Nai Vakatekivu 37–41

Ena veigauna eso, a vaka e dau biuti Josefa na veika vinaka, ia na Turaga a sega vakadua. Ni o wilika na italanoa kei Josefa, vakasamataka vakatitobu na taro eso vakaoqo: na cava a cakava o Josefa me tiko volekata kina na Turaga? A “tiko vata kei koya” vakacava na Turaga? (raica Nai Vakatekivu 39; 40:1–19; 41:9–45). Na cava o vulica mai na italanoa kei Josefa ka rawa ni vukei iko mo kila ni dau tiko na Turaga ena nomu bula?

De o na taroga talega na mataqali taro vata oya baleta nomu bula. Na ivakadinadina cava o sa raica ni sega ni biuti iko na Turaga ena nomu gauna ni veivakatovolei? Vakasamataka na sala e rawa ni o wasea kina na veika o sotava vata kei ira na lewe ni matavuvale kei ira na itabatamata ni mataka (raica na 1 Nifai 5:14).

E dina sara, ena so tale na nomu veivakatovolei ena veisiga ni mataka. Na cava o rawa ni cakava ena gauna oqo me vukea na kena vakadeitaki ni veivakatovolei oqo e sega ni kauti iko tani mai vua na Turaga? Vakasamataka mo vola e dua na ivola me vakayaloqaqataki iko ena veisiga ni mataka mo volekati Koya tikoga se cava ga. E rawa beka ni o okata na vakasama eso mai na bula nei Josefa se mai na itukutuku nei Elder D. Todd Christofferson “Na Keda iSema ni Veiwekani kei na Kalou” (Liaona, Me 2022, 78–81).

Raica talega na Joni 14:18; Roma 8:28; Alama 36:3; Vunau kei na Veiyalayalati 121:7–8; “Ni Tu Ga Vei Au,” Sere ni Lotu, naba 94.

A tu vei Josefa e dua na isolisoli me kila kina na itukutuku mai vua na Turaga ena tadra. Na cava o rawa ni vulica mai Nai Vakatekivu 37:5–11; 40:5–8; 41:14–25, 37–38 me baleta na kena ciqomi kei na kilai vakavinaka ni ivakatakila mai vua na Turaga? Me ivakaraitaki, na cava o rawa ni vulica mai na ivakaraitaki nei Josefa ena gauna e vaka me dredre toka mo kila na ivakatakila? (raica Nai Vakatekivu 40: 8; 41:16).

Vakasamataka vakatitobu na sala e vakatakila tiko kina vei iko na Lomana na Turaga. Na cava o sa cakava tiko mo cakacakataka kina na ivakatakila sa solia vei iko o Koya? O sa vakasaqara tiko vakacava na ikuri ni veidusimaki mai Vua?

Kevaka me na veivakasalataki o Josefa me baleta na sala me vorati kina na veitemaki ni ivalavala ca ni veiyacovi, na cava o nanuma ni na kaya o koya? Vakasamataka tiko oqo ni o wilika na veika a sotava o koya ena Nai Vakatekivu 39. Kena ivakaraitaki, vakasamataka mada na ka ena cakava o Josefa me baleta na lomaleqa vakaoqo:

• Kevaka e sega ni dua tale e kila na ka au cakava tiko, na cava na kena leqa levu? (raica na tikina e 8–9).

• Au tovolea me’u vorata, ia na veitemaki e vaka me sega ni mudu rawa (raica na tikina e 10).

• Na cava me’u cakava ni’u sa tiko ena dua na ituvaki ka kaukauwa kina na veitemaki? (raica na tikina e 12).

O na vakamacalataka vakacava na vuna e bibi kina na talairawarawa ki na lawa ni tiko savasava? (raica na Me iSakisaki ni iTabagone: iDusidusi ni Vakayaco Digidigi, 23–28).

E dina sara, na ivakaraitaki nei Josefa, e rawa ni vakayagataki ki na veimataqali veitemaki tale eso. Ni o nanuma tiko na ivakaraitaki nei Josefa, vakasamataka mo tuva e dua na ituvatuva ni kena levei kei na vorati ni veitemaki. Me vaka beka oqo, e rawa ni o vakasamataka e dua na veitemaki ka vola na ituvaki mo levea kei na sala mo “dro” kina ni basika mai na veitemaki oqori.

Oqo eso tale na ivolanikalou ka rawa ni tukuna na nomu ituvatuva. Na cava o vulica mai vei ira yadua me baleta na sala e rawa ni vukei iko kina na iVakabula mo vorata na veitemaki? Maciu 4:1–11; 1 Korinica 10:13; 1 Nifai 15:23–24; 3 Nifai 18:17–18.

Ni o cakava na nomu ituvatuva, ena rawa talega ni veivuke mo vakasamataka na veigauna sa oti ni o a levea se vorata rawa kina na veitemaki. A vukei iko vakacava na iVakabula? (raica na 2 Nifai 4:18–33).

Na ivakavakadewa nei Josefa me baleta na tadra nei Fero a vakavuna eso na ivakasala vuku ka yaga sara me baleta na bula mai na dausiga (raica Nai Vakatekivu 41:15–57). Vakasamataka mada na itukutuku vakayalo cava ena rawa ni solia vei iko na Turaga ena itukutuku oqo. Na cava o vakila ni vinakata o Koya mo vakavakarau kina me baleta na veika dredre ena nomu veisiga ni mataka?

Raica talega na David A. Bednar, “Eda na Vakatovolei Ira Mada Kina,” Liaona, Nov. 2020, 8–11.

• Na wiliki ni veika dredre ena matavuvale nei Josefa ena rawa ni vakauqeta e dua na veivosaki me baleta na ivakarau me da qaravi ira kina na lewe ni matavuvale. Mo tukuna kina na italanoa kei Josefa kei iratou na tuakana mai na Nai Vakatekivu 37, sa rawa mo vakayagataka na iyaloyalo ena ituvatuva oqo se ena “Na Tadra Veivakauqeti eso nei Josefa” (ena iTalanoa eso mai na Veiyalayalati Makawa, 47–51). Mera wasea na luvemu na veika matailalai era kila me baleta na italanoa oqori. O na kerei ira beka na luvemu me ra raitayaloyalotaka ni ra a tiko ena matavuvale nei Josefa. Na cava era na tukuna se cakava mera dau veisaututaki kina ena matavuvale? Me ivakaraitaki, na cava na kena ibalebale meda dau “vosa vinaka” ena noda matavuvale? (tikina e 4). E dau veisaututaki vakacava o Jisu Karisito ena matavuvale ni Kalou?

  

  2:17

• Ni ra sotava na luvemu na veigauna dredre, e dodonu mera kila ni na dau tiko vata kei ira na Turaga, me vaka ga a tiko vata kei Josefa. De dua e rawa ni o vukei ira mera vola na veika dredre a yaco vei Josefa (raica Nai Vakatekivu 37:23–28; 39:20; se “Na Tadra Veivakauqeti eso nei Josefa” kei na “Josefa e Ijipita,” ena iTalanoa eso mai na Veiyalayalati Makawa, 47–51, 52–56). Ni ra kunea oti na veika dredre yadua, sureti ira na luvemu mera tokaruataka sara, “A sa tiko kei Josefa na Turaga” (Nai Vakatekivu 39:2).

  

  2:17

  

  2:50

• De dua e rawa ni ra vakasaqara ena Nai Vakatekivu 39:1–3, 20–23 na veigauna kece e laurai kina na malanivosa “A sa tiko kei Josefa na Turaga” kei na malanivosa tautauvata eso. Mera wasea na ka era nanuma e kena ibalebale na malanivosa oqo. Eda kila vakacava ni sa tiko vata kei keda na Turaga? Veivosakitaka vakai kemuni na veika o ni vakila ni a tiko vata kei kemuni na Kalou ena dua na gauna dredre.

• Oqo e dua na lesoni vakaraitaki ka rawa ni vukei ira na luvemu mera muria na ivakaraitaki nei Josefa ena nona dro tani mai vei wati Potifa: Vakayagataka e rua na mekeneta me matataki Jisu Karisito kei Setani. Vakayagataka e dua na iyaya kaukamea lailai, me vaka e dua na kilipi ni pepa, me matataki keda. Mera qai raica na luvemu na kena kaukauwa cake na veivakayarayarataki ni dua na mekeneta ena iyaya kaukamea ni ra tosoya voleka yani kina na iyaya oqori. E vakaraitaka vakacava na veika a sotava o Josefa ena Nai Vakatekivu 39:7–12 na dina oqo? Na cava eda rawa ni cakava meda lako tani kina mai na ivalavala ca ka voleka cake vei Jisu? Na vidio “Temptation Fades as We Seek Christ in Every Thought” (Valenivola ni Kosipeli) kei na dua na sere me vaka na “Au Rai Vei Kemuni” (Sere ni Lotu, naba 51) e rawa ni veivuke ena veivosaki oqo.

  

  2:58

  Vakayagataka na sere/ivakatagi. “Na serenilotu kei na sere tabu tale eso e rawa ni vukei ira na gone mera vakila na loloma ni Kalou, vakila na Yalotabu, ka vulica na dina vakosipeli. Na memela ni vakatagi, itautau, kei na veisotari ni rorogo e rawa ni vukei ira na gone me ra nanuma tiko na dina vakosipeli ena veiyabaki e muri. Ni o lagasere vata kei ira na gone, vukei ira mera raica ka kila na ivakavuvuli e vakavuvulitaki ena sere” (Veivakavulici ena iVakarau ni iVakabula, 32).

• Vukei ira na luvemu mera vakasamataka na veitemaki era na rairai sotava. Mera matanataka na sala me ra “dro” kina mai na veitemaki eso oqori.