Lako Mai, Mo Muri Au
16–22 ni Maji. “Sa Nakita na Vinaka na Kalou”: Nai Vakatekivu 42–50

“16–22 ni Maji. ‘Sa Nakita na Vinaka na Kalou’: Nai Vakatekivu 42–50,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“16–22 ni Maji. ‘Sa Nakita na Vinaka na Kalou’,” Lako Mai, Mo Muri Au: 2026

Vosoti iratou na tuakana o Josefa

Veivosoti, mai vei Megan Rieker

16–22 ni Maji: “Sa Nakita na Vinaka na Kalou”

Nai Vakatekivu 42–50

Sa rauta ni 22 na yabaki mai na gauna eratou a volitaki koya kina na tuakai Josefa me bobula. A sotava o Josefa e levu na veivakatovolei, wili kina na beitaki vakailasu kei na biu i valeniveivesu. Ni qai raici iratou tale na tuakana, sa kovana tu mai Ijipita taucoko ko Josefa, ka ikarua walega yani vua na fero. A rawarawa sara me a sauma lesu na ca vei iratou na tuakana, ni vakasamataki na veika eratou a cakava vei Josefa, ka na rairai ciqomi oqori. Ia a vosoti iratou ko Josefa. Sega ni o koya walega oqori, ia a vukei iratou me raica na inaki vakalou ni nona rarawa. “Sa nakita na vinaka na Kalou” (Nai Vakatekivu 50:20), a tukuna vei iratou, baleta ni a biuti koya e na dua na itutu me vakabula kina “na mataqali kecega i tamana” (Nai Vakatekivu 47:12) mai na dausiga.

Ena vuqa na sala, a vakataki Jisu Karisito kina o Josefa. E dina ga ni a vakavuna na nona vakararawataki vakalevu o Jisu na noda ivalavala ca, e solia tu o Koya na veivosoti, ka vakabulai keda kece mai na dua na icavacava e ca sara mai na dausiga. Se da gadreva meda na ciqoma na veivosoti se solia—ena so na gauna eda gadreva meda cakava ruarua—na ivakaraitaki nei Josefa e dusimaki keda kivua na iVakabula, na ivurevure dina ni veivakabulai kei na veivakaduavatataki.

ivakatakilakila ni vuli

Vakasama eso ni Vuli e Vale kei na Lotu

Nai Vakatekivu 45:5–7; 47:12

“A sa talai au na Kalou me’u liutaki kemudou me maroroi kemudou.”

O sa bau raica beka e dua na ka e tautauvata kina na bula nei Josefa kei na ilesilesi ni veisorovaki i Jisu Karisito? Mo raica eso na ivakaraitaki ni ka tautauvata oqo, tovolea mo vakatauvatana:

  • Nai Vakatekivu 37:3 vata kei na Maciu 3:17.

  • Nai Vakatekivu 37:26–28 kei na Maciu 26:14–16.

  • Nai Vakatekivu 45:5–7 kei na Luke 4:18.

  • Nai Vakatekivu 47:12 kei na Joni 6:35.

Na vakasama se vakanananu cava e votu vei iko me baleta na iVakabula kei na Nona ilesilesi ni o wilika na veitikina oqo?

Nai Vakatekivu 45; 50:15–21

ivakatakilakila ni semineri
Na veivosoti e kauta mai na veivakabulai.

Ni o wilika me baleti Josefa ena nona vosoti iratou na tuakana ena veika vakaloloma eratou cakava vua ena rawa ni uqeti iko mo vakasamataka e dua o sasagataka tiko ena gauna oqo mo vosota. Na taro eso oqo ena rawa ni veivuke ni o sasagataka mo bulataka na ivakavuvuli oqo:

  • Na cava e rairai dredre kina vei Josefa me vosoti iratou na tuakana? (me railesuvi na veika eratou a cakava vua, raica Nai Vakatekivu 37). Na veika cava a sotavi se na ivakarau ni bula cava a rairai solia vei Josefa na kaukauwa me veivosoti kina? (raica, me kena ivakaraitaki, Nai Vakatekivu 45:1–15 se 50:15–21).

  • Na veivakalougatataki cava a lako mai ena veivosoti nei Josefa vei iratou na tuakana? Me kena ivakaraitaki, vakatauvatana na veimaliwai ena matavuvale nei Jekope ena itekivu ni italanoa (raica, me ivakaraitaki, Nai Vakatekivu 37:3–11) kei na veimaliwai ena kena itinitini (raica Nai Vakatekivu 45:9–15; 50:15–21). A rairai rawa ni duatani vakacava na veika a yaco kevaka a sega ni lomai Josefa me veivosoti?

  • Vakasamataka mo vola na yacana e dua e gadreva beka na nomu veivosoti—se ra kerea se sega na veivosoti. Na cava o rawa ni cakava mo sureta kina na kaukauwa ni veivakabulai ni iVakabula ki na ituvaki o ya? Kevaka e vaka me rui dredre na veivosoti, vakasamataka mo railesuva na ivakasala nei Elder Gerrit W. Gong ena iotioti ni ono na parakaravu ni nona itukutuku “Marau ka Tawamudu” (Liaona, Nove. 2022, 85). Na cava o raica e solia vei iko na inuinui mo rawa ni veivosoti kina?

Raica talega na Vunau kei na Veiyalayalati 64:9–11; “Forgiveness: My Burden Was Made Light” (vidio), Valenivola ni Kosipeli.

8:27

Forgiveness: My Burden Was Made Light

Nai Vakatekivu 49

A solia o Jekope na veivakalougatataki vakaparofita ki na nona matavuvale.

Na veivakalougatataki nei Jekope vei ira na nona kawa e tiko kina na ivakatakarakara matata sara, ia e sega ni rawarawa na kena kilai. Ena vakavinavinaka, e solia vei keda na kosipeli sa vakalesui mai eso na veivuke. Ni o wilika na veivakalougatataki vei Josefa ena Nai Vakatekivu 49:22–26, wilika talega na veitikina oqo, ka raica na vakasama eso e votu mai kina: 1 Nifai 15:12; 2 Nifai 3:4–5; Jekope 2:25; Vunau kei na Veiyalayalati 50:44.

Ni o wilika na veivakalougatataki nei Juta ena Nai Vakatekivu 49:8–12, nanuma tiko ni o Jisu Karisito e a kawa i Juta. Na cava o raica ena veitikina oqo ka vakananuma vei iko na iVakabula? (raica talega Nai Vakatakila 5:5–6, 9; 1 Nifai 15:14–15; Vunau kei na Veiyalayalati 45:59; 133:46–50).

Na wiliki ni veivakalougatataki oqo ena vakauqeti iko mo railesuva na nomu veivakalougatataki vakapeteriaki—se, kevaka e sega vei iko, mo ciqoma e dua. Na vosa kei na malanivosa cava ena nomu veivakalougatataki ena vagolea na nomu vakasama vei Jisu Karisito?

Raica talega na Randall K. Bennett, “Nomu Veivakalougatataki Vakapeteriaki—iDusidusi Veivakauqeti mai vei Tamada Vakalomalagi,” Liaona, Me 2023, 42–44.

Nai Vakatekivu 50:19–21

Na Kalou e rawa ni vukei au me kunea na ibalebale ni noqu vakatovolei.

E dina ga ni a sega beka ni matata sara nona sa lako curuma tiko na nona veivakatovolei, e muri a qai rawa vei Josefa me raicalesu na nona veika dredre mai Ijipita ka raica ni “Sa nakita na vinaka na Kalou” (Nai Vakatekivu 50:20). Kevaka beka mo a rawa ni sikovi Josefa ena gauna a tiko kina ena loma ni qara se ena valeniveivesu, o na vakacegui koya beka vakacava? Ena vukei iko vakacava na Nai Vakatekivu 50:19–21 ena nomu gauna ni veivakatovolei?

Raica talega na Vunau kei na Veiyalayalati 122; “Na Yavu Tudei,” Sere ni Lotu, naba 43.

Raivotutaka o Josefa mai Ijipita ni ciqoma o Josefa Simici na peleti koula mai vua na agilosi o Moronai

Josefa Simici ena kedra maliwa na Parofita, mai vei Paul Mann (matailalai)

Nai Vakatekivu 50:24–25

“Ena vakatubura na Turaga na noqu Kalou e dua na daurairai.”

Ni o wilika Nai Vakatekivu 50:24–25 kei na iVakadewa nei Josefa Simici, Nai Vakatekivu 50:24–38 (ena ikuri ni iVolatabu), vakasamataka vakatitobu na vuna ena bibi kina vei Josefa me kilai Mosese kei Josefa Simici ena vuqa na senitiuri yani ki liu. A vakayacora vakacava o Josefa Simici na parofisai nei Josefa me baleti koya? (raica na Vunau kei na Veiyalayalati 1:17–23; 20:7–12; 39:11; 135:3).

Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.

ivakatakilakila 01 ni iwasewase ni gone

Vakasama eso ni Nodra Vakatavulici na Gonelalai

Nai Vakatekivu 42–44; 45:4–15

Au rawa ni vakaraitaka na loloma kei na veivosoti ki na noqu matavuvale.

  • Ena rairai marautaki beka vei ira na luvemu mera vakatasuasuataka na italanoa kei Josefa ni sa duavata tale kei na nona matavuvale (raica Nai Vakatekivu 42–44). Se rawa ni ra vakayagataka na “Josefa kei na Dausiga” (ena iTalanoa eso mai na Veiyalayalati Makawa, 57–60) se na iyaloyalo ena ituvatuva oqo mo ni vakavulica kina vakai kemuni na italanoa oqo. Oqo eso na taro ena rawa ni vukei ira na luvemu mera vuli mai na italanoa:

    • Na cava a cakava o Josefa me vakaraitaka kina na loloma ki na nona matavuvale? (raica Nai Vakatekivu 45:4–15).

    • Na cava o nanuma ni a vosoti iratou kina na tuakana o Josefa?

    • Na cava o nanuma ni ratou a vakila na tuakai Josefa ni ratou sa kila ni sa vosoti iratou o Josefa? O cei ena nomu bula e gadrevi me vosoti? O rawa vakacava ni vakaraitaka na loloma kei na veivosoti?

    2:26

    Joseph and the Famine

Ni o vakavakarau mo veivakavulici, taroga mada, “Na cava era na cakava na luvequ me ra vuli kina?” Me kena ivakaraitaki, ena itaviqaravi oqo era vakatasuasuataka tiko se tukuna tale tiko na luvemu e dua na italanoa. Ni ra cakava oqo ena vukei ira mera nanuma ruarua na veika a yaco kei na ivakavuvuli ni kosipeli e tiko ena italanoa.

  • O na via wasea beka se o ira na luvemu e dua na ka era sotava ena nodra vosota e dua se ni a vosoti ira e dua. Sa qai rawa ni o lagata e dua na sere me vaka na “Dou Veilomani” (iVolanisere ni Gonelalai, 74) se “Ni Vukei Au Mai Noqu Kalou” (iVolanisere ni Gonelalai, 52).

Nai Vakatekivu 48:8–9

E dau vukei au na Turaga ena veivakalougatataki ni matabete.

  • O iko kei ira na luvemu e rawa ni raica na iyaloyalo kei Jekope ni vakalougatataki iratou na luvena tagane ena mua ni ituvatuva oqo ka veivosakitaka na veika e yaco tiko (raica Nai Vakatekivu 48:8–9). Kevaka e gadrevi, vakamacalataka ni a vinakata o Jekope, na tamai Josefa, me solia na veivakalougatataki ni matabete ki na nona matavuvale. De dua e rawa ni o wasea vakai kemuni na veika o ni sa sotava ena nomuni ciqoma na veivuke mai vua na Kalou ena dua na veivakalougatataki ni matabete. Na cava eso na vuna eda na kerea kina e dua na veivakalougatataki ni matabete?

ciqoma tiko na veivakalougatataki e dua na goneyalewa lailai

Nai Vakatekivu 45:5–11

A talai Jisu Karisito mai na Tamada Vakalomalagi me vakabulai au.

  • O na vukei ira vakacava na luvemu mera raica na iVakabula ena italanoa kei Josefa ena nona vakabula na nona matavuvale mai na dausiga? Vakasamataka mo cakava e dua na ivolakabi ka rua na kolomu ka vakatokai o Josefa kei Jisu Karisito. Vukei ira na luvemu mera vakasaqara ena ivolanikalou veisasa oqo ka vola ena papa na veika erau tautauvata kina o Joseph kei Jisu: Nai Vakatekivu 37:3 kei na Maciu 3:17; Nai Vakatekivu 37:26–28 kei na Maciu 26:14–16; Nai Vakatekivu 45:5–7 kei na Luke 4:18; kei Nai Vakatekivu 47:12 kei na Joni 6:35.

  • Tarogi ira na luvemu na cava e kena ibalebale mera vakabula se vueta e dua. Kevaka e dua vei ira sa vakabulai se vueti oti mai na ka rerevaki, sureta me mai wasea. A vakabulai iratou vakacava na tuakana ko Josefa? (raica Nai Vakatekivu 42:1–3; 45:5–7). Oti mo qai raica vata e dua na iyaloyalo ni iVakabula ka kerei ira na luvemu me ra tukuna na sala e vakabulai keda kina o Jisu.

Me baleta na vakasama tale eso, raica na ilavelave ni mekasini ni iTokani ni vula oqo.

Solia o Isireli e dua na veivakalougatataki ni matabete vua na luvena tagane

Vakalougatataki Josefa o Jekope (Vakalougatataki iratou na Luvena o Jekope), mai vei Harry Anderson

tabana ni itaviqaravi ni Lalai: Au rawa ni veivosoti