Wiliki na Veiyalayalati Makawa

Se cava ga na bolebole o sotava tiko kei na nomu matavuvale, na kena isau tu ga o Jisu Karisito. Okoya gona mo kunea kina na isau ni taro ena Veiyalayalati Makawa, vakasaqarai Koya. Ena sega ni dau rawarawa tu ga. O na gadreva beka mo vakasamataka vakatitobu ka vakasaqara na veidusimaki vakayalo. Ena so na gauna e vakadodonu sara ni tukuni o Koya, me vaka na parofisai i Aisea, “Ni sa sucu mai e dua na gone me noda, sa soli mai vei keda e dua na gonetagane: … ena vakatokai na yacana … Na Tui ni Sautu” (Aisea 9:6). Ena veivanua tale eso, e tukuni na iVakabula ena sala malumu cake, mai na ivakatakarakara kei na veika e tautauvata—kena ivakaraitaki, mai na ivakamacala ni vakacabo isoro manumanu se na itukutuku kei Josefa ena nona vosoti ira na tuakana ka vakabulai ira mai na dausiga.

Kevaka o vakasaqara na vakabauta cecere baleta na iVakabula ni ko vulica tiko na Veiyalayalati Makawa, ko na kunea vakaidina. Oqo beka ena rawa ni inaki ni nomu vuli ena yabaki oqo. Masuta me tuberi iko na Yalotabu mo kunea ka vakanamata ki na malanivosa, italanoa, kei na parofisai eso ena kauti iko vakavoleka mai vei Jisu Karisito.

Kakua ni namaka me tukuna mai na Veiyalayalati Makawa e dua na itukutuku makawa dodonu vinaka ni kawatamata. E sega ni o koya oqori na ka era a segata tiko me ra cakava na kena dauvolavola kei ira era vakasokumuna. Na nodra kauwai levu me ra vakavulica e dua na ka me baleta na Kalou— me baleta na Nona ituvatuva me baleti ira na Luvena, me baleta na kena ibalebale me ra Nona tamata ni veiyalayalati, ka baleta na iwalewale me kunei kina na veivueti ni da yaco koso. Ena so na gauna era vakayacora vakakina ena nodra vakatautauvatataka ki na veika a yaco ena gauna makawa me vaka na ka era kila, oka kina na italanoa eso mai na nodra bula na veiparofita cecere. Nai Vakatekivu e dua na kena ivakaraitaki, ka vakakina na ivola i Josua, Dauveilewai, kei na 1 kei na 2 ni Tui. Ia eso tale na dauvolavola ena Veiyalayalati Makawa era a sega sara ga ni nakita me ra kelia mai na veika makawa. Ia, era veivakavulici mai na veitaledi eso me vaka na serekali, kei na ivola. Na Same kei na Vosa Vakaibalebale erau oka ena iwasewase oqo. Sa qai tiko na nodra vosa vakamareqeti na veiparofita, mai vei Aisea ki vei Malakai, era a cavuta na vosa ni Kalou vei ira na Isireli ni gauna makawa—ka, ena cakamana ni iVolatabu, era se vosa tikoga vei keda nikua.

Era a kila beka na parofita, dauniserekali, dauvakasokumuni oqo ni ra na wilika na tamata e vuravura taucoko ena udolu vakaudolu na yabaki e muri na nodra vosa? Eda sega ni kila. Ia eda qoroya ni oqo saraga na veika sa yaco. Era tubu ka bale na veimatanitu, era ravuti na veikoro lelevu, era bula ka bale yani na tui, ia e uabaleti ira kece na Veiyalayalati Makawa, mai na itabatamata ki na itabatamata, mai vua na dauvolavola ki vua na dauvolavola, mai na ivakavakadewa ki na ivakavakadewa. E dina sara eso na ka a yali se veisau, ia e vuqa na ka a maroroi rawa ena cakacaka mana.

Oqo e vica ga na ka mo nanuma tiko ni o wilika na Veiyalayalati Makawa ena yabaki oqo. Na Kalou a maroroya tu na veivolavola makawa oqo baleta ni kilai iko kei na veika o lako curuma tiko. A sa vakarautaka tu o Koya e dua na itukutuku vakayalo vei iko ena veimalanivosa oqo, ka me na kauti iko vakavoleka sara ki Vua ka tara cake nomu vakabauta na Nona ituvatuva kei na Luvena Lomani. E rairai ena liutaki iko beka ki na dua na malanivosa se dua na vakasama me na vakalougatataka kina e dua o kila—e dua na itukutuku o rawa ni wasea vua e dua na itokani, lewe ni matavuvale, se itokani Yalododonu. E vuqa sara na ka e rawa ni yaco. E sega beka ni ka taleitaki oya me da vakasamataka?

A kaya o Nifai, “Sa dau taleitaka na yaloqu na ivolanikalou” (2 Nifai 4:15). De dua o na vakila vakakina ni ko wilika e vuqa na vosa vata ga a wilika o Nifai—na ka eda vakatoka ena gauna oqo me Veiyalayalati Makawa.