Nai Vakatekivu 1–2; Mosese 2–3; Eparaama 4–5

E dina ga ni da sega ni kila na veika kece me baleta na ivakarau a buli kina na vuravura, e taleitaki me da raica na veika sa digitaka na Kalou me vakatakila mai me baleta na Veibuli. Na cava e vakavulica vei iko na Kalou me baleta oqo e Nai Vakatekivu 1:1–25; Mosese 2:1–25; kei na Eparaama 4:1–25? Na cava e vinakata kina o Koya mo kila na veika oqo? Ni ko vakasamataka vakatitobu na itukutuku oqo, sa rawa mo vakasamataka talega na veika era vakavulica vei iko me baleta na Tamada Vakalomalagi, Jisu Karisito, na vuravura, kei iko.

Mo vakabulabulataka na nomu vuli, vakasamataka mo wilika na veitikina oqo ni o tiko ena kedra maliwa na ibulibuli ni Kalou se vakarorogo tiko ki na dua na sere me vaka “Na iBulibuli ni Kalou” (Sere ni Lotu, naba 33). E rawa ni o raica na iyaloyalo eso ni Nona ibulibuli ka na vukei iko mo vakarokorokotaka na Dauveibuli. Vakasamataka mo wasea na iyaloyalo oqori, vata kei na nomu ivakadinadina, kivei ira tale eso.

Raica talega na Vunau kei na Veiyalayalati 101:32–34.

Ni ko wilika Nai Vakatekivu 1:26–27; Mosese 2:26–27; kei na Eparaama 4:26–27, vakasamataka vakatitobu na ibalebale ni noda buli ena “ibulibuli” se meda “ucui” koya na Kalou, na tagane kei na yalewa. Na cava e bibi kina vei iko mo kila na dina ena veitikina oqo? Me kena ivakaraitaki, e tara vakacava na nomu raici iko, ira eso tale, kei na Kalou na dina oqo? Era na vukei iko vakacava ni o nanuma na veika ca me baleti iko?

Me vukei iko mo vakasamataka na taro oqo, tovolea mo vakacavara e dua na iyatuvosa vakaoqo: “Baleta ni’u kila ni’u a buli me ucuya na Kalou, au digitaka me …” Na railesuvi ni “Sa ka tabu na yagomu” ena Me iSakisaki ni iTabagone: iDusidusi ni Vakayaco Digidigi (tabana e 22–29) ena rawa ni veivuke. Vakasamataka mo digitaka e dua na ka o na cakava mo vakaraitaka kina vua na Kalou ni o kila ni sa ka tabu na yagomu.

Ena vidio “God’s Greatest Creation” (Valenivola ni Kosipeli), e vakadinadinataka kina o Peresitedi Russell M. Nelson na yago ni tamata e veivakurabuitaki. Ni ko sarava na vidio oqo, tarogi iko, “Na cava e vinakata na Tamada Vakalomalagi me’u vakila me baleta na yagoqu?” E duidui vakacava oqo mai na itukutuku o na rogoca beka mai vei ira na tani?

2:48

Eso na tamata era na kaya beka ni noda buli me ucuya na Kalou e kena ibalebale ni noda vakasama, veika eda vakila, kei na gagadre kece sara era sa vakadonui mai Vua ka sega ni gadrevi (se sega ni rawa) meda vakavinakataka cake. Na cava beka o na kaya ki na ka oqori? Na vakasama cava o rawata mai na Mosaia 3:19 kei na Ica 12:27?

Raica talega na Russell M. Nelson, “Your Body: A Magnificent Gift to Cherish,” Liaona, Okos. 2019, 50–55.

“Erau a semati vata o Atama kei Ivi ena vakamau me baleta na gauna oqo kei na veigauna tawamudu kecega ena lewa ni matabete tawavakaiyalayala” (Russell M. Nelson, “Lessons from Eve,” Ensign, Nove. 1987, 87). Vakasamataka oqo ena nomu wilika Nai Vakatekivu 1:27–28; 2:18–25; Mosese 3:18, 21–25; kei na Eparaama 5:14–19. O na qarava vakacava na vakawati ena veika tabu e solia kina na Kalou?

Raica talega na 1 Korinica 11:11; “Na Matavuvale: Ai Vakaro ki Vuravura Raraba,” Valenivola ni Kosipeli.

Na cava e vakatura Na iVakatekivu 1:28; Mosese 2:28; kei na Eparaama 4:28 me baleta na noda itavi ki na ibulibuli ni Kalou? Na cava e vakuria na Vunau kei na Veiyalayalati 59:16–21 kei na 104:13–18 ki na nomu kila ka?

Raica talega na Gérald Caussé, “Noda iTavi Vakaivakatawa e Vuravura,” Liaona, Nove. 2022, 57–59; (Topics and Questions), “Environmental Stewardship and Conservation,” Valenivola ni Kosipeli.

Na Kalou a vakatabuya na siga ni Vakacecegu, ka kerei keda meda vakatabuya tikoga. Ni ko wilika Na iVakatekivu 2:2–3; Mosese 3:2–3; kei na Eparaama 5:2–3, vakasamataka na ka e “veivakalougatataki” kina vei iko na Siga ni Vakacecegu.

Raica talega na Vunau kei na Veiyalayalati 59:9–13; “The Sabbath Is a Delight” (video), Valenivola ni Kosipeli.

0:50

• O na cakava beka vakacava me ka ni lasa kivei ira na luvemu na vulici ni Veibuli? E rawa ni o ni vaqara vata e tautuba na mataqali veika a caka ena veigauna yadua ni Veibuli. Era na rairai raica talega na luvemu na iyaloyalo ni veika a bulia o Jisu (raica na “Na Buli ni Vuravura” ena iTalanoa eso mai na Veiyalayalati Makawa, 8–12). Oti mo qai veitalanoataka kei ira na luvemu na veika o vakila me baleti Jisu Karisito ni wiliki oti na veika me baleta na Veibuli.

• Navuca mo ni lagata vata e dua na sere me baleta na noda vuravura totoka, vaka na “Rogoca na Sere ni Manumanu” (iVolanisere ni Gonelalai, 16). De dua e rawa ni ra vakuria na luvemu ki na sere eso tale na veika sa bulia na Kalou ka vukei ira mera vakila na Nona loloma.

• Sa rawa vei ira na luvemu me ra tara cake na yalo ni vakarokoroko kei na veidokai ki na yagodra kei ira tale eso ni ra vulica ni da a buli kece me ucuya na Kalou. Me vukei ira mera kila na ibalebale ni ka oqo, sa rawa mo laiva me ra raica na luvemu na kedra iyaloyalo ena iloilo se iyaloyalo ni ko wilika tiko na Mosese 2:26–27 vei ira. E rawa talega ni o vakaraitaka vei ira na nodra dau vakavuqa na luve ni manumanu era “ucuya” na nodra itubutubu (raica na iyaloyalo ena ituvatuva oqo, me kena ivakaraitaki). Oqo ena rawa ni veimuataki ki na dua na veivosaki me baleta na vuna e bibi kina vei iko mo kila ni o a buli mo ucuya na Tamamu Vakalomalagi.

  

• O na rairai taleitaka kei ira na luvemu me droinitaka e dua na yago vakatamata ka kotikotiva na droini vakaiba. Ni ra biuta vata na luvemu na nodra tiki ni droini kotivi, mera qai veivosakitaka na sala eso e rawa ni ra vakaraitaka kina vua na Tamada Vakalomalagi ni ra vakavinavinakataka na yagodra.

• Ni o wilika na Mosese 3:2–3, kerei ira na gone mera vakarogoca na ka ea cakava na Kalou ena ikavitu ni siga. Vukei ira na luvemu mera kunea se droinitaka na iyaloyalo ni veika e rawa ni ra cakava ena Sigatabu mera vakatabuya kina ka me duidui mai na veisiga tale eso. Veiwaseitaka na vuna e bibi kina mo ni vakatabuya na Siga ni Vakacecegu.

• Vukei ira na gone mera vakatasuasua ena so na ivakaraitaki ni ra vakamacalataka tiko vua na nodra itokani na vuna era digitaka kina mera cakava na veika ena Sigatabu e dokai kina na Tamada Vakalomalagi kei Jisu Karisito. Vakatura mera vakayagataka na iVakatekivu 2:2–3 ena nodra ivakamacala. E vakaraitaka vakacava na noda lomana ka doka na Tamada Vakalomalagi kei Jisu Karisito na noda maroroya na siga ni Vakacecegu?