Nai Vakatekivu 24–33

Ni o wilika tiko na Nai Vakatekivu 24, tarogi iko se cava a nanuma kina o Eparama ni sa ka bibi sara na vakawati nei luvena o Aisake. Na cava e bibi kina na vakamau vua na Kalou?

Na itovo cava o raica vei Repeka ena rawa ni cau ki na dua na vakawati kei na matavuvale kaukauwa? (raica vakabibi na tikina e 15–28, 57–61).

Raica talega na Veiulutaga kei na Veitaro (Topics and Questions), “Marriage,” Valenivola ni Kosipeli.

Ena itovo vakavanua nei Aisake kei Repeka, a ciqoma kina na luvena tagane qase duadua na itutu vaka ulumatua, ka kena ibalebale e dua na ivotavota vakawa levu cake, vata kei na itavi cecere cake ni kena qaravi na matavuvale. Ni o wilika Nai Vakatekivu 25:29–34, vakasamataka na vuna a rawa ni solia kina o Iso na nona itutu vaka ulumatua me isau ni kana. Na lesoni cava soti o kunea e baleti iko ena tikina oqo? Ena rawa ni veivuke mo cakava e rua na lisi: (1) na veivakalougatataki tawamudu e vinakata na Kalou me solia vei iko kei na (2) na veika vakavuravura ka na rawa ni vagolei iko tani. Oti mo qai wilika na malanivosa, ka sosomitaka na “itutu ni ulumatua” kei na dua na ka mai na imatai ni lisi kei na “rourou” kei na dua na ka mai na ikarua ni lisi. O na vakanamata vakacava kivua na iVakabula kei na veivakalougatataki tawamudu ni Nona kosipeli?

Raica talega na Maciu 6:19–33; M. Russell Ballard, “Nanuma Tiko na Ka e Bibi Duadua,” Liaona, Me 2023, 105–7.

Ni moce koto ena dua na ilokoloko vatu, a yacovi Jekope e dua na tadra veisautaki-bula. A dua dina na ka sotavi tabu ka vakatoka kina o Jekope na vanua oya me o Peceli, se “vale ni Kalou,” ka kaya, “Sa tiko vakaidina ko Jiova ena yasana oqo” (Nai Vakatekivu 28:16).

Ni o wilika Nai Vakatekivu 28, o na rairai tarogi iko beka se cava a rui ka vakalou kina vei Jekope na ka sotavi oqo. Na cava a lako curuma tiko o koya ena gauna oya? Na cava beka a rairai vakila voli o koya? E rawa talega ni o vaqara na vosa kei na malanivosa eso ena tikina e 10–22 ka vakananuma vei iko na vale ni Turaga. Na veivakauqeti cava o ciqoma me baleta na Kalou, Nona vale, kei na Nona veiyalayalati?

Ena mua ni ituvatuva oqo e tiko kina e dua na droini ka vakaraitaka na tadra nei Jekope; o na rairai raica yani ni o wiliwili tiko. Kevaka mo bulia na nomu droini ga ni nona tadra, na cava beka o na cakava? Na dina cava mai na italanoa o na saga mo vakatakarakarataka?

Na sere ni lotu “Au Toro Yani Tu” (Sere ni Lotu,, naba 53) e yavutaki ena veika a sotava o Jekope. Na isema cava so o raica ena sere oqo kei Nai Vakatekivu 28:10–22? E vukei iko vakacava na valetabu mo vakila ni o voleka cake vua na Kalou? Vakasamataka mo vaqara na isau ni taro oqo ena itukutuku nei Peresitedi Russell M. Nelson “Na Valetabu kei na Nomu Yavu Vakayalo” (Liaona, Nove. 2021, 93–96). O na rairai gadreva talega mo railesuva na veiyalayalati kei na veivakalougatataki ni vale ni Turaga ena iVoladusidusi Raraba, 27.2 (Valenivola ni Kosipeli). E kauta mai vakacava na kaukauwa ni Kalou ki na nomu bula na maroroi ni veiyalayalati oqo?

Ni o wilika Nai Vakatekivu 29:31–35 kei na 30:1–24, vakaraica na vosa eso e vakamacalataka na loloma veivueti ni Kalou vei Rejieli kei Lia. Vakasamataka vakatitobu na sala sa “kunea dina … na [noqu] rarawa” ka “nanumi” iko kina na Kalou (Nai Vakatekivu 29:32; 30:22).

Ni lesu ki Kenani o Jekope, a “sa rere vakalevu … , a sa kidroa” me baleta na ivakarau ena ciqomi koya kina o Iso (Nai Vakatekivu 32:7). Ni o wilika Nai Vakatekivu 32–33, vakasamataka vakatitobu na nomu veimaliwai vakamatavuvale—vakabibi e dua beka e gadrevi kina na veivakabulai. De rawa ni vakauqeti iko na italanoa oqo mo dolele yani vua e dua. Na veitaro vaqo e rawa ni dusimaka nomu wiliwili:

• A vakarautaki koya vakacava o Jekope me sotavi Iso?

• Na cava e laurai votu vei iko me baleta na masu nei Jekope e kunei e Nai Vakatekivu 32:9–12?

• Na cava o vulica me baleta na veivutuni mai na ivakaraitaki nei Iso?

• Ena vukei keda vakacava na iVakabula me da vakabula na veimaliwai vakamatavuvale?

• Me vakamatatataki na ivakaraitaki vakasakiti ni yalovinaka i Repeka, sa rawa mo vakaraitaka vei ira na luvemu na iyaloyalo e ra se tabana ni itaviqaravi ni macawa oqo ni o vakalekalekataka na italanoa ena Nai Vakatekivu 24:10–21. Era na marautaka beka na luvemu mera matanataka na italanoa. Oqo ena rawa ni muataki iko ki na dua na veivosaki me baleta na cakacaka ni yalovinaka o sa raica kei ira na luvemu.

• Lagata vata e dua na sere me baleta na yalovinaka, me vaka na “Me Tekivu Vei Au” (iVolanisere ni Gonelalai,, 83). Mera vakarogoca na luvemu na vosa “yalovinaka” (se dua na vosa e tautauvata) ka tucake ni ra rogoca. Eda na yalovinaka beka vakacava me vakataki Repeka?

• Navuca mo vakayagataka na “Jekope kei Iso” (ena iTalanoa eso mai na Veiyalayalati Makawa, 38–41) me vukei ira na luvemu me ra kila vakavinaka na italanoa e Nai Vakatekivu 25:21–34. De dua era rawa ni raitayaloyalotaka na luvemu ni a kerea o Iso na nodra ivakasala se me veisautaka na nona itutu vaka ulumatua kei na kakana. Na cava beka era na kaya vua?

  

  2:5

• Na veika cava so e bibi tawamudu vei iko kei ira na luvemu? De dua e rawa ni ra kunea na luvemu na iyaloyalo se iyaya e matataka na veika oqo. Eda na vakaraitaka vakacava vua na Turaga ni sa ka bibi vei keda na veika oqo?

• Ni o wilika vata na Na iVakatekivu 28:10–22 e rawa ni o vakayagataka e dua na ikabakaba (se dua na iyaloyalo me vakataka na kena ena mua ni ituvatuva oqo) mo veivosakitaka kina na sala e vaka kina e dua na ikabakaba na noda veiyalayalati. E rawa ni ra matanataka na luvemu ni ra cabe ikabakaba tiko, ka ena vei ikalawa, veivosakitaka me baleta na gauna eda yalataka meda talairawarawa vua na Kalou, me vaka ni da papitaiso, vakayagataka na sakaramede, se lako ki na valetabu. Ena kauti keda voleka vakacava vua na Kalou na noda veiyalayalati?

• Me vakamacalataki taumada na veitikina oqo, o na rairai tukuna ni oti e vica vata na yabaki ni yalo dredre, sa na qai mai sotavi Iso tale o Jekope. Wilika vata Nai Vakatekivu 32:6–11. Na cava a vakila o Jekope? Na cava a cakava o koya me vukei kina? Wilika vata Nai Vakatekivu 33:1–4 mo raica na sala a sauma kina na Turaga na masu nei Jekope. Kevaka e rawa ni rau vosa vei keda nikua o Jekope kei Iso, na cava beka e rau na kaya me vukei keda ni yaco na veileti ena noda matavuvale?