iVakamacala Taumada ni Veiyalayalati Makawa

E dua na sala me kunei kina na kakana vakayalo vutuniyau ena Veiyalayalati Makawa o ya meda vakasaqara na Madrai ni Bula, o Jisu Karisito (raica Joni 6:48). Me ivakaraitaki, o raica vakacava na iVakabula ena veika oqo?

• Mana (Lako Yani 16:4, 11–15; Joni 6:35)

• Na lami ni isoro (Lako Yani 12:3–5; Joni 1:29)

• Na gata parasaTiko Mai na Lekutu 21:4–10; Joni 3:14)

• Jona (Jona 1:4–17; Maciu 12:38–41)

Na cava e vakavulica vei keda na ivakaraitaki eso oqo me baleti Koya? Na idusidusi cava tale eso me baleti Jisu Karisito ena Veiyalayalati Makawa o sa kila tu?

Ena nona itukutuku “O Jisu Karisito na iYau Talei,” e vakayaloqaqataki keda kina o Elder Dale G. Renlund meda “nanuma ka vakanamata tikoga vei Jisu Karisito” (Liaona, Nove. 2023, 98). Vakasamataka mo wilika na nona itukutuku, ka vaqara na veika o rawa ni cakava mo kunei Jisu Karisito sega walega ena Veiyalayalati Makawa ia ena nomu bula talega.

Raica talega na “iVakatautauvata se iVakatakarakara i Karisito” ena iDusidusi ki na iVolanikalou, “Jisu Karisito,” Valenivola ni Kosipeli; “Meu na Vaqara na Turaga,” iVolanisere ni Gonelalai, 67.

A vakavulica o Peresitedi Dallin H. Oaks: “A vakatakila na Tamana na Luvena Duabau sa Vakatubura, o Jisu Karisito, ni sa noda iVakabula ka Dauveivueti ka solia mai na ivakaro meda ‘rogoci Koya.’ Mai na veidusimaki oqo eda tinia kina ni itukutuku vakaivolanikalou ni vosa a tukuna na ‘Kalou’ se na ‘Turaga’ era sa vakadina e veigauna na vosa i Jiova, na noda Turaga sa tucaketale, o Jisu Karisito” (“Na iVakavuvuli i Jisu Karisito,” Liaona, Me 2023, 102).

14:6

Ni ra bolei Jisu na iliuliu ni Jiu me baleta na ivakatakilakila ni Nona bula, a kaya o Koya, “Ni bera ni sucu ko Eparaama, au sa bula.” Era kurabui na tamata era rogoci Jisu ena veivosa oqo, ka ra sa vakarau tu me ra vakaviriki Koya ena vatu (raica na Joni 8:58–59). Vakasamataka mo wilika na Lako Yani 3:13–15; 6:3–5 mo raica na vuna era cudru kina eso na Jiu ena ka a tukuna o Jisu.

Na cava e bibi kina vei iko mo kila ni o Jisu Karisito ga o Jiova?

Ena raivotu, a vakaraitaka kina na Turaga vei Nifai na kena lako mai na iVolatabu, ka vakamacalataka ni “veitikina macala vinaka ka talei” ena kau tani mai kina. Navuca mo wilika na 1 Nifai 13:21–29, 38–42, ka vakaraica na sala a tuvanaka kina na Turaga me “tukuna na veika macala vinaka ka talei.” Me vaka ena 2 Nifai 3:12, e cakacaka vata vakacava na iVolatabu kei na iVola i Momani?

Ni ko vulica na Veiyalayalati Makawa ena yabaki oqo, o na vulica talega eso na “vola tale eso” a raica o Nifai. Oqo e oka kina na:

• Na ivola i Mosese, e tiki ni ivakavakadewa i Josefa Simici ni iVolatabu. E vakalesuya mai na dina kei na itukutuku e sega ni kune ena ivola ena iVakatekivu 1–6.

• Na ivola i Eparaama, ka a vakatakilai vei Josefa Simici ena nona dikeva na papiri ni Ijipita makawa (raica na Topics and Questions, “Book of Abraham,” Valenivola ni Kosipeli).

• Eso na malanivosa mai na iVakadewa nei Josefa Simici, eso vei ira era tiko ena ivakamacala e ra, na ikuri ni iVolatabu, kei na iDusidusi ki na iVolanikalou.

Oqo eso na ivakaraitaki ni itukutuku ni Veiyalayalati Makawa a vakalesui mai vei Josefa Simici: na koro ko Inoki kei Saioni (Mosese 7:18–19), na raivotu nei Eparaama me baleta na matabose mai lomalagi (Eparaama 3:22–28), kei na cakacaka vakalotu i Melikiseteki (iVakadewa nei Josefa Simici, Nai Vakatekivu 14:25–40). Na cava era “veitikina macala vinaka ka talei” kina vei iko na itukutuku eso oqo?

Na Veiyalayalati Makawa sa italanoa ni Kalou ni segata voli me cakava meda Nona “iyau talei” ena veiyalayalati (Lako Yani 19:5). Ena vuku ni ka oqori, e dua na sala vinaka ni vakavakarau meda wilika na Veiyalayalati Makawa o ya meda vulica na veiyalayalati—vakabibi na veiyalayalati tawamudu a solia na Kalou vei ira na parofita ni gauna makawa me vakataki Eparaama, Aisake, Jekope, kei ira na nodra kawa. Kei na dua na sala cecere ni vulici ni veiyalayalati o ya meda vulica na itukutuku nei Peresitedi Russell M. Nelson “Na Veiyalayalati Tawamudu” (Liaona, Okotova 2022, 4–11).

Ni ko wilika, tarogi iko mada: Na cava e bibi kina vei au na veiyalayalati? Na “mataqali loloma uasivi kei na yalololoma digitaki” cava au ciqoma mai vua na Kalou ni’u maroroya na noqu veiyalayalati kei Koya? Ni ko wilika na Veiyalayalati Makawa ena yabaki oqo, mo vakaraica tiko na veika e vinakata na Kalou me vakavulica vei iko me baleta na nomu veimaliwai ni veiyalayalati kei Koya.

Raica talega na Jeremaia 31:31–34.

• Ena rairai dredre vei ira na gone me ra kila na vosa kei na itovo vakavanua ni Veiyalayalati Makawa, ia e rawa ni o vukei ira mera raici Jisu Karisito ena ivakatakarakara kei na italanoa eso. De dua o iko kei ira na luvemu e rawa ni o raica na iyaloyalo e ra, Sa Parofisaitaka Na Parofita o Aisea na Sucu i Karisito. Me ra dusia na luvemu na veika matailalai era raica. Vakabibi vei Jisu na gonelailai. Oti sa na qai rawa ni o wilika vata kei ira na veika a vola o Aisea me baleta na sucu ni iVakabula ena Aisea 7:14; 9:6. Wasea vei ira na luvemu na nomu nanuma me baleta na vakasaqarai ni iVakabula ena Veiyalayalati Makawa ena yabaki oqo.

  

• O iko kei ira na luvemu e rawa talega ni wilika na Same 23 se Aisea 53:3–9 ka raica na vosa e vakananumi iko baleti Jisu Karisito. Na cava e vakavulica vei keda na veivosa oqo me baleta na Nona bula kei na Veisorovaki?

• Na veiyalayalati e dua na ikau levu ena Veiyalayalati Makawa. Me vakamacalataki na ikau oqo vei ira na luvemu, sa rawa mo veivosakitaka vata kei ira na yalayala era cakava ka maroroya vata kei ira na matavuvale se itokani kei na vuna e bibi kina na maroroi ni yalayala oqo. Oti mo qai raica e dua na iyaloyalo ni papitaiso ka veivosakitaka na yalayala, se veiyalayalati, eda cakava vua na Kalou ni da sa papitaiso (raica na Mosaia 18:10, 13). E rawa talega ni o vakaraitaka e dua na iyaloyalo ni valetabu ka wasea na nomu nanuma me baleta na veiyalayalati eda cakava e kea.

• Na tabana ni itaviqaravi ni macawa oqo ena rawa ni vukei ira na luvemu me ra nanamaki me ra cakava ka maroroya na veiyalayalati kei na Tamada Vakalomalagi. E rawa talega ni o lagata e dua na sere me baleta na caka ni veiyalayalati, me vaka na “Vaqara Drodrolagi Ni Bula Vesu No” (iVolanisere ni Gonelalai, 53).

• Era kila beka na luvemu e dua e duidui na yacana ena duidui vanua? De dua e duidui na yaca e kacivi kina e dua na itubutubu se qasenivuli ena vanua ni cakacaka, e vale, kei na lotu. Veivosakitaka na yaca oqori; qai wilika vata na Lako Yani 6:3 ka sureti ira na luvemu me ra raica na yaca a kilai Kina o Jisu Karisito ni bera ni sucu o Koya (raica talega na iVakadewa nei Josefa Simici ena ivakamacala e botonac).