“5–11 ni Janueri. ‘Oqo na Noqu Cakacaka kei na Noqu Lagilagi’: Mosese 1; Eparaama 3,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)
“5–11 ni Janueri. ‘Oqo na Noqu Cakacaka kei na Noqu Lagilagi’,” Lako Mai, Mo Muri Au: 2026
5–11 ni Janueri: “Oqo na Noqu Cakacaka kei na Noqu Lagilagi”
Mosese 1; Eparama 3
Na iVolatabu e tekivu ena vosa “ena ivakatekivu sa bulia na lomalagi kei vuravura na Kalou” (Nai Vakatekivu 1:1). Ia na cava a tu e kea ni bera “na ivakatekivu” oqo? Ka cava na vuna a bulia kina na Kalou na veika kece oqo? Mai vua na parofita o Josefa Simici, sa veivakararamataki kina na Turaga ena vuku ni taro oqori.
Me kena ivakaraitaki, a solia vei keda na ivolatukutuku ni dua na raivotu a raica kina ko Eparaama na noda a bula tu vakayalo “ni se bera na vuravura” (raica na Eparaama 3:22–28). Sa solia talega vei keda na Turaga e dua na ivakavakadewa veivakauqeti se raicilesu ni imatai ni ono na iwase ni Nai Vakatekivu, ka vakatokai na iVola i Mosese—ka sega ni tekivutaki me “ena ivakatekivu.” Ia, a tekivu ena dua na ka a sotava o Mosese ka lewena na italanoa kilai levu ni Veibuli. O koya sa vanua vinaka me tekivu kina noda vulica na Veiyalayalati Makawa na ivolanikalou ni gauna oqo baleta ni veivosakitaki kina eso na taro bibi ka rawa ni suitu ni noda wilika: O cei na Kalou? O cei o keda? Na cava na cakacaka ni Kalou, kei na cava na noda tikina e kea? Na iwase idola eso ni Nai Vakatekivu e rawa me laurai ni nona sauma na Turaga na kerekere nei Mosese: “Oi kemuni na Kalou mo ni lomana na nomuni tamata, ka tukuna mai vei au na veika e baleta na vurarvura oqo, kei ira na lewena, kei na lomalagi talega” (Mosese 1:36).
Vakasama eso ni Vuli e Vale kei na Lotu
Me vaka ni’u luve ni Kalou, e tiko e dua na noqu icavacava vakalou.
“Kevaka me a vosa vakadodonu vei iko na Turaga,” a vakavulica o Peresitedi Russell M. Nelson, “na imatai ni ka ena vakadeitaka o Koya mo kila sa ikoya na nomu ivakatakilakila dina” (“Choices for Eternity” [lotu e vuravura raraba me baleti ira na itabagone qase cake, Me 2022], Valenivola ni Kosipeli). E tarava ni na saga o Setani me vakasesei iko ena tikina vata ga oya. Vakasaqara na ivakarau oqo ena itukutuku ni Kalou vei Mosese ena Mosese 1:4, 6 kei na itukutuku nei Setani ena Mosese 1:12. Na cava o vulica mai na veitikina oqo me baleta na duidui ni Kalou kei Setani?
A vakavulica talega o Peresitedi Nelson, “Na ivakarau ni nomu vakasamataka se o cei dina o iko ena tara voleka na vakatulewa kece o na cakava” (“Choices for Eternity”). Vakasamataka mo vola e dua na lisi ni digidigi o cakava baleta ni o iko na luve ni Kalou e lako mai ni bera na ivakatakilakila tale eso.
Na ikuri ni tikina se malanivosa cava ena Mosese 1 ena vukei iko mo kila na nomu yaga vakalou? E rawa talega ni o wilika eso tale na itukutuku nei Peresitedi Nelson ena iwasewase ni “Choices for Eternity” ka kena ulutaga “First: Know the truth about who you are.” Na cava o sa vakauqeti kina mo cakava mo kila dina kina na kemu ivakatakilakila bibi duadua ni o luve ni Kalou?
Raica talega na “Au Luve ni Kalou,” Sere ni Lotu (1985), naba 185; “Our True Identity” (vidio), Valenivola ni Kosipeli; Ulutaga kei na Taro (Topics and Questions), “Luve ni Kalou,” Valenivola ni Kosipeli.
Our True Identity
Ena veivuke ni Turaga, au rawa ni vorati Setani.
Me vaka e vakaraitaki vakamatata ena Mosese 1 , na veika kaukauwa vakayalo e sega ni kena ibalebale ni da na sega tale ni temaki. Na ka dina, e dua na iwalewale nei Setani o ya me temaki keda meda vakatitiqataka na veika oqori. Ni o wilika na isaunivosa nei Mosese vei Setani ena tikina e 12–26, na cava o vulica e rawa ni vukei iko mo dinata tikoga na ivakadinadina o sa ciqoma? Na cava a qai vukei Mosese e muri me vakamalumalumutaki Setani?
E dua tale na lesoni mai na veika a sotava o Mosese o ya ni sa dau temaki keda o Setani ena ivadi lasulasu ni dina kei na kaukauwa ni Kalou. Vakasamataka mada eso na ka lasu, me vakataka e dua na kau buli se dua na matakau ni gonelailai. O na kila vakacava ni ra ka lasu? Qai vakasamataka mada na veika lasu e vakayagataka o Setani nikua me temaki iko kina. Na cava o vulica mai na Mosese 1:13–18 me baleta na sala mo kila ka vorata kina na nona lasu? Ena vukei iko vakacava na Turaga? (raica na Mosese 1:24–26).
Raica talega na Maciu 4:1–11; Gary E. Stevenson, “Kakua ni mai Vakatovolei Au,” Liaona, Nove. 2019, 93–96; “Au Luve ni Kalou” (vidio), Valenivola ni Kosipeli
I Am a Son of God
Na vuli e vale e rawa ni tuvanaki ia e rawa talega ni yaco ga ni sega ni vakarautaki “Na madigi ni veivakavulici ena matavuvale e dau yaco wasoma ena veigauna e sega ni vakaiyalayala, ena veisiga—ni kana, caka cakacaka, qito, [se] lako voli” (Veivakavulici ena iVakarau ni iVakabula, 31). Me kena ivakaraitaki, me ikuri ni wiliwili me baleta na nona vorati Setani o Mosese ena Mosese 1, e rawa ni o vakayagataka e vica na gauna ena gauna ni vakayakavi ka veivosaki vakamatavuvale me baleta na nomu vorata na veivakayarayarataki ni meca.
Na cakacaka kei na lagilagi ni Kalou sai koya me vukei au meu rawata na bula tawamudu.
Ni oti nona raica na raivotu ni nona bulika na Kalou, a kerea vua na Turaga o Mosese: “Tukuna vei au na ibalebale ni veika kece oqo” (Mosese 1:30). Na cava e tarai iko me baleta na kena isau mai vua na Turaga ena Mosese 1:31-39? Na cava na kedrau duidui na tawamate rawa kei na bula tawamudu? (raica na Ulutaga kei na Taro (Topics and Questions), “Eternal Life,” Valenivola ni Kosipeli. E veivuke vakacava o Jisu Karisito ena kena vakayacori ruarua oqori? A sotava talega o Eparama e dua na raivotu, ka volai ena Eparaama 3. Na cava beka o kunea ena tikina e 24–26 ka na rawa ni sauma na kerekere nei Mosese?
Au a bula tu vaka yalo ni bera ni’u sucu e vuravura.
E lailai sara na ka eda kila me baleta na noda bula taumada. Ia e vuqa na ka eda kila e lako mai na raivotu nei Eparaama ena Eparaama 3:22–28. Ni ko wilika na veitikina oqo, vola na dina eso o kunea—oka kina na dina me baleti iko kei Jisu Karisito. Na cava e bibi kina vei iko na dina oqo? Na duidui cava e rawa ni vakayacora na kilaka oqo ena nomu bula?
Raica talega na Ulutaga kei na Taro (Topics and Questions), “Premortal Life,” Valenivola ni Kosipeli.
Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.
Vakasama eso ni Nodra Vakatavulici na Gonelalai
Au sa dua na luve ni Kalou.
-
Ni oti na nomu wilika vata na itukutuku ni Kalou vei Mosese ena Mosese 1:4, vakasamataka mo laivi ira na luvemu me ra raica na kedra iyaloyalo ena iloilo ka solia vei ira na itukutuku vata oqori: “Au sa dua na luve ni Kalou.” Sa na qai rawa ni ra solia na itukutuku vata oqori vei ira vakai ira: “O iko e dua na luve ni Kalou.” O na rairai kunea sara mada ga na kedra iyaloyalo eso na tamata ka sureti ira na luvemu me ra dusia yadua ka kaya, “Oqo e dua na luve ni Kalou.” Veiwaseitaka vakai kemudou na vuna o marautaka kina ni o kila ni o ni luve ni Kalou. E veisautaka vakacava na kila oqo na ivakarau ni nomu ivakarau ni bula vakai iko kei ira tale eso?
-
E rawa ni o vakatauvatana kei ira na luvemu na itukutuku ni Kalou vei Mosese ena Mosese 1:4 kei na itukutuku nei Setani ena tikina e 12. O na vukei ira vakacava na luvemu me ra vakaduiduitaka na itukutuku ni Kalou vei ira kei na itukutuku nei Setani?
Sa Raici Jiova o Mosese, mai vei Joseph Brickley (matailalai)
Sa vakarautaka tu na Tamada Vakalomalagi e dua na cakacaka me’u cakava.
-
Ni o wilika vata kei ira na luvemu na Mosese 1:6 , o na rawa ni tukuna vei ira na “cakacaka” a tu vua na Kalou me baleti Mosese. Navuca mo vakayagataka na iVola ni iYaloyalo Vakosipeli, naba 13–16, se iTalanoa ni Veiyalayalati Makawa, tabana e 64–84, me vukei ira na luvemu me ra raica na veika a rawata o Mosese ena veivuke nei Tamada Vakalomalagi. Na cakacaka cava sa tu vua na Kalou meda cakava? (raica, me ivakaraitaki, Vunau kei na Veiyalayalati 11:20).
Au rawa ni vorata na veitemaki nei Setani.
-
Ni o vulica vata kei ira na luvemu na Mosese 1:12–26 , vukei ira mera kila na ka a cakava o Mosese me vorati Setani kina (raica na tikina e 13, 15, 18, 20–22, 26). Ena rairai ka marautaki vei ira mera matanataka na veika era rawa ni cakava mera vorata kina na veitemaki (me vaka na masu, lako tani, se kerea na veivuke).
Au a bula tu vaka yalo ni bera ni’u sucu e vuravura.
-
Na kila me baleta na noda bula taumada e rawa ni vakauqeti ira na luvemu mera cakava na digidigi e yavutaki ena dina tawamudu. Me vukei ira mera vulica, sa rawa mo solia vei ira eso na vosa kei na malanivosa bibi me ra kunea ena Eparaama 3:22–28, me vakataka na “ni bera ni buli na vuravura,” “yalo,” “bulia na vuravura,” kei na “vakatovolei.” Na cava e vakavulica vei keda na veitikina oqo me baleta na vuna e talai keda mai kina ki vuravura na Tamada Vakalomalagi?
-
Na sere me vakataka na “Meu Muria na Nona Lewa” (iVolanisere ni Gonelalai, 86) ena rawa ni vaqaqacotaka na veika e vakavulici ena Eparaama 3 . E rawa ni o sureti ira na gone me ra droinitaka na iyaloyalo eso e lako vata kei na qaqana.
-
Vukei ira na luvemu mera vakasamataka na ituvaki era na digitaka kina se mera cakava se sega na veika sa kerea vei ira na Kalou (raica na Eparaama 3:25; raica talega na Me iSakisaki ni iTabagone: iDusidusi ni Vakayaco Digidigi). Me ra vakatovotovotaka na ivukivuki cava e rawa ni caka ena ituvaki eso oqori. Ena rawa ni vukei keda vakacava na iVakabula ni da sa cakava e dua na digidigi cala?
Me baleta na vakasama tale eso, raica na ilavelave ni mekasini ni iTokani ni vula oqo.