na galala ni digidigi kei na veisaqasaqa me’u tubu.
A vakatavulica o Elder Dale G. Renlund, “Na lalawa vakaitubutubu nei Tamada Vakalomalagi e sega ni nodra cakava na Luvena na ka e dodonu; ia mera digitaka na ka dodonu mera cakava ka yaco mera vakataki Koya” (“Mo Ni Digitaki Koya Edaidai,” Liaona, Nove. 2018, 104). Na cava e rui bibi kina ena ituvatuva nei Tamada Vakalomalagi meda digitaka meda cakava na ka dodonu?
Ni o wilika na Mosese 4:1–4, vakasaqara na veika erau a cakava na Tamada Vakalomalagi kei Jisu Karisito me taqomaki kina na nomu dodonu mo digidigi—na nomu galala ni digidigi. O na rawata vakacava na nodrau kaukauwa veitaqomaki? Me baleta na vakasama eso, navuca mo vulica na iwasewase “Vakayaco digidigi e veivakauqeti” ena Me iSakisaki ni iTabagone: iDusidusi ni Vakayaco Digidigi (4–5).
Vakasamataka mo wilika talega na veika a vakavulica o Liai me baleta na galala ni digidigi ena 2 Nifai 2:11–20, 25–30. Na cava e gadrevi kina na veisaqasaqa me baleta na galala ni digidigi? O na vakaraitaka vakacava na nomu vakavinavinaka vei Jisu Karisito ena nomu “galala mo digidigi”? (2 Nifai 2:27).
Raica talega na Dallin H. Oaks, “Veibasai ni Ka Kecega,” Liaona, Me 2016, 114–17; Ulutaga kei na Taro (Topics and Questions), “Agency,” Valenivola ni Kosipeli; “Digitaka na Dodonu,” Sere ni Lotu, naba 142.
Vakalevutaka na vakaitavi. E vuqa na itaviqaravi e rawa ni caka vaka-tamata yadua, vakamatavuvale, vaka-kalasi, vakailawalawa lalai, se mera veisasa. Vakayagataka na veimataqali iwalewale eso mera rawa ni vakaitavi taucoko me kakua kina ni dua e lutu. Me baleta na itaviqaravi oqo, e rawa ni o sureta e dua na tamata se ilawalawa me wilika na Mosese 4 kei na idusidusi Me iSakisaki ni iTabagone ka ra vulica tiko e dua tale na ilawalawa na veitikina ena 2 Nifai 2. Sa na qai rawa ni ra veivakavulici vakai ira ena veika era sa vulica ena nodra dui iwasewase.
E vakasaqara o Setani “me vakaisini ka vakamatabokotaki” au.
Ni o wilika na Mosese 4:4–12; 5:13–33, vakasamataka mo vola na veisala a saga kina o Setani me temaki Atama kei Ivi kei ira na luvedrau. E tovolea vakacava o koya na veika vata oqo nikua? E vukei iko vakacava na Tamada Vakalomalagi mo vorata na veivakaisini nei Setani?
“Koi Au, na Turaga na Kalou … ka vakaisulutaki rau.”
Ni rau sa kania oti na vuanikau vakatabui, rau sa saga o Atama kei Ivi me rau ubia na nodrau luvawale. E muri, a qai lomasoli na Turaga me vakaisulutaki rau. Ni o wilika na Mosese 4:13–16, 27, vakasamataka mada na veika oqo:
-
Vakasamataka vakatitobu na cava e rawa ni matataka na luvaiwale kei na isulu ena ivolanikalou (raica, me ivakaraitaki, Nai Vakatakila 7:9, 13–15; 2 Nifai 9:14; Vunau kei na Veiyalayalati 109:22–26, 76). Na cava o vulica mai na veika erau sotava o Atama kei Ivi ena luvawale kei na isulu?
-
Kevaka o sa vakaedaumeni ena valetabu, vakasamataka mada na ka erau na tukuna vei iko o Atama kei Ivi me baleta na bibi ni nomu qameni ni valetabu kei na ka e matataka.
Raica talega na “Sacred Temple Clothing” (video), Valenivola ni Kosipeli.
Sacred Temple Clothing
Ena ciqoma na Kalou na noqu solibula kevaka au cabora ena yalo e lomasoli ka talairawarawa.
Ni o vulica na Mosese 5:4–9, 16–26, vakasamataka mada na ivakarau ni vakasama i Atama kei Ivi kei rau na luvedrau tagane o Keni kei Epeli me baleta na solibula. Na cava na vuna a ciqoma kina na Turaga na isoro nei Epeli ka sega na nei Keni?
Na cava e kerea vei iko na Turaga mo solibula kina? E tiko beka e dua na ka ena veitikina oqo e vakavuna na ivakarau ni nomu vakasamataka na isoro oqori?
Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.
Vakasama eso ni Nodra Vakatavulici na Gonelalai
Nai Vakatekivu 3; Mosese 4; 5:8–15
O Jisu Karisito e vueti keda mai na Lutu.
-
Me vukei ira na luvemu mera kila vakavinaka cake na Lutu nei Atama kei Ivi, sa rawa mo lavetaka na iyaloyalo mai na “Atama kei Ivi” (ena iTalanoa eso mai na Veiyalayalati Makawa, 13–16) ka kotiva laivi. Oti mo ni qai cakacaka vata me tuvanaki vakavinaka na iyaloyalo eso ni o ni veivosakitaka na veika erau sotava o Atama kei Ivi. Ni o vakayacora oqori, veivosakitaka na vuna e bibi kina, ena ituvatuva nei Tamada Vakalomalagi, me rau biuta na Were o Iteni o Atama kei Ivi.
-
E rawa ni ra vakila na luvemu na vakavinavinaka me baleta na Veisorovaki i Jisu Karisito ni ra kila na sala e ulabaleta kina o Koya na revurevu ni Lutu. Ni o wilika vata na Mosese 4:25; 6:48; Roma 5:12; 2 Nifai 2:22–23, vukei ira na luvemu mera vakasaqara na sala mera vakacavara kina na iyatuvosa oqo: “Ena vuku ni Lutu, au …” Qai, ni o wilika vata na Mosese 5:8–11, 14–15; 6:59; Alama 11:42, e rawa ni ra vakacavara na iyatuvosa oqo: “Ena vuku i Jisu Karisito, au …” Veiwaseitaka vata na nomuni vakavinavinakataki Jisu Karisito.
Au rawa ni digitaka na dodonu.
-
Navuca e dua na lesoni rawarawa me vakaraitaka na ivakavuvuli ni galala ni digidigi: sureti ira na luvemu me ra rokataka na itaviqaravi ena tabana ni macawa oqo, ia solia vei ira e dua ga na roka mera vakayagataka. Na cava ena vinaka cake kina me tiko na digidigi? Oti qai wilika vata na Mosese 4:1–4 ka veivosakitaka na vuna e vinakata kina na Kalou meda digitaka na dodonu mai na cala. E vukei keda vakacava na Tamada Vakalomalagi kei Jisu Karisito meda digidigi vinaka?
-
Vukei ira na luvemu mera vakasamataka ka droinitaka na digidigi vinaka eso e rawa ni ra cakava mera muri Jisu Karisito kina. Se lagata vata e dua na sere ni caka digidigi vinaka, me vaka na “Digitaka na Dodonu” (iVolanisere ni Gonelalai,, 82). Tukuna vei ira na gone me baleta e dua na gauna o vakayacora kina e dua na digidigi vinaka, ka vakamacalataka na veika o vakila ni oti o ya.
Na Lutu, mai vei Robert T. Barrett
Au rawa ni masu vei Tamada Vakalomalagi.
-
Ni rau sa biuta na Were o Iteni o Atama kei Ivi, erau sa sega tale ni qai tiko rawa vata kei na Tamada Vakalomalagi. Wilika na Mosese 5:4, 8 vata kei ira na luvemu, ka vukei ira mera kunea na veika erau a cakava o Atama kei Ivi me rau vakila kina ni rau volekati Koya ka rogoci Koya. Na cava eso na ka eda rawa ni tukuna vua na Tamada Vakalomalagi ena noda masu?
Me baleta na vakasama tale eso, raica na ilavelave ni mekasini ni iTokani ni vula oqo.
Ena iVakatautauvata ni Nona iSoro na Le Duabau ga nei Tamana, mai vei Mike Malm (raica na Mosese 5:5–9)